سؤال عن الزواج

[Most_H]

اولا صلى أستخاره

ثانية لو احنا كنا فى بلاد برة ،والبنت كويسة، كنت هقول لك اتكل على الله

لكن فى مصر انت بتتجوز البنت بى امها وابوها بأخوتها بصحبها وبدبدبها

وتذكر ، التفاحة لا تسقط بعيداٌ عن الشجرة

[medo_2060]

تقريبا كل حاجه اتقالت فى الموضوع دا بس انا حبيت اعلق على نقطتين بس
1- موضوع ان البنت مالهاش علاقه بابوها وانك هتتجوزها مش هتتجوز ابوها مش واقعى اوى بالنسبه لى لانك لما تتجوزها مش هتمحى ذاكرتها هيبقى ليكم برضه علاقه بابوها من زيارات لغيره ولو هو فيه مشكله لو حتى غير البخل هتقابلها برضه بعد الجواز وممكن من كلامك عليه مع البنت الى هى زوجتك فى الوقت دا يعمل مشاكل بينكم
2- انت بتقول انك اكتشفت انها غير صريحه يعنى فى موضوع تانى هيعمل مشكله حتى لو حليت مشكله البخل يعنى لازم تفكر فى الموضوع من اوله عشان ما تندمش وبرضه ما تظلمش بنات الناس معاك
فكر براحتك وانت ادرى مننا
ربنا يوفقك للخير ان شاء الله

[brown-eyes]

لو حضرتك سمحتيلى اقول رأيى فى الكلام دة من وجهة نظر رجالى و بعد اذن الاستاذ براون ايس .. انا مش شايف انة كدة بخيل (او بيقرط عليها) زى ما حضرتك تفضلتى - لانة هو مش بيمنع عنها حاجة بالعكس - هو كل اللى بيتكلم فية ان يبقى فية اعتدال و استخدام للمواد دى بعقل .. اية الداعى يعنى انة تستخدم المناديل الورقية فى تنشيف الارضية او تنشيف الوجة ادام موجود قدامها بديل غير مكلف و هيأدى نفس الغرض .. اية الداعى ان لتر شاور يخلص فى اسبوعين - الاعتدال مطلوب فى كل شىء .. و قدام ربنا مديلة يبقى ميحرمش بيتة من حاجة - بس مش معنى كدة اننا نفرط فى النعمة اللى ربنا ادهالنا بسهولة و من غير تفكير لمجرد اننا نقدر نجيب غيرها خصوصا .. انك متعرفيش الراجل بيعمل اية عشان يجيب الفلوس دى و لا بيفكر ازاى عشان يحاول توفير جزء من دخلة لتأمين مستقبل الزوجة و مستقبل الاولاد او تحسين المستوى المعيشى للاسرة .

هو ده اللي كان قصدي اوصلهلها خصوصا ان الفترة اللي احنا فيها نقطة تغيير كبيرة في حياتنا والظروف صعبة وعلي ده كله انا ماقلتش مانجبش بالعكس قولت نستخدم الحاجة بالعقل

[شريف]

شكرا لكل الناس اللي ردت
انا الحمد لله الذي لا يحمد علي مكروه سواه نهيت الموضوع و كنت بصلي استخاره مع كل فرض
ربنا يوفقتي و يوفقها
تحذير يا جماعه لازم التاني في الاختيار
وانا نهيت قبل الخطوبه و الدبل و بالتالي متحسبتش عليها خطوبه الحمدلله

ادعولي يا جماعه ربنا يرذقني الزوجه الصالحه اللي تعينني علي طاعه الله و عبادته

[زهير فكري]

بسم الله الرحمن الرحيم

ظرف اتعرضت ليه الفتره اللي فاتت

اذا رايت ان ابو العروسه بخيل

ايوه بخيل من كذا موقف

1- من طريقه الضيافه للعريس
2- فى النادي ميفكرش حتى انه يدفع الحساب
3- و دي الاهم في الخطوبه مش مرحب باهل العريس فى بيته و عايز اسره العريس بس و بيحدد الاشخاص و بلاش الخال ولا العم يروحو كمان و بيقول الضيافه حاجه ساقعه و جاتوة
4-الاتفاق علي العفش كان غريب النصف بالنصف بس حسيت من طريقة الكلام انه هيسترخص

