ما الذى يحدث فى مصر

[Abo_Lina]

من منجزات الحكومة انخفاض مستوى سقف التوقعات للمواطنين

[ainshouka]

أولا : واللهى العظيم انا مش تبع الحزب الوطنى
أنا ما بحبش الحزب الوطنى أساسا

ثانيا : تواريخ الصلاحية بعيدة وزى الفل

ثالثا : الأخ casprino قال الحقيقة اللى هو شافها بعنيه

رابعا : فيه حاجة الناس كلها بتقولها ان دوا التأمين والدوا ابو بلاش ده مفيهوش مادة فعالة ..
ومن تجربتى ان لما واحد بيجى ضغطه 220/110 بياخد قرص كابتوبريل بتاع التأمين تحت لسانه وبعد ساعة ضغطه بينزل
أكيد ضغطه نزل علشان القرص اللى اخده عمل حاجة
واعرف ناس كتير واللهى بتخف لما تاخد الدوا ابو بلاش ده
واولا واخيرا هى اسباب
بس متهيألى المفروض ما نبقاش ناقمين على مصر وسنين مصر وقرف مصر
واللهى واحد عايش فى السويد قالى :
احنا فى البلد دى عايشين بالدين وساكنين بالقسط وهنموت برضه مديونين (علشان نظام الكريديت)
احنا محبوسين زى الكلاب فى البيت علشان التلج بره (معظم الوقت )
لو اعيش فى بلدى بس اكل واشرب وسط اهلى يبقى تماااااااام
بس خلاص مبقاش ينفع

يادكتور محمد محدش بيتهمك بحاجة او انت تبع حزب او كلام من دا
الحكاية كلها انك حضرتك شفت حاجات كويسة قلما بنشوفها فى البلد دى
وكان نفسى اشوفها انا برضه بس للأسف مشفتهاش فأنا حبيت انقلك الصورة اللى انا شفتها ومدى الاهمال وكمية نقص الادوية اللى بتستمر بالشهور

طبعا كل اللى بياخدوا التموين عارفين هو شكله عامل ازاى والسكر والعدس والحاجات دى بتبقى عاملة ازاى والدتى بتقوللى انه ساعة الانتخابات اللى فاتت جابوا عدس وفول نضيف جدا ومحترم وبعد مخلصت الانتخابات رجع التموين لسابق عهده فممكن يكون حكاية الدوا دى عشان الانتخابات فقط لاغير

وحتى لو كانت حكاية الدوا انه كويس حتى لما الانتخابات لما تخلص فدا شئ كويس ونتمى انه يتعمم

[جمال]

من منجزات الحكومة انخفاض مستوى سقف التوقعات للمواطنين

فعلا كلام صح

تاخد على دماغك تتلخم وتهيس تتجنن تضطر تسقف و تهتف

[mxz911]

واللهى العظيم دية حقيقة

خد دى كمان

النهاردة وزير الصحة فى بنها
تخيل ان فيه عربيات اسعاف مجهزة نزلت تقف فى الشوارع تستقبل اى حد
يعنى المفروض ده يحصل يوميا
بس المشكلة فى المسؤلين المحليين التنابلة

لا يغير الله ما بقوم حتى يغيروا ما بأنفسهم

بمناسبه عربيات الاسعاف احب اقول بس حاجه ...

عربيات الاسعاف اللى حضرتك بتتكلم عليها دى اولى انها تكون واقفه فى صلاح سالم او على الاقل تقدر توصله بسرعه

انا شفت موقفين قدامى والله فى صلاح سالم وده اللى خلانى اكتب الرد ده
مره كنت ف درس ف عمارات العبور وانا نازل حصل حادثه واوتوبيس سياحيى تقريبا ( مش متذكر هو كان ايه بس كان شركه او حاجه خاصه ) خبط واحد بيعدى الشارع والواحد ده مكان شغله قريب من صلاح سالم وفضل ينزف دم من دماغه واحنا كلنا واقفين و الناس عايزه تساعد لكن خايفه انها هيه اللى تلبس فى الموضوع خصوصا انى حسب ما فهمت اللى هيوصله المستشفى هيتعمل معاه تحقيقات وبلاوى وممكن يلبسوه فى الاخر ان هوه ا للى خبطه
والاسعاف جت متأخره جدا بعد حوالى ساعه الا ربع من الحادثه !

