نداء الى كل من يعمل بالبورصة .... مش عايز تفكر شوية ؟

[تامر.محمد]

سلام عليكم
لكل واحد شغال في البورصة كموظف او كمضارب ... انا عايز اسأل كام سؤال , و أرجو تعذروني لأن معلوماتي عن البورصة قليلة جدا و لو قلت حاجة مش مظبوطة يا ريت حد يصحح لي , و ان كان الاجمالي في ظني و الله اعلم مش هايتأثر ...

الشغل في البورصة عبارة عن ايه ؟
تجارة ؟
طب هل لو هو تجارة ... بتتاجر في ايه ؟
في الفلوس نفسها ؟ ولا في حاجة تانية ؟

طب لو في الفلوس نفسها ... هل الفلوس سلعة ملموسة الواحد يتاجر فيها ؟
ولا الفلوس في حد ذاتها عبارة عن عامل وسط بين السلع ابتكروه اصلا كبديل للمقايضة ؟
هل دي حاجة يتتاجر فيها ؟؟

بلاش دي
اللي بيتاجر في القطن مثلا (سواء بيستورده او بيصدره) بيوجد في الآخر مادة خام بتستعملها مصانع الملابس و من الناحية التانية بيفيد المزارع اللي زرع القطن ده ....
اللي بيتاجر في اي حاجة بصفة عامة بيمد طرف مستهلك بحاجته , و بيصرف الانتاج لطرف منتج , و بالتالي بيفيد الاتنين ..... انت بتتاجر في ايه ؟ بتشتري سهم افتراضي و لما سعره يزيد تبيع ه ؟ نشاطك ده بيفيد مين غيرك ؟
طب الفلوس اللي انت حطيتها في السهم دي , ان كسبتها هاتدخل جيبك , زادوا ايوة بس انت زي ما انت , حلال ولا لأ , لو تفرق معاك فانا أتحداك لو كنت واثق من كده , انت شخصيا زدت ايه لما فلوسك زادت ؟ ولا حاجة .. كأنك ماشي في الشارع و لقيت شنطة فلوس , بقى معاك فلوس اكتر شوية بس انت شخصيا ما استفدتش اي حاجة على الاطلاق

اللي بيتاجر في أي حاجة ( مش هاتكلم كمان على اللي بيشتغل في الزراعة ولا الصناعة ) بيفيد الناس و البلد , انت بتفيد اي حد غير نفسك انت و اللي بيدير شغلك ؟ و على فكرة , كل الكيانات الكبيرة سواء في مصر او في العالم كله على حد علمي ما كبرتش بالبورصة , لكن كبرت بكيان له بيزنس معروف , سواء انتاجي او تجاري او خدمي .... و يوم ما حد من دول بيقول انا خسرت مش بيقع كل ما يملك مرة واحدة بكل تأكيد

بلاش دي
على فرض ان البورصة اسلاميا حلال .... و انا مش عايز ادخل في نقطة حلال و حرام هنا عشان بس مش هي الأساس اللي عايز الكلام يبقى عليه
البورصة عبارة عن ايه ؟ مش بتشتري سهم و تستنى لما سعره يرتفع عشان تبيعه ؟
و على حد علمي العادي انك في لحظة ممكن تلاقي نفسك خسرت كل او نص او اغلب راسمالك و في لحظة ممكن تلاقيه اتضاعف .... طب ده مبني على ايه ؟ على التوقعات و التكهنات .... مش حاسس انك شبه اللي بيلعب قمار ؟

انا مش هادعي اني فاهم اقتصاد او فاهم بورصة , لكن دي وجهة نظر و فكرة حبيت اطرحها و مستعد للنقاش و يا ريت اللي شايف في كلامي وجهة نظر او معلومة غلط يصحح لي ..

