عن البورصه المصريه

[MaZaGAngeE]

ايه ده يا باشا
انت نص لاشركات النشطة معلمة عليك
بعد كدة تبقي تقولنا هتحط فلوسك فين علشان منحطش في نفس الشركات
يا ريت والله اهو تبقي تعليم للناس وتجارب ببلاش

الحياة من غير تعليم ( بتاع البورصة مش بتاع المدارس ) مالهاش طعم ..........

باستخدام المؤشرات ماكد , ار اس آي بالقيم الافتراضية بتاعتهم ....
نبدأ أول شارت ::::::

طبعا البداية لازم تكون مع المؤشر الرئيسي للسوق الواقع بتاعنا ايجي 30

من الشارت اليومي :

المؤشر يتحرك داخل القناة العرضية اللي حدودها 6540 و 5936 و هوه حاليا قريب جدا من الحد السفلي للقناة , و أمامه نقطتين دعم 6000 و 5936 و أظن صعب جدا انه يكسرهم ...
طبعا الماكد ادى اشارة بيع يوم 30/6 ....لكن المؤشر مش منطقة تشبع بيعي ..

على الشارت الأسبوعي :

هتلاحظ انه كسر الترند الصاعد عند 6500 و نزل لحد 5936 و رجع تاني بس مقدرش يكسر نقطة ال 6500 , 4 محاولات فاشلة للصعود و اديها في النزول يا باشا ....
مؤشر ماكد ادانا اشارة بيع عند شمعة الرجل المشنوق يوم 16/5 من خلال تقاطع لأسفل زي الرسم ...
اللي ممكن يطمنا شوية ان المؤشر لا كسر حد القناة السفلي ولا قدر يكسر نقطة ال 6000 و ده يخلينا نصبر شوية لو عندنا رفاهية الصبر و تحمل الخسارة ...


لو بصيت على الشارت الشهري هتلاقي المؤشر ماشي في ترند صاعد و داخل في قناة حدودها 7500 و 5936 و ربنا يستر و مرحلة الزبزبة دي ما تطولش ...
و من مؤشر ماكد هنلاقي انه مدي اشارة شراء من شهر 9/2009 و ده معناه ان الترند على المدى الطويل صاعد .

[MaZaGAngeE]

مؤشر البورصة 70 :

اليومي :


يوم 22/6 كسر المؤشر الترند الصاعد و نزل حتى 527 تحت القناة السعرية التي حدها السفلي 539 , لكن مؤشر الماكد لم يظهر أن السوق هابط و لا عكس اشارة الشراء التي ظهرت يوم 2/6 لكن أوشك حدوث تقاطع للماكد .

الأسبوعي :


الاتجاه العام هابط لكن كسر المؤشر الترند الهابط الصغير يوم 13/6 و كون اتجاه صاعد قصير المدى و كسره ليكمل الاتجاه العام الهابط . و اشارة البيع من الماكد مازالت مستمرة من بداية شهر 5 حتى الآن ..

[MaZaGAngeE]

مؤشر 100 :

اليومي :


يتحرك المؤشر في قناة سعرية حدودها 973 و 924 و كسر المؤشر الترند الصاعد القصير في يوم 22/6 و كسر القناة السعرية يوم الأربعاء الماضي

الأسبوعي :


نفس الكلام على المدى الأسبوعي و لكن لازم نلاحظ تكون 3 قمم أقل من بعض أيام 4/10/2009 و 14/2/2010 و القمة الأخيرة 18/4/2010 بالقيم : 1425 ثم 1263 و 1254 مما يؤكد الاتجاه الهابط على المدى المتوسط ....

الشهري :


الشارت يغنينا عن الكلام .....

[MaZaGAngeE]

بصراحة و رأي شخصي ليا المؤشرات العامة للبورصة سواء كانت 30 أو 70 أو 100 اللي بيجمع الاتنين مع بعض , متابعتهم المفروض تدينا فكرة واضحة للسوق المصري لكن ... تلاعب الميكرات و أوزان الشركات و عدم الشفافية و تقليب المستثمر الصغير يخلوني أبعد عن المؤشرات و أحلل السهم بتاعي مباشرة بعيد عن تحليل المؤشر ,,,,


التحليلات السابقة دي مجهود شخصي ليا و مش منقولة من أي حد ....

