سيراتو اتسرقت و صاحبها راح سرقها من الحرامي !!!-واقعة حقيقية

[MITSUKERO]

السلام عليكم

طبعا العنوان تقريبا شرح اللي حصل بس شوية تتفاصيل

واحد صاحبي معاه سيراتو و النترا المهم راح محافظة مش هينفع اقول اسمها حفاظا علي صاحبي مش اكتر بالسيراتو ركن العربية الساعة 6 الصبح و طلع نزل علي صلاة الجمعة مش لاقي العربية !!!

المهم راح القسم يعمل محضر رفضوا و قالولوا احنا مالنا روح دور علي عربيتك !!!!

كلم محامي من هناك معرفه المحامي جه طلع يعرف امين الشرطة فأمين الشرطة قاله ياعم انزل المنطقة الفلانية و شوف فلان و فلان و فلان هتلاقي العربية عند واحد منهم !!!!!!!!!!!!!!!!!!!!!!!

المحامي طلع عارف واحد من الحرامية دول فكلمة قاله العربية مش عندي بس هشوف

كلمة بعديها بكام ساعة قاله اه لقيتها و عايزين 40 الف !!!!!!!!!!!!!!!!!!!!!!!!!

المهم قال مبدهاش بقي نزل الفجر تاني يوم فضل يلف علي العربية و مش لاقيها في الاخر روح لقي واحد بيكلمة بيقولة شوفت عربيتك في شارع (...........) !!! الشارع ده اللي المنطقة علي اسمة و كله حرامية

نزل تاني و فضل يلف بالريموت و يجرب يجرب لقاها متغطية في شارع سد

شال الغطاء لقي العربية ولا ازاز مكسور بقي ولا اي حاجة فتح العربية لقي الكونتاكت مكسور و مدلدل و الفبرة اللي تحته مكسورة فمعرفشي يدور العربية !!!!!!!!!!!!!!!

راح جاب عربيته التانية و جاب حبل و شدها (كل ده تحت بيت الحرامي الساعة 6 الصبح ) المهم شدها لحد البيت و فضل يدور فيها و يجرب السلوك لحد ما دارت و جري علي القاهرة

الحرامية بقي بيسرقوا العربية ازاي ؟

ببساطة ولا كسروا ازاز ولا اي حاجة فكوا الكرتيرة الشمال --> جابوا السلوك بتاعة السنتر اللي في الخرطوم البلاستيك اللي واصل بين الباب و الضفيرة الامامية و لمسوهم بطريقة معينه و فتحوا العربية !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!

الكارتيرة صاحب لاقاها في الشنطة و لقي السلوك متقشرة ناحية الباب الشمال

الحرامي بقي ميعرفشي ان صاحبي سرقها فبيكلمة لحد دلوقتي يساوم علي الفلوس عشان يتأكد هل صاحبي اللي اخدها ولا صبي من عنده

الطريقة اللي العربية اتسرقت بيها بالظبط :

فتح العربية من سلوك السنتر اللي تحت الرفرف الشمال --> كسر لوك الدركسيون اللي في الكونتاكت --> قطع الحزام الشمال --> جر العربية بعيد عن البيت --> كسر الكونتاكت و لمس السلوك و العربية متغطية --> و سرق العربية بمنتهي البساطة

العربية فيها مفتاح فصل و عرفوا يوصلوا له لانهم شغالين علي رواقة بقي ما العربية متغطية و بعيد عن البيت !!!!!!!!!!!!!!!!

حسبي الله و نعم الوكيل في كل ظابط مقصر في عمله

الاغرب ان رئيس المباحث بعت صاحبي ل الظابط اللي ماسك مكافحة سرقة السيارات ولا عمل حاجة و هو عارفهم بالأسم

التكلفة :

كونتاكت جديد بكوالين الابواب و الشنطة --> 1300
دراع مساحات --> 350 (لقاه عند سوسو ب 450) من التوكيل
فبرة اسفل الكونتاكت --> 200 من التوكيل
حزام امان --> 1300 من التوكيل و 950 من سوسو لسه مشتراهوش

خلوا بالكم بقي

[mhf_77]

قدر الله وما شاء فعل وقضا اخف من قضا
انما لو سمحت ليا استفسار
ازاى جرها بعيد وهى مطفيه ؟؟مش العربيه وهى على ال p مبتجبش على ال n غير لما تدور؟؟ولا ممكن تتجر وهى على ال p؟؟ ولا ممكن تجيب ال n والعربيه طافيه؟؟
هى عربية صاحبك فيها ايمبوليزر؟؟
ولو كان فيها ينفع تتسرق بنفس الطريقه دى ولا العربيه مش هتدور اصلا غير بمفتاحها الاصلى؟؟

