اطرف المواقف التى تعرضت لها فى ايام الامتحانات

[ganash]

كنت فى اولى كليه كنا لما ندخل اللجنه يقولو اقفلوا الموبايل او سلموه قبل ما تدخل المهم انا عملته صامت وانا منزل برنامج الاذان بعد لما الاذان يخلص ب10 دقايق الموبايل يرجع عام وانا قاعد فى نص المدرج واللجنه ساكته كلها بتحل وانا من ضمنهم ببص لقيت الموبايل بيرن كللله نزل ضحك عليه والحمد لله اخدوا الموبايل بس اخدته بعد ما خلصت

[pro_samir]

انا مكنتش بحب أيام الكلية خالص يعنى بدخل من باب الجامعة يجيلي اكتئاب وبعدين استغليت فرصة انى اشتغلت ومبقتش اعتبها الا فى الأمتحانات حتى مكنتش باخد اجازة أيام الأمتحانات

المهم فى تلات مواقف مش ناسيهم

أول موقف كان فى مادة سخيفة بتاع دكتورة أسخف كانت اترقت وبقت رئيسة القسم ، المادة كانت فى سنة تانية على ما أذكر

المادة دى شيلتها خمس سنين بسقط فيها وبعدين دخلتها دور سبتمبر كمان

المهم روحت للدكتورة قبل دور سبتمبر كانت هى المادة الوحيدة اللى معايا لسة

دخلتلها المكتب وفضلت واقف ساكت خالص لحد ما خلصت كل الناس اللى معاها وبصتلى باستغراب كدة أيوا يابنى عايز إية

وانا طبعا واقف متجهم جدا وبعدين قلتلها حضرتك انا معايا مادة كذا وامتحنتها خمس مرات وداخل فيها دور سبتمبر ومش فاضلى فى الكلية غيرها فا قلت اجى لحضرتك علشان اعرف اية الوضع

اتخضت جدا لأن الكلام كان معناة هنجح ولا هتتقتلى هنا

قالتلى يابنى انا اول مرة اشوفك انت حضرتلى قبل كدة !

ورغينا شوية وبعدين قالتلى حاضر ربنا يسهل بس ذاكر كويس

والحمد لله نجحت فيها بس الصراحة كان موقف مسخرة وكل ما افتكر شكلها ساعتها بموت من الضحك ههههه

الموقف التانى بقى افتكر ان كان فى لجنة سايبة خالص وانا مكنتش حتى بعمل برشام ولا حاجات من دى .. فا صعبت على واحد من المراقبين و راح جابلى برشام من زميلنا فى اللجنة هههه

وانا كنت محتاس بالبرشامة مش عارف احطها فين وكل شوية يجيلى يعدلى ورقة الأجابة و يورينى احط البرشامة ازاى علشان اعرف انقل منها يعنى كان ناقص انة ياخد ورقه الأجابة ويحللى هوا هههههههههه

الموقف التالت

فى سنة من السنين كانت اللجنة فى الدور الخامس فانا كنت بسترخم السلم و كنت بدخل من الباب الرئيسي على سلم الدكاترة واخد الأسانسير للخامس

لحد ما مرة عامل الأسانسير لاحظ انى مبجيش كل يوم فا قالى هو حضرتك معانا هنا ؟ قلتلة اة و فضل يسأل لحد ما قلتلة انى طالب وبمتحن (محبتش اكدب يعنى) .. الراجل اتخض كدة وراح موقف الأسانسير ومنزلنى وقالى لو سمحت دة للعاملين فقط هههههه طبعا كان شكلى زى الفل

بس انا كنت متعود على كده نظام الواحد يضرب معلقتين ثقة وبعدين ادخل من الأبواب بتاع العاملين علشان كانت بتبقى رايقة مفيش زحمة حتى على باب الجامعة كنت بدخل من باب الموظفين برضو والناس كانت بتتخم فيا

[Eng_Mostafa_89]

