إعـــــــلان

**A7MED_PHARMA** · 22-12-2009, 03:46 AM

كلنا هذا الرجل يا شريف
...........................
أديك عرفت اني حصل معايا نفس الموضوع..تقريبا بنفس التفاصيل
منا قولتلك قبل كده

.
عموما...
صعب تلاقي بنت تكون بتحبك ..عشان بتحبك
بتحبك عشان ظروفك ..عشان معاك عربيه ومعاك فلوس أو ... أو......
انت فاهمني بقا
تقريبا البنات همهم دلوقتي انها تتجوز واحد مستريح ...يريحها
ومعدش مراعي ظروف الشباب
وكل اب عاوز يجوز بنته..عاوز عريس بنته يبدأ من عند هوا ما إنتهى
يعني المطلوب تكون شاب ..وعندك وعندك وعندك ..وتجيب تجيب وتجيب

طيب نسرق يعني عشان نتجوز
بلاها جواز من اصله ..وأدينا قاعدين هنا في الإجتماعي بننعي حظنا

.
سلامي ليك يا اوكتوووو حبيبي
وشريف حبيبي

**أبو إياد** · 22-12-2009, 09:14 AM

فكرنى طيب ياايفو قولتلى ايه ؟

ودى صوره الباشمهندس اياد

**YaSSerwIN** · 22-12-2009, 10:31 AM

انا مش عارف ازاى بتقولو الجواز مش فلوس ...

اقل شقة فى مكان زبالة مابتقلش عن نص مليون

تخيل بقا تفضل تشتغل طول عمرك لحد لما سنك يبقا 40 سنة علشان تجيب شقة ولما تجهز الفلوس تلاقى الشقة غليت عن الأول

يبقا ازاى مش فلوس
ولسا بقا التقيل جاى

سيراميك بقا ودهان وكهرباء ومصاريف لا تحصر

نخش بقا فى الجد

شبكة مش هاتقل عن 10 بواكى

نخش على تجهيز الشقة تلاقى اهل العروسة يقولولك احنا هانجيب المطبخ والرفايع وانت ولع فى نفسك واملى الشقة فرش

نخش بقا على مصاريف الفرح والاستديو وفستان العروسة والذى منه

كدة انت بقيت على الحديدة دة لو اساسا فيه حديدة ومستلف وعليك أقساط ومديون

يبقا ازاى الجواز مش بالفلوس ...........................؟؟؟؟؟؟

**M.Osman** · 22-12-2009, 12:12 PM

مواقف الخطوبة المحرجة (عمر طاهر)

خدعوك فقالوا: «الخطوبة فترة تعارف».. فمعرفة أي شخص علي حقيقته تحتاج لحياة حقيقية قائمة بالفعل ووقت طويل والكثير من المواقف المشتركة.

الخطوبة هي الفترة التي يقضيها كيس الخضراوات المجمدة مع كيس اللحم المجمد بعد خروجهما من الفريزر حتي يذوب الثلج، ويبدأ الاندماج الحقيقي عندما يصبحان في إناء واحد مع «حبة» ملح وفلفل علي نار هادئة.

أهم ما في فترة الخطوبة هو كمّ المواقف المشتركة التي تجمعك بالطرف الآخر، والتي تعطيك صورة تقريبية للطريقة التي يفكر بها، وأسوأ ما في الفترة نفسها قدر من المراهقة العاطفية التي تفرض علي الطرفين سلوكًا يقوم علي الحساسية المفرطة والتفكير العدواني.

الحساسية المفرطة سببها حرص الطرفين كل فترة علي اختبار قوة الحب الذي يجمعهما، لذلك تنشب مشاحنات يومية حول شئون تافهة تحت شعار الكرامة، وكان المفروض واللي يصح واللي ما يصحش، وفي حقيقة الأمر يود كل طرف أن يعرف مدي قوة الحب الذي يجمعه بالطرف الآخر ومدي قدرة هذا الحب علي تحمل المشاحنات والتفهم.

التفكير العدواني راجع لمحاولة كل طرف أن يعرف كيف يفكر الطرف الآخر، وهو في ذلك يفترض الأسوأ دومًا خوفًا علي حياته من أي صدمات أو مفاجآت.. «ما اتصلش.. يعني أنا مش في باله؟!».. «إنت ماقلتش كده.. يعني أنا كداب؟!».

