اطرف المواقف التى تعرضت لها فى ايام الامتحانات

[abogogo]

مرة كنت بمتحن وكنت في اخر اللجنة وجنبي واد عامل زي الدولاب وكان معاه برشام مش عارف يغش منه ازاى المهم اخذته منه وقعدنا نغش منه سوا المراقبة شكت فينا كانت حامل وتعبانه قامت جابت كورسي وجلست بنا وقالت له بص في ورقتك لاحسناسحب منك الورقة واسقطك رد عليها الواد وقالها عشان اسقطك انا كمان طبعا الدنيا هاصت والمراقبة انفعلت بس الواد كان منظره يخوف المراقبين كانو خايفين منه ولموا الدور وهدوا الجو وخرجو ا المراقبة بره كان يوم مسخرة فعلا
ومرة في امتحان الدين تانيه ثانوي كان معنا في اللجنة 5 طلاب مسيحيين منهم واحد جاري وصحبي كنا بنروح سوا مع بعض المهم خلصت الامتحان وهو كان موقعه في اللجنة في الصف اللى جنبي فبشاور له اني هستناه بره مش همشى المراقب مسكنا وقال ياكفره بتغشوا في الدين مسك ورقتي وورقته وكمان مسلم ومسيحي يعني غشاشين واغبيه
الموقف اللى مش ممكن هنساه انا خريج 1998 وحده زميلتي كان معاها برشامه فيها 6 اجوبه اخذت منها نسخه ودخلت الامتحان لقيت 6 أسئله اجبتهم معايا بظبط المهم عرفت اطلع البرشامة وأنقل منها طبعا بعد ستر ربنا وجبت امتياز في المادة دي ولحد الان مش عارف الزميله دي جابت اجوبة الاسئلة دي منين ؟؟!!

[I.S.L.A.M]

[QUOTE]

المراقبة شكت فينا كانت حامل وتعبانه قامت جابت كورسي وجلست بنا وقالت له بص في ورقتك QUOTE]

بمناسبة المراقب الحريمى كان واحد صاحبى فى اللجنة داخل ابيض وميح فى كل حاجة ولغاية نص الوقت مكتبش غير اسمه المهم كان عمال يحاول يلقط منى اى حاجة وحاولت اديه الى فيه النصيب راحت المراقبة الى سنها فوق الاربعين حسيت ان الواد هيغش بس ما شافتوش وهى جايه عليه راح وقف وقالها ونبى يا استاذه احنا زى ولادك ودى ايام امتحانات وعشان خاطر ربنا يكرمك فى ولادك راحت ردت عليه وقايلالوه انتى جيت على الجرح انا معنديش ولاد ولسه ما اتجوزتيش !! طبعا اللجنة كلها راحت مكشرة وحسيت ان صاحبنا ده هو السبب فى عنوستها حتى الان راحت جايبة كرسى وفضلت قاعدة جنبة لغاية اخر دقيقة وحلفت لو شافتو بيهمش بعنية هتعملو مجلس تحقيق وساعتها محلش غير سوال واحد بس.

[dr-mohamed]

على فكرة انا بحب الناس اللى زي حضرتك فعلا
لان بجد اللجنة يبيقى فيها هدوء وتلاقى الواحد مركز
بس بجد فى نوعية من المراقبين بيبقوا مستفذين اللى هو واقف فى اول المدرج وعمال يزعق وخلاص
عارف بحس انى متور جدا مع انى عارف كويس جدا ان الكلام مش لية

وانا كمان بحبك يا درش

طيب متقولنا يا دكتور حضرتك فى جامعة إية علشان ننصح الناس تدخل جامعة تانية

هههههههههههههههههههههههههههههههههههههههههههههههههه هههههههههههههههه
لسوء حظ البرشماتية كل جامعة وكل كلية هاتلاقي فيها واحد زيي
ليا اصحاب كتير في اكتر من جامعة ولما بنتقابل خصوصا بعد الامتحانات بنقعد نحكي عن المواقف اللى بتحصل معانا في اللجان وبتبقي سهرة كلها ضحك