و البنت ممتاذة بس هل ينفع اخدها بشنطه هدومها؟؟؟؟؟؟

مش عارف اعمل ايه العقل بيقول هتتعب معاهم جدا و ممكن ده يأثر علي علاقتك بالبنت
و الدين بيقول فاظفر بذات الدين تربت يداك و دة انا شايفه و الله اعلم

رايكم ايه في الحكايه دي


شوف يا استاذ شريف , انا هقولك رأيي و ارجو ما تزعلش انه ممكن يكون قاسي شويه .
في الأول و من خلال المواقف اللي انت ذكرتها في بدايه مشاركتك و من بينها اللي لفت نظري

( من طريقه الضيافه للعريس , فى النادي ميفكرش حتى انه يدفع الحساب) و نقف عندها شويه , يعني انا دلوقتي متقدم لبنتي او اختي عريس في بدايه التعارف و جاي البيت المفترض اني اظهر بشكل طبيعي دون اسراف او تبذير و دون تقتير او انتقاص من قدري , يعني من المفترض ان الضيف يجد حفاوه و تكريم و اشعاره انه مرغوب ( مبدئيا) و مرحب به و ذلك طبقا لثقافتنا المصريه و العربيه و التي تؤيد تكريم الضيوف بتقديم ما لذ و طاب من الطعام وواجبات الضيافه وفقا لامكانياتي .

طيب لما نيجي نطبق ده علي حالتك و نربط ملاحظاتك ببعضها , يعني لو انا راجل محترم و اتعزمت مره لازم ارد العزومه او احسن منها و ما اقبلش علي نفسي اني اقعد اتعزم اكتر من مره و ما اردش لان ما لهاش الا تفسير واحد هو اني بوصل رساله للطرف الآخر ( اللي هو حضرتك) اني انا ناصح و ضحكت عليك و كلت ببلاش و ان كان عاجبك و هاحرجك كمان لاني متصور الموقف و حضراتكم قاعدين في النادي و طبعا سيادتك او والدك ناس محترمين و هتلاقي الجرسون جاي بالحساب و البيه عامل نفسه اطرش و اعمي , طبعا سيادك هتدفع !!!

و ماتحولش تبرر ده بقله ذات اليد او بخل , لانه ببساطه لو انا راجل محترم و امكانياتي الماديه علي قدي و محدوده في مليون طريقه لحفظ ماء وجهي و اني اظهر بمظهر جيد و علي فكره الناس هتفهم و تحترمني و لو فهموني غلط يبقوا هم احرار !!! يعني اسأل نفسك سؤال يعني عزومه شاي ياسيدي بلاش غداء في النادي هيكلف كام يعني ؟؟؟ و الله شايف انه انه تبذير بلا داعي هات معاك ترمس شاي !!!! و يبقي احسن .صح؟

نيجي لنقطه تانيه و نتابع ملاحظات سيادتك

و دي الاهم في الخطوبه مش مرحب باهل العريس فى بيته و عايز اسره العريس بس و بيحدد الاشخاص و بلاش الخال ولا العم يروحو كمان و بيقول الضيافه حاجه ساقعه و جاتوة
4-الاتفاق علي العفش كان غريب النصف بالنصف بس حسيت من طريقة الكلام انه هيسترخص

يا الله , واحد انا جاي اتقدم لبنته و طبعا في قبول مبدئي في الزياره الأولي و اللي كانت تقتصر علي العائلتين فقط و بالتالي من الواجب و الطبيعي انه يحدث تعارف من باقي افراد العائلتين و اتباهي بعائلتي و نسبي و هو يتباهي بعائلته و نسبه, يعني هو مش هيعزم عائلته ؟ و ياسيدي مشيها انه عايز يخليها عائلي و نتعلق بشماعه ضعف الامكانيات ما يبقاش الطلب بالشكل الفج و المستفز ده ! في عده اساليب للوصول للهدف من الخطوبه و الاحتفال بها اللي من اولي اهدافها تعارف الأهل من الطرفين وده ما اتحققش و في اماكن بره كتير ممكن تكون اسعارها مناسبه لو المكان عنده غير مناسب و يا سيدي انت مش كل يوم بنتك ها تتخطب و ما قولتش اعمل الخطوبه في الهيلتون !!

