ايه أحسن فى العيشة؟ المدن الجديدة و لا القديمة

[n_i_t_e]

أخباركم ايه جميعا؟؟
أكيد أغلبنا بيحب الحياة الهادية مش السريعة و الهدوء و بيكره الزحمة
موضوع كده جه على بالى و قلت أسمع الأراء فيه.
هو الأحسن لو الواحد يسكن فى مدن زي القاهرة و أسكندرية ؟ طبعا هيعانى من الزحمة الرهيبة و مشوار ال10 دقايق مشى بيوصله فى ساعة بالعربية اللى أستحالة يلاقيلها باركينج و الطوابير عند العيادات و المدارس و الأفران و ..و .. و الناس اللى أعصابها أصلا تعبانة من الزحمة و الخنقة. بس فى مقابل وجود خدمات أفضل و مولات و حياة عمار برضه
و لا يعيش فى مدن زي المدن الجديدة أو المدن الأصغر شويه اللى مش هتحس فيها حاجة زي أضواء القاهرة بالليل و خدمات كويسة مقارنة بالعاصمة بس هدوء و سهولة فى الحركة و رتم أبطأ شويه ؟
هنفرض أن الشغل متوافر فى المكانين عشان نستبعده من المقارنة.

كمان ممكن اللى يقرأ الموضوع يشاركنا ايه المدينة اللى فى مصر يتمنى يعيش فيها (حاسس ان فى ناس هتقول مفيش ) بس بجد يختارها و يقول بيحلم يعيش فيها ليه ؟

[النوبي]

الحمد لله علي الاقصر ده انا في نعمه مواصلات سهله بلد صغيره والعيشه فل الفل

[MTAK]

نفسى اعيش فى مدينة هادئة
كنت اتمنى ان يكون عملى مثلا بمدينة الطور
اى حاجة صغيرة ليس بها الا شارع رئيسى و بحر و خلاص
شوية المبهرجات الموجودين فى القاهرة او الاسكندرية انت بتدفع ثمن استعمالهم من صحتك و عمرك و اعصابك
بس طبعا يعيب تلك المدن الصغيرة
الخدمات الصحية

[hobaz]

انا من رأيي انك تمسك العصاية من النص يعني تروح مدينة جديدة متكاملة وفي نفس الوقت تكون قريبة من القاهرة ومن مصالحك وشغلك والمدن ده زي الرحاب على سبيل المثال وليس الحصر هي ربع ساعة بالكتير وتكون في القاهرة........

[marsguy]

انا من رأيي انك تمسك العصاية من النص يعني تروح مدينة جديدة متكاملة وفي نفس الوقت تكون قريبة من القاهرة ومن مصالحك وشغلك والمدن ده زي الرحاب على سبيل المثال وليس الحصر هي ربع ساعة بالكتير وتكون في القاهرة........

بصراحه أنا شايف إن اللي بيعيش في الرحاب ولا 6 أكتوبر بيكون متعذب

موضوع ربع ساعه ده شبه مستحيل

أحسن حاجه بالنسبه لي هي إني أشتغل في مدينة فيها هدوء نفسي زي مدينة الطور أو دهب. بس على شرط إن يكون مرتبي كويس عشان للأسف في معظم الأوقات المرتبات بتكون تعبانه في المناطق النائيه دية.

[n_i_t_e]

بصراحه أنا شايف إن اللي بيعيش في الرحاب ولا 6 أكتوبر بيكون متعذب

موضوع ربع ساعه ده شبه مستحيل

أحسن حاجه بالنسبه لي هي إني أشتغل في مدينة فيها هدوء نفسي زي مدينة الطور أو دهب. بس على شرط إن يكون مرتبي كويس عشان للأسف في معظم الأوقات المرتبات بتكون تعبانه في المناطق النائيه دية.

أنا طرحت الموضوع بطريقة فكرية مش عملية بحيث موضوع المرتب مستبعد فى الرأي لأنه فعلاااا بيفرق كتير زي ما حضرتك قلت. عشان نشوف من كل الأراء هل الواحد بيفضل الهدوء و لا الخدمات. لو استبعدنا من كلامك نقطة المرتب يبقى انت بتفضل الهدوء فعلا.
بس هو الخدمات مهمة برضه...يعنى مثلا ممكن تلاقى المدارس مستواها تعبان...تتزنق بابنك الصغير فى نص الليل فى دكتور كويس متلاقيش...لما تحتاج تشتري بضايع معينة بتلاقيها متوافرة. أنا مش منحاز ليها بس حبيت أوضح أهمية كل نقطة عشان أوسع مجال الأراء و الحوار.

