ايه رايكم في زواج الاجانب

[bassemali]

يا أبو علي باشا أنا مقصدش أن السعوديه بلاد بره أنا أقصد أننا كنا فاكرين ان الواقع في دول كتير بره مصر شيء تاني لكن أكتشفنا أنها غلط ومش هتقدر تقارن الدول التانيه بمصر الا لما تعيش فيها فتره كافيه عشان تقدر تشوف المميزات والعيوب

[araberphilosoph]

استاذ حسام
انا اعترف ان خبرتي مع الاجانب اكتر بكتير من المصريين رغم ان عمري كله قضته في مصر بس المرات القليله اللي اتعملت فيها في موضوع الجواز ده مع المصريين كانت سيئه لاقصى حد!! كمان اصحابي ومعارفي اللي تجوزوا مصريات وكانت بتابع خطواتهم بصراحه مكنش الموضوع عقلاني تماما
سيدي شئنا ام ابينا واقع مصر بيفرض نفسه احنا بنحب مصر(مع تعديل كبير في مفهوم الوطنيه والقوميه) بس والله انا بحب كل بلاد المسلمين من شرقها لغربها وموضوع انت اتولدت فين في رايي المفروض ميدفعناش للتعصب للمكان اللي احنا اتولدنا فيه عموما ده موضوع تاني مختلف تماما اتمنى نفتحه برده
مصر دي ورث ورثناه؟؟ (انا وجدنا ابانا علي امه وانا على اثارهم مقتدون* قال اولو جئتكم باهدي مما وجدتم عليه ابائكم) برده ده موضوع متعلق باللي قبله وانا هافتح الموضوع ده للنقاش !!!
اما موضوع المقارنه فانا بحط شروط معينه عشان تبقى عادله يعني ان الاجنبيه مسلمه ومتدينه زييها زي المصريه
قصدي موضوع البكر انه دي اللي هتتفاضل بيه المصريه عن الاجنبيه وخلينا نقول من دلوقني الاوربيه عشان نقفل موضوع العرب تماما لانهم زينا زيهم يمكن هم ابشع في حاجات كتير !!!
انا قصدي ان الانتنين زب بعض مسلمات متدينات محترمات بس التربيه تتختلف والبيئه بتتختلف بس!!!
موضوع المغالاه في الطلبات والمهور زاد عن حده اوي يعني افهم القايمه دي لازمتها ايه؟ وليه نكلف اهل العروسه او العريس كل ده؟ ليه كميه الاطباق والاكواب والشوك والسكاكين دي كلها ؟؟ ليه اوده سفره بالشئ الفلاني ده ناهيك عن السجاد والنجف و و و ليه؟؟ وده بنسبه 90% اللي بيحصل اكيد في استثناءات بس دي النسبه الاكتر انا بقول اه اجيب لمراتي كل حاجه بس بشكل عقلاني مش عايزني وعايزين وعايزين وفي الاخر كله بيتركن لحد ما التراب يكلوا؟؟؟؟؟