السنة اللى فاتت كنت فى امتحان رسم هندسي الامتحان مدتة 4 ساعات
وانا الحمد لله من عشاق الرسم جدا
المهم داخلت الامتحان والدنيا تمام وعايش حياتى وارسم
وبعد 1.20 دقيقة اكتشفت الكارثة!!!!!!!!!!!!!!!!!!!!!!!!!
انا قالب اللوحة(كان مدينى راسي وجانبى وانا رسمت على اساس انهم راسي وافقى) وعلشان اظبطها لازم امسحها كلها وارسمها من تانى
طبعا انا بمسح ونفسي اعيط تيجى معيدة تقولى اية اللى انت بتعملة دة انت بتمسح اللوحة قلتلها منا عارف انا راسم غلط علشا كدة بمسح تقولى لاء متمسحش وكمل على كدة قلتلة طيب وكملت مسح
المهم رسمت الرسم اليكانيكى وكان عندى خيار من الاتنين ياما ارسم الاستيل وهو علية 25 درجة او احل الهندسة الوصفية وطبعا عليها 50 درجة
طبعا حليت الوصفية والحمد لله جبت فى الرسم جيد جدا
بس بصراحة احساس وحش جدا وانت بتمسح حلك كدة


وفى مادة من المواد المعيد جى يدينى الورقة فبخدها منة وهو ماسك فيها
فبيقولى انت جى تمتحن فبقولى لا انا جى اخد فكرة وامتحن بكرة لقيت اللجنة كلها راحت ضاحكة
المعيد كان فكرنى مش تبع الكلية وجى امتحن مكان واحد
اطلع الكرنية مش مصدق واطلعلة البطاقة مش مصدق
مقتنعش غير لما سأل اللى حواليا هو دة معاكم
الغريب ان المعيد دة تقريبا كان كل يوم بيراقب علينا

[NFS]

انا ليله امتحان الرياضه فى اعدادى هندسه قعدت العب ps انا و صحابى لحد ميعاد الامتحان.


و يوم امتحان الماتيريال فى اولى ميكانيكا وقفت على كورنيش المعادى ساعه و نص بسبب حادثه بجد كنت حاسس انى هقطع نفس, كان هاين عليا اركن العربيه على جنب و انزل اخدها جرى للجيزه.

[maka]

احساس هايل لما تذاكر مادة ...وتروح الإمتحان تلاقي نفسك هتمتحن ماده تانيه خالص
حصلت ليا في طب القصر العيني

و الاحساس الاجمل ان دكتور المادة يلغى اخر صفحة فى المنهج و تخش تلاقى الامتحان كله على الصفحة دى وسوال واحد على باقى المنهج

و الاجمل منه ان معيد الدرس يلغى قانون و تخش تلاقى عليه مسائلتين

اما الجامد فحت لما تبقى اللجنة مفتوحة على الاخر وقاعد انت و 5 عاملين بارتيتة غش و مفيش ولا كلب منهم عارف يحل نص سوال

[I.S.L.A.M]

بس كانت صدمه وأنا واقف قدام اللجنه ....العيال كلها ماسكه ورق فيسيولجي
وأنا واقف مستغرب وأفول ...هيا العيال دي إتهبلت ولا إيه؟؟

