استشارة قانونية هامة

[نور القمر]

ارجو افادتي في الاستشارة للاهمية
دلوقت الموضوع باختصار جدتي لابي توفت منذ اقل من سنتين وتوفى بعدها بابا من حوالي سنة وعند وفاة بابا مكنش لسه اتوزع ميراث تيته
ولاننا واخواتي بنات بس فعمي وعماتي ورثوا معانا في بابا
وعمي ظلمنا في حاجات كتير ابتداء من انه اخذ زيادة عن حقه انتهاء بانه اخذ المميز في كل شيء
وبالتالي على طريقة حسابه عماتي كان من نصيبهم جزء زيادة في الميراث عن تيته ولكن 2 منهم حبوا يمشوا الامور ووافقوه على قراره وبعد كدة تنازلوا لنا عشان يبرأوا ذمتهم قدام ربنا
لكن العمة الثالثة كانت شريكة له في ظلمنا
ورضينا بأقرب الحلول الى انصافنا وسلمنا امرنا لله وربنا يعوض علينا
وكتبنا عقود ابدائية مع كل وريث نسخة والجميع مضى على كل النسخ

دلوقت السؤال الاول

دلوقت العمة الثالثة عايزة تعيد التقسيم في منطقة معينة من الارض مدعية انها اخدت في جزء ارخص مع ان وقتها تم حساب الفرق في السعر وتم تعويض عماتي في مقابله بارض
وبما ان عمي بنى فيلته خلاص في الجزء الخاص بيه اذن مش فاضل غير ارضنا اللي هي طمعانه فيها وعايزة تستبدل ارضها بجزء م ارضنا
هل العقود الابتدائية كافية للتمسك بحقنا وعدم التنازل عن الاتفاق السابق ولا محتاجين نعمل توثيق للعقد بطريقة معينة عشان يكون قانوني

سؤال ثاني مفيش مشكلة فيه حاليا لكن متخوفين تظهر له مشكلة في المستقبل
اثناء كتابة العقود نسينا ادراج قطعة معينة من الارض تخصنا وبعد ما مضوا افتكرناها وعمي كتبها يدوي بخط ايده في نسختنا فقط ومضى وعماتي مضوا

لكن في النسخ اللي معاهم واحنا ماضيين عليها مفيش الجزء ده
هل بالطريقة دي ممكن يحصل اي مشكلة في المستقبل لو حد منهم حب يضايقنا ؟؟؟

[النوبي]

تقريبا انتي عايزه محامي شاطر دي اهم نقطه علشان تعرفي تضمني حقك
وبيتهيالي لازم تكون النسخ كلها زي بعض
بس برضه طالما كلهم مضوا علي النسخه بتاعتكم يبقي كدا ممكن حقكم يبان والله اعلم
برضه لازم تروحي الي محامي ويكون حاجه عقر علشان الظاهر ان عمتك دي مش ساهله (والله اعلم)

[أبو صلاح]

لازم محامي كويس
ولو عايزة محامي تخصص في الحاجات دي انا ممكن اساعدك عندي صديق عمري فاجر في الامور دي مدني وتجاري

[mahfouz1983]

بصي يا ستي المشكلة بتاعتك دي اولا جدتك لابوكي ماتت في حياة ابوكي صح يبقي ابوكي يورث فيها الميراث الصحيح وهو للزكر مثل حظ الانثيين لانها توفت والدك عايش يعني ميراثك في هذه الحاله هو ميراث الاب حتي ولو لم يتم تقسيمه ووالدك مات تمام هتاخدو ميراثكم كامل وبعدين لو انتي بنت واحده بس يبقي ليكي النصف اما لو ليكي اي عدد من اخواتك البنات فليكو الثلثين من ميراث ابوكي تمام طبعا انتي بتسالي في نقطة الاثبات الكتابي الغير مسجل الي هو العقد الابتدائي هو اثبات للحق ولكن العقد المسجل في الشهر العقاري اقوي في السند تمام وغير كدا في نقطة اننو ثابت قطعة الارض في العقد وماضي عليها تمام دا يثبت حقكو فيها حتي ولو مش موجوده في الصور التانيه الي مع الورثه تمام يعني متخافيش انتي حقك معاكي بس ياريت ترفعي دعهوي صحة توقيع علي الروق الي معاكي عشان يكون معاكي اوراق مظبوطه وذات حجة قوية