مرة واحد زميلنا مسك بنت بتغش بس المصيبة ان البنت كاتبة الاجابة على دراعها طب هيدبس لها البرشامة في الورق ازاي ؟؟؟؟؟؟
بسرعة بديهة اخد الطالبة على مكتب العميد وخلى السكرتيرة تصور دراع البنت على ماكينة التصوير واخد الصورة ودبسها في ورقة الاجابة وحولها للتحقيق

[kh_talaat]

انا لحد دلوقتى بحلم ان عندى امتحان واتأخرت او راحت عليا نومة او نسيت الاقلام او نسيت القراءة والكتابة

أنا برضه لحد دلوقتي بحلم نفس الحلم مش عارف ليه على الرغم اني خلصت جامعه من اكتر من 8 سنوات لكن لازم كل فتره احلم اني قاعد في الأمتحان وورقة الأسئلة قدامي ومش عارف احل حاجه


هحكيلكم على موقف حصلي كنت في سنة اولى تجارة جامعه القاهرة وأنا سكن قريب قوي من الجامعه وكنت باخدها مشي ، المهم كان عندي مشكلة في مادة ومش عارف افهم مسأله معينه كدة المهم كلمت واحد صاحبي معايا في المجموعة ليله الأمتحان وقالي خلاص هعدي عليك في البيت بكره بدري واشرحهالك

المهم جالي البيت على الساعه 8 الصبح وقعدنا نراجع بسرعه وفجأة ببص في الساعه لقيتها 10 صباحا ودة نفس ميعاد الأمتحان

طبعا قومنا نطينا من مكانا وبقينا عمالين نجري في الشارع زي المجانين عشان نلحق الأمتحان ودخلنا اللجنة على الساعه 10:15 وربنا ستر

[Dr_Mido]

وحضرتك رايح الامتحان متاخر نص ساعة يبقي من حق الدكتور يمنعك من دخول اللجنة نهائيا
ولما الراجل يتساهل معاك ويدخلك تقول عليه الدكتور الخفيف ؟
كمات متردش على الدكتور وتطلع له المخضر ومخالفة الرادار وكانك جايب تصريح من رئيس الجمهورية
ايه يعني مخالفة ردار ولا محضر
مش عذر لدخولك اللجنة متاخر نص ساعة
والله انا لو مكانه وعملت معايا كدة وبقولك ممنوع الدخول متردش عليا وتطلع لي الورقتين دول ما انت داخل لو جبت رئيس الجامعة نفسه
من حق الطالب يدخل حتي 15 دقيقة بعد الامتحان بعذر وممنوع الدخول بعد 15 دقيقة ودي لوائح الامتحانات ومش من حق اي حد يدخل بعد كدة مهما كان السبب
والراجل الطيب اللى دخلك تقول عليه الدكتور الخفيف ؟

علشان هو فعلا خفيف
دة غير ان الدخول كان مسموح بيه يعنى بيستخف
دة غير انه اول سنه ليه معيد وفرحان بشبابه وبيهرج

[Eng_Mostafa_89]

وانا كمان بحبك يا درش


هههههههههههههههههههههههههههههههههههههههههههههههههه هههههههههههههههه
لسوء حظ البرشماتية كل جامعة وكل كلية هاتلاقي فيها واحد زيي
ليا اصحاب كتير في اكتر من جامعة ولما بنتقابل خصوصا بعد الامتحانات بنقعد نحكي عن المواقف اللى بتحصل معانا في اللجان وبتبقي سهرة كلها ضحك

مرة واحد زميلنا مسك بنت بتغش بس المصيبة ان البنت كاتبة الاجابة على دراعها طب هيدبس لها البرشامة في الورق ازاي ؟؟؟؟؟؟
بسرعة بديهة اخد الطالبة على مكتب العميد وخلى السكرتيرة تصور دراع البنت على ماكينة التصوير واخد الصورة ودبسها في ورقة الاجابة وحولها للتحقيق

ربنا يخليك يا دكتور ومعرفناش حضرتك كلية اية وبتدرس اية

بمناسبة ان حضرتك بتتكلم عن الكتابة على الدراع
قبل مدخل هندسة كنت فى معهد فنى صناعى
كان فى مهندسة اسمها تغريد كانت بتاخد البنات فى صالة مفياش حد غيرهم
وتروح هوب كل واحدة تشمر كمها وتخليهم يمسحوا كل اللى على ايديهم ومحدش هيخرج من الصالة دى غير لما يمسح اللى على ايدة
وطبعا كلة يمسح وهو بيدعى عليها علشان تخرجهم ويخشوا الصالة التانية اللى فيها اللجنة