واكيد الراجل اللي لازم يجيب كل حاجه علي قد امكانياته يعني في نظري سرير ودولاب وطريبظه وبوتجاز وتلاجه وسخان وكام كرسي يكفوا جدا لو بجد الموضوع عقلاني (اقسم بالله انا بدات حياتي من غير غساله ولا سخان وعاشت مراتي الاجنبيه 6 شهور تغسل هدومي علي ايدها ونسخن الميه علي بوتجاز بعنين مسطح)
موضوع التدين اللي يهمني فيه التصرف الخارجي انا مقلتش الايمان انا قلت التدين النصرف الخارجي صلاه وصوم صدق عفاف حب الخير واسف بس اللي اقدر اقوله ان الاجنبي المسلم عن اقتناع اقوي بكتير عن اللي اخده وراثه (ده ميمنعش ان في استثناءات كتيير بس احنا بنتكلم عن الاعم)
يا سيدي اختيار الام هو الاساس فى الاولاد وانا لما اختار لاولادي ام تجمع مميزات الدنيا بالاخره يبقي انا وفيت حقه وانت اللي بتدين الاسلام من الاساس الاسلام الصح بس انت نفسك بتنقيه منم الشوائب بتاعتنا!!
متربين في بلد اسلامي؟؟ اكرر نفس الكلام هنا بيتعلموا اخلاق اسوا بكتير من اوروبا علي الاقل في اوروبا مش هيصابوا بالازدواج في المعايير والنرجسيه بتاعتنا
اكيد كل نسيه في السعيد والشقي بس اسف مفيش ظابط شرطه سويدي هيسحل مواطن سويدي على قفاه ويهتك عرضه في قسم بوليس مش هيوقفه علي كمين ويقطع بطاقته ويخده تحري
مش لما يمرض هييرموه علي الرصيف عشان مفيش سرير فاضي واكيد لما يموت في حادث عباره من السويد للنرويج مثلا مش هيعتبروها جنحه مش جنايه يعني!!! اقصد ان في حد ادني وده بتوفره لالولادك عشان ميتعبوش التعب ده اللي انت شايفه
انا اقصد _مضيعش عمرك عشان ليله) في المقارنه يس يعني لو اختارت المصريه عشان الموضوع ده بس ليس الا
مش عايز اخش في موضوع عذريه الروح الافكار والاحاسيس يس رايي مش هيعجب حضرتك
انا مقلتش ان بامهاتنا واخوانتا وحشين لا ابدا بقول ان المستقبل بيتفتح قدامنا والدنيا بقت صغيره جدا واكيد هنلاقي في حتت تانيه ناس برده كويسه اوي ندر نبني معاهم اسر تناسب المستقبل اللي مش هيكون في اي حدود لا قوميه ولا جنسيه (العالم بيميل للانفتاح علي بعضه الاتحاد الاوروبي والسوق الخليجيه المشتركه كمثال احنا بس اللي فقرا حبتين عشان كده محدش عايز ينفتح علينا)
واخيرا اشكر ليك دعائك لي ومش عارف ممكن الصوره غريبه شويه دلوقتي بس مين عارف(علموا اولادكم السباحه والرمايه وركوب الخيل فانهم مخلوقون لزمان غير زمانكم)

