قرية كويسة في الساحل الشمالي

[medo_msmsa]

يا جماعة انا محتاج مساعدتكم انا بدور على قرية كويسة في الساحل الشمالي انا عايز قرية فيها ناس بس مش زحمة اوي ووسطها كويس لان انا اصلا كنت بنزل كل سنة في المعمورة بس الصيف اللي فات عشان السيزون كان ضيف لقيت الناس هناك مش تمام وفي شباب لبط.
يا ريت يا جماعة اللي بيروح الساحل الشمالي يوصفلي قرية كويسة ويا ريت لو يعرف رقم سمسار او ادارة القرية عشان استفسر منه قبل ما اسافر، وياريت اللي يعرف لو في شالية او شقة 3 اوض تعمل كام وهل كل القرى فيها وسائل ترفيه ومستلزمات كافية زي المطاعم والكافيهات وسينما وكده؟

[egyptawy2010]

متابع باهتمام

[OlaOsman]

متابع باهتمام

و انا كمان

[mohamedmostafa]

لو مش فارق معاك تكون بعيد عن مارينا انصحك بقرية آمون تقريبا ك37 قرية هادية جدا ونظيفة وبيهتموا بنظافة حمامات السباحة والمطاعم بره على الطريق كتيرة ومتنوعة لكن بصراحة مش عارف اى سماسرة وأجازة سعيدة ان شاء الله !!

[hobaz]

متابع.............

[محمد المصرى]

السلام عليكم

انا هرتب القرى من واقع زياراتى لها
1. طبعا بلا منازع مارينا اجمل القرى بالساحل والاسعار هناك من 300 جنيه لليلة فى الى الف وممكن الفين فى الليلة
2. قرية سيدى كرير فى اول الساحل تقريبا الكيلو 35 من اجمل القرى وارخصها فى المعيشة ولكن انا معرفش ايجار الشاليهات اسعارها كام
تتميز ببحيرة من اجمل البحيرات الى ممكن تنزلها فيها وخصوصا لو معاك اطفال واسعار الخدمات رخيصة يعنى على سبيل المثال ايجار الشمسية اربع كراسى حوالى 10 جنيه والمشروبات على البحيرة رخيصة طبعا بالنسبة لباقى القرى ومن اهم مميزاتها انها قريبة من الاسكندرية ومن العجمى عشان لو حبيت تخرج من القرية وفيها لعب اطفال وفيها سوق جميل عشان التمشية ومجموعة مطاعم كويسة ورخيصة

3. قرية المنتزه فى الكيلو 79.5 قرية هادية وجميل بس هى هادية جدا فيها حمامات سباحة حلوة اوى وشاطئ كبير وقريبة من مارينا تقريبا 10 كيلو وقريبة من زهران مول "مول على طريق الساحل جميل اوى "

4. قرية مينا وده انا دخلتها مرة واحدة بس وهى قرية جميلة وناس كتير بتشكر فيها

واتمنى انى اكون افدت بشوية المعلومات الصغيرة ده

[egyptawy2010]

طيب ايه اسعار الشقق الصغيرة بالنسبة للتمليك

[ehabradwan]

[QUOTE=محمد المصرى;3872725043]


2. قرية سيدى كرير فى اول الساحل تقريبا الكيلو 35 من اجمل القرى وارخصها فى المعيشة ولكن انا معرفش ايجار الشاليهات اسعارها كام
تتميز ببحيرة من اجمل البحيرات الى ممكن تنزلها فيها وخصوصا لو معاك اطفال واسعار الخدمات رخيصة يعنى على سبيل المثال ايجار الشمسية اربع كراسى حوالى 10 جنيه والمشروبات على البحيرة رخيصة طبعا بالنسبة لباقى القرى ومن اهم مميزاتها انها قريبة من الاسكندرية ومن العجمى عشان لو حبيت تخرج من القرية وفيها لعب اطفال وفيها سوق جميل عشان التمشية ومجموعة مطاعم كويسة ورخيصة

هي كرير هي لؤلؤة كرير ؟
على العموم ده رقم سمسار في لؤلؤة كرير كلمه واعرف الاسعار وابقى قولنا

شريف : 0106494295

[dolly13]

فيه كمان قرية زمردة انا رحتها مرة من كام سنة وشايفاها لطيفة جدا كل مربع له حمام سباحة خاص وفيها مطاعم مش بطالة
هى بعد مراقيا مباشرة يعنى قريبة من سمكمك وطبعا قريبة من اسكندرية جدا

[medo_msmsa]

كالعادة يا جماعة مخيبتوش ظني
استاذ محمد المصري شكرا لردك اوي بس عايز اسال سؤال مهم جدا بالنسبة ليه قرية سيدي كرير دي في صديق ليه قالي عليها وقال ان رنج السعر 500 لليوم فهل حضرتك متاكد ان اسعار مرينا تيدأ من 300 لو كده يبقى مثلا 500 يجيبوا شقة لا بأس بيها، لو كده يا ريت لو تعرف رقم سمسار او اي شخص يبفعني في ايجار شقة هناك، وشكرا جدا لردك.

استاذ ehabradwan شكرا لردك انت ايه رأيك في قرية لؤلؤة كرير دي وايه هي رينج الاسعار هناك وهل رقم الراجل اللي انت كتبته أمين؟
شكرا لردودكم

[kimonesta]

بص انا روحت مارينا فى الاول بجد ممتازة جدا جدا جدا وفيها خرجات كتير اوى يعنى عمرك ما هتزهق منها نهائى ابدا بجد دى حاجة لوحدة
بعد كدة روحت الزور بجد بردة القرية دى من احسن وانضف الاماكن اللى فى الساحل حاجة كحترمة جدا وعلى مستوى عالى جدا جدا ونظافة وكلها ناس مستوى عالى دى انا بحطها بعد مارينا

[medo_msmsa]

شكرا يا استاذ kimonesta على ردك
عندك فكرةعن اسعار مارينا في حدود كام لو شقة 3 اوض
معلش انا مخدتش بالي من اسم القرية التانية تقريبا زور؟؟ هي في الكيلو كام وايحاراتها في حدود كام ولو تعرف رقم سمسار هناك يبقى تمام

[amribrahim]

زمردة حلوة أوي فيها عدد ٢ سوق تجاري و هادية جداً

[hany_mohamed]

يا سلام يا باشا موضوعك ده هالل علينا بنسايم البحر والاجازات
شوف يا باشا
معظم القرى فى الساحل الشمالى جميلة وزى الفل انما خد بالك
1-يمكن السباحة فى البحر فى القرى الموجودة أعتبارا من الكيلو 80 تقريبا أما قبل كدة واعتبارا من قرية سيدى كرير فالبحر غير صالح للسباحة وبالتالى مفيش غير حمامات السباحة والبحيرات الصناعية بس
2- مشكلة القرى السياحية هى من بعد المغرب و بالليل هدوء قاتل ما عدا مارينا اللى هى تقريبا حجمها يقارب اسكندرية الان
فالسهر فيها له اشكال مختلفة ومحدش بيزهق فيها خالص
حتى الكثيرين من مقيمى القرى الاخرى يقضون الليل والسهر فى مارينا ثم يعودون لقريتهم
أتمنى لك صيف ممتع ان شاء الله .

[egyptawy2010]

طيب ايه اسعار الشقق ياجماعة يعنى ممكن الاقى شاليه صغير فى مارينا ب 90 الف مثلا ولا ايه