[زينة الله]

السلام عليكم يا باشمهندس
أنت تقريبا بتقول نفس خبرتى المتواضعة عن البورصة و أنا مقتنعة بكل كلامك
وكمان لانى قرأت فى صفحة الفكر الدينى فى جريدة الاهرام أن البورصة فيها نوعين من الاوراق المالية
1- السندات : ودى عبارة عن دين على المؤسسات اللى بتعرض سنداتها فى البورصة و المضارب أو المشترى يأخذ فائدة مقابل هذا الدين و بالتالى يبقى ربا و حرام بناء على هذا التفسير والله أعلم
2- الاسهم : و دا يبقى كأن المضارب أو المشترى أصبح شريك مساهم فى هذه المؤسسة اللى بتعرض أسهمها فى البورصة و دا ممكن يكون ربح حلال بناء على هذا الكلام بشرط أن يكون فاهم طبيعة النشاط المساهم فيه و الا يكون كما ذكرت حضرتك كمن يقامر بماله ومال اولاده فى مخاطرة مالية كبيرة والله أعلم أيضا
و من الزملاء الأفاضل نستفيد
و شكرا مع تحياتى ...

[hesham_tawfiq]

البورصه تجاره ياباشا وانت كمستثمر فالبورصه بتتاجر فى سلعه اللى هى صكوك ملكيه فى الشركه اللى انت تملك اسهمها يعنى كأنك بتبيع وتشترى فى ملكك زى منتا عاوز وبراس مالك مش راس مالحد تانى - يعنى لسه لحد دلوئتى الفلوس هى وسيط المبادله زى ماحضرتك تكرمت وذكرت - يعنى انت مبتبيعش وتشترى فلوس انما انت بتبيع وتشترى سلعه - صكوك ملكيه او اسهم - زى اى سلعه تانيه.
موضوع بيفيد مين تانى غيرك دى هو بيفيداساسا الشركات اللى اسهمها مقيده فالبورصه للتداول عن طريق حاجتين :

اولا الشركات دى بتوفر التمويل اللازم لنموهاوتوسعها عن طريق ادخال مساهمين جدد وبالتاى ضخ اموال وسيوله فى الشركه ودى احد بدائل تمويل الاستثمار والبديلالتانى لو الشركه عاوزه تحتفظ بهيكل راسمالها بدون ادخال مساهمين جدد هو الاقتراض عن طريق اصدار سندات

الفايده التانيه ان سعر السهم فالبورصه بتاع اى شركه هومؤشر لاداء الشركه المالى والادارى فى السوق وبالتالى لو سعر السهم زاد دا معناه الشركه مركزها المالى قوى امام اى طرف خارجى والعكس صحيح

موضوع حلال وحرام بئى دى والله اعلم حسب النيه لو انت داخل البورصه براس مال عاوز تكبره وتستثمر فيه عن طريق شراء وبيع اسهم كسبانه فهو حلال انما او نيتك تدخل البورصه بغرض المضاربه فأكيد دا حرام وفى الحاله دى فعلا تكون زى المقامره
موضوع السندات والمتاجره فيها فدا شيئ مفروغ منه انو حرام الا لو الشركه المصدره للسندات مش هتدى فايده على السند دا ودا مبيحصلش لا هنا ولا بره

[ahmed4000]

الاسهم ببساطة معناها انك شريك فى الشركة يعنى الشركة راسمالها مليون جنيه لو دفعت حضرتك 100 الف جنيه يبقى بتمتلك 10% من الشركة وده بيبقى فى صورة اسهم

وطبعا زى اى شركة فى الدنيا بعد شوية بتحقق ارباح وبالتالى ده بينعكس فى انك تاخد نصيب من الارباح على اد نسبة مشاركتك

او ان حد يطلب منك يشترى نصيبك فى الشركة ووقتها ممكن يدفعلك سعر اعلى وده معناه ان سعر السهم يرتفع او ينخفض

طيب ليه بيرتفع؟ زى لو فى قطعة ارض واتبنى جنبيها طريق مهم...حتلاقى الناس مستعدة تدفع فيها سعر اعلى

والعكس صحيح

وده اللى بيحصل للأسهم برده لو فى اخبار كويسة عنها معناها ارباح اكتر وبالتالى مستعدين يدفعوا فيها فلوس اكتر