[hussein]

فيلسوف العرب
انت قلت انك هتحكى حكايتك مع الزوجه الاجنبية
بيتهيألى ان الاوان
انا مستنى اسمع تجربتك

[araberphilosoph]

عشان خاطرك بس يا استاذ حسين
انا اساسا خريج جامعه الازهر من قسم الدراسات الاسلاميه باللغه الالمانيه قسم غريب محدش يسمع عنه بس اخنا المفروض المؤهلين ان احنا نكلم الغرب وتجديد الخطاب الدين والمواضيع دي كلها
كانت دفعتنا 33 طالب بس وكان المفروض ان احنا نشتغل في الدعوه في الخارج بس احنا في مصر
كانت عقول بسم الله ما شاء الله بس للاسف منهم لله وزاره الاوقاف!!!
بدات حكايتي وانا في 3 جامعه لما اتعرفت علي بنت المانيه علي النت اوه والله علي النت يعني انجذبنا لبعض 3 اسابيع وجت مصر بتدكره ذهاب بس بلا عوده ووالدي كان متفهم قالي اتجوزوا من غير ورق ولا نيله بس جواز شرعي افضل من اي حاجه وبالفعل !! ربنا اكرمها واسلمت وكنت ساعتها باخد مكافاه تفوق حوالي 1500 في السنه وكان لازم اظبط نفسي بيها وكنت بحاول اشتغل جنب الدراسه المهم ربنا وفقني واتخرجت(جيد جدا مع مرتبه الشرف) رغم اني كنت رب اسره بشكل او اخر
المهم اتخرجت ممعيش غير 1000 جنيه واخدت شقه في القاهره الجديده فيها سرير ودولاب وكرسيين وبوتجاو مسطه وتلاجه واهم من اي حاجه جهاز الكومبوتر بتاعي ووقفت مراتي جنبي لاشتكت ولا قالت حاجه كنت بتغسل هدومي علي ايدها ونسخن الميه في حلل ايام
المهم بدات ادور على شغل وزاره الاوقاف قالتي بعد سنه هنوظف نسيت اقول اني بتكلم الماني زي العربي كده حتى قبل الجواز بس بعده اتحسن اكتر وطبعا بدات ادور ليها على شغل ومفيش اسهل من انك تلاقي شغل لاجنبي في مصر كان شغلها في 6 اكتوبر تخيل من القاهره الجديده ل6 اكتوبر كل يوم وكانت بتعمل كل شغل البيت
وانا مش لاقي
مره كنت بدور علي شغل في اهرام الجمعه بس الواد الي بيجيب الجرايد مجاش الجمعه دي فقالت لي طب متنزل تجيب جرايد وتباعها انت وطبعا طلعت فيها وازاى وازاي وانا وانا سمعتني محاضره عن اسباب تخلفنا وعجزنا وبالفعل جبت جرايد وبعتها وكسبت اليوم ده اول فلوس من عرق جبيني
المهم اسبوعين ولقيت شغل في شرم الشيخ في شركه سياحه شركه بجد محترمه احترمت قوتي اللغويه وقدرتني وسافرت شرم وسبتها لوحدها في القاهره الجديده وانا في اخر الدنيا وبرده معترضتش
بس بدات الحياه تسوء لاسباب بجد مش عارفها وخيرتني يا اسافر المانيا معاها دلوقتي يا كل واحد يروح لحاله بس مكنتش اقدر كنت عايز اثبت نفسي في بلدي الاول وحاولت كتير اني الاقي ليها شغل في شرم بس محدش بيوظف واحده محجبه
المهم انفصلنا بكل ذوق واحترام وحب وما زلنا بنتكلم مع بعض لحد دلوقتي ووالله وصلتها لغايه المطار واحنا الاتنين بنتمني الحير لبعض وبنتابع اخبار بعض من غير لا غلط ولا تجريح

وتمر الايام يعني 4 شهور واتعرف علي انسانه جديده برده علي النت !!! بسم الله ما شاء الله ساعه ما شوفتها قلت هي دي وبالفعل انجذبنا لبعض جدا جدا ونزلت مصر وهي كانت مسلمه قبل ماعرفها ببتاع سنه وبدات تتعلم كل حاجه من الالف للياء كانت بتدرس هناك اسلاميات برده ووالله ساعات انا بتضيع علي فروض وهي ابدا عمرها ماعترضت علي حاجه معاي في اي مكان بغيب عن البيت بالاسبوع ورا بعضه ولا حاجه ست بيت شاطره ومسلمه اسلام عميق عن اقتناع وحب
كانت بتروح وتيجي عشان الدراسه وبعدين وقفت الدراسه واستقرينا هنا
ولما بزور اهلي بتتتعامل معاهم كانهم فعلا ابوها وامها وبتتعلم عربي مخصوص عشان القران كفايه لما دخلت للبيت مره لقيت والدتي بتعلمها قران وهي بتحاول وتحاول والله عيني دمعت
مش عارف اوصف ايه ولا ايه بس لو جيت اقارن بينها وبين زوجات اصحابي او قرايبي ماظنش انهم يستحملوا حاجات كتير زي دي او عندهم طول بال كده
لما كانت في مشكله بيني وبين قرايبي هي اللي بتحضني علي اني اصلهم وجازي الاساءه يالاحسان حاجات كتير كتير
ناهيك عن سعه الافق والتفكير الحر الي غير طريقه تفكيري انا شخصيا
انا بحكي ليكم عن 2 اوروبيات عملو لي صدمه حضاريه في طريقه تفكيرنا غيروا مفاهيمي عن الكفاح والحب والتحمل والاخلاص بل والكراهيه عرفوني ان مش كل حاجه عندنا صح ولا كل حاجه عندهم صح كل هدفنا ان احنا ناخد احسن ما في الحضارتين ونطلع جيل مسلم بيفكر صح قادر انه يتحمل الصعاب ودول همه اللي هيرتقوا بينا اكيد
وان شاء الله ولي العهد جاي في السكه ادعولي
دي حكايتي باختصار عشان خاطرك يا حسين باشا
واستني ارائكم