نيجي لأهم نقطه و آخر نقطه اللي هي العفش و انه بيقول النص بالنص و ده انتم احرار فيه و علي حسب الاتفاق بين الطرفين , وحضرتك ذكرت انه عامل الموضوع ده عشان هيسترخص
و طبعا متوقع انه هيجيب مثلا طقم شوك انتاج مصانع من منازلهم و يقول لك ده فضه الماني و يكتبه عليك طبعا في القايمه !!و قيس علي ده كل حاجه ده لو جاب اصلا , ده غي مشاكل الشبكه
و تحديد قيمتها وووو.

سيدي الفاضل ارجو الا اكون اثقلت عليك و انا بعتبر نفسي في المنتدي ده كأني في بيتي الثاني و اعضاؤه المحترمين اخوه كبار لي .

الخلاصه اني شايف ان الراجل ده ليس بخيل بدليل امتلاكه سياره و مسكن مناسب بل هو شخصيه استغلاليه لأبعد الحدود للآخرين و لديه صفه الأنانيه و الجشع و عدم احترام مشاعر الاخرين و النظر لاتفاقات الزواج انها صفقه يجب ان يستغلها و يعتصر مكاسبها لصالحه و يلجأ للحصول علي اغراضه بوسائل الضغط و اختلاق العقبات و اخذ الأمور بسيف الحياء و احراج الطرف الاخر , مثل تلك العيوب تعتبر عيوب خطيره في الشخصيه قد تؤدي لا قدر الله لتكدير صفو حياتك بل لانهيارها نظرا لتدخله في كل صغيره و كبيره في حياتك علي اعتبار انك منجم ذهب يجب ان تؤول ملكيته له وحده!! هذا بأعتبار انقيادك له و تنفيذ رغباته . اخيرا استخر ربك في شأن تلك الفتاه و ان كنت متعلقا بها و تجد انها خير معين لك ان شاء الله فيجب عليك الاستعداد جيدا لهذا الرجل و منعه من تقلد زمام الأمور و يتحكم بها كما يريد وان تتبع معه سياسه تنفيذ القانون الصارمه ( تشتغله رسمي ) بالأصول يعني و لو تقدر تأخذ مسكن الزوجيه بعيد بمسافه عنه او بلد تانيه يكون افضل لتخفيف تدخله و تاثيره مع مراعاه ان لا تساعد زوجتك ( ان شاء الله) ان تقع في عقوقه رغم عيوبه السيئه بل فقط ما نريده هو تحجيمه و تخفيف تأثيره .

و في النهايه ارجو لك التوفيق و حسن الاختيار.

[dr.amr]

شكرا لكل الناس اللي ردت
انا الحمد لله الذي لا يحمد علي مكروه سواه نهيت الموضوع و كنت بصلي استخاره مع كل فرض
ربنا يوفقتي و يوفقها
تحذير يا جماعه لازم التاني في الاختيار
وانا نهيت قبل الخطوبه و الدبل و بالتالي متحسبتش عليها خطوبه الحمدلله

ادعولي يا جماعه ربنا يرذقني الزوجه الصالحه اللي تعينني علي طاعه الله و عبادته

الف مبروك
واحييك بصراحه علي موضوع قبل الدبل والخطوبه علشان ماتتحسبش عليها
ربنا يوفقك
بصراحه صعب انك تاخد واحده من غير اهلها
الزواج ده عيلتين بيتجوزوا مش واحد وواحده
ربنا يوفقك لبنت الحلال

[شريف]