وهو ده مكسبك

وعلى فكرة يا جماعة مفيش حاجة اسمها واحد يخسر كله فلوس او نصها فى يوم واحد

اقصى خسارة بتبقى يوميا 20% وده بقانون من البورصة وليس وديا

يعنى لو السهم ب100 جنيه اقصى نزول ليه لغاية 80 جنيه (فى النظام الجديد بقى بحد اقصى 44% نزول او طلوع)

ولا فى حد يضاعف فلوسه فى يوم واحد

[hesham_tawfiq]

اقصى خسارة بتبقى يوميا 20% وده بقانون من البورصة وليس وديا

يعنى لو السهم ب100 جنيه اقصى نزول ليه لغاية 80 جنيه (فى النظام الجديد بقى بحد اقصى 44% نزول او طلوع)

ولا فى حد يضاعف فلوسه فى يوم واحد

معلومه جديده ليا
الف شكر

[Islam_galal]

البورصة بالنسبة لي كان البزنس المناسب لي تماما و متوافق مع ظروفي تماما
و لكن
عمري مارتحت له ، حاولت أدور علي ما فيه من شبهات و لم تكن الأمور واضحة كعادتنا في مصر

إلي ان استمعت إلي دكتور عبد الله المصلح ( و هو ممن أثق فيهم بشكل شخصي و فتاواه لا تتبع التشدد) في قناة الرسالة في سؤال عن شرعية البورصة فكان رده فيما معناه

التعامل مع البورصة حلال و لكن بشروط
طبعا التعامل علي شركات المحرمات كالخمور و غيرها حرام
أما التعامل مع باقي الشركات فببساطة لو بعت الأسهم التي في حوذتك و دخل ثمنها في حسابك في نفس اليوم تبقي حلال
أما لو احتاج التعامل يوم أو أكثر لتنتقل إلي الأموال إلي حسابك فتنتقل المعاملة من باب التجارة إلي باب الربا
" الذين يأكلون الربا لا يقومون إلا كما يقوم الذي يتخبطه الشيطان من المس ذلك بأنهم قالوا إنما البيع مثل الربا وأحل الله البيع وحرم الربا"

و أتبع بأن الشرح يطول و يطول و لا يستطيع التوضيح بأكثر من ذلك للعامة و لو أنه مع طلابه لاستغرق منه الكثير من الوقت و الكثير من القواعد الفهية للشرح

و صراحة أنا أثق في فتوي هذا الرجل و في منطقه في الفتوي

و بالسؤال وجدت استحالة حدوث هذا في مصر و تحويل الأموال قديستغرق ثلاث أيام ، فامتنعت عنها و الله أعلي و اعلم

[Hegazio]

بصراحة ( و انا مستثمر قديم .. خسر اكتر ما كسب ) هو الموضوع مشبوه أه .. بس مش حرام .. ممكن تبقي في السليم جدا لو بتشتري السهم تستثمرة .. مش ضروري سنين .. بس بلاش ايام .. و طبعا شركة حلال بتتاجر ف حلال

[تامر.محمد]

الإخوة الكرام hesham_tawfiq و ahmed4000 و Islam_galal و Hegazio
أشكركم جدا على إفاداتكم الكريمة , و كنت عايز اطلب منكم نبعد عن نقطة حلال ولا حرام , مش لأنها مش مهمة , على العكس انا جوايا اقتناع داخلي انه مش حلال , لكن عشان انا عايز اناقش الموضوع من وجهة النظر القيمية لأن ببساطة مش كل حلال صح

الأخت Tifana2010 , تحياتي يا فندم و يا ريت حضرتك تتابعي النقاش ان أمكن

أخي الكريم hesham_tawfiq , فيه نقطة انا عايز افتحها معاك , الإستفادة اللي بتستفيدها الشركة في حالة دخولها البورصة ... انت لخصتها في مساهمين جدد و ضخ للسيولة , هل تقصد مساهمين ولا مشاركين ؟ يعني الشركة اللي في البورصة زيها زي شركة دخل واحد اشترى مثلا 20% منها و انطبقت عليه خسائرها و أرباحها ؟ ولا تختلف ؟؟ و كنت عايز اسألك كمان , نفترض ان شركة ما ما دخلتش البورصة , هل هاتعتبر خسرانة حاجة ؟ او ممكن نفترض ان مافيش بورصة أصلا , هل الشركات الموجودة كلها تعتبر ناقصها حاجة او خسرانة حاجة بسبب عدم وجود بورصة ؟