هههههههههههههههههه ههههههههههههههه
طب اقولك انا بقى على حاجة تكسف انا طول عمرى بكره الكيميا وعملالى عقد وكلاكيع لغاية دلوقتى دا حتى فى الثانوية العامة جبت 24 بس من 50 على الرغم من المجهود الجبار الى عملتو فيها والصراحة الواحد عمره ماحس بالغباءغير فى المادة دى مش عارف ليه كان كل حصة بحس ان دى اول مره اسمع فيها عنى حاجة اسمها كيمياء المهم الغباوة دى كان بدايتها معايا من اولة ثانوى يعنى تاريخها معايا زى الزفت والصراحة كانت اول مره افكر فى حياتى اعمل برشام لانى بصراحة كنت خايف جدا اسقط فيها على الرغم من محاولاتى المستميتة فى تحضير عفريت الكيميا بس للاسف المهم عملت برشامة بيتى واخدها تانى يومين الامتحان واول ما استلمت ورقة الاجابة رميتها فيها وقولت ابقى ابوص فيها بس المصيبة ماجتش حاجة منها خالص المهم حليت الى ربنا قدرنى عليه وماحتجتش البرشامة وخرجت من غير ما اشيل البرشامة نسيتها فى ورقة الاجابة وخرجت وبعد ما نزلت من السلم وداخل الحوش افتكرت قمت جارى على طول على فوق ودخلت اللجنة تانى واقعد اتحايل على المراقب واقولة ان انا نسيت الفولس جوه الورق طبعا هو ماصدقنيش بس عشان يخلص منى لسه بيفتح الورق روحت خطفت البرشامة وطلعت اجرى وهو ملحقنيش بس الحمدلله الموضوع عدى على خير ونجحت !! والغريبة ان تانى يوم المراقب شافنى ولا عملى اى حاجة .

[pro_samir]

فبيقولى انت جى تمتحن فبقولى لا انا جى اخد فكرة وامتحن بكرة لقيت اللجنة كلها راحت ضاحكة

ههههههههههه

[A7MED_PHARMA]

اما الجامد فحت لما تبقى اللجنة مفتوحة على الاخر وقاعد انت و 5 عاملين بارتيتة غش و مفيش ولا كلب منهم عارف يحل نص سوال

جربتها مرة والله ...العيال كلها حمير مش فاهمه حاجه ..وأنا معاهم برضوو
ههههههههههههههههههههههههههههههه

روحت خطفت البرشامة وطلعت اجرى وهو ملحقنيش بس الحمدلله الموضوع عدى على خير ونجحت !! والغريبة ان تانى يوم المراقب شافنى ولا عملى اى حاجة .

شغل محترفين
ههههههههههههههههههههههه

.
موقف بقا حصلي ..ومش هتكسف أقوله
كنت بمتحن مادة الرياضة ..في صيدله
ماده كده مش لها لزمه في أي حاجه في صيدلة
ولو شلتها ..مش بتتحسب مادة نجاح وسقوط
المهم

كنت رايح على أمل إني أعرف أسمسر أي كلمتين من العيال
بس محدش فبهم كان مذاكر
الأهم
واحد زميلتنا كانت options

أنا طبعا بعد مانقلت ورقه الأسئله كلها في ورقه الإجابه مرتين تلاته
قعدت بقا أركز مع زميلتنا دي لحد نص الوقت لما عدى وطلعت
.
وطبعا كل العيال كانوا مركزين زيي كده
كانت كده كده بايظه بايظه

[Eng_Mostafa_89]

وخرجت من غير ما اشيل البرشامة نسيتها فى ورقة الاجابة وخرجت وبعد ما نزلت من السلم وداخل الحوش افتكرت قمت جارى على طول على فوق ودخلت اللجنة تانى واقعد اتحايل على المراقب واقولة ان انا نسيت الفولس جوه الورق طبعا هو ماصدقنيش بس عشان يخلص منى لسه بيفتح الورق روحت خطفت البرشامة وطلعت اجرى وهو ملحقنيش بس الحمدلله الموضوع عدى على خير ونجحت !! والغريبة ان تانى يوم المراقب شافنى ولا عملى اى حاجة .

واحد كان معانا فى المدرسة واحنا فى 2 ثانوى حط البرشام فى الكراسة وسلمها ونسية
بس للاسف معرفش حصلة اية

ومرة تانى شقت برشامة زى الفل بس الواد اللى كان عاملها فنان بجد لو كنت شفتة كنت عملتلة برائة اختراع
عارفين الورق الشفاف اللى بيتلزق دة
الواد دة طبعا علية حاجات تبع الفرنساوى المهم الديسك اللى بنكتب علية لونة بنى غامق والواد عامل الكتابة لونها اسود
ولا كانها موجودة بس بصراحة فكرة جديدة

[A7MED_PHARMA]

