إيه أكتر كائن بتخاف منه وانت سايق ؟

[Abdo_Eldesokey]

الموضوع ده جت فكرته في بالي

كل واحد يقول إيه الكائنات الي بيخاف منها وهو سايق العربية

وهذه الكائنات تشمل :

- تريلات

- أوتوبيسات

- ميني باص

- ميكروباصات

- نص نقل

- ملاكي (شباب)

- ملاكي (كبار السن)

- ملاكي (ستات)

- تاكسيات

- توك توك

- موتسيكلات

- عجل

- بني آدمين

[Abdo_Eldesokey]

أنا هبدأ بنفسي

- تريلات : مش بخاف منهم ، لكن بحرص منهم طبعاً خصوصاً لما أكون على يمينه ، بعمل فرح عشان أعرفه بوجودي جنبه

- أوتوبيسات : بخاف منهم في الـ U-Turns بس ، وغالباً بستناهم لما يلفوا

- ميني باص : عادي مش بخاف منه

- ميكروباصات : بردوا اتعودت عليهم ، مفيش منهم قلق

- نص نقل : بترعب منهم لما تلاقي واحد منهم راكب على شنطة عربيتك وبيرعشلك عشان تعديه ، نفسي أعرف بيعملوا الحركة دي ازاي

- ملاكي (شباب) : معاملة عادية خالص

- ملاكي (كبار السن) : بافتحلهم الطريق وأبعد عنهم لأن معظمهم قدراته في السواقة بتقل بسبب عامل السن

- ملاكي (ستات) : بردوا ببعد عنهم ، ذوقياً وخوفاً على العربية

- تاكسيات : بخاف من حاجة واحدة بس ، لما الباشا السواق يقف فجأة في الحارة اليمين عشان يركب واحد ، ساعتها الخيار بيبقى صعب ، يا تفرمل جامد والي وراك يلبس فيك ، يا تخلع منه من الشمال وتتشتم من الناس الي جاية وراك

- توك توك : أكتر حاجة بتعصبني في الدنيا ، عامل زي الدبان كده ، كل ما تهشه يرجع تاني

- موتسيكلات : بخاف من المتهورين منهم فقط الي بيعدوا من بين العربيات

- عجل : أكتر حاجة بخاف منها حالياً بسبب موقفين حصلولي ، مرة واحد راكب عجلة وزي الباشا بيعدي طريق عربيات وهو باصص الناحية التانية ، حظه جه قدامي ، فرملت جامد ويا دوب خبطه خبطة بسيطة بالاكصدام ، عجلته اتعجنت بس الحمد لله هو مجرالوش حاجة

الموقف التاني لسه حاصل قريب ، كنت لسه مستلم العربية من عند بتاع الدوكو وطالع بيها من عنده فرحان ، فوقفت في شارع جانبي على جنب عشان أتكلم في الموبايل ، فجأة عيل صغير بعجلة 26 قده 3 مرات فقد التحكم فيها وقام جايبلي الرفرف الي ورا بالكامل ، أنا من المفاجأة معرفتش أتكلم ، وطبعاً رحت رشيت الرفرف تاني يوم

من ساعتها وأنا بخاف من العجل جداً ، لأنه ممكن بالجادون يضيعلك جنب العربية

- بني آدمين : الحمد لله اتعودت عليهم وعلى الغباء الآدمي ، مع الحرص في أوقات الذروة عشان الناس مبتبقاش شايفة قدامها

أنا نسيت أحط

العربيات الكارو : بردوا ببعد عنهم لأن مرة واحد فيهم لف عليا في U-Turn بس الحمد لله جت سليمة وضفر الاكصدام بس الي اتكسر مع الإشارة

[HemaVet]

العجل ، فالعجل ثم العجل

بس دول بأخاف منهم وأنا واقف بالعربية مش وأنا سايقها

لأن آخر خدشين (والخدوش الوحيدة للأسف فى العربية بعد ما شديتها) حصلوا وأنا واقف فى إشارة وفى كل مرة كان واحد بعجلة بيحاول يحشر نفسه بينى وبين الرصيف علشان يعدى ...
وواحد منهم (عنده 12 سنة) بعد ما حكنى وأنا واقف زعق فيا وقال لى ايه يا عم مش تحاسب ...

[amrico]

- تريلات: اكتر من 50% منهم بيسوق تحت تأثير المخدرات

- أوتوبيسات: مابمشيش على يمينه ابدا، توقع اي حد ينط منه فجأه ، سواء كان راكب قرر ينط، او حرامي اتقفش بينشل.