بسم الله الرحمن الرحيم


الخلاصه اني شايف ان الراجل ده ليس بخيل بدليل امتلاكه سياره و مسكن مناسب بل هو شخصيه استغلاليه لأبعد الحدود للآخرين و لديه صفه الأنانيه و الجشع و عدم احترام مشاعر الاخرين و النظر لاتفاقات الزواج انها صفقه يجب ان يستغلها و يعتصر مكاسبها لصالحه و يلجأ للحصول علي اغراضه بوسائل الضغط و اختلاق العقبات و اخذ الأمور بسيف الحياء و احراج الطرف الاخر , مثل تلك العيوب تعتبر عيوب خطيره في الشخصيه قد تؤدي لا قدر الله لتكدير صفو حياتك بل لانهيارها نظرا لتدخله في كل صغيره و كبيره في حياتك علي اعتبار انك منجم ذهب يجب ان تؤول ملكيته له وحده!! هذا بأعتبار انقيادك له و تنفيذ رغباته . اخيرا استخر ربك في شأن تلك الفتاه و ان كنت متعلقا بها و تجد انها خير معين لك ان شاء الله فيجب عليك الاستعداد جيدا لهذا الرجل و منعه من تقلد زمام الأمور و يتحكم بها كما يريد وان تتبع معه سياسه تنفيذ القانون الصارمه ( تشتغله رسمي ) بالأصول يعني و لو تقدر تأخذ مسكن الزوجيه بعيد بمسافه عنه او بلد تانيه يكون افضل لتخفيف تدخله و تاثيره مع مراعاه ان لا تساعد زوجتك ( ان شاء الله) ان تقع في عقوقه رغم عيوبه السيئه بل فقط ما نريده هو تحجيمه و تخفيف تأثيره .

و في النهايه ارجو لك التوفيق و حسن الاختيار.

اشكرك يا سيدي الفاضل علي هذه المشاركه التي جعلتني اتذكر بعض الاشياء و قد تاكد لي ان كلامك صح

[brown-eyes]

د عمرو انا بعتلك رسالة علي الخاص من كام يوم بس شكلك ماشوفتهاش ياريت تبقي تشفها وشكرا

[hussein]

معلش يا جماعة بردو ادخل في الموضوع واسال علي شوية حاجات
هي ايه مواضفات الجوز البخيل لان محدش بيكون شايف نفسه بخيل
يعني مثلا لما اتخانق مع مراتي عشان بتخلص الشور جيل اللي هو 1 لتر في اسبوعين يبقي انا كده بخيل ولما اتخانق معاها عشان لازم تنشف وشها في في مناديل ولا يمكن تنشفها في فوطة يبقي انا كده بخيل ولما اشوفها بتنشف مرة ارضية الحمام بمناديل وازعقلها يبقي انا كده بخيل
ولما هي يكون ردها ان لو اخر ففلوس في جيبها وقدامها تجيب شور جيل او اكل هتجيب الشور وان الشور اهم عندها من الاكل وان انا كده بخيل
بجد انا بدات اشك في نفسي
انا اترددت جدا قبل ما اكتب الكلام ده لان حاسس ان الحاجات دي من اسرار البيت ومينفعش تطلع بس انا علي اخري ده غير حاجات تانية كتير بس ماينفعش تتقال
عموما يا جماعة لو حد يحب يتكلم معايا علي الخاص ياريت !

طبعا حضرتك مش غلطان ولا حاجه لأن حضرتك عايز الاستهلاك يكون بالعقل مش اسراف و خلاص بس بردو اكيد الموضوع مع مراتك لازم يكون من غير زعيق و بالعقل علشان الموضوع ميقلبش عند و زعل و فى نفس الوقت علشان متحسش ان دا بخل منك على اد ماهو اقتصاد و حفظ للنعمة لان اللى مش بيحافظ على النعمة بتزول منه

[waelfarid]