ومره تانيه كنت طالع من البولينج اللى ورا البانوراما و اتنين بيعدوا الشارع جت بنت ب عربيه 127 خبطتهم الاتنين واللهم شفتهم طايرين قدامى وبعدها اترموا على الارض والبنت طلعت تجرى ومحدش جابها .. الاسعاف جت بعدها ب حوالى تلت ساعه .. وخمنوا ايه .. عربيه الاسعاف مفهاش اى جهاز من ورا .. مفهاش اصلا اى حاجه عربيه اسعاف فاضيه من جوه والله العظيم من ورا عباره عن صندوق خاوى من اى شئ فعلا مفيش اصلا حتى كرسى والله يتقعد عليه !!! صفيحه !!! انا مكنتش مصدق المنظر ذهلت والله !!!
وفى الاخر تخيلوا ايه كمان ! عربيه الاسعاف وصلت واما وقفت عطلت ومدارتش تانى والناس كان بيزقوها فى الشارع غايت ما المصاب ركب ورا واحد على موتوسيكل ومشى والتانى اللى اتصاب مكانش اصابته بالغه وقدر يعد على الجنب على الرصيف غايت ما يفوق !!


بلد فيها حاجات غريبه ... وانا لا اقصد ان مصر وحشه بس برضه فيه حاجات مينفعش التنازل فيها

[beautiful0mind]

مره كنت ف درس ف عمارات العبور وانا نازل حصل حادثه واوتوبيس سياحيى تقريبا ( مش متذكر هو كان ايه بس كان شركه او حاجه خاصه ) خبط واحد بيعدى الشارع والواحد ده مكان شغله قريب من صلاح سالم وفضل ينزف دم من دماغه واحنا كلنا واقفين و الناس عايزه تساعد لكن خايفه انها هيه اللى تلبس فى الموضوع خصوصا انى حسب ما فهمت اللى هيوصله المستشفى هيتعمل معاه تحقيقات وبلاوى وممكن يلبسوه فى الاخر ان هوه ا للى خبطه
والاسعاف جت متأخره جدا بعد حوالى ساعه الا ربع من الحادثه !

حضرتك انا صديق صحبى عمل حدثة بالعربية بتحته ع الدائرى .......تخيل الشعب المصرى عمل اية ................................

كل اللى عمله انه خرجه من العربية وحطه على جنب ورا العربية بتحته بظبط .....الكلام ده على الدائرى ..قبل المريوطية ...........بعدها تقريبا بساعه اصحابى جين وراه بالعربية لقه عربيته واقفة ع الطريق .........فوقفة ونزلة جرى لقه صحبهم متوفى جنب العربية ......ومافيش مخلوق من الناس حاول حتى يودى المستشفى وينقذة حياته مش كان يمكن يكون سبب فى انقاذ حياته لو حد حاول بس يساعده .....بس هى اعمار والله يرحمة ويغفر له

ياباشا احنا بقينا بنعمل الغلط لان الغلط بقى الصح فى هذا العهد .....