- ميني باص: لو بتاع شركة، بيبقى معقول شوية، لكن ممكن برضه يقف في اي مكان عشان ينزل الأستاذ فلان، او مدام فلانة قدام شارعهم بالضبط بدل ماتعدي الشارع، او تمشي شوية، وخصوصا لو كانوا شايلين خضار او اي حاجة.

- ميكروباصات: العن طايفة بالنسبة لي، غرز تلاقي، مفيش انوار اصلا في العربية ولا إشارات تلاقي، افترا وركن فجائي تلاقي، مش عارف اقول ايه ولا ايه.

- نص نقل: اتفق مع الأخ اللي بيقول انهم بيركبوا على شنطة العربية، ساعات كمان ببقى سايق عربيات هاتش باك، فابيكون مشرف معانا في الصالون، وبيكون تذكير ليك بأشكال علامات العربيات، مثلا ممكت تلاقي حرف t كبير في المرايةاللي في النص، تعرف ان دي تويوتا ، او حرف d بحجم المراية كلها تعرف انها دايهاتسو، وهكذا، ادينا بنتسلى

- ملاكي (شباب): بعضهم منظره مستفز اوي وخصوصا اللي بيبقى مايل بزاوية 45 على المخدع اللي جنبه وماسك الدركسيون بطراطيف صوابعه، ومديها اغاني بصوت عالي، وبعضهم محترم جدا

- ملاكي (كبار السن): احتراما للسن، لازم نوسعلهم، لكن الغريب ان بعضهم بيفتري اوي في الطريق وبيعمل حركات تكسف بصراحة.

- ملاكي (ستات): البعد عنهم احسن

- تاكسيات: حسبي الله ونعم الوكيل، هو الوحيد اللي شقيان، وكلنا الست الوالدة هي اللي شاريالنا العربيات.

- توك توك: بستغبى عليهم بصراحة، وخصوصا لو كان ماشي عكسي في التراب اللي على يمين الطريق، خصوصا بلليل بروح ضاربله كل النور اللي في العربية في وشه. وابدأ اجنح يمين شوية عشان ارعبه.

- موتسيكلات: الله يخرب بيت الصين اللي خلت اللي زهقان من الموبايل بتاعه يبيعه ويجيبله موتوسيكل

- عجل: رعب كبير جدا، لأنه في مصر بيعتبر زي المشاة لكن اخطر، وكتير منهم اطفال صغيرين وتوقع منهم اي حاجة.

- بني آدمين: لازم نقدر شعورهم ونصبر عليهم خصوصا في المطر او الحر، ونفتكر النعمة ان احنا قاعدين في العربية مرتاحين وهم تعبانين برة، بس ياريت يلتزموا بأماكن العبور(ان وجدت) ولو عدوا الشارع يعدوا بشكل عمودي، مش بشكل قطري.


وعشان شغلي بسوق كتير جدا في الصحاري وعلى طرق صحراوية (في مصر وخارج مصر) انا هاضيف حاجة مرعبة جدا
الجمال: الجمل خطير جدا للي بيمشي على طرق صحراوية لأنه فجأة بيقرر انه يعدي الشارع وساعتها عينك ماتشوفش الا النور، والأخطر انه بالليل ساعات بيحي يقعد على الأسفلت متفهمش ليه.

ربنا يستر.

[pro_samir]

الحاجات دى كلها مقدور عليها

لكن اكتر حاجه بقيت اخاف منها الظلط ! جالى فوبيا منه بجد

أول مره الأزاز اتكسر وسرطن بسبب ظلطه طارت من عربيه تريلا خد شويه مطبات هوا

وتانى مره عربيه ماشيه قدامى داست على ظلطه طارت فى الأزاز بتاعى زى الطلقه بس الحمد لله كنت ركبته تريبلكس

بس فعلا جالى فوبيا من الظلط لدرجه انى لو معدى من عربيه شايله ظلط أو فى رمل خفيف طاير وعامل صوت ببقى شبه مغمض عنيا وبجرى على قد ما اقدر علشان اعدي

[newuser2009]

- نص نقل زي ما قال الاخ Abdo_Eldesokey
بترعب منهم لما تلاقي واحد منهم راكب على شنطة عربيتك وبيرعشلك عشان تعديه
بصراحه بيعملولي ارهاب

