مخاوف من الانفجار العظيم التجربه الثانيه وابتلاع الارض

[Casio2000]

حمل بالشيفورليه و احنا قاعدين
طلع بالشيفورليه و احنا قاعديييييييييييييييييييييييييييييييين

يا باشا احنا كمان تعبنا من القعدة فادلوقت هو بيحمل و يطلع و احنا مسطحين و مأنتخين

[memohamada]

غريبة نفس الموضوع دة شفتة فى فلم وثائقى على قناة العربية من سنة تقريبا وكان بيحكى عن الاخطار الى بتهدد العالم زى تسونامى و غيرها و من ضمن الاخطار دى كان التجربة بتاعت النفق و فعلا اتكون ثقب اسود و بلع الارض !!!

[TaoTao]

مشروع سيرن كنت عاوز اكتب عنه هنا اكتر من مرة بس ماكنتش لاقي مناسبة ..
معرفتي بهذا المشروع سطحية وجاءت بالصدفة، كنت أبحث عن مقال عن تكوين الذرة فقادني البحث لهذا الإنجاز البشري الغير مسبوق ..
المشروع عبارة عن محاولة تفتيت الذرة لأصغر أجزاء ممكنة لدراسة تكوينها بدقة (مازالت بعض مكونات الذرة حتى الآن نظرية يعني العلماء يفترضون وجود جزيئات أصغر من البروتون والإلكترون يسمى الكوارك وجسيمات تسمى الميزون وأخرى تدعى بوزون وهكذا ومعظمها افتراضات نظرية) والغرض من التجربة تفتيت الذرة ورصد ما ينجم عن هذا التفتيت من جسيمات (محاكاة الانفجار العظيم ليس من أهداف التجربة، ولكن التجربة ستحاكي اللحظات الأولى التالية لما افترضته نظرية الانفجار العظيم .. هناك فرق).

لإجراء هذه التجربة يجب بناء مسرع جزيئات، وهو أن يتم وضع جزئ -بروتون مثلا- في أنبوب يحتوي مجال مغناطيسي ومع كل دورة للجزيء تزداد سرعته (تحدث عملية مماثلة في أنبوب الكاثود الخاص بشاشات التلبفزيون، عامةً مسرعات الجزيئات موجودة منذ زمن ولكن الفارق هنا في حجم التجربة) ولكن هنا المطلوب سرعات عالية تقارب سرعة الضوء، تم استخدام نفق (بين فرنسا وسويسرا) طوله 27 كيلومتر لهذا الغرض، تخيلوا الإعجاز الهندسي الذي تم!! نفق بهذا الطول مع احتياطات مشددة لتسريب الحرارة الهائلة (سينجم عن التجربة حرارة تقاس بالتريليون درجة مئوية) التي تنجم عن هذه التجربة مع وسائل التأمين بالإضافة لأجهزة القياس الحساسة جدا (بعض الجسيمات عمرها يقاس بالفيمتو ثانية والمطلوب رصدها !) وحاسبات سوبر لتحليل البيانات .. وفي الآخر يقول المشرفون على التجربة أمامنا شهور أو سنوات للوصول لنتائج ملموسة" .... كمان؟!!

اللي يحزن بقى إن المشروع بقاله عشرات السنين شغالين يه وعلماء من جميع أنحاء العالم مشاركين فيه (ولو حتى بصفة مراقب زي إسرائيل وتركيا)، واحنا ولا نعرف عنه اي خبر !! يا جماعة أنا مهندس وماكنتش اعرف عنه أي حاجة غير بصدفة بحتة!! هل فيه كارثة أكبر من كدة؟!!! أنا والله مكسوف من نفسي !

الكلام بتاع الثقب الأسود والأرض هاتتشفط وتتبلع ده كلام أثير فعلا واللي يضحك إن مشعوذو الشرق الأوسط كالعادة من قبيل "قصر الديل" حاجة كدة زي قلالات الحيلة اللي يقفوا على جنب ويقولوا "شفتوا هايخربوا الدنيا بالعلم بتاعهم" سابوا التجربة والإبداع الهندسي اللي فيها ومسكوا في الكلمة دي .. ومش بعيد يطلع اللي يقول انه هايبقى يوم القيامة!!
حد فاكر تجربة الروبوت اللي دخلوه من ثقب في الهرم لاستكشافه والمذيعة كانت بتقول "خلف هذا الجدار أسرار الكون" ؟! اهو احنا كدة مالناش غير في الدجل والشعوذة، إنما العلم ... ولا بلاش