يابختك ان ربنا اعطاك مؤشرات ونور بصيرتك وحكمت عقلك كويس والهمك الصواب وربنا يرزقك بالاحسن منها واهم البنات علي قفا من يشيل وشوية نصايح بالعامية في اي امر (أستعدل قبل ما تستعجل)يعني اختار الصواب وكل تأخيرة وفيها خيرة ومحدش بيموت ناقص حاجة من رزقه وعموما افتكر جزء من اغنيه لعبد الحليم (عرفته قد ما عرفته ولاعرفتوش وشفته قد ما شفته ولا فهمتوش)لان مهما طالت فتره الخطوبة ده لا يمكن يوصل لمرحلة المعايشة 24 ساعة يومياوفي ظروف ومواقف مختلفة ابسط مثال بما اننا في منتدي سيارات العربية الكويسة من الوحشة بتتعرف في بدء دوارتها في الشتاء بعد ركنة طويلة فيه بتدور بنعومة وفيه تطلع روحك لحد ما تدور ارجو ان محدش يفهمني غلط اللي اقصده لو بتصحي حد من النوم وقام بيذكر الله ومبتسم ولا بيهب في اللي بيصحيه زي البابور البايظ والطبع يغلب التطبع وما تبان البضاعة غير بعد الحبل والرضاعة المثل الاخير المقصود بيه الاخلاق والطباع والمعاملة مش القوام الخارجي مش يعني خلاص بقي فيه اولاد يبقي اتثبتت تتفرعن بقي وتكشر عن انيابها محتمية بان القانون في صف الحاضنة وأخيرا وليس آخرا لا تذم ولا تشكر قبل سنة وست أشهر واللي من نصيبك لازم يصيبك وثلاثة أشياء يبتلي بهن المرء في الدنيا سعة المسكن أو ضيقه والزوجة الصالحة التي تعينه علي الحياة ولا تكون هي والحياة عليه والدابة (السيارة مثلا) تكون سريعة أو بطيئة والله الموفق

[max_ziro]

بص لو العريس او اهله بخلاء دي بتبقى عيشة ضنك عالبنت و انا ما اجوزش بنتي كده

بس لو انا هاتجوز واحدة (بفرض اني مش متجوز يعني ما تودونيش في داهية يعني) ابوها بخيل ..... و انا مالي؟ طظ !!! هو مش هيأكلني و لا يشربني و لا انا مستني منه حاجة .....

و حتى لو طبعه بهت على بنته ..... هي مش هتصرف عليا يعني و ممكن الطبع ده يتغير

انما الزوج البخيل بيبقى كارثة و ربنا ما يحكم على حد من بناتنا تتجوز واحد كده

كلام عاجبنى جدا احترم صاحبة ..

[M.Osman]

أولاً ربنا يوفق الأخ صاحب الموضوع للخير
ثانياً.. شكرأ لكل المشاكرين بالموضوع دا و المواضيع المشابهة اللي تعتبر مرجع لينا كشباب هنبقى نبص فيها قبل الإنترفيو .. قبل الخطوبة قصدي :))

[hh]

أولا ربنا يصلح لك الحال يا رب و يهدي سرك مع زوجتك.

أنا حبيت أرد على مشاركتك عشان ساعات الرجالة بيبقوا مش مقدرين طريقة تفكير الستات و العكس صحيح طبعا.
مبدأيا و متزعلش مني من وجهة نظر حريمي أه طبعا انت كدة تبقى بخيل
معلش انا بتكلم بصراحة و بحط نفسي مكان مراتك. الستات بصفة عامة المنتجات الخاصة بالعناية بالشعر و البشرة و الميك أب....الخ, اللي هي كل الحاجات النسائية دي تعتبر مهمة جدا و من الأساسيات عندهم. و هي حاولت تشرحلك ده لما قالتلك انها الحاجات دي عندها أهم من الأكل و الشرب. لما هي تحس ان انت - أسفة في اللفظ - بتقرط عليها في الحاجات دي بتبقى حاسة ان انت بتستخسر فيها, لأن دي تعتبر الحاجات الوحيدة في طلبات البيت اللي خاصة بيها هي. طبعا انا مقدرش احكم و لا أحب أسالك اذا كانت الحاجات دي بتقصر معاك في الميزانية فعلا و لا انت بتتكلم فيها من باب عدم الأسراف, انت بس اللي تعرف ظروفك, انما اللي بحاول أوصلهولك ان المشكلة الأساسية ان انت بتبص للحاجات دي باعتبارها رفاهيات ممكن التقليل منها و هي شايفاها أساسية.