[amrbakly]

أولهم الستات و سواقتهم العجيبة اللي مرة واحدة تجيب من اليمين للشمال في ثانية

ثانيا البني أدمين اللي بيمشوا في الشوارع و لو ضربت فرملة قدامة فجأة يبصلك و كأنة شارع اللي خلفوة رغم أن الرصيف فاضي و كبير و زي الفل، و اللي عايز يشوف أتنح خلق الله ينزل ميدان الجيزة و يا سلام لو واد من شباب صفط اللبن و جايب بقي جاكيت بيلمع من سوق غزة و معاه المزة (اللي طبعا لابسة البادي الكارينا الأصفر الفحفحي و ضاربة شعرها اوكسوجين عند بتاع الدوكو و حاطة في وشها ربع علبة بودرة تلك) و عامل شعرة صابايكي (سبايك يعني شوكة ربنا يحفظنا) و ينقرك حاجب محترم علشان متخيل انك طمعان في المزة بتاعتة، ولا الشاب اللطيف اللي يطلعلك مرة واحدة من تحت الأرض و يتحول إلي لواء مرور علشان يعدي قافلة ستات و بنات و عيال و كأنة الرجل الأخضر !

اما فيما يخص التوكتوك فأنت غلطان انك بتمشي وراة و هو بصراحة اكثر الناس أدبا لأنة ملتزم باليمين دايما ولا يظهر في الشوارع الرئيسية

[بحري]

الموضوع جميل والتعليقات كلها جميلة جدا
أكتر حاجة بخاف منها وأنا سايق هم المشاة للأسباب السابق ذكرها بالإضافة إلى إنه لو حصلت مشكلة لا قدر الله فإنت بتتعامل مع أرواح بشرية مباشرة يعني الخسارة بتبقى مؤلمة نفسيا جدا

[Ralliart]

الحاجات دى كلها مقدور عليها

لكن اكتر حاجه بقيت اخاف منها الظلط ! جالى فوبيا منه بجد

أول مره الأزاز اتكسر وسرطن بسبب ظلطه طارت من عربيه تريلا خد شويه مطبات هوا

وتانى مره عربيه ماشيه قدامى داست على ظلطه طارت فى الأزاز بتاعى زى الطلقه بس الحمد لله كنت ركبته تريبلكس

بس فعلا جالى فوبيا من الظلط لدرجه انى لو معدى من عربيه شايله ظلط أو فى رمل خفيف طاير وعامل صوت ببقى شبه مغمض عنيا وبجرى على قد ما اقدر علشان اعدي

مرره زلطه طارت بنفس الطريقه وخبطط في وش والدي وهو سايق قريب من عينه
بس الحمد لله ربنا ستر

اسوأ حاجه بكرهها كره العما هي التكاتك تحس انها صراصير ولازم يمشي عكس
وبخاف من اي مخلوق متخلف يمشي عكس لان ده بني آدم غبي لدرجه زياده عن اللزوم ولما تكلمه ويقولك واسعه يا استاذ يبقى نفسك تنزل
وبخاف من العجل اللي بيقع قدامك مره واحده وطبعاً لو خبطه الناس هتتلم وتظبطك انت والعربيه بعلقه محترمه ماهو طالما انت راكب عربيه يبقى انت اللي غلطان

[zalpany2000]

الOpject الاولاني طبعا طبعا هو الرداااااار

و بعدين البني آدمين
و دول بقي معظمهم عالم ظريفة جدا جدا
فيه ناس بتعدي الشارع في الحتت اللي لازم يتقال عليهم فيها مخابيل.. زي .. علي كوبري الدائري مثلا ... في منزل اي كوبري ... تلاقيه بيجري في صلاح سالم ... تلاقيه لابس اغمق جلابيه عنده ولابس عمة سودة ويمكن داهن وشه اسود و بيجري يقطع الصحراوي الساعة 2 بالليل -للي مش متمرس ممكن يصنف الكائن ده علي انه شبح-

و فيه نوع تاني بيمشي بمبدأ .. انا امشي و العربيات هي اللي تقف لما تشوفني :)
اما النوع التالت فنوع ظريف جدا بقي .. متخيل نفسه هوجان في زمانه ... يعدي الطريق و يرفع ايده يشاورلك انك تقف ... ولو انت شديت شويه تلاقيه اتسمر في مكانه و مادد ايديه الاتنين قال انه يعني هايوقف العربية ؟؟؟؟