[Ghost2]

بالنسبة للسؤال الاول .. فا حضرتك ممكن ترفعي دعوى صحة توقيع وهتاخدي حكم ليكي لو العقد صحيح .. اما عن السؤال التاني فيحب ان يكون العقدين نسخة طبق الاصل .. ويستحسن ان المشكلة تحل وديا افضل من المحاكم وخلافه

[dolly13]

والله حاجة تزعل ان الاعمام هم اللى يطمعوا فى مالكم لكن من افضل الاشياء انكم تحولوا تحلوا الموضوع ودى لكن فى وجود محامى امين وشاطر
وربنا ينصركم وتاخدوا حقكم كامل باذن الله

[نور القمر]

شكرا للجميع على الرد والاهتمام
انا طبعا ان شاء الله هاستشير محامي وقاضي كمان بس بحب اجمع اكبر قدر من المعلومات واراء متعددة عشان افهم الدنيا ماشية ازاي ومحدش يستغل جهلي بالقانون

دلوقت استفسار من Ghost2 يعني ايه (( ترفعي دعوى صحة توقيع وهتاخدي حكم ليكي لو العقد صحيح ))
مهو صحيح وهي ماضية قدام باقي اخواتها يعني يعتبروا شهود على العقد
يعني انا مش فاهمة هل في حاجة قانونية تخليه غير صحيح
دي نقطة
نقطة تاني هل رفع الدعوى لازم في محكمة في نفس المحافظة ولا ينفع في اي مكان
وعلى اي اساس المحكمة تحكم بصحة التوقيع ؟

اما بالنسبة للقطعة التانية من الارض لسه محصلش مشاكل عليها لكن انا مستبعدش ان ممكن حاجة تحصل في المستقبل منها هي بالذات وموضوع الحل الودي مش ينفع معاها نهائي هي كل همها تطلع كسبانة على د متقدر حتى لو مش حقها وربنا يستر وحسبي الله ونعم الوكيل

[أبو إياد]

بصى يا استاذه انا عايش تقريبا فى مشكله شبيهه للمشكله دى لدرجه انى اخذت اجازه من الشغل للتفرغ للموضوع ده وباين من كلامك انكوا مش هاتستخدموا الارض حاليا
مشكله الاراضى دى هو الاهمال (الاهمال هو اللى بيضيعها ) مش هاتقدرى تبنيها او مش هاتستغليها او مش محتاجه منها شيىء حاليا عليكى والتخلص منها فورا وباقصى سرعه بيعى الارض وريحى دماغك
وشروط البيع هو انك تعرفى سعر الارض فى المنطقه دى متراوح مابين كام وكام وتعرضى الارض على اقرب ناس ليكى بسعر اقل وتريحى دمغك وبالطريقه دى مش هايضيع حقك وحق اخواتك ياعنى لو سعر المتر بيعمل مثلا 1000ج ممكن تبيعها لعمك او احد عماتك ب950 او 900ج للمتر وتنهى اى معاملات ماديه مع اى حد من الورثه وخصوصا من هو دون الاب والام والاخوات مافيش حاجه تانيه اسمها اقارب
انا معرفتش معنى العقارب اقصد الاقارب الا بوفاه ابى رحمه الله عليه

[KSA2011]

انا مش بفهم فى اى حاجه بصراحه بس هقول وجهة نظرى
المنطق بيقول انه والدك المفروض بيورث فى جدتك زيه زى اخواته من وقت وفاتها ولو الوصيه بتاعته مكتوبه ليكم بس يبقى مش من حق حد يورث معاكم ولو مش كاتب يبقى اعمامك وعماتك هيورثوا معاكم فى كل حاجه تخص والدك ومنها ميراثه من والدته
والبقاء لله ربنا يغفر ليهم ويرحمهم وربنا يكون فى عونكم و يوقف اولاد الحلال فى طريقكم دايما

[mr_sameh]

