Tweet
بمناسبة الموسم الصيفي اللي بيظهر فيه كائن عجيب كده اسمه على اسم فاكهة قديمة انقرضت من مصر من زمان اسمها "الخوخ"
أحب أفكر مواليد السبعينات ومن هم أكبر بالخوخ القديم
الخوخ زمان كان كبير ولونه أحمر غامق جدا و لحمه برتقالي محمر أما النواة فكانت نبيتي
وكان اللحم ماسك في النواه جامد مش عاوز يسيبها , و مكنتش ثمره مليانة مياه ولا كنا محتاجين بافتات علشان بيسقط !
وبعدين البقعه منه مكنتش بتطلع ولا بالطبل البلدي من الهدوم , ومش سائل شفاف لا طعم له ولا لون زي دلوقتي !
أما الطعم بقه فكان حكاية , كانت أحلى فاكهة , وريحتها كانت بتقلب العمارة مش الشقة اللي فيها خوخ بس
الخبر الجميل بقه إن لسه الخوخ صفاته كده في جميع الدول التي لم يتولى والي ولاية الزراعة فيها
واللي مش قادر يسافر ممكن يجيب الكمبوت التايلندي أهه فيه 50% من الطعم القديم و أهو نص العمى
زمان على ما أفتكر كنت ضعيف شوية , أبويا خدني للدكتور وقاله عنده نقص في الفايتامينات , أكله فاكهة كتير وكتر من الخوخ
بعد تلت قرن أخدت بنتي للدكتور علشان عندها نزلة معوية , أول ما بصلها الدكتور , قالي أكلتها خوخ ؟؟؟؟؟؟
قلتله أه
قالي يا نهار أسود !! إوعى تأكلها خوخ أنت مجنون ؟؟؟؟
وواحد صحبي مره نسى نفسه وأكل بتاع كيلو خوخ وهو قاعد قدام التليفزيون , جاله إسهال شديد لمدة 5 أيام و في الأخر حجزوه في المستشفى وعلقوله محاليل وخسر نص وزنه !!!
جبولنا تقاوي من اسرائيل ورشوها مبيدات وأطعموا بيها خير أجناد الأرض علشان يبقوا خير مسهلي الأرض ,
منه لله اللي عمل في نعمة ربنا كده
Comment