أحدث طريقه للغش بقا
واحد صاحبي لسه عاملها في الترم ده
وناجحه 100 %
سماعه بلوتوث ...وخط بيزنس ..وواحد صاحبه بره اللجنه
وطبعا كان رابط ايشارب في ايده ( زي العيال السيس ) ومخبي تحته السمعه

[dr-mohamed]

[QUOTE=engmohamed;3872277153]
و بعدين بعيد عنكم..جالى مغص جامد قوى..عايز أروح الحمام....عفوا ممنوع الخروج للحمام.مفيش إزاى؟؟ده انا حبهدل الدنيا كده..
النصيبه إن المشكله دى عندنا فى كليه الهندسه ..وهى ممنوع أى حد يروح الحمام!!!!!!!!!!!!!!!!
و بنهااااااااتى..ومحدش بيسمعلنا خالص..رغم إنى كنت قريت فى اللايحه بتاع الجامعات المصريه إن من حقى أشرب شاى وأى مشروب تانى مع كل البسكوتات..و من حقى اخرج عشان أدخن اربع مرات..ومن حقى اخرج للحماام..عدد لا نهائى من المرات..بس طبعا مفيش حاجه عدله على مستوى البلد..
/QUOTE]

طبعا الاول ربنا يوفقك في الامتحانات
بس بعلا ممنوع الخروج من اللجنة للحمام نهائي
ونفسي اعرف مين العبقري اللى قالك ان منحقك شاي وبسكويت وكمان تطلع تدخن 4 مرات ؟
واشمعني 4 مرات ليه مش 3 او 5 ؟
بالمرة كان كمل الفتوي بتاعته ويشوف حل لاخوانا اللى بيشيشوا هل ممكن يجيب شيشة معاه ولا لا؟ ولو ممكن يبقي الطالب مسموح له بكام حجر في اللجنة ؟
يا جماعة بطلوا تهريج فيه لوائح للمتاحانت والناس مبتعرفهاش وبعد كدة تشتكي واللى بيقوم بشغله صح يبقي هو اللى خارب البلد

ورحت الامتحان مالقيتش اى حاجة من الى شفتها فى الكتاب ولما خرجت وانا ماكتبتش غير اسمى كان نفسى انتحر بس بعد ما اموت الدكتور

الرياضة انا كنت مذاكرهاااااااااااا جدااااااااا برضة هههههههه ودخلت الامتحان وحليييت وفى الاخر لما خرجت لقيت الناس بتقولى انى حليت الاسئلة الاختيارى وسبت الاجبارى (كانوا فى ظهر الورقة وانا مااخدش بالى منهم) المعيد الغبى ادانى الورقة بالعكس (ههه وانا ذكى ومابصيتش فى ظهر الورقة )

اعمل اية فى نفسى وبكرة عندى امتحان فيزياء ومش عارف اذاكرها

يعني مرة الدكتور مبيفهمش وحط الامتجان بالعند علشان متعرفش تحل رغم انك فاهم المادة مووت
ومرة المعيد غبي علشان اداك الورقة ونسي يقولك ان ضهر الورقة فيه اسئلة رغم ان كل زمايلك اكيد محدش قالهم واكيد المعيد الغبي اداهم الورقة من اي ناحية بس هما بصوا على الناحية التانية يعني انت الغلطان
يبقي مرة الدكتور غلطان ومرة المعيد غبي رغم انك في المرتين انت الغلطان

الدكتور الخفيف بيقلى ممنوع انت متاخر مردتش عليه و طلعتله االمحضر ومخالفه الرادار سابنى ادخل من غير كلام زيادة و الاغرب انى جبت جيد جدا فى المادة دى