[AhmedGen2]

النجوم بتلمع وتنور نتيجة عملية ال thermonuclear fusion يعنى اتحاد نواتين هيدروجين لتكوين نواة هيليوم وخروج طاقة ، وهكذا بتحرق وتطلع طاقة ، الكلام دة بيحصل داخل الشمس من حوالى 5 مليارات سنة ودة العمر التقريبى للشمس واللى متوقع لها 5 مليارات سنة كمان وينتهى عمرها ، نظرا ً لأن الشمس نجم متوسط فعمره طويل ، لكن تعالى لنجوم أكبر من الشمس أضعاف بيقل عمر النجم لحوالى بضعة ملايين من السنين ، نظرا ً لأن كل ما الكتلة تزيد ، كل ما كثافة المركز تزيد ، وبالتالى بتزيد الحرارة ، وبتحرق وقودها أسرع.

بعد حوالى 5 مليارات سنة وفى نهاية نجمنا الطويل العمر الشمس ، هيبتدى وقود الهيدروجين يخلص ، وهتتحول الشمس ل Red giant star لما كل الهيدروجين فى المركز يخلص ويسخن المركز أكتر وأكتر نتيجة ضغط المادة ، هيحصل حاجتين الحرارة فى المركز هتخلى ذرات الهليوم دلوقتى تتحد مع بعضها لتكوين عناصر أثقل ، والطبقة الخارجية للشمس هتكبر وتبلع الأخ عطارد ، وساعتها بتكون فى أوج سطعانها ( حلوة سطعانها دى جاية من سطع ) ، المهم وقتها مش هنكون عايشين الحمد لله ، حيث إن سطح الأرض هيتبخر.

وفى المرحلة الأخير بيحصل انهيار لكتلة الشمس على نفسها نتيجة جاذبيتها ودة طبعا بعد ما عملية ال thermonuclear fusion توصل لنهايتها ويتحول نجم الشمس لحاجة شبه ماسة بحجم الكرة الأرضية مثلا وتفضل كدة شوية لغاية ما تبرد خالص وتختفى.

رغم اللى حصل دة إلا إنه لم يتكون ثقب أسود ، رغم كمية الطاقة اللى تحررت وانهيار كتلة نجم بحجم الشمس إلا إنه لم يتكون ثقب أسود ، لماذا؟ ، لأن الموضوع يتطلب كمية طاقة رهيييييييبة جدا لا تتوفر إلا فى النجوم الكبيرة ، تخيل مثلا نجم قد الشمس 30 او 40 مرة وبينهار على نفسه هيولد كثافة شديدة جدا لدرجة إن الضوء بتاع النجم لن يستطيع الهروب من قوة الجاذبية التى ولدها ذلك الانهيار ، متخيل معايا ؟ ، وفجأة هيختفى النجم تماما ً هيصبح ثقب أسود.

دة طبعا ً باختصار شديد جدا ً ، عموما ً اللى حابب يستزيد يقرأ رائعة جيم الخليلى Black holes, Wormholes, and Time Machines

[wawoo]

و الله حاجة جميلة ان فى شباب عندهم فضول و عندهم معلومات عن مشروع مسرع الجزيئات العملاق دة و عن التجربة اللتى تمت دى .

على فكرة التجربة تمت بالفعل يوم 9 سبتمبر و لم يحدث شىء من مخاوف العلماء السابقة , وبيتم الان دراسة النتائج تمهيدا لاعلانها لاحقا .
و بهذة المناسب انا جمعلتلكم صور للمشروع فى ثلاث مجموعات لليحب ياخد فكرة عن حجم المشروع عامل ازى .

دى المجموعة الاولى من الصور :

اول صورة هى توضح مكان المسرع بالضبط على صورة جوية للمنطقة التى اقيم فيها المشروع و هوة عبارة عن نفق على شكل دائرى بطول 27 كيلومتر زى ما اخونا وضح كدة و كل دة تحت الارض على الحدود بين فرنسا و سويسرا , مش عارف التلكفة كام بالضبط بس هى مليارات .
باقى الصور توضح شكل النفق .

[Nile Heart]

So dark is the con of man