قها للمنتجات الغذائيه والعصائر انها حقا شركه مظلومه

[mazagngi2010]

بسم الله الرحمن الرحيم
طبعا كلنا عارفين الشركه العلم دى من زماااااااااااااااان
كنت مروح الى باريس مصر- الشرقيه - مع زميلى واخدين طريق اسكندريه الزراعى -اعوذ بالله من ده طريق-ووقفنا عند منفذ منتجات قها اللى عند كوبرى قها برضه!!!!!!! فى الحته اللى بيتبنى فيها هايبر -بيبنوا فى الارض الخضرا وبيزرعوا فى الصحرا!!!!!!!!!!- المهم
هتلاقى المنفذ عباره عن كشك حقير والموظفين جوه اللى لابس بالطو ابيض واللى بيكنس وواحد فاتح دفتر كبيييير جو قديم تنين.
بيبعوا مربى وعصاير وصلصات طماطم ومنتجات خضروات
بصراحه ياجماعه تحس ان الشركه دى مغضوب عليها منتجاتها طبيعيه وطعمها جاااامد وزى الفل ورخيصه عن المنافسين اللى خاربين السوق زى فيتراك مثلا
اشترينا عصاير فيه قزاز وعلب كارتون -بجنيه وربع وطعمه جميل جدا- وفيه علب صفيح ودى احسنهم واغلاهم ومخصصه للتصدير على طول والعلب لسه زى ماهيا تحس ان التاريخ وقف عند التصميم ده . حتى العلبه الصفيح لازم تخرمها بمسمار او بسن الفتاحه علشان تدخل الشفاط -الشليموه يابتوع المدينه:]:-


وجربت المربى بتاعتهم تقيله ومركزه وزى الفل -انا حاسس انى بقلد ممتاز القط فى وصفه للحم البعرور-
المهم الشركه دى ليه فاشله قوى كده؟؟؟؟هتتباع مثلا هيا كمان
انا متاكد انها لو راحت كارفور وعملوا شويه دعايه هبله وشغل عينات هتتخطف خطف
ولا هيا سياسه تسويق ومديرين فاسدين
بجد صعبت عليا الشركه لما اديت الرجل 15 جنيه وباسهم وحطهم فى قورته-استفتاح اليوم يعنى- ده مش موضوع دعائى يااداره اللى شجعنى فى كتابته موضوع الالبان
عذرا لكثره استخدام الجمل الاعتراضيه-الجمل التوضيحيه اللى بين شرطتين - اصل انا خنيق شويه

و علي فكرة ادارة المبيعات في وسط البلد في القاهرة (في التحرير) :

شركة قها للاغذية المحفوظة
43 ش عبد الخالق ثروت
وسط البلد, القاهرة
التليفون: 02-23901480, 02-23912662

يا ريت نسأل علي أقرب منافذ بيع لكل واحد فينا و نشجعهم علي توفير المنتج في أكتر من مكان سلع استهلاكية بقي كارفور سبينيس مترو أو حتي عم عبده البقال ...

يالا يا شباب نبدأ بنفسنا و نشجع صناعة بلدنا

[أحمد علاء]

جزاكم الله خيرا
فعلا منتجات قها عالية الجودة واعتقد ان إهتمامهم هو التصدير (بغض النظر عن الشكل المتواضع جدا لمنتجاتهم وطريقة التغليف والطباعة الي فعلا من 20 سنة).
الي جرب العصير ده هيحس بفرق كبير بينه وبين اي عصير معبأ.

[mazagngi2010]

فعلا منتجاتها للتصدير لاسواق تقيله وده صحيح زى السويد وفرنسا وشويه للسعوديه والكويت زى مالبياع قاللى
بس اللى يغيظك ماتصدروا ياعم زى مانتوا عايزين واتوصوا للاستهلاك المحلى ولا الشعب ده مكتوب عليه ميشربش حاجه عدله ويشرب فرجللو وايزى موزو وجهينه والقرف ده
حتى العلب الصفيح اللى بشتريها كانت مره متطبقه ومكتوب عليها للاردن يعنى الحاجه الفستك واللى بيطبق او فيه عيوب بيتباع هنا
بيع للناس هنا اكنك بتصدر ده السوق المصرى لوحده مصيبه وهياخد كل الانتاج ولا العمليه متقسمه من الاول ولما بحثت عن رئيس ادارتها لاقيته لوا
هو اى حد طلع معاش يمسكوه شركه كبيره او منصب كبير وهو اساسا ميعرفش ا ب -الف به - الاداره والتسويق غير الافق المحدود وعدم الرغبه فى زياده البيع وانه ليس بالامكان افضل مما كان ولو كسبنا السنه الجايه 10 % عن اللى قبلها يبقى كده فل قوى
حاجه تفقع المراره