[Mohamed.Ramah]

الانتخابات قربت

[KSA2011]

ايه يا جدعان انتم ما تعرفوش كده ولا ايه ؟
زى ما حضرتك قلت فعلا يا دكتور وناقشت الموضوع ده مع ناس كتير بس رد الغالبيه العظمى ما هو من دخل البلد ودم الغلابه كنت بسكت يمكن كلامهم صح بس فعلا المستشفيات بتصرف كتير
انا طبيب امتياز فى جامعه المنصوره اشتغلت فى كل المستشفيات
فى مستشفى الاطفال الجامعى فى المنصوره اى طفل بيدخل المستشفى بيدفع تمن تذكره بس 2 جنيه او اقل بيعمل كل حاجه يكشف ببلاش و يصرف علاج كامل ببلاش و لو محتاج تحليل ببلاش ولو محتاج اشعه موجات سى تى اى حاجه بتتعمله عايز يتحجز بيتحجز وفى اماكن نضيفه جداا واكل وشرب هو والمرافق بتاعه ببلاش
استقبال 24 ساعه وعلاج ببلاش
تركيب محاليل وكانيولات ببلاش متابعه ببلاش
وهقولكم فى الاخر حاجه
مستشفى المنصوره الجامعى اقسام فى جميع التخصصات عيادات جميع التخصصات وعلاج ببلاش و علاج ما يقلش عن العلاج بره
لو فيه اى حاله محتاجه عمليه و على ايدى عمليات العظام والشرايح و بتتعمل بضمان احسن من احسن دكتور ممكن يعملها بره
لانه فى اى عمليه بيبقى فيه كذا دكتور عظام مثلا وكذا دكتور تخدير و باطنه و و و لاى طوارىء اثناء العمليه
وفى مستشفى الطوارىء يومين فى الاسبوع
عياده ستتشات بتدخل تتخيط ببلاش خيوط تجميل ومش تجميل ومش بمزاجك يعنى لو الحاله محتاجه تجميل بينزل نايب التجميل يعملهالك تجميل من غير ما انت تقول
عيادات العظام الحالات بتتجبس بحاجه اسمها جيبسو باند ده جبس جاهز الحاله الواحده ممكن بتاخد 5 او 6 باكيتس شوفوا الباكيت الواحده بكام بره
لا بجد يا جماعه المستشفيات دى بيتصرف فيها مصاريف بالهبل بجد
انا اشتغلت الاسبوع الى فات و الاسبوع ده فى مستشفى فى الجيزه شغل خاص و الحمد لله كانوا اول مرتين واخر مرتين فى حياتى لانه الى بيحصل فى المستوصفات دى عكس الى انا شفته واتعودت عليه
كمان الدكاتره بتتعامل مع الحالات على انها فلوس يعنى هيديك اى حاجه عشان تدفع مش يتعامل معاك صح وبطريقه صح
مثلا لو حاله جايه تتخيط 4 غرز وتجميل تمام فى المستوصف الخاص واكيد اغلبكم من القاهره و المستوصفات منتشره عندكم عكس المنصوره مفيش حاجه اسمها مستوصفات
المهم الحاله دى فى الخاص بتتحسب تدفع تمن الخيط و شغل الدكتور والغيار ده غير العلاج بره وكل يوم تيجى تغير يعنى تدفع بعد الخياطه مثلا 80 جنيه فى 4 غرز وكل يوم 5 جنيه او 10 جنيه غيار ده غير علاج مضادات حيويه بحوالى 30 جنيه
فى الجامعه كل ده ببلاش وكل يوم تيجى تتابع فى العياده مع دكتور متخصص يشوفلك جرحك صح و يغيرلك عليه
انا شفت فى اليومين دول بلاوى ومش عايز احكى لانى تعبان اوى
المهم البلد من أسوا لاسوا ومش الحكومه هى الى مبوظه البلد بالعكس الشعب هو الى مبوظ البلد فساد وحقد و قلة ذوق و انتهازيه و كل واحد بيكره التانى و عايز يمص دمه باى شكل
كفايه كلام لانى بجد زهقت واسف على الاطاله

[samcar]

