إيه أكتر كائن بتخاف منه وانت سايق ؟

[mohamedrabia]

انا بخاف من التريلا اوووي لانهم كلهم بيبقوا لانايمين يا شربين يعني مش سليق اصلااا ببعد عنهم علي قد ما بقدر والدليل علي كلامي اغلبية حوادث الدائري منهم اخر مرة سائق تريلا علي الدائري حب ياخد غرزة ام واخد معاه حوالي 5 عربيات غير طبعا الاصابات الخفيفة انا مش عارف فين المرور في مصر فلحين بس يطبقوا علينا بعربياتنا الصغيرة انا اتعرفت علي واحد شغال في كارتة العربيات التريلا ده بيحلف انا اي سواق بيعدي عليه يدفع لشارب لماسك سيجارة بانجو او حشيش وممكن يعزم عليه كمان حسبنا الله ونعم الوكيل في اي حد يري هذا ويصمت الله ما بلغت

[mohamedhamam]

التريلات ربنا ينجينا منها خصوصاً عندنا فى الاسكندرية الموضوع أوفر قوى بسبب ميناء الاسكندرية و ميناء الدخيلة و عايز أقولكم تريلات من شتى بقاع جمهورية مصر العربية و غالبية سائقيها مدمنى مخدرات

[Dr Ahmed]

البنى آدمين طبعا علشان لو اتسببت فى إصابة حد أو موته لا قدر الله مش عارف حياتى هتبقى شكلها إيه
إنما بالنسبة للحاجات التانية المفروض إنى أخاف من الترلات لإن كل حوادثها سكتها للآخرة سالكة ، إنما الحاجات الخفيفة فأولها الكارو لإن فرامل الحمار والحصان والبغل مش abs فلما بيفرمل بيطير لقدام وممكن تلاقيه قاعد جمبك أو وشه فى وشك لا قدر الله
العجل دا برضه مصيبة ولازم تعمل فرح فعلا لما تشوف حد راكب عجلة علشان يتنيل ويبعد عنك

[sarah5]

البني ادمين لاني لو خبطت حد انا اللي ممكن اموت من الصدمة مش هما ده بالنسبة للطريق العادي
اما طريق السفر التريلات والعربيات بمقطورة

[I.S.L.A.M]

1-العجل يخلى الواحد اعصابة تتحرق وفعلا من اسبوعين معدى من جنب سفارة اطاليا لقيت عيل مفعوص معداش ال14 سنة رفع حصان وضرب منة لخمة ولقيت عجلتة فوق الكابوت بتاعى وفرملت مره واحدة راح وقع يدوب قدام الاكصدام الحمد لله من غير ما يلمس العربية بس كان ساعتها نفسى اطلع عليه امركانى عشان اعلمو الادب .
2- التوك توك وفعلا حلفت ما انزل اى منطقة شعبية بالعربية بس الصراصير دى .
3- عربيات الفولكس الى فى شارع فيصل فجاءة بيقف فى اى وقت من غير ما يبص حواليه .
4-التريلات بس فعلا الواحد لازم يبعد عنهم وعمرو ما يفكر يشد معاهم اولا لان اغلبهم بيبقو شاربين وثانيا لانهم كلهم ماشين على مبدا الكبير يعدى الاول وبيعتبرو كل العربيات الصغيرة دى حشرات ماشية جنبيهم وعشان الاغرب ان العربيات الكبيرة دى طول وهى ماشية بيقعدو يكسرو على بعض على الطريق.
5- الحاويات ام صناديق لان من سنتين شوفت حاوية على الدائرى الصندوق بتاعها انفلت منها ونزل على عربية وراها طبعا خليتها متساوية بالارض ومن ساعتها طبعا بقلق من كل حاوية بتعدى قدامى.

[lancerevolution]

- تريلات : بحب أمشى وراهم انا بعشق العربيات النقل من يوم ما إتولدت

- أوتوبيسات : زى التريلا بحب أمشى وراه

- ميني باص : بحس بغباء و انا ماشى جمبه بسبب مواقف كتييييييييييييير و مفكرين نفسهم راكبين ملاكى فببعد عنهم

- ميكروباصات : إبعد عنه عشان متهور

- نص نقل : عادى بعديه عشان دا واحد مش نازل يلعب بالعربية

- ملاكي (شباب) : ما ببصلوش و بخاف يعمل حركة غبية فببعد عنه

- ملاكي (كبار السن) : كبيرة بحترمهم و ببعد عنهم

- ملاكي (ستات): و الله إكصدامات و فوانيس العربية غالية دا غير السمكرى الى بياخد فلوس كتير

- تاكسيات: أعوذ بالله إفتكر حاجة عدلة

- توك توك : بخاف عليهم

- موتسيكلات : بخاف عليه عشان بيتقلب بسرعة

- عجل : بحترمه و بديله مساحته و كملن بستناه يعدى و مبضربلوش كلاكس عشان ما ألخبطه

- بني آدمين : أجارك الله منهم مفكرين نفسهم سوبر مان

أكتر حاجة بخاف منها الى قاعد جمبى عشان بيوترنى

[بحري]