[dolly13]

انا عايشة فى العبور وهى بجد مدينة جميلة ويوم ماخرجت من مدينة نصر وجيت هنا كنت عايزة اعمل فرح
المشكلة انى باضطر انزل القاهرة لزيارة الاهل وبجد بابقى مش عايزة اخرج من العبور
طبعا المدن الجديدة الهادية الواسعة النظيفة احسن بكتير من الزحمة
لكن انا ربنا وفقنى لان زوجى مهندس ومعظم اعماله فى العبور والتجمع يعنى لا يضطر لنزول القاهرة كتير وده فضل من ربنا لكن لو حد عايش هنا ولازم ينزل القاهرة كل يوم يبقى الله يكون فى عونه طبعا وده بفرض ان معاه عربية محترمة كمان فما بالك لو بيستخدم المواصلات اكيد هاتبقى مشكلة
طبعا ده نتيجة طبيعية لسوء تخطيط المدن الجديدة لانه لم يراعى عوامل كتير تجذب الناس لنفس المدينة السكنية والمشكلة ان المسؤلين بيحلوا ازمة السكن وبيخلقوا ازمة المواصلات لكن برده المدن الجديدة احسن

[محمد محمد]

انا عايش برضه في العبور وكلنا الحمد لله شغلنا ومصالحنا ومدارس اخواتي جوة العبور وفي الحي اللى انا قاعد فيه ...لما باجي انزل القاهرة بمجرد وصولي عند موقف العاشر بيجيلي حالة اكتئاب وابقي نفسي ارجع تاني علشان كده مش بنزل القاهر في الوقت من 1ظهرا وحتي ال9 مساء....احسن حاجة في المدن الجديدة هي ان الكثافة السكانية محدودة والهواء النقي وان مافيش زحمة علي الأطلاق...والمواصلات والخدمات كل يوم بتتحسن عن الأول...انا ساعة ماجيت العبور في 2005 الحي الأول ده كان عامل زي ما يكون مصيف الناس ماشية في وسط الشارع بياكلوا ذرة بليل تعالى شوف الحي الأول دلوقتي عامل ازاي....كان ساعتها مافيش غير معهدين ازهري ومدرستين خاصة و4 مدارس حكومية وواحدة تجريبي وحوالى اربع مراكز طبية حكومية مافيهمش كل التخصصات وخطين اوتوبيس فقط واحد بيروخ السلام والمرج والتاني بيروح التحرير...دلوقتي فيه 3 معاهد ازهرية و9 مدارس خاصة و7 مدارس حكومية ومدرستين تجريبي و4 مراكز طبية وحوالى 4 مستوصف فيهم كل التخصصات ومستشفي خاصة ومستشفي العبور الجماعي التخصصي(الشيخ زايد) ومعامل المختبر ومستشفي تبارك للأطفال عيادات تانية بتاعت اسنان وباطنة....الخ و4 خطوط اوتوبيس نقل عام و5 خطوط نقل جماعي غير طبعا الميكروباصات والنقل الداخلي(السوزوكي) ومؤخرا التوكتوك.

[n_i_t_e]

انا عايشة فى العبور وهى بجد مدينة جميلة ويوم ماخرجت من مدينة نصر وجيت هنا كنت عايزة اعمل فرح
المشكلة انى باضطر انزل القاهرة لزيارة الاهل وبجد بابقى مش عايزة اخرج من العبور

انا عايش برضه في العبور وكلنا الحمد لله شغلنا ومصالحنا ومدارس اخواتي جوة العبور وفي الحي اللى انا قاعد فيه ...لما باجي انزل القاهرة بمجرد وصولي عند موقف العاشر بيجيلي حالة اكتئاب وابقي نفسي ارجع تاني علشان كده مش بنزل القاهر في الوقت من 1ظهرا وحتي ال9 مساء....احسن حاجة في المدن الجديدة هي ان الكثافة السكانية محدودة والهواء النقي وان مافيش زحمة علي الأطلاق...والمواصلات والخدمات كل يوم بتتحسن عن الأول.التوكتوك.

أنا مرحتش العبور قبل كده...بس أنا فهمت من حضراتكم أنها بتجمع الميزتين...الهدوء و خدمات قابلة للمقارنة مع خدمات القاهرة.

[ganash]

الارياف مع انها متعبه فى كل حاجه بس راحه

[zanativich]

انا بقى عندى استعداد اعيش فى السلوم لو عندى شغل هناك
دا الى اهلينا علموهولنا
مكانك فين , الى فيه اكل عيشى

[n_i_t_e]

الارياف مع انها متعبه فى كل حاجه بس راحه

هههههههههههههههههههه
على فكرة أنا جربت العيشة فى مدينة كبيرة و مدينة صغيرة و شوية فى الأرياف كمان كام أسبوع جربت عيشتها و مكون من تجربتى وجهة نظر بس حبيت أفتح مناقشة أسمع رأيكم مين الأحسن . بس اللى لفت نظري موضوع مدن العبور و الرحاب لأنى معنديش خلفية عنهم خالص

[kemoelord]

انا نفسي اعيش في احدى ال 3 مدن دي :_

1- التجمع الخامس
2- مدينة الشيخ زايد
3- الرحــــــــــاب

[Eng_Mostafa_89]

اسماعيلية بلد جميلة
ومواصلاتها جميلة ومحترمة ورخيصة مستوى النضافة فيها عالى وشوارع كويسة
يعيبها ان الشغل فيها مش زى القاهرة طبعا

[dolly13]

بصراحة العبور بعد الجولف سيتى وكارفور بقت حاجة تانية خالص واميز حاجة فيها انها تجمع كل طبقات الشعب وده لوحده ظاهرة صحية جدا وفيها طبعا نشاط صناعى وزراعى هايل بيخليها استايل مختلف عن كل المدن الجديدة الاخرى