الأخ ahmed4000 , مشاركتك واضح انها عن خبرة , و فيها حاجات انا ما كنتش اعرفها برده , و يمكن انا كل اللي اعرفه يعتبر من اللي باسمعه من الناس اللي شاركت في البورصة , و أغلبهم متفقين انهم بيخسروا بشدة , طب انا عايز اعرف , ليه الكل تقريبا بيخسر ؟ و ليه الشركات أسهمها بتعلى و بتوطى بسرعة ( و هو ما ينتج الخسائر السريعة أو المكسب السريع ) , خليني أفتكر وقعة معينة , لما حصل الموضوع بتاع ابراهيم عيسى و اتنشر الخبر اياه , يومها البورصة نزلت جامد , هل معنى كده ان خبر زي ده في الواقع قلل قيمة كل الشركات اللي في مصر ؟

الأخ Islam_galal , و الله مشاركتك الشرعية انا برده ما كنتش اعرفها , بس بصفة عامة , هل كنت حاسس انه حاجة صح ؟ هل كنت حاسس انك فرد منتج (اي انتاج من اي نوع ) و ان فلوسك منتجة ؟

الأخ Hegazio , نفس النقطة بتاعة الأخ اسلام

[MaZaGAngeE]

اسمحولي اشارك معاكم ..
كلام صاحب الموضوع يعبر عن رأي اكتر من 90 في الميه من الناس و هوه ان البورصة دي اشتغالة و نصب و ضحك على الناس عشان يخسروا فلوسهم...
بس قبل ما نتكلم عن البورصة لازم نفهم انواع الشركات و طرق التمويل , من انواع الشركات الشركات المساهمة و دي منها المغلقة على عدد محدد من الناس و لا يتم تداول اسهمها في البورصة او سوق المال , و النوع التاني شركات مساهمة يتم تداول اسهمها في السوق بنسبة حددها القانون لا تقل عن 15 في الميه من اجمالي اسهم الشركه و دي اللي تهمنا .. كمان طرق التمويل بتكون قروض بنكية او سندات يتم تداولها في سوق المال و الاتنين حرام عشان الفوايد الربوية بتاعتهم و الطريقة التالتة طرح اسهم الشركة في سوق المال و عمل اكتتابات او زياده لرأس مال الشركة بطرح اسم لقدماء المساهمين و دي حلال لأن ادارة الشركة هنا بتبيع حصة في ملكية الشركة للمساهمين او ملاك الشركة ...
طبعا أغلب أو كل الشركات المساهمة للأسف اصحاب الشركة المؤسسين بيتلاعبوا بالقانون و بيطلق عليهم الميكر او اللاعب الرئيسي في السهم لأنه يمتلك حصه حاكمة كبيره في الاسهم و بيقدر انه يرفع او ينزل سعر السهم عن طريق العروض و الطلبات على السهم بشكل يؤثر على سعره بدرجة كبيره....

[MaZaGAngeE]

نيجي بقى لحتة الحلال و الحرام ..
السندات و القروض حرام
الأسهم برضه فيها حلال و حرام و مشبوه
الحرام اسهم شركات البيره و الخمور و السجاير
المشبوهه اسهم البنوك و شركات السياحة التي تقدم الخمور و البيره في فنادقها
الحلال باقي الشركات ....