[MITSUKERO]

قدر الله وما شاء فعل وقضا اخف من قضا
انما لو سمحت ليا استفسار
ازاى جرها بعيد وهى مطفيه ؟؟مش العربيه وهى على ال p مبتجبش على ال n غير لما تدور؟؟ولا ممكن تتجر وهى على ال p؟؟ ولا ممكن تجيب ال n والعربيه طافيه؟؟
هى عربية صاحبك فيها ايمبوليزر؟؟
ولو كان فيها ينفع تتسرق بنفس الطريقه دى ولا العربيه مش هتدور اصلا؟؟

انا سألت صاحبي فقالي ان الكونتاكت كان مدلدل بس فيه سنه بتيجي و قالي ان مش هو اللي كان في السيراتو هو كان قاعد في الالنترا مستني يجري في اي لحظة بس قالي انه اللي امن فيها جاب سنه كونتاكت و حرك الفتيس و هو مش متأكد اوي من اللي حصل بالظبط

بس العربية مفيهاش ايموبيليزر هي 2010 كاملة بس مش Start - Stop Key

[gebreel]

الفتيس بيبقى فيه زرار علشان ي release اللوك بتاع الفتيس من الP للN

[mhf_77]

انا سألت صاحبي فقالي ان الكونتاكت كان مدلدل بس فيه سنه بتيجي و قالي ان مش هو اللي كان في السيراتو هو كان قاعد في الالنترا مستني يجري في اي لحظة بس قالي انه اللي امن فيها جاب سنه كونتاكت و حرك الفتيس و هو مش متأكد اوي من اللي حصل بالظبط

بس العربية مفيهاش ايموبيليزر هي 2010 كاملة بس مش Start - Stop Key

انا مبسألش عن صاحبك ازاى جرها ماهى ساعتها خلاص اتفك حالها
انا بتكلم على الحرامى ازاى من الاول جرها وجابها على n عشان يحرر تروسها وهى طافيه ومن غير مفتاح انا اللى اعرفه انها مبتجبش اى غيار من ال p غير لما تدورها ولا هى ممكن تتجر على ال p اساسا من غير اى حاجه انا مبقتش فاهم ؟؟

[Y a r i s]

حمدالله على سلامت عربية صاحبك ... بس معليش كمان استفسار هو الحرامي قطع الحزام. ليه

[mhf_77]

الفتيس بيبقى فيه زرار علشان ي release اللوك بتاع الفتيس من الp للn

الزرار ده (الفتحه اللى قدام الفتيس) اللى ممكن تدخل فيها اى مفتاح يفك تعشيقته؟؟ وهل ممكن يحصل الكلام ده و العربيه طافيه ومفهاش مفتاحها؟؟

[MITSUKERO]

حمدالله على سلامت عربية صاحبك ... بس معليش كمان استفسار هو الحرامي قطع الحزام. ليه

بيستخدمة كحبل يجر بيه العربية

[magedfarid]

الحمد لله ان العربية رجعت
والاهم ان هو بخير

[MITSUKERO]

الزرار ده (الفتحه اللى قدام الفتيس) اللى ممكن تدخل فيها اى مفتاح يفك تعشيقته؟؟ وهل ممكن يحصل الكلام ده و العربيه طافيه ومفهاش مفتاحها؟؟

الزرار ده اساسا معمول عشان تفك التعشيقة و العربية مطفية

و بيستخدم برضة لو طفيت العربية و الفتيس علي وضع غلط

انا معرفشي في السيراتوا اوي بصراحة بس اكيد فيها الزرار ده يعني

[yaserbasha2000]

لله الامر من قبل و من بعد

حسبي الله في كل واحد بيستحل شقى الناس و في كل واحد مبيأديش شغله علشان يحافظ علي اموال الناس او علي الاقل استردادها بعد سرقتها

[sanhory]

موضوع مفيد فعلا و تحية مني لصاحبك والله قلبه جامد

[mhf_77]

بيستخدمة كحبل يجر بيه العربية

يعنى كده مش فارقه امبوليزر او بدون لانه كده كده بيجرها مطفيه عنده ويشتغل برواقه

[sanhory]

موضوع مفيد فعلا و تحية مني لصاحبك والله قلبه جامد

[mhf_77]

بيستخدمة كحبل يجر بيه العربية

يعنى كده مش فارقه امبوليزر او بدون لانه كده كده بيجرها مطفيه عنده ويشتغل برواقه