النوع الاخير بقي ده غريييب جدا .. وبدأت ألاحظه مؤخرا ... ناعامات بتعدي الطريق ... مبدئه ... طالما انا مش شايف العربية .. تبقي العربية مش موجوده اساسا :) .. زي النعامة اللي بتدفن راسها في الرمال لما تحس بالخطر.. تلاقي ده بيعدي ووشه الناحية التانية .. مابصش ناحية اتجاه سير العربيات اساسا .. ولو غلط و بص في الاتجاه ده تلاقيه يروح مغير علي طوول اتجاه راسه ... وباصص الناحية التانيه ويقنع نفسه ... انه ما شافكش .. انت شبح .. انت شبح .. هو اكيد ماشافاكش ...

دول الكائنات اللي تقلق اي حد وانت ماشي علي الطريق
تحياتي

[ahmed2y]

باختصار انا بخاف من كل انسان جاهل ومعندوش زوق ومبيعرفش فى قواعد المرور والادب والذوق سواء راكب نقل تقيل او حتى عجلة لان مهما كان العيب بيبقى على الانسان من الجماد

[mrghost]

التوك توك والموتوسيكلات والعجل والميكروباصات

[ams]

انا بخاف من اللى قاعد جنبى

[seqoia]

- تريلات بخاف من المقطورات لانها متبقاش متماسكة مع العربية

- أوتوبيسات بخاف من اليبينزلو منهم قدام العربية

- ميني باص زي اللي قبله

- ميكروباصات بخاف منه وهو ورايا

- نص نقل احيانا واحيانا

- ملاكي (شباب) لو متهورين يخوفو خاصة على الطرق الطوالي

- ملاكي (كبار السن) متقربش منهم اوي

- ملاكي (ستات) بكرهم كره العما في السواقة لا بيشوفو ولا بيفهمو

- تاكسيات بخاف يقف قدامي فجاة
- توك توك نمل

- موتسيكلات مبشوفهمش في المراية فممكن تعمل مشكلة

- عجل محصليش مواقف


هههههههه مسبتش حد كلو بيقلق وفي حاجة تقلق جدا انه تكون راكبة معاك واحدة ست كبيرة (والدتك . خالتك ....)
تجبلك جنان

- بني آدمين يقلقوا فعلا

[Abdo_Eldesokey]

العجل ، فالعجل ثم العجل

بس دول بأخاف منهم وأنا واقف بالعربية مش وأنا سايقها

لأن آخر خدشين (والخدوش الوحيدة للأسف فى العربية بعد ما شديتها) حصلوا وأنا واقف فى إشارة وفى كل مرة كان واحد بعجلة بيحاول يحشر نفسه بينى وبين الرصيف علشان يعدى ...
وواحد منهم (عنده 12 سنة) بعد ما حكنى وأنا واقف زعق فيا وقال لى ايه يا عم مش تحاسب ...

فعلاً ملهمش أمان خالص بتوع العجل لأن حجمه صغير وبيخش في أي مسافة بين عربيتين ، وطبعاً العربية هي الضحية

الحاجات دى كلها مقدور عليها

لكن اكتر حاجه بقيت اخاف منها الظلط ! جالى فوبيا منه بجد

أول مره الأزاز اتكسر وسرطن بسبب ظلطه طارت من عربيه تريلا خد شويه مطبات هوا

وتانى مره عربيه ماشيه قدامى داست على ظلطه طارت فى الأزاز بتاعى زى الطلقه بس الحمد لله كنت ركبته تريبلكس

بس فعلا جالى فوبيا من الظلط لدرجه انى لو معدى من عربيه شايله ظلط أو فى رمل خفيف طاير وعامل صوت ببقى شبه مغمض عنيا وبجرى على قد ما اقدر علشان اعدي

ياه .. ده الظلط مستقصدك يا باشا ، ليك حق تترعب منه ، وفعلاً الواحد لا إرادياً لو فيه شوية رمل أو حصى جايين في وشه تلاقيه لا إرادياً بيغمض عنه زي ما يكون مفيش قزاز

- نص نقل زي ما قال الاخ abdo_eldesokey
بترعب منهم لما تلاقي واحد منهم راكب على شنطة عربيتك وبيرعشلك عشان تعديه
بصراحه بيعملولي ارهاب

المشكلة إنه كده بيربكك ومبتعرفش تتصرف كويس ، كائنات غريبة