[بحري]

ولما بحثت عن رئيس ادارتها لاقيته لوا
هو اى حد طلع معاش يمسكوه شركه كبيره او منصب كبير وهو اساسا ميعرفش ا ب -الف به - الاداره والتسويق غير الافق المحدود

كل شركات القطاع العام والهيئات الحكومية والشركات القابضة التابعة للحكومة تدار بذات الطريقة..أهل الثقة لا أهل الكفاءة...المهم يفضل ولاء المؤسسة للكبار مهما كانت بتخسر أو رايحة في داهية ويفضل العمال في الشركة كالعبيد وتتم إدارتهم من مكاتب الأمن في الشركات
جنبنا مصنع ومعرض لـ (قها) على بعد حوالي عشر دقائق بالعربية...حاجته ممتازة فعلا ولكن التسويق زي الزفت
وكان جنبها مصنع سيكلام كان هو كمان عامل زي الخرابة مع إنه كان زمان مضرب المثل وكان بيعمل حاجات رهيبة وكان جنب بيتي معرض لسيكلام بنشتري منه منتجات أكثر من ممتازة...فضلوا يهملوا فيه لغاية لما اتدمر واشتراه منصور

[kemo0o]

انا على طول وانا مروح بشتري عصير من عندهم

[factorialx]

فعلا منتجاتها للتصدير لاسواق تقيله وده صحيح زى السويد وفرنسا وشويه للسعوديه والكويت زى مالبياع قاللى
بس اللى يغيظك ماتصدروا ياعم زى مانتوا عايزين واتوصوا للاستهلاك المحلى ولا الشعب ده مكتوب عليه ميشربش حاجه عدله ويشرب فرجللو وايزى موزو وجهينه والقرف ده
حتى العلب الصفيح اللى بشتريها كانت مره متطبقه ومكتوب عليها للاردن يعنى الحاجه الفستك واللى بيطبق او فيه عيوب بيتباع هنا
بيع للناس هنا اكنك بتصدر ده السوق المصرى لوحده مصيبه وهياخد كل الانتاج ولا العمليه متقسمه من الاول ولما بحثت عن رئيس ادارتها لاقيته لوا
هو اى حد طلع معاش يمسكوه شركه كبيره او منصب كبير وهو اساسا ميعرفش ا ب -الف به - الاداره والتسويق غير الافق المحدود وعدم الرغبه فى زياده البيع وانه ليس بالامكان افضل مما كان ولو كسبنا السنه الجايه 10 % عن اللى قبلها يبقى كده فل قوى
حاجه تفقع المراره

في منتجات غذائية مصرية جامده جدااا و جودتها عالية ما بشوفش حاجه منها في مصر حتى في كارفور و هايبر

[احمد المصرى]

مكان منفز البيع دا فين بالظبط يا رجاله

[karaktar]

طيب يجماعه منتجاتها الاقيها فين فى القاهره؟؟؟؟؟؟؟؟

[night_whisper]

ياااااااااااااة الشركة دة لسة موجودة
انا فاكر و انا صغير كونت بشترى العلبة الصفيح دة و كان طعمها تحفة
انا كونت فاكر ان الشركة دة قفلت لانى لما بشوف مبنى ليها بلاقية مهجور
بجد حرام اللى بيحصل دة للصناعة المصرية
على رأى عمرو أديب
البلد دة أتخدمت بما فية الكفاية ----- عايزين بقى حد يجى يسرقها

[EGYCARS]

أولا أنا فعلا سعيد ان في حد بيهتم بحاجات زي دي

أنا شوفت بعيني منتجات مصنع قها للأغذية المحفوظة و دخلت المصنع أكتر من مرة

الأغرب اني برضه شفت منتج بلدي في أوروبا
و كنت سعيد اني ألاقي اسم مدينة صغيرة مكتوب علي منتج بيتباع في أوربا و تحته بالخط العريض "صنع في مصر"
و كان ساعتها من المنتجات اللي عليها طلب بشكل غريب و الناس عارفين النتج باللإسم.

اللي يوجع القلب بقي ان الشركة دي بكل ممتلكاته طالته ايد الخصخصة و ما أدراك ما الخصخصة
الراجل المستثمر العظيم أخد قرض من البنك عشان يشتري االشركة .... الحكومة حددت سعر بيع الشركة بممتلكاتها برقم عبيط كده كالعادة لا يساوي حتي سعر أرض المخازن اللملوكة للشركة !!!