موقف تانى كان حصلى
كنت فى سنة اولى فى المعهد كنت رايح امتحن مادة اسمها تكنولوجيا سيارات 2
المهم المعهد دة كان فى بورسعيد وانا كنت قاعد فى الاسماعيلية
كنت بسافر بورسعيد بالتوبيس بتاع شرق الدلتا فكان ديما باخد اى كتاب او ورق علشان اتسلي واقراء واراجع شوية الطريق بياخد ساعة
يوم المدة دى مكنتش محتاج اخد اى حاجة اراجع منها قبل الامتحان لانى كنت مقفل المادة دى عن حب
فكنت فى الاوتوبيس وافتكرت قانون قلت اكتبة علشان اتاكد من حفظى لية ادور على ورقة مش معايا اى حاجة غير ادواتى
كان معايا برجل قلت اكتب على ظهرة بالرصاص وبعد كدة اابقى امسح اللى كتبتة المهم كتبت القانون واتاكدت انى حفظة
المهم رحت اللجنة ودخلت عادى اخدنا الورق وقاعدنا عادى
المهندس اللى وقفة علينا كانت عرفانى فجت اخدتنى من مكان وقعدتنى فى صف انا لوحدى عند الباب امامها (علشان محدش يعنى يغش منى وياخد مجهودى او حد ينادى عليا ويوترنى) المهم بعد خمس دقائق من اللجنة دخل واحد علشان يفتش الالات الحاسبة علشان لو حد كاتب عليها حاجة
المهم انا عادى والراجل بيلف
افتكرت انى نسيت امسح اللى على ظهر علبة البرجل ياخبر ابيض هعمل اية مسكت علبة البرجل وقلت امشيها على البنطالون علشان يتمسح الكاتبة اللى بالرصاص ادعك العلبة فى رجلى وابص برضة متمسحش اخر مزهقت قلت احط العلبة فى جيبى وبلفعل حطيتها طبعا مكتش عارف اقعد طول اللجنة بس ان العلبة مضيقانى
الراجل جة عندى وهيمسك الالة لقيت المهندسة قالتة دى ثقة سيبة وعلى ضمنتى
والله فرحت اوى
من يومها وانا مبنزل من بيتنا غير وانا معايا ورقة فلوسكاب مجوز علشان اللى عايز افتكرة اكتبة فيها وابقى ارميها قبل اللجنة

[mr_sameh]

انا بقي حصلي موقف طريف قوي كان عندي امتحان في الكليه وكنت في البلد والمسافة حوالي ساعه بالميكروباص المهم جهزت الساعة السابعة ولبست بلوفر كان لونه احمر في اسمر داخلين في بعض الموضه بتاعت زمان ركبت المكروباص ورحت الامتحان وخلصت ورجعت البلد تاني وانا بغير البلوفر اكتشفت اني كنت لبسة بالمقلوب طبعا حاجة تكسف واعتقدت ان محدش اخد باله اتصلت باصحابي اكتشفت ان كلهم واخدين بالهم والاندال محدش قالي

[Eng_Mostafa_89]

معلش يا دكتور cairo2005 سؤال بخصوص الورقة الوجة والظهر

السنة اللى فاتت كان فى واحد صحبي فى امتحان الميد تيرم مادة انتاج الامتحان كان وش وظهر المهم صاحبى دة اخد الورقة وش بس والظهر فاضى وهو مكنش يعرف ان فى امتحان فى الظهر لان ممنوع انك حتى تبص جنبك
المهم خلص الامتحان وطلع لقى الناس كلها بتشتكى من الامتحان انة طويل ومفيش وقت وهو ازاى ياجماعة دة الامتحان سهل وبعد كدة اكتشف ان الامتحان كان وش وظهر وان العيب كان فى ورقتة
راح كلم الدكتور قالة مليش دعوة دى مش شغلتى
لو حضرتك حصل معاك الموقف دة هيكون اية تصرفك مع الطالب
والطالب دة بسم الله ماشء الله علية متفوق جدا

[maka]

جربتها مرة والله ...العيال كلها حمير مش فاهمه حاجه ..وأنا معاهم برضوو
ههههههههههههههههههههههههههههههه

