من فضلك استخدم مزيل العرق

[M.Zaher]

السلام عليكم ورحمة الله و بركاته

اولا محدش يدخل يقولي ايه الموضوع اللى ريحته وحشه ده

تاني حاجة بمناسبة الصيف بقى و الحر و الجو الجميل ده قولت اقولكم على معاناتي

طبعا كلنا عارفين بقى الروايح الجامده و الخطيره جدا المنتشرة اليومين دول بسبب العرق
و يسلام بقى لو ركبت مواصلات ولا مترو ولا اي حاجة فيها احتكاك بالناس
يبقى طبعا الكمامه اسلم
الحمد لله ان ربنا تاب عليا من المواصلات دي كان الواحد بيتخنق جدا

دلوقتي بقى
هل ممكن تقول لواحد لو سمحت ممكن تستخدم مزيل عرق ؟؟؟

[heshamzaky]

لو قوليلة كدة حا يزعل ممكن تلفت انتباهة بصورة غير مباشرة مثل سمعت عن مزيل العرق الماركة الفلانية دة حكاية انا جلابتة و ريحتة حلوة جدا م سعرة ممتاز بكدة تكون قد بأت فى كسر الحاجز النفسى بينك و بينة و بدأت فى محاورتة و النتيجة 90 بالمائة ايجابية

[bassemali]

أعتقد أن البني أدم لازم يكون من نفسه مهتم بنظافته الشخصيه والنظافه العامه في بيته وفي مكتبه وفي عربيته...إلخ
لكن اللي بيسيب نفسه كده ... يبقى سوري يعني ... بني أدم معفن ...وحتى لو قولتله إستخدم مزيل عرق .... لأ دا أنت لو جبتله مزيل عرق هديه برضه مش هيستعمله... لإنه معفن .

[ابو فرح]

أعتقد أن البني أدم لازم يكون من نفسه مهتم بنظافته الشخصيه والنظافه العامه في بيته وفي مكتبه وفي عربيته...إلخ
لكن اللي بيسيب نفسه كده ... يبقى سوري يعني ... بني أدم معفن ...وحتى لو قولتله إستخدم مزيل عرق .... لأ دا أنت لو جبتله مزيل عرق هديه برضه مش هيستعمله... لإنه معفن .

هههههههههههههههه عندك حق والله

[tabeb]

أعتقد أن البني أدم لازم يكون من نفسه مهتم بنظافته الشخصيه والنظافه العامه في بيته وفي مكتبه وفي عربيته...إلخ
لكن اللي بيسيب نفسه كده ... يبقى سوري يعني ... بني أدم معفن ...وحتى لو قولتله إستخدم مزيل عرق .... لأ دا أنت لو جبتله مزيل عرق هديه برضه مش هيستعمله... لإنه معفن .

كلامك صح
الانسان علي مااتعود وهو صغير

[أبو إياد]

انا شوفت ناس بتواجه ناس بكده ودى بتكون حسب نوع العلاقه اللى بينهم

انا عن نفسى استحاااااااااااااااااااااااااله اقدر اقول او انوه عن حاجه زى كده حتى فى غياب الشخص ماينفعش اعلق على حاجه زى كده

فى واحد اعرفه من زمان رائحه عرقه مش لطيفه خالص وبالرغم من ان كان فى ناس بتنبه من حاجه زى كده بشكل مباشر وبغيره الا ان الكلام ده ماكنش ليه اى تاثير ... لدرجه انى حللت رد فعله ده عند مع الناس ... بس انا ماليش دعوه دى حاجه تدينه هو وخصوصا انه عرف رد فعل الناس من الموضوع ده
تدووووووووووووووور الايام واقابله بعد سنين كتيررررررررر وعرفت منه انه تزوج بس الغريب فى الموضوع انك لو واقف معاه على بعد مترين تشم رائحه بارفان جميله (سبحان مغير الاحوال)

[بحري]

وهل تتخيل أن تستوقف أحدهم في وسيلة مواصلات أو مكان عام وتقول له (لو سمحت استخدم مزيل عرق)...مثل هذه النصائح لا يمكن أن تسديها إلا في دائرة محدودة جدا من المقربين وبأسلوب غير مباشر أيضا ويكون أفضل هذه الأساليب أن تكون أنت شخصيا ممن يهتمون بهذا الأمر فينتقل الاهتمام تلقائيا إلى من حولك دون الحاجة الكلام
لكن بالنسبة لعموم الناس في المواصلات أو غيرها فلابد أن نلتمس لهم بعض العذر فمثل هذه المستحضرات مكلفة نسبيا لاسيما وإن (الناس عايشة بالعافية)
للأسف قد ينفقون أضعاف ذلك على التدخين ولكن لله الأمر

[Abo_Lina]

أنا مع الرأي القائل إنك ما ينفعش تنصح واحد يستحمى مثلا ..
و على فكرة بعض المزيلات مش غالية و الأسعار تتراوح بين ٤ أو ٥ جنيه ( تمن علبة كيلوباترا التي لا تفارق جيب محدودي الدخل ) ..إلى ٢٤ جنيه ل نيفيا men الألماني الصنع ..