وحضرتك رايح الامتحان متاخر نص ساعة يبقي من حق الدكتور يمنعك من دخول اللجنة نهائيا
ولما الراجل يتساهل معاك ويدخلك تقول عليه الدكتور الخفيف ؟
كمات متردش على الدكتور وتطلع له المخضر ومخالفة الرادار وكانك جايب تصريح من رئيس الجمهورية
ايه يعني مخالفة ردار ولا محضر
مش عذر لدخولك اللجنة متاخر نص ساعة
والله انا لو مكانه وعملت معايا كدة وبقولك ممنوع الدخول متردش عليا وتطلع لي الورقتين دول ما انت داخل لو جبت رئيس الجامعة نفسه
من حق الطالب يدخل حتي 15 دقيقة بعد الامتحان بعذر وممنوع الدخول بعد 15 دقيقة ودي لوائح الامتحانات ومش من حق اي حد يدخل بعد كدة مهما كان السبب
والراجل الطيب اللى دخلك تقول عليه الدكتور الخفيف ؟

وفى مادة من المواد المعيد جى يدينى الورقة فبخدها منة وهو ماسك فيها
فبيقولى انت جى تمتحن فبقولى لا انا جى اخد فكرة وامتحن بكرة لقيت اللجنة كلها راحت ضاحكة
المعيد كان فكرنى مش تبع الكلية وجى امتحن مكان واحد
اطلع الكرنية مش مصدق واطلعلة البطاقة مش مصدق
مقتنعش غير لما سأل اللى حواليا هو دة معاكم
الغريب ان المعيد دة تقريبا كان كل يوم بيراقب علينا

طب بذمتك ده اسلوب مع المعيد المسئول عن اللجنة ؟
واحد تاني مكانه كان قالك خلاص تعال امتحن بكرة وحولك للتحقيق واتحرمت من المادة دي على الاقل لانك كدة اهنته في محل عمله

و الاحساس الاجمل ان دكتور المادة يلغى اخر صفحة فى المنهج و تخش تلاقى الامتحان كله على الصفحة دى وسوال واحد على باقى المنهج

و الاجمل منه ان معيد الدرس يلغى قانون و تخش تلاقى عليه مسائلتين

اما الجامد فحت لما تبقى اللجنة مفتوحة على الاخر وقاعد انت و 5 عاملين بارتيتة غش و مفيش ولا كلب منهم عارف يحل نص سوال

بصراحة بقة دي من المواقف القليلة اللى فطستني من الضحك من اكتر من ناحية
الاولي ان دكتور المادة لئيم جدا ما شاء الله بيفكرني بالاستاذ عقدة بتاع احمد رجب في كتابه صور مقلوبة لما كان بيحط امتحان الثانوية العامة
والمعيد بردو دماغ جدا لما هو مش قد المادة بيدرسها خصوصي ليه
والاجمل بارتيتة الغش اللى على الفاضي دي

[dr-mohamed]

اكلمكم انا بقة من الجانب المضاد المرة دي واحتمال اقول من جانبكم لو كتبت تاني هنا
اظرف المواقف من الناحية العكسية زي ما انتم لكم مواقف طريفة زي ما المراقبين كمان بيحصل معاهم مواقف طريفة
انا في كليتي معروف كويس ان الطالب اللى معاه برشامة لو لقاني انا اللى في اللجنة يقوم قبل ما اوزع الورق يرمي البرشامة برة اللجنة ويدخل تانى وامره لله يعني مفيش غش
و ده مش ظلم لحد بالعكس ده العدل ان كل واحد ياخد على اد مجهوده وبما يرضي الله وفي المقابل بيهيأ الجو للامتحان قدر الامكان للطلبة
المهم
دخلت مرة امتحان وواقف في المدرج عند المنصة مبتكلمش خالص والامتحان شغال عادي وانا واقف مكانى مش بتحرك
بعد حوالى نص ساعة اتحركت لاول مرة ورحت لطالب في اخر المدرج وفتحت كراسة الاجابة بتاعته وطلعت البرشامة منها واخدت ورقة الاجابة والبرشامة وبعته على الشئون القانونية
ورجعت مكانى واقف عند المنصة من غير ولا كلمة اكتر من ربع ساعة وفجاة اتحركت لنص المدرج ورحت لطالبة وقومتها من مكانهاواخدت البرشامة من تحتها وبصيت فيها لقيت فيها اجابة السؤال اللى هي بتحله وخلثتها تحصل زميلها على الشؤون القانونية ورجعت وقفت عند المنصة
بعدها بحوالى ربع ساعة تانى رحت لطالب في نصر المدرج وقلت له مش قلنا الموبايلات تبقي مقفولة طبعا الموبايل لا كان رن ولا اي حاجة بس انا لاحظت انه بيبص على الموبايل بشكل مريب وكل شوية يمسكه وهو مغطيه بورقة الاجابة
ومسكت الموبايل وبشوف ايه اللى شغال فيه لقيت قائمة الاسماء والاستديو ضغطت على الاستديو اتفتح ببص لقيته مفتوح على صفحة من الكتاب بقلب في الصور لقيت الواد مصور صفحات كاملة من الكتاب وعامل فهرس ليها طبعا حصل اخواته ورجعت مكانى عند المنصة
المهم استمر الوضع بنفس الطريقة حوالى 6 او 7 مرات