والله العظيم مرة ماشي بالعربية وواحد ماشي مع نفسه في تلت الشارع كده جنب الرصيف ولما انتبه وآنا بعدي من جنبه بهدوء لقيته زعقلي بعلو حسه وقال: إيه يا بني آدم هو مفيش رصيف؟؟؟؟!!!!!!
والله قالها كده بمنتى الجدية والغضب
غالبا هو نفسه حس بغلطه بس كان عاوز يزعقلي ويجيب الغلط عليا وخلاص وغالبا حصله ما يسمى بالـ mind restriction
عشان كده قال اللي قاله لأن فكرة إنه المفروض يمشي على الرصيف سيطرت على عقله ساعتها

[peregrine]

المبرشميين والمعتوليين من اشباة البشر(المشاة) واى حاجة تانية على الطريق مقدور عليها

[Dr Ahmed]

1-4-التريلات بس فعلا الواحد لازم يبعد عنهم وعمرو ما يفكر يشد معاهم اولا لان اغلبهم بيبقو شاربين وثانيا لانهم كلهم ماشين على مبدا الكبير يعدى الاول وبيعتبرو كل العربيات الصغيرة دى حشرات ماشية جنبيهم وعشان الاغرب ان العربيات الكبيرة دى طول وهى ماشية بيقعدو يكسرو على بعض على الطريق.
.

على فكرة أنا متعود أذل أنفاسهم بالعربية الكانشل ال 850 سى سى
كل مرة وأنا راجع على الزراعى (لو فيه وقت) وألاقى واحد منهم مستلم الشمال وماشى على 50 وللا 40 ومستعبد الناس اللى وراه لازم يخطوه من اليمين أقوم أنا أستعبط وأمشى قدامه أبطأ منه على 30 مثلا ، يبطأ أبطأ إنشا الله أقف لحد ما يزهق وينقل للحارة الوسطى ويحاول يسبقنى أقوم ماشى بسرعته وحاجز برضه الشمال لحد ما عربيات تخش ورايا وميعرفش يرجع شمال أقوم طاير لحد ما ألاقى واحد تانى وهكذا
طبعا هو خايف من الكانشل لأنه عارف قدراتها فبيبعد عنها

[ahmed_h_g]

الأطفال

[pharonicking]

أنا هبدأ بنفسي

- تريلات : مش بخاف منهم ، لكن بحرص منهم طبعاً خصوصاً لما أكون على يمينه ، بعمل فرح عشان أعرفه بوجودي جنبه

- أوتوبيسات : بخاف منهم في الـ u-turns بس ، وغالباً بستناهم لما يلفوا

- ميني باص : عادي مش بخاف منه

- ميكروباصات : بردوا اتعودت عليهم ، مفيش منهم قلق

- نص نقل : بترعب منهم لما تلاقي واحد منهم راكب على شنطة عربيتك وبيرعشلك عشان تعديه ، نفسي أعرف بيعملوا الحركة دي ازاي

- ملاكي (شباب) : معاملة عادية خالص

- ملاكي (كبار السن) : بافتحلهم الطريق وأبعد عنهم لأن معظمهم قدراته في السواقة بتقل بسبب عامل السن

- ملاكي (ستات) : بردوا ببعد عنهم ، ذوقياً وخوفاً على العربية

- تاكسيات : بخاف من حاجة واحدة بس ، لما الباشا السواق يقف فجأة في الحارة اليمين عشان يركب واحد ، ساعتها الخيار بيبقى صعب ، يا تفرمل جامد والي وراك يلبس فيك ، يا تخلع منه من الشمال وتتشتم من الناس الي جاية وراك

- توك توك : أكتر حاجة بتعصبني في الدنيا ، عامل زي الدبان كده ، كل ما تهشه يرجع تاني

- موتسيكلات : بخاف من المتهورين منهم فقط الي بيعدوا من بين العربيات

- عجل : أكتر حاجة بخاف منها حالياً بسبب موقفين حصلولي ، مرة واحد راكب عجلة وزي الباشا بيعدي طريق عربيات وهو باصص الناحية التانية ، حظه جه قدامي ، فرملت جامد ويا دوب خبطه خبطة بسيطة بالاكصدام ، عجلته اتعجنت بس الحمد لله هو مجرالوش حاجة

الموقف التاني لسه حاصل قريب ، كنت لسه مستلم العربية من عند بتاع الدوكو وطالع بيها من عنده فرحان ، فوقفت في شارع جانبي على جنب عشان أتكلم في الموبايل ، فجأة عيل صغير بعجلة 26 قده 3 مرات فقد التحكم فيها وقام جايبلي الرفرف الي ورا بالكامل ، أنا من المفاجأة معرفتش أتكلم ، وطبعاً رحت رشيت الرفرف تاني يوم

من ساعتها وأنا بخاف من العجل جداً ، لأنه ممكن بالجادون يضيعلك جنب العربية

- بني آدمين : الحمد لله اتعودت عليهم وعلى الغباء الآدمي ، مع الحرص في أوقات الذروة عشان الناس مبتبقاش شايفة قدامها

أنا نسيت أحط

العربيات الكارو : بردوا ببعد عنهم لأن مرة واحد فيهم لف عليا في u-turn بس الحمد لله جت سليمة وضفر الاكصدام بس الي اتكسر مع الإشارة

كلام سليم مصراوى اصيل"

[mohamedrabia]

اكتر كائن اخاف منة السيدات وسائقي التريلات لانهم الاتنين بيكونوا مغيبين ومش فارق معاهم حاجه

[shaddadfalcon1]

جميع ماسبق