بصراحة العيال مكنتش حمير اوى الامتحان هو اللى كان من بره المنهج

بصراحة بقة دي من المواقف القليلة اللى فطستني من الضحك من اكتر من ناحية
الاولي ان دكتور المادة لئيم جدا ما شاء الله بيفكرني بالاستاذ عقدة بتاع احمد رجب في كتابه صور مقلوبة لما كان بيحط امتحان الثانوية العامة
والمعيد بردو دماغ جدا لما هو مش قد المادة بيدرسها خصوصي ليه
والاجمل بارتيتة الغش اللى على الفاضي دي

ههههههههه

مرة دكتور تانى قالنا فى الامتحان فى المسائلة الاولى انسوا كل اللى ذاكرتوه و هديكم ورقة مع ورقة الاسئلة

فيها قوانين تحلوا منها و المسائلة التانية افرضوا المعطيات المناسبة ليكم

العيال كلها ظقطتت و فرحت و مكناش مصدقيين نفسنا

بعد توزيع الورق ب 5 دقايق اكتشفنا المقلب

ورقة القوانين فيها تقريبا 54 قانون و فيها قوانين اول مرة اشوفها فى حياتى

نفضت و دخلت على المسائلة التانية و قعدت افرض و افرض و افرض .....

و بعدين ملقتش حاجة اعملها و لقيت صاحبى اللى جانبى متنح قوى فى ورقتى

و بيسالنى حليت الاولى قولتله اه - و انا محليتهاش - و حلها من المحاضرة ال 3

قالى و الورقة قولتله دى مقلب و اللى هيحل منعها هيسقط و الدكتور عامل كده علشان يعرف اللى بيذاكر من اللى مبيذاكرش

بعد شوية لقيته بيبص لى و بيقولى متاكد من ال 3 بس مفيش

قوانين من المحاضرة ال 5

فطست من الضحك و قولتله الحقيقة و هى ان المسائلة فعلا من بره المنهج

بعد ما الامتحان خلص لقيت المعيد بيقول ان المسائلة التانية

المطلوب 1 و 2 و 4 non logical وملهمش حل

و المسائلة الاول اللى هيكتب قوانين غلط هيتحاسب بالسالب

طبعا محدش اتصدم لان محدش حل حاجة


بس الدكتور طلع ابن ناس ونجح الدفعة و قالنا الهدف من الامتحان انك تفكر

[dr-mohamed]

علشان هو فعلا خفيف
دة غير ان الدخول كان مسموح بيه يعنى بيستخف
دة غير انه اول سنه ليه معيد وفرحان بشبابه وبيهرج

يا دكتور ميدو والله انا الى اعرفه ان من السبعينات ولوائح الامتحانات لم تتغير الا فيما يتعلق بالمنع فقط لكن لم تتغير بالمنح
يعني غير مسموح بدخول الطلاب بعد مرور ربع ساعة من بداية الامتحان
ويسمح بدخول الامتحان قبل مرور نصف ساعة بقرار من رئيس اللجان اي رئيس الامتحانات في اليوم
وفيه واقعة لسة حاصلة قريب واجباري وثابتة مش زي واقعة حضرتك
الواقعة ان طلاب جامعة بني سويف من محافظة المنيا تعطل بهم القطار وسط الزراعات وحضروا للامتحانات متاخرين ورفض رئيس اللجان دخولهم واشتكوا لرئيس الجامعة ورفض واشتكوا في كل مكان حتي التليفزيون ولما حصلت ضغوط على رئيس الجامعة كل اللى عمله انه وافق على عدم اعتبارها مادة رسوب لهم في دور مايو بحيث ان الطالب لو كان راسب في مادتين اخرتين لا يعتبر راسبا حيث لا تضاف هذه المادة لمواد الرسوب على ان يمتحنها الطلاب في امتحان دور اكتوبر لتحديد مصيرهم بين النجاح والانتقال للفرقة التالية من عدمه
يعني المعيد الخفيف اللى مش عارف حاجة وفرحان بشبابه بردو كان على حق