زهقت من الوقفة قلت روح ارجع اقعد في نص المدرج علشان اشوف من الناحية العكسية رحت قعدت على البنج من فوق وخليت الطالب اللى جنبي يدخل شوية
والواد عمال يبص لي من غير ما يفتح بقه بكلمة
فجاة
لقيته بيقولي بص يا دكتور من الاخر الورقة اهيه ومد ايده وطلعها من الجزمة وبيديني ورقة برشام
مبقتش عارف اعمل ايه
انا مش جاي امسكه ومعرفش ان معاه برشامة وهو اللى سلمها بنفسه من الخوف لما لقاني كل ما اروح لحد اطلع البرشام منه
ضحكت وبصيت عليها لقيته منقلش منها حاجة اكتفيت بطرده من اللجنة بدون محاضر وانا بضحك



طبا اخواننا البرشماتية زعلانين مني جدا
بس بجد لما بتغش مش ده حق حد من زمايلك ؟
يعني لما بتغش بتاخد حاجة مش من حقك
وبتغش نفسك قبل ما تغش الاخرين
كما قال الرسول الكريم من غشنا ليس منا

[Eng_Mostafa_89]

اقتباسالمشاركة الأصلية كتبت بواسطة Eng_Mostafa_89وفى مادة من المواد المعيد جى يدينى الورقة فبخدها منة وهو ماسك فيها
فبيقولى انت جى تمتحن فبقولى لا انا جى اخد فكرة وامتحن بكرة لقيت اللجنة كلها راحت ضاحكة
المعيد كان فكرنى مش تبع الكلية وجى امتحن مكان واحد
اطلع الكرنية مش مصدق واطلعلة البطاقة مش مصدق
مقتنعش غير لما سأل اللى حواليا هو دة معاكم
الغريب ان المعيد دة تقريبا كان كل يوم بيراقب علينا
طب بذمتك ده اسلوب مع المعيد المسئول عن اللجنة ؟
واحد تاني مكانه كان قالك خلاص تعال امتحن بكرة وحولك للتحقيق واتحرمت من المادة دي على الاقل لانك كدة اهنته في محل عمله


طيب وهو معلش سؤال يعنى
دلوقتى دى لجنة وانا قاعد فيها هكون جى اعمل اية غير انى امتحن ولو انا مش جى امتحن اخدت كراسة الاجابة وسطرتها لية؟؟؟
وعلى فكرة انا شكلى عادى يعنى مش زى الشباب اللى مخها ضارب ومسقط البنطالون ولا عامل حاجة فى شعرة فاعتقد ان دة كان سؤال غريب انت جى تمتحن؟؟

[Eng_Mostafa_89]

طبا اخواننا البرشماتية زعلانين مني جدا
بس بجد لما بتغش مش ده حق حد من زمايلك ؟
يعني لما بتغش بتاخد حاجة مش من حقك
وبتغش نفسك قبل ما تغش الاخرين
كما قال الرسول الكريم من غشنا ليس منا

