**إستــــــفتــــاء على مكــان المقابلة الشهرية -فبراير08**

[hazem_khidr]

و انا كمان جاي بأذن الله
بس يا ريت حد يقولي امشي ازاي من علي الدائري و لو انا علي الكورنيش امشي ازاي :)

[Dr Ahmed]

أنا مش هافتى معرفش فين منشية الصدر بس هاقولك من غمرة إطلع على رمسيس و إمسك كوبرى إكتوبر و من مدخل كوبرى 15 مايو من فوق أكتوبر إدخل و خليك على مايو لحد آخره هاتنزل ميدان ليبنان تفضل ماسك شمالك هاتطلع المحور تمشى حبة و خلى بالك من الرادار لحد منزل طريق إسكندرية الصحراوى فى اليمين (و على المنزل إعلانات لغبور) تنزل و تمشى حوالى 4 كيلو هاتفوت محطة شل و توكيل عز العرب و إمارات مصر و هاتلاقى كارفور

الله يكرمك يا أخى
لكن كده فيه أكتر من حاجة مش عارفها زى كوبرى 15 مايو والمحور اللى عمرى ما طلعته وباسمع بزحمته... أنا هرجع للطريق الزراعى وآخد منه الدايرى بدل ما أتوه وتسيبوا الاجتماع علشان تدوروا عليا.

[techno]

انا عضو جديد معاكم اتنمي ان يكون مرحب بيا و بجد انا نفسي اشوفكوم كلكم واحد واحد و إن شاء الله هحاول اجي بس المشكلة اني هاجي واصلات علشان انا من شبرا فا ممكن حد يقولي الاجتماع امته و الساعه كام و اركب ايه :]:] شكرا ليكم جميعا يا ناس يا ذوووووق

[hazem_khidr]

دكتور احمد عبد الغني انا سعيد جدا انك جاي بكره ان شاء الله :)

[Dr Ahmed]

الله يخليك يا حزوم وأنا أسعد

[د.أحمد سمير]

الله يكرمك يا أخى
لكن كده فيه أكتر من حاجة مش عارفها زى كوبرى 15 مايو والمحور اللى عمرى ما طلعته وباسمع بزحمته... أنا هرجع للطريق الزراعى وآخد منه الدايرى بدل ما أتوه وتسيبوا الاجتماع علشان تدوروا عليا.

يا دكتور أحمد حضرتك بتتكلم على مسافة بعيدة جداً .. انت أصلاً في منشية الصدر أو غمرة يعني بالفعل على مطلع كوبري 6 أكتوبر .. ويوم الجمعة بتكون الزحمة هينة جداً مش بالصورة الجامدة بتاعة كل يوم .. انت هتطلع كوبري أكتوبر لو جاي من ناحية شارع رمسيس .. يعني شريط المترو على يمينك ، أما لو كنت جاي من ناحية منشية الصدر ومستشفى غمرة من الخلف يعني بين شريط المترو على اليسار وشريط القطار على اليمين وفوقك كوبري اكتوبر كمل الشارع إلى ميدان رمسيس هتلاقي مطلع كوبري أكتوبر أمامك بالضبط .. كل اللي هتعمله هتطلع الكوبري وتخش تاني مدخل على اليمين .. الأول بتاع المحطة الدولية ، والتاني هو وصلة كوبري 15 مايو وهو واضح جداً وعليه علامات إرشادية والكوبري واسع جداً في هذا المكان ، وبعدين طوالي لا يمين ولا شمال (بالتفصيل خليك شمال على الكوبري ومالكش دعوة بمنازل الكوبري سواء ناحية الكيتكات أو العجوزة أو المهندسين ) المهم طوالي برضه هتلاقي كوبري ميدان لبنان طبيعي قدامك هتطلع وتنزل هتلاقيك على المحور (مش هيبقى زحمة زي مانت متخيل بإذن الله ) طوالي برضه وبعد 13.5 بالضبط هتلاقي منزل طريق اسكندرية الصحراوي على اليمين انزله شوية وهتلاقي على اليمين كارفور داندي مول .. بس

أما أخونا العزيز حازم خضر اللي جاي من الدائري فأمامه طريقين : الأول ينزل نزلة المحور وهي أقرب طبعاً ويكمل على نفس الوصفة ، والتانية يكمل على الدائري وينزل نزلة الصحراوي ويكمل على الطريق الصحراوي حتى كارفور والفرق ما بين المسافتين مش بعيد فقط لو عايز تتجنب المحور .