فقط المواقف الكوميدية هي التي تجعل لأيام الخطوبة طعمًا وتفتح مساحة للمزيد من الحب والتفاهم والاندماج، خصوصا عندما تكون الكوميديا ناتجة عن مواقف محرجة.

والآن.. هل تعرف ما أكثر المواقف إحراجًا خلال فترة الخطوبة؟!

> تقف أنت وخطيبتك في مكان عام ويلفت نظرك أحد الأشخاص بمظهره الكوميدي وتبدأ في فاصل من التريقة بعد أن تلفت نظرها إليه وما إن يقترب منكما حتي تصيح «خالو ماجد..».

> تجلس مع خطيبتك في مكان عام وإلي جواركما منضدة عليها سيدة تضحك كل قليل بصوت عال يميل إلي الخلاعة.. وكلما اقتربت وخطيبتك من لحظة رومانسية تُطلق هذه السيدة ضحكتها المدوية.

> عندما تدعوها للعشاء وتكتشف أنك نسيت محفظتك والأسوأ ألا يكون مع خطيبتك أي نقود، والأسوأ أن يتكرر معك هذا الموقف.

> تقود سيارتك وإلي جوارك خطيبتك وتصيح فجأة «بُص أوضة الليفينج اللي في الفاترينة دي».. وتلتفت لثوان فتصطدم بالسيارة التي أمامك فينزل قائدها فاتحاً صوته في وجهك، وأنت تُنقّل النظر بينه وبين وجه خطيبتك.

> عندما تتأخر عن موعد رجوعك بخطيبتك إلي منزلها فتجد الأب في انتظارك، تصافحه وقبل انصرافك يقول لك «عايزك دقيقة».. وحواره معك في هذه الدقيقة سيكون غالباً حول فكرة: «وناويين علي إمتي إن شاء الله».

> عندما تكتشف أن خطيبتك لا تهاجمها آلام الضروس إلا عندما تكونان بمفردكما.

> عندما تسألك خطيبتك عن أجمل ما فيها فتمعن في البحث عن إجابة رومانسية وتقول لها «لون عينيكي» فترد عليك بنصف ابتسامة «بس دول لينسيز».

> عندما تتفق مع خطيبتك علي حضور حفل زفاف أحد أصدقائك فترتدي ألمع وأروش فساتينها وعلي باب القاعة تكتشف أن الفرح إسلامي.

> عندما تكتشف أن أسعار الأجهزة وقطع الأثاث التي اتفقت مع أهل خطيبتك علي شرائها ليست كما كنت تتخيل أو تعرف نتيجة قلة خبرتك، ويكون عادياً أن تسمع جملة مثل «هو فيه حاجة دلوقتي بألف جنيه».

> تذهب مع خطيبتك إلي كبابجي شهير ويقدم لكما القائمة وفيها أسماء لقطع اللحوم (موزة، نيفا، مخاصي، طحال... إلخ) وتسألك خطيبتك: يعني إيه مخاصي؟!

> عندما تحاول أن تختلس نظرة إلي فتاة جميلة في مكان عام وتضبطك خطيبتك وتواجهك بسؤال بسيط «بتبص علي إيه؟!».

> عندما تتصل بك علي موبايلك صديقة قديمة كنت قد أنهيت علاقتك بها وعادت للظهور وتتصل بك عدة مرات وأنت جالس مع خطيبتك وترفض الرد عليها.. المحرج أن تسألك خطيبتك «ما بتردش ليه؟!» والأشد إحراجاً أن تخطف خطيبتك الموبايل لترد هي بنفسها.

> تغلق تليفونك لتجنب مثل هذه المكالمات وتفتحه فتجد خطيبتك تتصل بك وتسألك وهي متوترة «قافل موبايلك ليه؟!».

> تجلس مع خطيبتك في مكان عام ثم تضحك فجأة وتقول لك بصوت عال «الراجل التخين اللي هناك دا وقّع الأكل»، فتلتفت فتجده ينظر إليكما أنتما - تحديداً - شذراً.

> عندما يقول لك حماك «سوستة بنطلونك مفتوحة».

> لمّا تكون قاعد مع حماتك وخطيبتك داخلة عليكو بالشاي، وهي بتصب لك الشاي يقع عليك ويغرقك - لحد هنا عادي - المحرج لما حماتك تقعد تشد فيك وهي بتقول لك «اقلع البنطلون.. اقلع البنطلون».