على فكرة انا بحب الناس اللى زي حضرتك فعلا
لان بجد اللجنة يبيقى فيها هدوء وتلاقى الواحد مركز
بس بجد فى نوعية من المراقبين بيبقوا مستفذين اللى هو واقف فى اول المدرج وعمال يزعق وخلاص
عارف بحس انى متور جدا مع انى عارف كويس جدا ان الكلام مش لية

[pro_samir]

اكلمكم انا بقة من الجانب المضاد المرة دي واحتمال اقول من جانبكم لو كتبت تاني هنا
اظرف المواقف من الناحية العكسية زي ما انتم لكم مواقف طريفة زي ما المراقبين كمان بيحصل معاهم مواقف طريفة
انا في كليتي معروف كويس ان الطالب اللى معاه برشامة لو لقاني انا اللى في اللجنة يقوم قبل ما اوزع الورق يرمي البرشامة برة اللجنة ويدخل تانى وامره لله يعني مفيش غش
و ده مش ظلم لحد بالعكس ده العدل ان كل واحد ياخد على اد مجهوده وبما يرضي الله وفي المقابل بيهيأ الجو للامتحان قدر الامكان للطلبة
المهم
دخلت مرة امتحان وواقف في المدرج عند المنصة مبتكلمش خالص والامتحان شغال عادي وانا واقف مكانى مش بتحرك
بعد حوالى نص ساعة اتحركت لاول مرة ورحت لطالب في اخر المدرج وفتحت كراسة الاجابة بتاعته وطلعت البرشامة منها واخدت ورقة الاجابة والبرشامة وبعته على الشئون القانونية
ورجعت مكانى واقف عند المنصة من غير ولا كلمة اكتر من ربع ساعة وفجاة اتحركت لنص المدرج ورحت لطالبة وقومتها من مكانهاواخدت البرشامة من تحتها وبصيت فيها لقيت فيها اجابة السؤال اللى هي بتحله وخلثتها تحصل زميلها على الشؤون القانونية ورجعت وقفت عند المنصة
بعدها بحوالى ربع ساعة تانى رحت لطالب في نصر المدرج وقلت له مش قلنا الموبايلات تبقي مقفولة طبعا الموبايل لا كان رن ولا اي حاجة بس انا لاحظت انه بيبص على الموبايل بشكل مريب وكل شوية يمسكه وهو مغطيه بورقة الاجابة
ومسكت الموبايل وبشوف ايه اللى شغال فيه لقيت قائمة الاسماء والاستديو ضغطت على الاستديو اتفتح ببص لقيته مفتوح على صفحة من الكتاب بقلب في الصور لقيت الواد مصور صفحات كاملة من الكتاب وعامل فهرس ليها طبعا حصل اخواته ورجعت مكانى عند المنصة
المهم استمر الوضع بنفس الطريقة حوالى 6 او 7 مرات

زهقت من الوقفة قلت روح ارجع اقعد في نص المدرج علشان اشوف من الناحية العكسية رحت قعدت على البنج من فوق وخليت الطالب اللى جنبي يدخل شوية
والواد عمال يبص لي من غير ما يفتح بقه بكلمة
فجاة
لقيته بيقولي بص يا دكتور من الاخر الورقة اهيه ومد ايده وطلعها من الجزمة وبيديني ورقة برشام
مبقتش عارف اعمل ايه
انا مش جاي امسكه ومعرفش ان معاه برشامة وهو اللى سلمها بنفسه من الخوف لما لقاني كل ما اروح لحد اطلع البرشام منه
ضحكت وبصيت عليها لقيته منقلش منها حاجة اكتفيت بطرده من اللجنة بدون محاضر وانا بضحك



طبا اخواننا البرشماتية زعلانين مني جدا
بس بجد لما بتغش مش ده حق حد من زمايلك ؟
يعني لما بتغش بتاخد حاجة مش من حقك
وبتغش نفسك قبل ما تغش الاخرين
كما قال الرسول الكريم من غشنا ليس منا

طيب متقولنا يا دكتور حضرتك فى جامعة إية علشان ننصح الناس تدخل جامعة تانية