الجميل بقي ان الحكومة ادت المسثمر العظيم تسهيلات في السداد عشان يشغل الشركة .... أوم ايه المستثمر خرب الشركة و كالعادة رفد العمال و .... رأس المال و سرق و نهب ... أوم ايه الحكومة اكتشفت ان الراجل المستثمر العظيم مادفعشي تمن الشركة للحكومة و قال ايه واخد قروض من البنك بضمان الشركة أوم ايه اكتشفوا ان اللي بيحصل ده غلط (علي فكرة مش هما اللي اكتشفوا ده عمال و موظفي الشركة لحسوا تراب الجمهورية عشان حد يسمعلهم و الحمد لله أخيرا لاقو حد يسمع)..

المهم في الآخر الحكومة استردت الشركة و الحمد لله الوضع كما هو عليه بل أسوأ في كل يوم من اللي قبله
ليه عشان هي دي مصر ....

علي فكرة يا شباب ... فيتراك ده برضه في قها بس نعمل ايه حظوظ بقي (رزق و الحكومة هي اللي بتوزعه!!!)

برجاء مراعاة الاداب العامة و انتقاء الالفاظ

مشرف 5 ب

3:37 مساءا

14 يونيو 2010

[Spear]

اسوأ جهاز تسويقي لشركة أغذية مصرية على الإطلاق

[mazagngi2010]

حاجه تقرف يابحرى بصراحه انا سمعت برضه عن سيكلام بتاع الالبان
======================
kemo0o
مش انا لوحدى
=====================
factorialx
متقسمه ياباشا الناصح اللى يعرف سكتهم انا لسه عارف حوار البان مزارع دينا النهارده
=====================
احمد المصرى
طريق اسكندريه الزراعى بعد كوبرى قها وانت رايح بنها على اليمين بس ابقى ركز علشان ميفوتكش
هتلاقى جنبه يافطه كبيره مكتوب عليها مشروع انشاء هايبر وان
====================
karaktar
هسالهم لك المره الجايه جايز يكون فيه هنا
====================

ياااااااااااااة الشركة دة لسة موجودة

على رأى عمرو أديب
البلد دة أتخدمت بما فية الكفاية ----- عايزين بقى حد يجى يسرقها

مع انه منافق كبير بييجى عند الراس الكبيره ويقف حلو البق ده
===================
EGYCARS
انت كدرتنى اكتر اللى بيحصل ده حاجه تقرف
==================
Spear
واضح جدا الناس هنا كانت فاكرها قفلت !!!!!!!!!!! هو فيه احسن من كده تسويق

[EGYCARS]

مكان منفز البيع دا فين بالظبط يا رجاله

بص المنفذ ده علي طريق مصر اسكندرية الزراعي علي بعد حوالي 25 كيلو من القاهرة
عند مدينة قها ... بعد الكوبري الأول و قبل الكوبري التاني في الاتجاه اللي رايح إسكندرية.

و علي فكرة ادارة المبيعات في وسط البلد في القاهرة (في التحرير) :

شركة قها للاغذية المحفوظة
43 ش عبد الخالق ثروت
وسط البلد, القاهرة
التليفون: 02-23901480, 02-23912662

يا ريت نسأل علي أقرب منافذ بيع لكل واحد فينا و نشجعهم علي توفير المنتج في أكتر من مكان سلع استهلاكية بقي كارفور سبينيس مترو أو حتي عم عبده البقال ...

يالا يا شباب نبدأ بنفسنا و نشجع صناعة بلدنا

[zakiali]

بص المنفذ ده علي طريق مصر اسكندرية الزراعي علي بعد حوالي 25 كيلو من القاهرة
عند مدينة قها ... بعد الكوبري الأول و قبل الكوبري التاني في الاتجاه اللي رايح إسكندرية.

و علي فكرة ادارة المبيعات في وسط البلد في القاهرة (في التحرير) :

شركة قها للاغذية المحفوظة
43 ش عبد الخالق ثروت
وسط البلد, القاهرة
التليفون: 02-23901480, 02-23912662

يا ريت نسأل علي أقرب منافذ بيع لكل واحد فينا و نشجعهم علي توفير المنتج في أكتر من مكان سلع استهلاكية بقي كارفور سبينيس مترو أو حتي عم عبده البقال ...

يالا يا شباب نبدأ بنفسنا و نشجع صناعة بلدنا

والله فعلا منتجاتها متميزه ومش عارف لصالح مين بيتم عمل تعتيم علي الشركات الناجحة دي وبعدين بيبيعوها بتراب الفلوس للأسف بحجه انها بتخسر وبعد ما تتباع المستثمر هو كمان يصفيها ويبيع الأصول والأراضي ويكسب الملايين . سيناريو بيتكرر كل يوم .

[mohamed_kta]

انا كنت عايش زمان فى السعوديه و عصير قها ده كان حاجه كده تحفه و المربى كمان ملهاش حل و من حوالى شهر كنت انا و مراتى هناك و بحثت عنه كثيراً و لكن لم أجده ولا فى أصغر و لا أكبر سوبر ماركت عادى " بقى " هيا هتيجى على قها