> لما تكتشف خطيبتك أنك مسجلها علي الموبايل باسم «elmozza».

> لما تلاقي الجو في الشارع مناسب بعد سهرة رومانسية وإنت وخطيبتك في العربية وخلاص ها تروّحها.. وتطلب معاك «قبلة علي السريع»، وأثناء انهماكك في القبلة تري 2 أمناء شرطة واقفين لك بره العربية ومستنيينك لمّا تخلّص.

نقلاً عن الدستور :)
آسف اتأخرت عليك يا اوكتوو

**hady83** · 22-12-2009, 12:45 PM

عايز تتجوز!!!!!!!!

بصوا يا جماعة أنا من أنصار إن الواحد أول ما يقدر علي الزواج ما يتأخرش بس خدوا بالكم[الزواج إما روضة من رياض الجنة وإما حفرة من حفر ......]

**aomran** · 22-12-2009, 01:03 PM

المشاركة الأصلية كتبت بواسطة terrible_darsh مشاهدة المشاركة

هو الجواز ايه يا اوكتو ! مش واحدة تحب فيها طول اليوم و بس ..

هو فعلا مسئولية كبيرة و الكلام ده مش روتين و لا حاجة .

لو تقدر تجيب سكن و شبكة و تكاليف زواج و اجهزة و تشطيب ألـــــخ , و تقدر تصرف على بيت و تشيل مسئولية كاملة "لوحدك" ..

ساعتها قول عاوز اتجوز براحتـــــــك و هشوف لك عروسة لو عاوز :) ..

كمان ملامح الحياة مش بتتضح الا بعد سن 21 فيما فوق , يعنى استقرارك الشخصي مش هييجى الا بعد ال 21 .

انا انصح بالزواج المبكر للبنات خصوصا فى مصر , لكن الشباب يتقلوا شوية .

حلو الكلام ده
لازم الواحد يكون قادر يشيل مسئولية علشان يفكر في الجواز لان الجواز مش مجرد تكاليف الجواز اللي هي شبكة وشقة وخلافة لا ده بعد الجواز بفترة قليلة في مسئولية ضخمة جدا وهي الاولاد اللي مش هتلحق تتلفت كده من شهر العسل وتلاقيك كل يومين عند الدكتورة بتابع الحمل والولادة وشوية كمان ومش هتلاحق على البامبرز وخلافة وشوية كمان مصاريف الكى جي وبعدها المدرسة
وربنا يعينك يبني:b4_611:
بس تعرف الجواز في احيان كتيرة لذيذ جدا
يعني هتلاقي الذة دي في اول الجواز وهتلاقيها لما تبقى راجع من الشغل وطلعان عينك وتلاقي الدنيا رايقة ومراتك مستنياك بابتسامة - مش دايما يعني بس احيانا - وشوية لما تشوف ابنك اللي لذة رؤيتة اكبر من اي لذة في الدنيا برغم عياطة وزنة ورخمتة بس بجد مجرد ما تشوف ابنك او بنتك يعني ان شاء الله هتنسى كل هموم الدنيا
وربنا يوفق ان شاء الله

**yousef1978** · 22-12-2009, 01:36 PM

بأقولكم إيه يا جماعة
حد فيكم سمع عن زواج الفرند

النوع ده من الزواج وكمان زواج المسيار اتنقاشت الأبحاث الخاصة بيه تقريبا حسب علمي في المجلس الإسلامي العالمي وأباحوا هذين الطريقتين من الزواج

أنا مش هأقولكم على زواج المسيار لكن خليني أديكم فكره عن زواج الفرند
واحد وواحدة بيحبوا بعض أو شايفين نفسهم مناسبين لبعض
لكن ما فيش معاهم إمكانية إنهم يجيبوا شقة وعفش وكده
فبيتجوزوا بفرح عادي وبعلم الأهل وبولي وشهود ومأذون وكل الشروط متوفرة ما عدا السكن الدائم
يعني ممكن فترة من الفترات يقعدوا في بيت أهل الزوج
أو شهر يقضوه في مصيف
أو شقة مفروشة مؤقتة
أو أبو الولد أو البنت يفضوله غرفة كويسه في بيت أو شقة العائلة لغاية ما ربنا يفرجها