ثانيا واضح من عرضك للمشكلة ان انت المسئول عن ميزانية البيت, طيب ليه متحاولش تشركها معاك في الميزانية أو حتى تديلها مصروف البيت و هي تتصرف, عشان أولا هي تقدر الألتزامات و الظروف اللي بتخليك تدقق على الحاجات دي, ثانيا عشان تتأكد ان انت مش بتتعمد تستخسر فيها. أعتقد لو عملت كدة ممكن تلاقيها هي من نفسها بتراعي حاجات كتير عشان حتبقى مقدرة ظروفك. في نفس الوقت انت ممكن تقتطع جزء معين تديهولها يبقى زي مصروف شخصي ليها و للحاجات الشخصية بتاعتها بعيد عن مصروف البيت عشان تحسسها انها مش طول الوقت مخنوقة و مستنياك تتعطف عليها بالحاجة اللي هي محتاجاها. معلش انا عارفة ان كلمة تتعطف عليها دي بايخة بس أنا أتعمدت استخدمها عشان أحاول أوصلك هي ممكن تكون حاسة بأيه.

النقطة الأخيرة اللي لازم تاخد بالك منها ان الخلافات على الأمور المادية دي من أكتر الحاجات اللي ممكن تهز العلاقة الزوجية و تخليها متوترة. لازم تتكلم معها و تفهمها - و الكلام ليك انت كمان - ان فلوس الدنيا كلها متساويش ان انتوا يبقى فيه سكينة و صفاء في علاقتكوا ببعض. مينفعش الكلام في الماديات يبقى سبب للخناق و انكوا تبعدوا عن بعض, بالعكس حتى لو فيه ضائقة مادية الزوجين بيمروا بيها في أي وقت المفروض يكونوا بيتعكزوا على بعض عشان يعدوها. مفيش ظروف في الدنيا مبتعديش و المركب بتمشي, بس تعاملنا خلال المواقف و الازمات المخلفة هو اللي بيفرق وبيخلينا قدام يا أما نبص على المشاكل و المحن و نلاقي انها قربتنا من بعض أكتر يا أما بنلاقينا سبنا الظروف تبعدنا عن بعض.

و في الأخر بدعي ليك و لينا كلنا أن ربنا يوفقنا مع أزواجنا و يجعل بينا كل خير و مودة و رحمة.

لو حضرتك سمحتيلى اقول رأيى فى الكلام دة من وجهة نظر رجالى و بعد اذن الاستاذ براون ايس .. انا مش شايف انة كدة بخيل (او بيقرط عليها) زى ما حضرتك تفضلتى - لانة هو مش بيمنع عنها حاجة بالعكس - هو كل اللى بيتكلم فية ان يبقى فية اعتدال و استخدام للمواد دى بعقل .. اية الداعى يعنى انة تستخدم المناديل الورقية فى تنشيف الارضية او تنشيف الوجة ادام موجود قدامها بديل غير مكلف و هيأدى نفس الغرض .. اية الداعى ان لتر شاور يخلص فى اسبوعين - الاعتدال مطلوب فى كل شىء .. و قدام ربنا مديلة يبقى ميحرمش بيتة من حاجة - بس مش معنى كدة اننا نفرط فى النعمة اللى ربنا ادهالنا بسهولة و من غير تفكير لمجرد اننا نقدر نجيب غيرها خصوصا .. انك متعرفيش الراجل بيعمل اية عشان يجيب الفلوس دى و لا بيفكر ازاى عشان يحاول توفير جزء من دخلة لتأمين مستقبل الزوجة و مستقبل الاولاد او تحسين المستوى المعيشى للاسرة .

فى فرق بين انى امتع نفسى ب شاور جيل او غيره او غيره وانى ابقى مبذر ومعنديش احساس بقيمة الحاجة ده ولا عندى احساس بان اللى بيجبلى الحاجات ده بيتعب فى فلوسها ومش بيلاقى الفلوس على الارض.

هو ده اللي كان قصدي اوصلهلها خصوصا ان الفترة اللي احنا فيها نقطة تغيير كبيرة في حياتنا والظروف صعبة وعلي ده كله انا ماقلتش مانجبش بالعكس قولت نستخدم الحاجة بالعقل