الموضوع بسيط جدا حضرتك ترفعي دعوة صحة ونفاذ عقد البيع ودي طبعا دعوي موضوعيه بعكس صحة التوقيع دعوي تحفظيه لا تتعرض لموضوع العقد ولكنها تتعلق بالتوقيع فقط اما دعوي صحة ونفاذ تتعرض لموضوع العقد وهي بمثابة تسجيل للعقد . هي بتاخد وقت شويه في المحكمه لان اجراءتها كتير شويه . اما بالنسبه للبند المضاف في العقد الخاص بيكم فهوا سليم تماما ومافيش مشكله خالص من ناحيته وكمان الكويس فيه ان البند ده مضاف بخط يد عمك
طبعا المعلومات اللي قولتها دي مظبوطه لاني محامي

[mr_sameh]

وبيتهيالي لازم تكون النسخ كلها زي بعض
بس برضه طالما كلهم مضوا علي النسخه بتاعتكم يبقي كدا ممكن حقكم يبان والله اعلم

هوا ده المفروض فعلا لكن في الحاله دي احنا امام عقد محرر بخط يد احد الورثه وموقع من جميع الورثه اذا مفيش حد من الورثه يقدر يطعن بالتزوير علي العقد لان التوقيعات سليمه وفي حالة الطعن بالتوزير وطلع العقد سليم المحكمه بتغرم الطاعن مبلغ مالي وكمان بيعطي للمدعي الحق في رفع دعوي تعويض وهما اكيد هيكونو عارفين كدا

طبعا انتي بتسالي في نقطة الاثبات الكتابي الغير مسجل الي هو العقد الابتدائي هو اثبات للحق ولكن العقد المسجل في الشهر العقاري اقوي في السند تمام وغير كدا في نقطة اننو ثابت قطعة الارض في العقد وماضي عليها تمام دا يثبت حقكو فيها حتي ولو مش موجوده في الصور التانيه الي مع الورثه تمام يعني متخافيش انتي حقك معاكي بس ياريت ترفعي دعهوي صحة توقيع علي الروق الي معاكي عشان يكون معاكي اوراق مظبوطه وذات حجة قوية

كلامك مظبوط ان العقد المسجل اقوي شئ علشان كده انا قولت ترفع دعوي صحة ونفاذ عقد البيع وليس صحة توقيع لان دعوي صحة ونفاذ بيكون الخصم فيها الاطراف الموقعه علي العقد ويختصم فيها الشهر العقاري علشان كده بيكون العقد مسجل . طبعا كلامي بطريقه مبسطه علشان محدش يغلطني

بالنسبة للسؤال الاول .. فا حضرتك ممكن ترفعي دعوى صحة توقيع وهتاخدي حكم ليكي لو العقد صحيح .. اما عن السؤال التاني فيحب ان يكون العقدين نسخة طبق الاصل .. ويستحسن ان المشكلة تحل وديا افضل من المحاكم وخلافه

طبعا الحل الودي اقصر الطرق تماما لكن احيانا بنجبر للجوء للقضاء . طبعا دعوي صحة التوقيع بتحكم فيها المحكمه بعد اعلان المدعي عليه بقبول الدعوي لكن هي دعوي ضعيفه جدا بس بنلجا ليها في الامور العاديه لكن هي طبعا بتكون قويه لو حضر المدعي عليه واقر امام المحكمه بصحة التوقيع اما في الحاله المعروضه اعتقد الاطراف مش هيحضرو للمحكمه للاقرار

[نور القمر]

بصى يا استاذه انا عايش تقريبا فى مشكله شبيهه للمشكله دى لدرجه انى اخذت اجازه من الشغل للتفرغ للموضوع ده وباين من كلامك انكوا مش هاتستخدموا الارض حاليا
مشكله الاراضى دى هو الاهمال (الاهمال هو اللى بيضيعها ) مش هاتقدرى تبنيها او مش هاتستغليها او مش محتاجه منها شيىء حاليا عليكى والتخلص منها فورا وباقصى سرعه بيعى الارض وريحى دماغك
وشروط البيع هو انك تعرفى سعر الارض فى المنطقه دى متراوح مابين كام وكام وتعرضى الارض على اقرب ناس ليكى بسعر اقل وتريحى دمغك وبالطريقه دى مش هايضيع حقك وحق اخواتك ياعنى لو سعر المتر بيعمل مثلا 1000ج ممكن تبيعها لعمك او احد عماتك ب950 او 900ج للمتر وتنهى اى معاملات ماديه مع اى حد من الورثه وخصوصا من هو دون الاب والام والاخوات مافيش حاجه تانيه اسمها اقارب
انا معرفتش معنى العقارب اقصد الاقارب الا بوفاه ابى رحمه الله عليه