أنا شفت واحد دكتور في جامعة المنيا
كنا ساكنين واحنا طلبة في الشارع اللي هو ساكن فيه
وأتذكر في رمضان في إحدى المرات عزم كل الطلبة اللي في الشارع على الإفطار كنوع من الرأفة بنا لآننا والحق يتقال كنا نصعب على أي حد - مساكين إهئ إهئ

مرة قابلت إبنه الصغير - بسم الله ما شاء الله كبر دلوقتي - وسألت عليه قاللي إن أخوه الكبير باباه جوزه أول ما خلص الثانوي
وعرفني على واحد تاني قاللى ده جوز أخته ولما سألت واحد صاحبنا عرفت إن الدكتور جوز بنته اللي في الثانوي لواحد طالب متميز في الكلية كان معجب بيه وكمان مأجر عنده شقة في نفس بيت الدكتور

الدكتور ده والله راجل طيب قوي وعرفت بعد كده إنه بقى عضو مجلس شعب رغم إنه راجل بسييييط جدا وبيواجه الحياة بسلاسة من غير كلاكيع

وكمثال آخر وهذه سمعتها بنفسي في إزاعة القرآن الكريم
كانوا جايبين الأول على كلية طب الأزهر
الولد كان بيحكي إنه لما وصل رابعة ثانوي أزهري - لما كانت أربعة سنوات
قال لأبوه - بص بقى يا حاج أنا جبت آخري
هتجوزني هأكمل مش هتجوزني أنا لا هأنفع لا في ثانوية ولا غيره
الراجل آخر ما غلب جوزه
وربنا كرمه وطلع الأول على الثانوية الأزهرية في السنة دي ودخل طب الأزهر وبيطلع الأول على دفعته

حد فينا من أولياء الأمور أو الشباب يجروء على كده

مين فينا يلاقي بنته متعلقة بشاب محترم ويعرف ربنا ويجوزهم بفرح ومأذون وغيره ويسيبهم يكملوا دراسة مع بعض وممكن يأجلوا موضوع الخلفة مثلا لغاية ما يكون عندهم سكن دائم
ويكتبلها مهر كويس وقايمة زيها زي أي واحدة وبدل ما يأجلوا الجواز خمس ست سنين يسيبهم يتمتعوا ببعض في الحلال ويعيشوا الخمس ست سنين دول وهم سعداء من غير حرمان

مش عارف أنا حاسس إن العالم كله بيعيش حياته الجنسية ببساطة وبدري بدري إلا المصريين
في الغرب على فكره بيلاقوا حل لمشاكلهم يتماشى مع مبادئهم

لكن المسلمين بيضيقوا على نفسهم على الفاضي
ممنوع الزواج المبكر
لازم تجهز كذا وكذا وكذا
ممنوع التعدد
زواج المسيار عيب
زواج الفرند حاجة مش مقنعة

والأهم من ذلك بنسأل في النهاية هم الشباب بينحرفوا لييييييييه؟

أنا الصراحة مش لاقي إجابة على السؤال ده لو حد عارف السبب يقوللي !!!!!!!

...................

**YaSSerwIN** · 22-12-2009, 02:01 PM

بس الكلام دة متعب وهايبقا صباح الشحتتة

مدام مافيش أستقرار يبقا بناقص من الجواز

**m7nsh** · 22-12-2009, 03:51 PM

موضوع جااااااااااامد جداااااااا
و انا انضم اليكو بشده فى جماعه " العالم اللى جابت اخرها "
انا تابعت كل الردود و ماشاء الله الموضوع اتناقش مناقشه جميله جدا
ربنا يرزقنا جميعا الزوجه الصالحه قولو اّمــــــــــــــــــــــــــــــــــــين
واللى اتجوز ربنا يباركله فى بيته و اهله ,,
احييك بشده يا اوكتو (thumbs up)

**bmya** · 22-12-2009, 05:22 PM

المشاركة الأصلية كتبت بواسطة human12 مشاهدة المشاركة

تانى
انسى

اخويا العزيز طارق ممكن لو سمحت تشاركنا برأيك بس بدون هذه الكلمات القليله المحبطه والغير مقنعه يعني ياريت تفسر بس تقصد ايه بانسىىىىىىىىىىىىىىى

Comment

Comment

Comment

Comment

Comment

إعـــــــلان

.

عاوز اتجوز.............. اة عاوز اتجوز فيها حاجة ؟؟؟

Comment

Comment

Comment

Comment

Comment

Comment

Comment

Comment

Comment

Comment