بكرر مرة تانية انا مش بدافع عن الحكومة

بس امريكا مافيهاش أدوية ببلاش
ومرة كنت بعمل شات مع واحد من امريكا كان بيشتكى ان اسعار الدوا غالية وان الليله فى المستشفى بألف دولار و الفقير ما بيتعالجش
وان اوباما عايز يعمل تأمين صحى لكل المواطنين بس الأغنيا رافضين علشان كده هياخدوا فلوس منهم علشان علاج الفقرا وده نظام شيوعى
وعلى فكرة كمان
على اطراف نيويورك فيه احياء عشوائية بيعيش فيها السود فيها مخدرات ورزيلة وشذوذ ومع ذلك مش بيطلعوها كل شوية فى التليفزيون زى الاستاذ عمرو الليثى ما بيعمل

جزء كبير من مشكلة مصر فى الاعلام اللى خلى شكلنا زى الزفت قادم العالم والدول العربية على الأخص
فيه مثل بلدى بيقول (ماتنشرش غسيلك الوسخ برة)

ومع ذلك الحكومة طبعا مقصرة
مفيش ديموقراطية
مفيش اهتمام بالعلم
مفيش قدوة للشباب
مفيش مشروع قومى

با قول لك ايه انت نازل الانتخابات قريب ولا حاجه وبتربط مع الحزب- هههههههههه- ده كلامك فى حد ذاته ادانه للحكومه دى - اللى مفروض يتعمل انت شايفه حاجه مهمه وملفته للنظر- وبلاش كلام عن امريكا واوربا والدول المتقدمه- خلى الكلام على اد مصايبنا - انت عملت شات مع واحد انا عشت فى انجلترا وامريكا وكندا- بلاش تقلب المواجع اعمل معروف- كانت شوره سوده ان الواحد رجع

[samcar]

الانتخابات قربت

برافو عليك واالى ادوهم 1500 جنيه فى الشهر ملوا المنتديات -

[mxz911]

خلينا نحسن الظن بالناس برضه يا samcar

اكيد كل واحد بيحاول يحسن من ناحيته والله اعلم ما خفى فى نفوسنا جميعا وربنا يصلح حال البلد دى ...


اقسم بالله انا النهارده ( السبت 19-12) رحت اجيب ورق الضرايب العقاريه والله العظيم مش معامله بنى ادمين موقفين الناس من 9 الصبح على اساس ان المفروض يفتحوا من 9 الصبح و مبدأوش توزريع الورق غير الساعه 1 الظهر والناس كبيره ف السن وستات كبيره والورق لم يتم توزيعه ف المكان المخصص له ف مبنى كده ف الشارع عشان الزحام .. لا دول طلعونا 5 اداور فى مبنى اداره الحى فى غرفه ضيقه والناس مش عارف تقف ازاى وال ........* واقف جوه وعمال يزعق ويقول للناس اوقفوا طابور وبعد ما وقفوا طابور فضل لاطعنا والناس عمال تسب وتشتم فيه لانه شبه مذنبنا والستات عماله تصرخ فيهم من كتر ما وقفوا وانا متكلمتش لانى تقريبا كنت من الشباب القليل اللى واقف هناك لكن اما وصلت بالعافيه ل بتاع الورق اكتشتف انه مش بيدى غير نموذج واحد لكل شخص بقوله طيب انا عند والدى شقه ووالدتى شقه و عندنا كام حاجه كده ومحتاج 5 نماذج مرضاش يدينى وقالى روح اشتكى ف المأموريه او حاجه كده وساعتها والله اتنرفزت جدا وهو كان واقف على كرسى رحت شاده من ا يده ومن كتر النرفزه قلت له والله منا سايبك وهتشوف ومشيت وانا مولع

بس انا مش بلطجى ومش هعمله حاجه وعارف ان دول اصلا موظفين غلابه لكن حكم الشغل القذر المحاط بالفساد خلاهم يتحولوا ل ضعاف نفوس ومعدتش حد يهمهم وده للاسف نتيجه الغش اللى دايما بيتعاملوا بيه مع الناس مع انى ممكن استناه اما يروح ب كام بلطجى ونروقه