لو بصيت للردود اللي فوق دي يا أستاذ براون أيز حتلاقي ان انا كلامي صح. أنا لما قلتلك حتكلم من وجهة نظر حريمي كنت أقصد الفت نظرك ان ممكن تكون مراتك بتفكر بطريقة مختلفة عنك. واضح من ردود الأخوة ان الرجالة ليهم وجهة نظر مختلفة تماما و ده يثبت كلامي. الرجالة و الستات اتخلقوا مختلفين في المشاعر و التفكير و ردود الأفعال, الأختلاف ده رحمة من ربنا سبحانه و تعالى لأن الزوجين بيكملوا بعض. أهم حاجة في الحياة الزوجية ان كل طرف يقدر طريقة تفكير التاني و مشاعره و يوصلوا مع بعض لحلول وسط. أنا معرفش اذا كان حضرتك في بداية حياتك الزوجية و لا متجوز من فترة, بس أحب أقولك ان الخلافات اللي من النوع ده طبيعية جدا في بداية الجواز لأنها نابعة من أختلاف الطباع و العادات لكل طرف. مش مهم خالص مين صح و مين غلط - و مش شرط أصلا يكون واحد صح و التاني غلط - المهم ان في الخلافات دي سواء مادية أو غيره مناخدش الموضوع بحدة و يبقى كل طرف عايز يفرض وجهة نظره. المفروض كل واحد يتنازل شوية و نوصل لحل وسط. يعني انا أقترحت عليك تحدد لها مصروف خاص باحتياجاتها و يكون مناسب بحيث انها تجيب بيه اللي هيا عايزاه و ما تطلبش منك, و انت تكون مظبط الميزانية و ماتفاجئش بطلبات أضافية. ممكن برضه بالنسبة لموضوع المناديل ده تنزل تشتري لها مجموعة فوط من الرخيصة و تقولها ان دي مخخصة لتنشيف الأرض. الأقتراحات دي ممكن تناسبك انت و مراتك و ممكن لأ, مش مهم, اتكلم معاها بهدوء و أوصلوا مع بعض لحل يرضيكوا انتوا الاتنين. أهم حاجة في الموضوع انكوا متسيبوش خلافات صغيرة تكبر و تخليكوا شايلين من بعض, و حاولوا دايما كل واحد يلتمس العذر للتاني مش يدور هو غلط في ايه. و زي ما قولت لحضرتك أي ظروف في الدنيا مهما طولت ان شاء الله حتعدي و تبقى ذكرى, اللي باقي لكم هي عشرتكم الحلوة.

ربنا يوفقك و يصلح حالك و حالنا.

[AmatoALLAH]

انا لاحظت من كلامك انك انت شويه ممكن تتكسف من اهل خطيبتك قدام اهلك يعني مثلا طريقة التقديم او بيتهم او انهم يحددوا لك عدد المعازيم

طبعا دي مشكله كبيرة جدا لو فيه اختلاف في الحاجات دي

صحيح دي حاجات صغيره بس انت بعد الجواز هتتضايق منها و هتقف لخطيبتك علي الواحده فيها و كده انت هتكون ظلمتها لانك عارف الحاجت دي من الاول

في نقطة ضعف شخصيتها الخوف بعد الجواز ان في اي مشكله بينكم تلاقي اللي بتتعامل معها هو ابوها مش هي و دي بداية خراب اي بيت

بالنسبه لسؤالك عنهم في المنطقه و الجيران دا مش مقياس ابدا انك تعرف هما بتوع مشاكل و لا لا صدقني الكلام دا عن تجربه


بس فيه سؤال يعني ايه والد العروسه بيقولك العفش يكون سمبل مش انت و عروستك هتجيبوا العفش من مكان واحد يعني نفس المستوي و لا هما من مكان و انت من مكان؟

و هل هو بيشرط عليك حاجات معينه تجبها و تكون في مستوي معين و لا متساهل معاك؟


يا ريت ترد علي النقطتين دول

عايزه اقولك علي حاجه اخيره انت شوف والدة العروسه ايه نظامها في بيتهم يعني هي المتحكمه في الامور و هي اللي بتمشي البيت ؟ لو كده استخير ثم استخير ثم استخير و نفس الشئ لو فيه عريس و والدته هي اللي تمشي البيت يبقي قول علي الدنيا السلام

[AmatoALLAH]

للاسف ما كن رقات لنهاية الموضوع و ماعرفت انك نهيته

قدر الله و ما شاء الله فعل

و اكيد البنت ربنا هيرزقها خيرا منك و هيرزقك خيرا منها

و ماتزعلش صدقني اكدي دا خير ليك