[heshamzaky]

مع ان النظافة من الايمان الصابونة ب 75 قرش او 2 جنية بس فية ناس الوساخة من طبعها بيكرهو النظافة

[Hossam_Hassan]

بقول لناس كتير خصوصا فى الشغل، اصل ما ينفعش يبقى شغال فى فندق 5 نجوم و ريحته عرق، المقرف بقى لما يبقى مدير و قدوة، صحيح مالوش تعامل مع النزلاء، بس بسم الله ماشاء الله مرتبه فوق ال 10000 و ييجى كل يوم الساعة 8 صباحا من غرفته اللى بتبعد 30 متر عن مكتبه و ريحته عرق و مش غاسل سنانه و بقه مقبرة، معنى كده انه يا اما ما استحماش الصبح يا اما لابس قميص كذا يوم، يبقى ماينفعش السكوت، المصيبة انه ما بيهتمش بكلام الناس و غالبا لما ييجى تجديد عقده مش هوافق و يارب ياخدوا برأيى علشان قربت اطفش من محافظة البحر الأحمر كلها بسبب ريحته.

[mr_sameh]

والله انت جيت علي الجرح انا بقي بعاني من الموضوع ده لان في شغلنا بيكون معظم الناس لابسين بدل وبتكون ريحة العرق فظيعه والله لدرجة اني برجع والموضوع بيكون مع ناس كتير يعني تشم ومتقدرش تعمل حاجه والله انا زهقت من الموضوع ده جدا

[AmatoALLAH]

لا طبعا مستحيييييييييييييييل اقول لحد كده

ببتعد عنه و خلاص

بس مش الفكرة في استخدام مزيل العرق

الفكره في الاستحمام

لان لو ماستحماش مهما استخدم مزيل عرق بردوا مش هينفع :(

[kemoelord]

لو قوليلة كدة حا يزعل ممكن تلفت انتباهة بصورة غير مباشرة مثل سمعت عن مزيل العرق الماركة الفلانية دة حكاية انا جلابتة و ريحتة حلوة جدا م سعرة ممتاز بكدة تكون قد بأت فى كسر الحاجز النفسى بينك و بينة و بدأت فى محاورتة و النتيجة 90 بالمائة ايجابية

أعتقد أن البني أدم لازم يكون من نفسه مهتم بنظافته الشخصيه والنظافه العامه في بيته وفي مكتبه وفي عربيته...إلخ
لكن اللي بيسيب نفسه كده ... يبقى سوري يعني ... بني أدم معفن ...وحتى لو قولتله إستخدم مزيل عرق .... لأ دا أنت لو جبتله مزيل عرق هديه برضه مش هيستعمله... لإنه معفن .

أحسن تعليقين قراتهم الصراحه , وفي حاجات مش ينفع الواحد يتكلم فيها لانها بتعتبر من الامور الشخصيه ولازم الواحد يكون متعلمها من صغره لذلك ييقولك (التعليم في الصغر كالنقش على الحجر)
حتى لو ما اتعلم كده المفروض يتداركها لما يكبر وياخد باله بطريقه او باخرى وعلى ما اعتقد اننا كلنا بندرس الكلام ده في المدارس واحنا صغار (ده اذا فرضنا ان دور الاهل غائب وبيشخر كمان)

قول الرسول صلى الله عليه وسلم (إن الله طيب يحب الطيب نظيف يحب النظافة)

[M.Mosaad]

يا سيدي هو المترو يبقي مترو من غير عرق الناس و اللي مش بيغسلوا سنانهم علي الصبح و عربيه المترو تفتح اكنك فتحت باب مقبرة مقفوله بقالها سنين

في ناس عندهم فكرة النضافه دي حاجة صعبة جدااااااا يااااااااه لسة هيستحمي و كمان يحط مزيل عرق

انت بتطلب منهم المستحيل

[Karim_Monir]

لكن بالنسبة لعموم الناس في المواصلات أو غيرها فلابد أن نلتمس لهم بعض العذر فمثل هذه المستحضرات مكلفة نسبيا لاسيما وإن (الناس عايشة بالعافية)
للأسف قد ينفقون أضعاف ذلك على التدخين ولكن لله الأمر

حجر الشبه ولا الشبه المطحونة من عند العطار بجنية ولا 2 جنيه تكفي شهور
وريحته ما تطلعش وقرفنا
في ناس بتستحمى الصبح
لكن طبيعة عرقها دهني اكتر منها ملحي
والعرق الدهني بيسبب روايح لعينة والشبه بتقتلها فورا وماتطلعلهاش ريحة

غرفتي في العمل غرفة كبر ولكن بها 14 فرد
متخيل لو واحد منهم ريحته سيئة
احيانا بيجي عملاء كتير من برة في عز الحر بتكون دي الكارثة
هو قاعد مريح قدام التكييف ونص الاوضه طفشو من ريحتة
وساعات باخد النوتبوك واقوم من الاوضه بسبب ناس زيه واحمد ربنا ان الشركة متغطية وايرلس واما هافضل قاعد من غير شغل لغاية ما يمشي

مرة دخلت الاضو عندي وفيها 2 سيدات اكتر من مرة لقيت الرائحة سيئة جدا
اول ما خرجت واحدة ناديت التانية وقولتلها روحي اعملي اي حاجة
وزعتها يعني
وقفت في نص الاوضه وقولتلهم النضافة من الايمان وكل لبيب بالاشارة يفهم