[bassemali]

أخي فيلسوف العرب
أولا بارك الله لك في زوجتك وأبنك القادم أن شاء الله أنا عايز أقولك أنك أنسان صالح وتقي وربنا هيكرمك أن شاء الله وعشان كده ربنا كرمك بزوجتين ونعم الزوجه فعلا لأن الطيبين للطيبات والخبيثين للخبيثات لكن موضوع الصدمه الحضاريه ده أنا مش معاك فيه لأنك ماتزوجتش واحده مصريه الكلام ده ممكن تقوله لو كنت تزوجت مصريه وحصل تعارض بينك وبينها لكن أنت بتقارن تجربتك بتجارب أصحابك وده مش أساس سليم للمقارنه لازم تتجوز مصريه عشان تقدر تحكم بوضوح وموضوعيه .
أوعى والنبي المدام تكون جنبك لحسن تفتكرني بحرضك تتجوز عليها تبقى مصيبه .....

[hussein]

عشان خاطرك بس يا استاذ حسين

الف شكر ليك يا باشا

بس بدات الحياه تسوء لاسباب بجد مش عارفها وخيرتني يا اسافر المانيا معاها دلوقتي يا كل واحد يروح لحاله بس مكنتش اقدر كنت عايز اثبت نفسي في بلدي الاول

بسهوله كده؟؟؟؟؟
تسيبها علشان عايز تحقق نفسك فى بلدك وانت عمال تكلمنا على العالم انو هيبقى قريه صغيره
يأخى اقنعها- سايسها- لكن تسيبها؟؟؟؟؟؟

وان شاء الله ولي العهد جاي في السكه ادعولي

ربنا يجيبو بالسلامه و يبارك فيه و ينفع بيه الاسلام و المسلميين

[araberphilosoph]

انا حاولت والله بس ساعات الدنيا بتقفل متعرفش ليه حاولت بس محصلش نصيب ببساطه ودي برده حاجه انا اتعلمتها المواضيع ممكن تكون اسهل بكتير مما هي باينه عليه

[araberphilosoph]

طب عندك عروسه يا سحس

[araberphilosoph]

اسف يا bassimali

[bassemali]

لا ياخويا معنديش وماليش دعوه بالموضوع ده ماتدبسنيش وتخلع أنت

[hussein]

على فكره اعز اصدقائى هيتجوز المانيه يوم 29-12
هو فى مصر و هيمشى يوم الاتنين وعاوز اجيبلوا هديه واجيبلها هديه هيا كمان تقترحوا ايه؟؟
-هو 29 سنه بيدرس هناك
-هى 20 سنة - مسلمه- بتدرس علوم اسلاميه-محجبه
ها اجيب ايه؟؟؟؟

[araberphilosoph]

,والله سوال صعب يا سحس
بس لها في مجموعه كتب اسلاميه بالالماني موجود في مكتبه جامع الفتخ لذيذه ممكن تشتريها وتديه ليهم
اما صاحبك فانت ادري بيه
ولا قولك اشتريهم حته bmw الفئه السابعه وريح دماغك
ومبروك مقدما

[araberphilosoph]

ايه يا عم bassemali مش انت اللي بتقول اتجوز عشان تبقي موضوعي
طب ساعدني يقه ولا هو كلام وخلاص

[araberphilosoph]

اسف يا حسين جامع النور بالعباسيه

[bassemali]

ياباشا أنا بقول لازم تكون أتجوزت مصريه عشان تشوف مش يمكن تطلع كويسه برضه
مش معنى كده انك لازم تتجوز مصريه دلوقتي مادام محصلش قبل كده يبقى احمد ربنا وأسكت بدل ماتلاقي حلل البيت كلها فوق دماغك دلوقتي وأحتمال حله منهم توصل دماغي وأنا هنا في السعوديه
والله شكل المدام قاعده جنبك!!!!!!!!