[dr-mohamed]

بردو مقولتش ايه الاسهم الىل هتشتريها علشان نبعد عنها

بضحك معاك طبعا
بجد مجهود تشكر عليه فعلا ومحتاج قراءة بتركيز جدا

[MaZaGAngeE]

بردو مقولتش ايه الاسهم الىل هتشتريها علشان نبعد عنها

بضحك معاك طبعا
بجد مجهود تشكر عليه فعلا ومحتاج قراءة بتركيز جدا

برضه .... بص يا سيدي أنا دلوقتي مفلس على الآخر عشان اشتريت كابلات تاني الأسبوع ده ب 1 عشان أخلى المتوسط بتاعي 1.18 و كمان دخلت اكتتاب أسكوم و كان المتوسط بتاعي قبل الاكتتاب 84.5 بس لسه مش عارف بقى كام بعده .....

يعني أنا حاليا متفرج ... تقدر تشتري براحتك يا عم من غير خوف مني ...

أنا دلوقتي في الوردية أول ما أروح هضرب مج نسكافيه محترم و أقعد أحلل كابلات عشان شايف فيها فرصة حلوة جدا و عايز رأيك معايا ....

[dr-mohamed]

لافهمني واحدة واحدة
وردية ايه انت بتشتغل ايه
وايه حكاية المتوسط السعري بتاعك انت داخل في شركات ايه
وايه حكاية سهم الكابلات ده
عارف انا بشوفه من ايام لما كان ب 200 جنيه تقريبا
انا متنيل في الزفتة دي من 1999 لكن لا خسرت كتير ولا كسبت كتير لان اخري العب بمبلغ لا يتعدي اصابع الكفين علشان الخوف
قريني حكاية الكابلات دي لانى ناوي ارجع من تاني واقولهم
عاد لينتقم

[MaZaGAngeE]

لافهمني واحدة واحدة
وردية ايه انت بتشتغل ايه
وايه حكاية المتوسط السعري بتاعك انت داخل في شركات ايه
وايه حكاية سهم الكابلات ده
عارف انا بشوفه من ايام لما كان ب 200 جنيه تقريبا
انا متنيل في الزفتة دي من 1999 لكن لا خسرت كتير ولا كسبت كتير لان اخري العب بمبلغ لا يتعدي اصابع الكفين علشان الخوف
قريني حكاية الكابلات دي لانى ناوي ارجع من تاني واقولهم
عاد لينتقم

أنا مهندس صيانة في مصنع كربونات الكالسيوم بتاع أسكوم في المنيا و عندي وردية دلوقتي قربت تخلص ...

سهم الكابلات ده فيه مصلحة حلوة هنظبطها مع بعض بس كمان ساعة أروح بس و أجيلك هنا نقعد براحتنا ...

[dr-mohamed]

أنا مهندس صيانة في مصنع كربونات الكالسيوم بتاع أسكوم في المنيا و عندي وردية دلوقتي قربت تخلص ...

سهم الكابلات ده فيه مصلحة حلوة هنظبطها مع بعض بس كمان ساعة أروح بس و أجيلك هنا نقعد براحتنا ...

يييييييييييييييييه
فكرتني ببيكربونات الصوديوم والبوتاسيوم واتش تو اس او فور
منها لله الكيميا
منك لله يا منيرة

كمان ساعة يا باشا اكون في عاشر نومة انا لسة مانمتش وجبت جااااااااااااااااااااز
بس بردو لازم تقريني على حكاية الكابلات دي علشان بجد ناوي اشتري اي حاجة اليومين دول وتكون مضمونة ومعقولة مش البس في الحيطة ومبقتش اثق في السماسرة بتوع البورصة لبسوني في سهم قبل كدة بتاع شركة كيماويات نزل من 17 جنيه ل6 جنيه الله يخرب بيوتهم

[MaZaGAngeE]

لا احنا مالناش دعوة خالص ببيكربونات الصوديوم و لا الكيميا .... احنا مصنع زي مصانع الأسمنت كده تقريبا بس من غير أفران .....
بالنسبة للكابلات يا باشا أنا هقولك رأيي بس لو مشيت عليه و كسبت ده رزقك من عند ربنا لكن لو خسرت أنا مش مسؤول ده قرارك و انت تتحمل تبعاته ... كمان أنا لسه بتعلم و بحاول أوصل لطريقة تحليل مناسبة ....

نبدأ بالشارت السنوي :


من الشارت ده هنلاحظ ان سعر السهم 0.95 ده نقطة دعم قوية جدا و كانت دعم طول السنة و كمان لما السعر كسرها في 2007 سافر في رحلة جامدة جدا لحد 3.5 ....

الشارت ربع السنوي :


نفس السلوك نقطة قوية جدا لما كسرها بيطلع طلعات قوية جدا ...