معلش يا دكتور cairo2005 سؤال بخصوص الورقة الوجة والظهر

السنة اللى فاتت كان فى واحد صحبي فى امتحان الميد تيرم مادة انتاج الامتحان كان وش وظهر المهم صاحبى دة اخد الورقة وش بس والظهر فاضى وهو مكنش يعرف ان فى امتحان فى الظهر لان ممنوع انك حتى تبص جنبك
المهم خلص الامتحان وطلع لقى الناس كلها بتشتكى من الامتحان انة طويل ومفيش وقت وهو ازاى ياجماعة دة الامتحان سهل وبعد كدة اكتشف ان الامتحان كان وش وظهر وان العيب كان فى ورقتة
راح كلم الدكتور قالة مليش دعوة دى مش شغلتى
لو حضرتك حصل معاك الموقف دة هيكون اية تصرفك مع الطالب
والطالب دة بسم الله ماشء الله علية متفوق جدا

دي بقة كارثة ومسئولية الدكتور ورئيس لجنة الامتحانات وكان المفروض الطالب يثبت حالة فورا عند رئيس لجنة الامتحانات ده من الناحية القانونية
من الناحية الانسانية ممكن كان الدكتور اعتبر الامتحان من ورقة واحدة للطالب ده
بس بصراحة دي غلط من الناحية القانونية وممكن الدكتور يحاسب عليها

مرة دكتور تانى قالنا فى الامتحان فى المسائلة الاولى انسوا كل اللى ذاكرتوه و هديكم ورقة مع ورقة الاسئلة
فيها قوانين تحلوا منها و المسائلة التانية افرضوا المعطيات المناسبة ليكم
العيال كلها ظقطتت و فرحت و مكناش مصدقيين نفسنا
بعد توزيع الورق ب 5 دقايق اكتشفنا المقلب
ورقة القوانين فيها تقريبا 54 قانون و فيها قوانين اول مرة اشوفها فى حياتى
نفضت و دخلت على المسائلة التانية و قعدت افرض و افرض و افرض .....
و
فطست من الضحك و قولتله الحقيقة و هى ان المسائلة فعلا من بره المنهج
بعد ما الامتحان خلص لقيت المعيد بيقول ان المسائلة التانية
المطلوب 1 و 2 و 4 non logical وملهمش حل
و المسائلة الاول اللى هيكتب قوانين غلط هيتحاسب بالسالب
طبعا محدش اتصدم لان محدش حل حاجة

بس الدكتور طلع ابن ناس ونجح الدفعة و قالنا الهدف من الامتحان انك تفكر

مش عارف ليه حاسس ان بجد فيه تار بايت بينكم وبين الدكاترة
او ان فيه دكاترة عباقرة بشكل غير طبيعي
والله الامتحان بيبقي من المقرر والمقرر بيبقي عادي او صغير كمان والامتحان سهل والاسئلة نصها مباشر على الاقل وسؤال واحد للطالب المتميز وتلاقي اللجنة كلها بتصوت والامتحان صعب ومن خارج المقرر وحاجة تقرف
مرة اتعملت معايا وقالوا الحق الطلبة بيقولوا مدرسوش حاجة من الامتحان ومفيش غير سؤالين من الستة بس درسوهم ووكيل الكلية لشئون الطلاب في المدرج بيحاول يهديهم
طلعت اللجنة ولقيت اللجنة هرج ومرج وغش جماعي وكلام جماعي والوكيل واقف يتكلم على الفاضي
دخلت اللجنة فين يا بني الاسئلة الى من خارج المنهج لقيت ناس كتير بتتكلم طبعا متعرفش تسمع اي كلمة والكل بيتكلم زعقت وقلت اللى هيتكلم او يفتح بقه هالغي امتحانه واحد بس يرفع ايده ويتكلم
لقيت اللى رفعوا ايديهم اقل من ربع المدرج وقفت واحد والمفاجاة دي اول مرة اشوف الواد ده
يخرب بيت عقلك
ده انا بدرس للدفعة دي 3 سنين وحافظ شكل كل الطلبة اللى بتحضر واسماء معظمهم
ايه المشكلة يا بني قال الامتحان كله من برة المقرر وعايزين دكتور المادة
طبعا البعيد ميعرفش اني دكتور المادة
قلت له حاضر هنبعت نجيبهولك
اتنيل اقعد
حد تاني عنده اعتراض ؟
بردو رجعت الهيصة الوكيل قالهم عارفين تحلوا انهي اسئلة قالوا له على 3 اسئلة قالهم خلاص هما دول الامتحان والباقي ملغي
بس
ووقعنا في بعض وكان يوم اسود حلفت بالله ما يتغير اي كلمة من الامتحان وان كله مقرر
والامتحان كان 6 اسئلة تختار منهم 5
وطبعا مشيت كلامي وجاوبوا غصب عنهم