يا ريت لو كان حد راح يجيب الورق يقولنا شكل الزحمه واحساسه بالامراض من حواليه بحكم صغر المكان وكتر العدد من الناس
حسبى الله ونعم الوكيل

[casperinoo]

متزعلش نفسك
ممكن تنزل الأقرار من هنا
ظˆط²ط§ط±ط© ط§ظ„ظ…ط§ظ„ظٹط© - ط¹ظ†ط§ظˆظٹظ† ط±ط¦ظٹط³ظٹظ‡ - ط¥ظ‚ط±ط§ط±ط§طھ ظ‚ط§ظ†ظˆظ† ط§ظ„ط¶ط±ظٹط¨ط© ط¹ظ„ظ‰ ط§ظ„ط¹ظ‚ط§ط±ط§طھ ط§ظ„ظ…ط¨ظ†ظٹط©
ده فين المكان اللي انت جبت منه الأقرار؟؟

[mxz911]

انا مكنتش اعرف انه موجود على النت والله ..

انا كنت عاوزه ل شقه عندنا ف مدينه نصر وشقه ف حدائق القبه ورحت جبته من اداره حى حدائق القبه حيث انى مقيم هناك حاليا بجوار القصر الجمهورى .. وكان ف كذا حاجه تانيه محتاج ليهم نموذج بس مخدتش 5 و لا حاجه لانهم مش راضين يدوا اكتر من واحد .. اخدت واحده بالعافيه من جوه وانا خارج لقيت واحد تانى بيوزع اخدت منه ...

وكمان ف حاجه .. يعنى مثلا احنا تقريبا كل اعضاء المنتدى يقدروا بفضل الله مثلا يطبعوا النموذج ده .. فى ناس مش قادره والمفروض يراعوا الناس دى .. وينظموا الدنيا مش نبقى رايحين ندفع فلوس وكمان اهانه !

[casperinoo]

انا مكنتش اعرف انه موجود على النت والله ..

انا كنت عاوزه ل شقه عندنا ف مدينه نصر وشقه ف حدائق القبه ورحت جبته من اداره حى حدائق القبه حيث انى مقيم هناك حاليا بجوار القصر الجمهورى .. وكان ف كذا حاجه تانيه محتاج ليهم نموذج بس مخدتش 5 و لا حاجه لانهم مش راضين يدوا اكتر من واحد .. اخدت واحده بالعافيه من جوه وانا خارج لقيت واحد تانى بيوزع اخدت منه ...

وكمان ف حاجه .. يعنى مثلا احنا تقريبا كل اعضاء المنتدى يقدروا بفضل الله مثلا يطبعوا النموذج ده .. فى ناس مش قادره والمفروض يراعوا الناس دى .. وينظموا الدنيا مش نبقى رايحين ندفع فلوس وكمان اهانه !

هي المشكلة ان فيه ناس استغلت موضوع الزحمه وكانت بتستلم النموذج وتبيعه...يعني هما الاول كان بتاخد العدد اللي انت عايزه..بس بعد موضوع السوق السوده ده :) بقي كل واحد ياخد نموذج واحد

[mxz911]

والله العظيم من قبل ما حضرتك تقولى ومع انى مشوفتش حد بيبيع ..

لكن انا اول ما رحت هناك وشوفت شكل الناس عرفت ان هيحصل موضوع بيعه سوق سودا وكده .. ومش بعيد ان الموظفين اللى ف المكتب هما نفسهم اللى يبيعوا وكان فى راجل كبير النهارده من اللى واقفين فى الطابور عمال يشتم فيهم يقولهم يا حراميه يا ولاد ال ........ يا مش عارف ايه ومعنى الكلام كان انهم بيسرقوا الناس ويبيعوا النماذج ويقولوا ان مفيش نماذج

مصر تسبح فى بركه من الفساد النتن المتعفن !