الشارت الشهري :


نفس الكلام و ده تأكيد في كل مرة على قوة و سلوك السهم عند السعر ده ...

الشارت الأسبوعي :


نفس النقطة و نفس السلوك .....

الشارت اليومي :


بصورة عامة نفس الكلام ......

تعالى بقى ناخد الشارت اليومي و نفصصه حتة حتة مع بعض :


أول حاجة لاحظ وجود فجوة مش متغطية بين الأسعار 1.18 و 1.14 و دي لازم السعر يطلع يغطيها ...
تاني حاجة بيتكون نموزج شمعة الصباح و دي بتتكون من 3 شمعات زي الرسم و دول معناهم بداية انطلاقة قوية و ارتفاع في الأسعار سريع ... وكمان معناها ان الترند خلاص هيعكس اتجاهه بشكل سريع من هابط الى صاعد ..


و تأكيد تاني من مؤشر البولنجرباند :


وده بيقول ان السعر تحت حد القناة بتاعة بولنجر باند السفلية يعني كده عند نقطة دعم قوية جدا لازم يرد منها أو يكسرها .. بس ده في رأيي مستحيل لأن زي ما احنا عارفين سلوك السهم على مر السنين اللي فاتت عمره ما قدر يكسرها و كل مرة بيرد منها و يطلع بقوة ...
حاجة كمان من بولنجرباند القناة بققت ضيقة جدا و ده معناه مرحلة زبزبة و بداية حركة السعر حركة قوية لأعلى أو أسفل ...

طيب هيروح فين ؟

من الشارت ده نقدر نقول ان السعر خلال الفترة اللي فاتت كان بيتحرك في قناة حدودها 0.98 و 1.02 و كسرها و نزل ل 0.95 اللي هيرد منها يوم الأحد و هيطلع للمقاومة الأولى ليه1.00 و لو قدر يعديها هيطلع ل 1.02 و بعدها ل 1.05 لحد ما يوصل ل 1.18 و يغطي الفجوة السصعرية اللي عملها يوم 5/6/2010 .

بس خلي بالك مش شرط انه هيطلع على طول كده في أسبوع و لا يومين تلاتة لأ هوه ممكن يقعد أسبوعين تلاتة لحد ما يغطي و ممكن يطلع لحد 1 و ينزل يختبر ال0.98 و يرد أو يكسر .....
بس أكيد انه هيطلع عشان الفجوة لازم تتغطى و ده من قوانين التحليل الفني اللي مافيهاش فصال .........

يا رب أكون بحلل صح ... لو انت أو حد من الأعضاء شايف حاجة أو ليك رأي تاني قوله عشان نتعلم من بعض و نفيد بعض ..........
آسف على الاطالة ...

[mada121977]

اهلا
هو حضرتك من ضحايا ميتو واية اى سى

شوف حضرتك انا من ضحايا حاجات كتير واولهم جنوب الوادى واخرهم سوق خارج المقصوره اللى الواحد اتظبط فيه تمام ولسه ربنا يستر على اللى جاى

[mada121977]

ههههههههههههههههههههه
مش لوحدك الاغلبية مجروحة ومتقطعة كمان
عارف بتدعي على مين
بصوا احنا بندعي على اتنين جروا رجلنا للرزيلة
الاول اللى علمنا شرب السجاير
والتاني اللى جر رجلنا للبورصة

طيب مادام انت عارف انا بدعى على مين قول اول حرف من اسمه كده :)
لحسن يكون اللى فى بالى غير اللى فى بالك

[dr-mohamed]

بالنسبة للكابلات يا باشا أنا هقولك رأيي بس لو مشيت عليه و كسبت ده رزقك من عند ربنا لكن لو خسرت أنا مش مسؤول ده قرارك و انت تتحمل تبعاته .

لو كسبت والله هدعي لك جدا
ولو خسرت هدعي عليك من غير جدا

بس بجد تحليلك ممتاز

[MaZaGAngeE]

لو كسبت والله هدعي لك جدا
ولو خسرت هدعي عليك من غير جدا

بس بجد تحليلك ممتاز

طيب بدال ماتعي عليا ادعيلي ربنا يعلمني ما جهلت ....

مبسوط ان تحليلي عجبك ....

[dr-mohamed]

على فكرة انا راجعت التحاليل يا مزجانجاي
فعلا اقل سعر للسهم في خلال سنة كان 93 قرش واعلى سعر كان 124 قرش
يعني السهم دلوقت بيلعب في الحد الادني ليه وده الوقت المثالي للشراء
بس المشكلة البيع يكون امتى علشان المقالب بتاعة الميكرات