تقبلوا جميعاً خالص مودتي .. وأنا بمشيئة الله هحاول آجي بكرة لكن الأمور مش واضحة بالنسبة لي حتى الآن ، وإن كنت طبعاً أتمنى أشوف جميع الأعضاء في كل وقت .

[hazem_khidr]

ميرسي جدا يا دكتور احمد علي الافاده دي و الوصف الدقيق:)
يا تري بقي الميعاد الساعه كام علشان عاوز اجي من بدري يا ريت نعرف الناس حتبدأ تكون هناك من امتي علشان ما اروحش من بدري اقعد لوحدي

[Nile_Storm]

ميرسي جدا يا دكتور احمد علي الافاده دي و الوصف الدقيق:)
يا تري بقي الميعاد الساعه كام علشان عاوز اجي من بدري يا ريت نعرف الناس حتبدأ تكون هناك من امتي علشان ما اروحش من بدري اقعد لوحدي

انا جاي بس برضه زيك حاسس اني خقعد لوحدي مش عشان هاجي بدري
لكن لانكم ماشاء الله اكبر مني
21 سنه بس :(

[Dr Ahmed]

ماتخافش يا ستورم فيه أخوة هنا 18 و 19 وانت طالع وحتى 60 ماشاء الله
وهتفاجأ إن الكل كأنهم يعرفوا بعض معرفة حقيقية من زمن بعيد .. يعنى انسى انك هتحس انك لوحدك دى خاااالص.

وشكرا للعزيز الغالى دكتورأحمد سمير على وصفه الهايل - كالعادة.

[اسلام المصرى]

أعتذار

أخوانى و أحبائى الأعزاء جدا , السلام عليكم و رحمة الله و بركاته :)

أعتذر بشدة عن عدم حضورى المقابلة غدا :( غصب عنى و الله , عندى أرتباطات عائلية لا يمكن تأجيلها كنت بحاول أئجلها بس كان هيبقى فيها زعل....... أنا زعلان أنى مش هاقدر أشوفكم بكره :( و حاسس أن فى أخوة أعزاء هاتيجيى المقابلة بكره أول مرة , و أخوة أعزاء عايز أشوفها من زمان و القدر لا يسمح :( أرجوكم أعذرونى يا أحبائى أنا أسف جدا جدا و ان شاء الله أشوفكم كلكم على خير فى مقابلة شهر مارس أو قبل ذلك لو شائت الأقدار ان شاء الله تعالى.
فى حفظ و رعاية الله , أتمنى لكم جميعا قضاء وقت ممتع غدا و ان شاء الله الجو يكون جميل و توصلوا و تروحوا من القابلة بألف خير و سلامة :)

[hazem_khidr]

:(:(:(:(:(:(:(
ليه كده بس يا باشا دا انا كان نفسي اشوفك جدا .

بس طالما ليك عذرك يبقي حنقول ايه بقي بس حخاول تيجي علي الاقل ساعه و لا حاجه

[segsauer]

أنا جاى بكرة أن شاء الله

[Sharky]

أعتذرعن الحضور غدا لظروف خاصة

[Karim_Monir]

مش عارف اقول ايه بس 90% مش هاقدر اجي
والدتي مريضه شوية ولازم اروحلها
والله كنت مرتب اروح بعد المقابلة بس كدة هاروحلها من الصبح
عذرا والله كان نفسي اشوفكم كلكم
بس الا الوالدين بقى وانتم عارفين
اشوفكم مقابلة مارس على خير باذن الله

[E_Farid]

السلام عليكم ورحمة الله وبركاته،

انا اسف جدا يا جماعه، للأسف احتمال كبير مش هقدر آجى بكرة لظروف طارئه،

بإذن الله أشوفكم فى مقابلة الشهر الجاى..