[ahmed4000]

بالأضافة بقي إلي مصاريف الجهات السيادية ...... أنت عايز اية يا راجل لما يطلع السيد وزير المالية يقول في التلفزيون أن كل عائد قناة السويس بيروح لجهه سيادية كمصاريف اللي هو في أدني مراحلة بيكون تلاتة مليار جنية

و بعدها مستكتر 3 مليون في الشهر علي الغلابة

ده فى انهى حتة اتقال الكلام ده
لان مفيش حاجة فى الدنيا اسمها ايراد جهة مخصص لجهة
اى محاسب صغير حيعرف ان ميزانية فيها بند ايراد وبند مصروفات بدون تخصيص يعنى حنلم من هنا وهنا وهنا ونصرف هنا وهنا وهنا لكن مش ممكن يقول حخصص دخل قناة السويس للتعليم والسياحة للصحة ...يبقى عمر موزير المالية حيقول الكلام ده

على فكرة دخل قناة السويس 30 مليار مش 3 مليار

وبرده ده ولا حاجة اذا كان البنزين لوحده دعمه فى ال40 مليار...طارت قناة السويس

احنا مش احسن دولة فى العالم ولا احسن اقتصاد

بس لازم الناس تفهم برده ان الموارد محدودة، بلاش محدودة علشان الناس بتزعل

الموارد محدودة على اد السكان

يعنى الناس دايما بتبص على الخليج

طيب لو بصينا على السعودية مثلا

لو عندك بترول السعودية كله برده مش حتبقى عشر المواطن السعودى من ناحية الخدمات

لانك 80 مليون وهو 6 مليون فنصيب الفرد اقل

ناهيك عن سياسات كتيرة متعودين عليها

بصوا على البنزين 80....السلعة الوحيدة فى العالم (بالاضافة لرغيف العيش فى مصر برده) اللى بترخص بقالها 20 سنة

ايوه 20 سنة بترخص مش ثابتة حتى وطبعا بسبب التضخم

طيب ازاى الناس مش ملاحظة نقطة زى دى

ازاى البترول كان ب16 دولار واللتر ب90 قرش
ولما البترول بقى 140 دولار برده بنفس السعر

يعنى اى سلعة بتغلى اشمعنى دى...انا عارف انى حسمع محاضرات على الغلابة واللى مش لاقيين و...الخ

على عينى وراسى بس هل معنى كده ان السلعة متتحركش خلال 20 سنة

وليه منشوفش الغلابة دول ونديهم الدعم والباقى يدفع

ليه سواق تاكسى بيلهف فى المشوار 20 جنيه وتلاقيه واقف يتخانق على البنزين 80 ولما تركب معاه يحسسك انه بيحط 95

ليه واحد راكبلك عربية قديمة صحيح لكن حاطط في جيبه سجاير ب7 ولا 8 جنيه فى اليوم ويحطلك بنزين 80

طيب فلوس مين اللى بتتصرف على النوعية دى....مهى فلوسى ...الفلوس اللى كانت المفروض تتصرف على تعليم عدل ولا صحة عدلة ولا طرق..بتترمى فى الهوا

قيس بقى على كده..مياه...اللتر يكلفنا اكتر من جنيه ونص وتلاقى الناس فاتحة المياه براحة راحتها...مهى الفاتورة حتجيله كام يعنى...ينفع تشترى ازازة بيبسى وترميها فى الشارع

داخلين على حرب مياه والناس بترمى المياه فى الشارع علشان ترطب الجو

شوف الكهربا بتتكلف كام وبتتباع للمواطن بكام وتلاقى كل واحد فاتح 5 الاف نور فى الشقة وسايبه ونايم

يعنى فى حد يقدر يفتح الموبيل ويسيبه ويمشى علشان مكسل يقفل المكالمة

محدش بينكر الفساد ولا التخبط ولا الكلام ده كله بس محدش يحاول يقنع نفسه اننا اعظم شعب فى العالم والمفروض نبقى اقوى من امريكا لولا الحكومى