فكرة البيع مستبعدة تماما لاسباب كتير
اولها انها مساحات كتيرة ومحدش عايز يشتري الكل محتاج سيولة
ثانيا انها كل ما نملك وفي منها مباني وفي منها قرب يدخل كردون المباني وبالتالي بيعها بخسارة علينا وقيمة الارض عموما بتتزايد مع الزمن
ده غير انها مش مهملة احنا بنأجرها لفلاحين بيزرعوها

انا مش بفهم فى اى حاجه بصراحه بس هقول وجهة نظرى
المنطق بيقول انه والدك المفروض بيورث فى جدتك زيه زى اخواته من وقت وفاتها ولو الوصيه بتاعته مكتوبه ليكم بس يبقى مش من حق حد يورث معاكم ولو مش كاتب يبقى اعمامك وعماتك هيورثوا معاكم فى كل حاجه تخص والدك ومنها ميراثه من والدته
والبقاء لله ربنا يغفر ليهم ويرحمهم وربنا يكون فى عونكم و يوقف اولاد الحلال فى طريقكم دايما

ده المنطق والشرع اللي اتطبق منه الجزء اللي على هواهم بس
يعني لما تيته وصت بوصية لصالح عمي وتراجعت فيها قبل وفاتها وقالت استفتوا الشرع رفضوا فتاوي الازهر واصروا على تنفيذها ولما بابا وصى بوصية لصالحنا رفضوا تنفيذها مع انه وصاهم كلهم
لكن اقولك ان ربنا بالمرصاد والكوارث المادية بدأت تظهر بوادرها على من ظلمنا

الموضوع بسيط جدا حضرتك ترفعي دعوة صحة ونفاذ عقد البيع ودي طبعا دعوي موضوعيه بعكس صحة التوقيع دعوي تحفظيه لا تتعرض لموضوع العقد ولكنها تتعلق بالتوقيع فقط اما دعوي صحة ونفاذ تتعرض لموضوع العقد وهي بمثابة تسجيل للعقد . هي بتاخد وقت شويه في المحكمه لان اجراءتها كتير شويه . اما بالنسبه للبند المضاف في العقد الخاص بيكم فهوا سليم تماما ومافيش مشكله خالص من ناحيته وكمان الكويس فيه ان البند ده مضاف بخط يد عمك
طبعا المعلومات اللي قولتها دي مظبوطه لاني محامي

شكرا لك
بس ده مش عقد بيع
عقد البيع المفروض فيه طرف بائع وطرف مشتري
لكن صيغة العقد كانت فيما معناها انها توزيع لميراث كل من الجدة والاب
يعني احنا لتسهيل وتبسيط العقد اخدنا نتائج توزيع ميراث تيتة وبابا الاجمالية لكل فرد بدون الدخول في التفاصيل اد ايه من بابا واد ايه من تيته

[mr_sameh]

انا كنت فاهم غلط ده عقد تقسيم مش عقد بيع . طيب ممكن اسئل سؤال الارض دي زراعيه ولامباني

[نور القمر]

فيها زراعي وفيها مباني

[ezzatfox]

اللى فهمتة انة تم عمل عقد قسمة اتفاقى بين الورثة لتوزيع التركة .. و احد الورثة رجع فى كلامة و طمعان فى حاجة زيادة او مكان اميز ... تمام كدة
طالما ان تم تحرير عقد القسمة و تم التوقيع علية من الورثة بارادتهم و كامل اهليتهم يصبح العقد ملزما لهم و لا يجوز تراجع احد الاطراف عنة بارادتة المنفردة .
و ممكن حضرتك ترفعى دعوى صحة توقيع لهذا العقد لاثبات صحة توقيع الورثة و ضمان عدم تمكنهم مستقبلا من الطعن على توقيعهم و يمكن رفعها امام المحكمة الجزئية الموجود بها موطن المدعى علية و هى اجرائتها بسيطة و غير مكلفة .
بالنسبة لاختلاف نسخ العقد .. زى ما استاذ سامح تفضل و قال .. مفيش اى مشكلة .. لان البند مكتوب بخط احد الورثة و تم التوقيع منهم بما يفيد موافقتهم و علمهم بوجود هذا البند المضاف .