[MaZaGAngeE]

طيب احننا اتفقنا على ان الاسهم دي عباره عن ملكية في الشركة يعني حضرتك بتبيع و تشتري سلعة أو كيان مادي مش بتبيع فلوس بفلوس و ده اللي حرام , احنا بنبيع و نشتري ملكية بتقل و تزيد بناء على طريقة التحليل التي تنقسم لطريقتين أو مدرستين في التحليل
1... التحليل المالي و ده بيهتم بيه المستثمر طويل الأجل اللي معاه فلوس كتير و بيدرس قوائم الشركة المالية و نتائج اعمالها و اصولها و مديونياتها و خططها المستقبلية و من كل ده يقدر يحدد القيمة العادلة للسهم و متوسط سعر السهم خلال المده اللي هيستثمر فيها في سهم الشركة.
2... التحليل الفني , و ده يهم المستثمر المتوسط و القصير الاجل و المضارب و ده بيعتمد تماما على عروض و طلبات البيع و الشرا للسهم و الأخبار الجوهرية للسهم و باستخدام برامج التحليل الفني زي ميتاستوك و باستخدام استراتيجية خاصة بيه و مؤشرات للتحليل يستطيع تحديد اتجاه السهم و أفضل أسعار البيع و الشراء ..

[mr_safwt]

الأخ islam_galal , و الله مشاركتك الشرعية انا برده ما كنتش اعرفها , بس بصفة عامة , هل كنت حاسس انه حاجة صح ؟ هل كنت حاسس انك فرد منتج (اي انتاج من اي نوع ) و ان فلوسك منتجة ؟

انا عايز ارد على السؤال دة
حضرتك بتسئل فلوسى منتجة ولالا
حضرتك ممكن تدخل البورصة عن طريق الاكتتاب يعنى الشركة هتزود راس مالها عن طريق المساهمين
والفلوس دية الشركة بتدخل بيها مشاريع كبيرة
وبكدة فلوسك هتبقى منتجة
المشكلة فى البورصة اية بقى
ان المفروض سعر السهم بتحدد قيمتة حسب اداء الشركة ومستقبلها
لو شركة بتحقق ارباح اكيد ناس كتير هتبقى عايزة تشترى وناس قليلة عايزة تبيع فاكيد سعر السهم هيزيد
لكن فى مصر ولان صاحب الشركة معاة اكبر عدد من الاسهم ومفيش للاسف رقابة على حد
فبيلعب بالسهم على مزاجة
يعنى يعرض كمية كبيرة من اللى معاة للبيع فطبعا الناس بتلاقى البيع كتير والبيع يكتر سعر السهم ينزل لتحت جامد ويكون هو باع اول واحد
وينزل تانى يجيبهم من تحت وممكن بحركة زى كدة يعملوة فى يومين ثلاثة كام مليون

[ainshouka]

لكن فى مصر ولان صاحب الشركة معاة اكبر عدد من الاسهم ومفيش للاسف رقابة على حد
فبيلعب بالسهم على مزاجة
يعنى يعرض كمية كبيرة من اللى معاة للبيع فطبعا الناس بتلاقى البيع كتير والبيع يكتر سعر السهم ينزل لتحت جامد ويكون هو باع اول واحد
وينزل تانى يجيبهم من تحت وممكن بحركة زى كدة يعملوة فى يومين ثلاثة كام مليون

ممكن توضيح اكتر
ازاى صاحب الشركة بيكسب بالطريقة دى

وايه اللى المفروض - لو فيه رقابة - انه يتعمل

[MaZaGAngeE]