الظريف انى احتياطيا علشان فيه طلبة اندال كتير مش بتحضر وتيجي تقول ده اخدناه وده لا
اخر محاضرة كل طالب يطلع ورقة بيضا ويكتب عليها اسمه كامل وبياناته وتاريخ اليوم ومقرر المادة الفلانية ويكتب عناوين الموضوعات ورايا ويسلمني الورقة وهو خارج من المحاضرة
وبكدة اضمن ان مفيش ندل يقدر يعملها معايا والا يبقي مبيحضرش وماليش دعوة بيه

[Eng_Mostafa_89]

دي بقة كارثة ومسئولية الدكتور ورئيس لجنة الامتحانات وكان المفروض الطالب يثبت حالة فورا عند رئيس لجنة الامتحانات ده من الناحية القانونية
من الناحية الانسانية ممكن كان الدكتور اعتبر الامتحان من ورقة واحدة للطالب ده
بس بصراحة دي غلط من الناحية القانونية وممكن الدكتور يحاسب عليها

عارف اية اللى حصل الطالب راح لدوكتور المادة وقالة على اللى حصل الدكتور قعد يتريق علية ويقولة وانت متسألش اللى جنبك لية
وقعدوا يتكلوموا مع بعض وفى الاخر الدكتور قالة يعنى انت عايز اية مش هعيدلك الامتحان
وفعلا علملة الامتحان عادى ومراعهوش فى اى حاجة

طيب معلش حضلاتك اسمع دى
كان عندى السنة اللى فاتت دكتور ربنا يسمحة بقى بيدرس مادة الميكانيكا
وكان عامل امتحان شفوى
تدخل تجاوب يبقى انت بتاخد قرص
ولو ماجوبتش يبقى انت فاشل ومبذاكرش
وفى الاخر تاخد 5 من 10
فى حين ان الدكتور التانى اللى بيمتحن باقى نص الدفعة تجاوب تاخد 9 ماتجاوبش تاخد7
فين العدل هنااااااا؟؟

من ضمن المواقف اللى حصلت السنة دى مع اصحابى فى قسم مدنى فى امتحان الميد تيرم مادة ميكانيكا
الدكتور كان جايب مسألة بالنص من الكتاب بس غير المطلوب (تقريبا كان عايز عزم القصور الذاتى حوالين محور z وفى الامتحان كان عايزة حول محور x)
النتيجة طلعت اللى حالل صح جاب درجة وحشة واللى حالل غلط جاب درجة كويسة
تقريبا سألوا المعيدين عرفوا انة علم على المطلوب اللى كان فى الكتاب
يحاولوا يكلموا الدكتور الدكتور مبيجيش الجامعة علطول


وعندى قصص كتير على عدم المساواة وعدم احترام الدكترة لبعض وبيشتموا فى بعض امام الطالبة تخيل

[Samah AbdAllah]

ايه ده كله
كلها قصص غش

الحمدلله انا عمرى ما غشيت
لان كان عندى مبدأ اذا كنت انا مش عارفة الاجابة يبقا محدش غيرى هيعرف

[Ahmed Nouh]

لان كان عندى مبدأ اذا كنت انا مش عارفة الاجابة يبقا محدش غيرى هيعرف

دحيحه :)

[Samah AbdAllah]

دحيحه :)

جدا المذاكرة دى كانت هواية

[Ahmed Nouh]

جدا المذاكرة دى كانت هواية :ob_mak1[1]:

برغم ان الواحد ليه هوايات كتير , منها المهم ومنها الهايف

الا ان المذاكره عمرها ما كانت ولا هتكون واحده منهم , لدرجه انى ممكن امسك كتاب بتاع ماده بعد ما اخلصها اقراه بأستمتاع قوى وده مبيحصلش ابدا قبل الامتحان , مجرد جو الدراسه بيزهقنى ايا كانت الماده مشوقه