بصفتي متاجر في البورصة المصرية مقتنع تماما بأن فلوسي تنتج و ليها قيمة مؤثرة في اقتصاد البلد رغم قلة فلوسي لكن زي ما قلتلك الشركة المساهمه بتحتاج تزود خطوط انتاج أو فتح فروع أو تحديث معدات أو انتاج منتجات جديده و كل ده محتاج تمويل قد لا يتواجد لدى الشركة ... طيب ايه الحل ؟ اما الغاء التوسعات أو سحب قروض بنكية أو طرح سندات أو طرح أسهم للمساهمين اللي همه ملاك الشركة ...
الشركة المساهمة غير شركات التوصية غير المتضامنة غير شركات التوصية غير الفردية .. كل شركة ليها مميزات و عيوب و كل نوع شركة ليه طرق التمويل الخاصة بيه اللي حددها قانون الشركات . و لكن على وجه العموم الشركات المساهمة ليها مصداقية أكبر لأن القانون اشترط نشر القوائم المالية للشركة و نشر خطط الشركة , كمان دي شركات رأس مالها ضخم جدا يزيد عن 20 مليون جنيه يعني ليها ملاءة مالية كبيره مما يقوي مركزها أمام البنوك و المؤسسات المالية و الشركات الأخرى ...
طيب لو عندي شركة فردية أو متضامنة أنا هخسر لو مدخلتش البورصة ؟ لازم الأول يكون رأس مال الشركة اكتر من 20 مليون جنيه عشان ابتدي افكر في طرح الشركة في السوق ...
طيب شركتي كبيرة و رأس مالها أكتر من 20 مليون هفكر هل طرح اسهم في السوق يوافق خطتي الشخصية و مستقبل الشركة اللي أنا بصفتي صاحبها مخطط ليه ؟
لو لأ يبقى مش هدخل الشركة البورصة... لكن لو من مصلحتي أدخلها أكيد هدخل لأن البورصة بتوفرلي طرق تمويل و مميزات كبيرة لا تتوافر للشركات الأخرى

[hesham_tawfiq]

أخي الكريم hesham_tawfiq , فيه نقطة انا عايز افتحها معاك , الإستفادة اللي بتستفيدها الشركة في حالة دخولها البورصة ... انت لخصتها في مساهمين جدد و ضخ للسيولة , هل تقصد مساهمين ولا مشاركين ؟ يعني الشركة اللي في البورصة زيها زي شركة دخل واحد اشترى مثلا 20% منها و انطبقت عليه خسائرها و أرباحها ؟ ولا تختلف ؟؟ و كنت عايز اسألك كمان , نفترض ان شركة ما ما دخلتش البورصة , هل هاتعتبر خسرانة حاجة ؟ او ممكن نفترض ان مافيش بورصة أصلا , هل الشركات الموجودة كلها تعتبر ناقصها حاجة او خسرانة حاجة بسبب عدم وجود بورصة ؟

فى الحاله دى وفى شركات المساهمه ( اللى بالاسهم ) الشريك هوهو المساهم بدون اى اختلاف لان المساهم من حقه يشترك فى الجمعيه العموميه ويشارك فى اتخاذ قراراتها

بالنسبه للفايده من قيد او عدم قيد الشركه فى البورصه للتداول لو الشركه مدخلتش البورصه ولا هتخسر اى فلوس انما لو اشتركت فى البورصه واسهمها اتفتحت للتداول دا معناه ان فلوس داخله للشركه فى صورة زيادة راس المال وتوسيع قاعدة المستثمرين بس من ناحيه تانيه الشركه دى حطت رقبتها تحت رحمة سيف الجمعيه العموميه ( حملة الاسهم ) لانهم هيراقبو اداءها على الاقل مره كل تلت شهور فى صورة المراكز الماليه الربع سنويه لان الشركه ملزمه تطللع مركز مالى معتمد من مراقب حسابات خارجى مستقل - ولو ان الاستقلال دا صورى فى مصر - وكمان الشركه دى هتبئى كتاب مفتوح للبنوك ( فى حالة طلب الحصول على قروض ) ومصلحةالضرائب
يعنى اجمالا ادراج الشركه فى البورصه للتداول ليه ميزه وعيب انما عدم ادراجها مش هيفرق فى حاجه خالص

انا بئى عندى استفسار من حضرتك ولو انك قيدتنى بعدم الدخول فى الحلال والحرام ( انا برضه مش عاوزاخش فالحته دى :-)
يعنى ايه " مش كل حلال صح " ؟
وسؤال تانى للاخوه اللى اشتركوا لانى مش بورصجى ومعرفش قوانين البورصه فى مصر

فى بورصات امريكا والغرب عامة تعامل ادارة الشركه على كل او بعض الاسهم الخاصه بالشركه اللى هما بيعملوا فيها يعتبر جريمه وجريمه كبيره كمان لانهم كده اثروا على اداء سهم الشركه فالبورصه تاثير غير حقيقي
القيد دا بيتطبق فى مصر ولا لأ ؟