إيه حوارالفيلات الدوبلكس ده ؟

[phantom0xx0]

طيب يا جماعة هو الدور الأرضي أو البدروم ده ملوش فتحات تهويه أو شبابيك ؟

وهل في دوبليكس دور أول مرتفع ودور تاني مع الجنينة طبعا والحركات دي ؟

الدور الأرضي أو البدروم فيه شبابيك ذي أي دور، بس مش بتشوف الشارع و بتكون في مستوى الجنينة
على ما أعتقد إن صعب يكون فيه أول و تاني و معه الجنينة علشان دائماً بيكون الجنينة مع الأرضي ألا في حاله إن الأرضي مشاع أو جراج

( على حسب علمي )

[Evo]

أصل لما واحد يكون عامل اعلان دوبليكس 400 م في ارقى مكان في التجمع وفي فيللا مش في عماره وحديقة 220 م وحمام سباحة كبير وجراج خاص و كل ده بـ 800 ألف يبقى الموضوع ملفت للنظر

مازلت مش قادر اقتنع برده ليه سعره رخيص عن الشقق ؟

ده المتر في اي ماكن راقي في التجمع بيقرب من 3000 جنيه إزاي بقى كل الحركات دي بـ 800 ألف بس أكيد في انه !

[phantom0xx0]

أصل لما واحد يكون عامل اعلان دوبليكس 400 م في ارقى مكان في التجمع وفي فيللا مش في عماره وحديقة 220 م وحمام سباحة كبير وجراج خاص و كل ده بـ 800 ألف يبقى الموضوع ملفت للنظر

مازلت مش قادر اقتنع برده ليه سعره رخيص عن الشقق ؟

ده المتر في اي ماكن راقي في التجمع بيقرب من 3000 جنيه إزاي بقى كل الحركات دي بـ 800 ألف بس أكيد في انه !

في رأي ،، أكيد في حاجة غلط
السعر دة غريب

[amgad29]

في التجمع الجهاز بيشترط وجود جراج بكل فيلا فالملاك بيبقوا عاوزين يستفيدوا من البدروم اللي مترخصله جراج (اوقات بيترخص خدمات زي الجيم) منهم بيقسم البدروم نصين نص جراج و طبعا بيتباع حصته لوحده و نص اخر بيضيفه على شقة الدور الارضي و يعمله فيلا و في ناس بتعمل البدروم كله مع الارضي فيلا. نفس الكلام بالنسبة للروف هو بياخد ترخيص غرف خدمات و طبعا عشان يكسب يقوم فاتحها على الدور الاخير و يعمله فيلا.
بخصوص السلم مابتفتحش الا بعد المعاينة الاخيرة و مطابقة الجهاز
بالنسبة للاسعار سعر المتر في البدروم بيبقى عادة في حدود نصف سعر المتر فوق
فمثلا لو الشقة اللي بتقول عليها 400 متر عبارة عن 200 بدروم و 200 دور اول يبقى المتر في الاول بـ 2666 وفي البدروم 1333 جنيه و ده يعتبر سعر عادي ممكن تلاقي ارخص منه و فيه اغلى منه حسب الموقع (مش لقطة قوي).
ففكر كويس وخد وقتك
و ربنا يكرمك ان شاء الله

[noureymo]

أصل لما واحد يكون عامل اعلان دوبليكس 400 م في ارقى مكان في التجمع وفي فيللا مش في عماره وحديقة 220 م وحمام سباحة كبير وجراج خاص و كل ده بـ 800 ألف يبقى الموضوع ملفت للنظر

مازلت مش قادر اقتنع برده ليه سعره رخيص عن الشقق ؟

ده المتر في اي ماكن راقي في التجمع بيقرب من 3000 جنيه إزاي بقى كل الحركات دي بـ 800 ألف بس أكيد في انه !

لايمكن يكون السعر الي حضرتك كاتبه ده للمواصفات دي
شوف حضرتك انا ليا تجربة في الموضوع ده
السنة الي فاتت كنت بشتري شقة في التجمع الخامس وكنت حاصر البحث في مناطق الفيلات الي هي مكونة من ارضي منخفض واول وتاني وروف وطبعا كنت عاوز الشقة الي في الدور الاول وماكانش في دماغي موضوع الدوبلكس ده وبيني وبينكم ماكنتش اعرفه اصلا.
المهم من خلال البحث استقريت على منطقة اسمها الياسمين 8 (فيلات) وركزت فيها واستقريت كمان على فيلا معينة المهم ساعة التنفيذ مش عارف ايه الي حصل لقيت نفسي شفت اعلان على فيلا مكتوب عليه فيلا دوبلكس متشطبة للبيع وفجأة لقيتني جوة الفيلا دي وبتفرج على الدوبلكس بصراحة الفيلا الدوبلكس دي بالجنينة بتاعتها حاسيت وانا داخل من برة اني داخل قصر والجنينة جميلة جدا
بس طبعا ما اخدتهاش علشان انا مش عاوز حاجة متشطبة.
تاني يوم رحت الشركة الي بشتري منها علشان خلاص البيعة تتم لقيتهم في فيلا دوبلكس المهم فحصتها تاني وعند الاجتماع مع المبيعات بتاعتهم لقيت الشقة الي في الدور الاول الي انا عاوزها ب 485 الف جم والدوبلكس في نفس الفيلا بالجنينة 620 الف جم
بصراحة اخدت الدوبلكس والحمدلله
حكاية ان السعلر قليل فده بيكون لانه مش ممكن طبعا هيبيع فوق الارضي بنفس سعر المرتفع فبتلاقيه بيبيعه بنص السعر يعني مش لازم السعر يتضرب في اتنين زي ما اغلب الناس متخيلة
وبعدين كمان هو مش بدروم بالظبط لأن الدور الارضي اصلا مش ارضي ده بيكون ارضي مرتفع والمنخفض (البدروم)بيكون نصه فوق مستوى الشارع.وعلى فكرة فيه شبابيك من كل الجوانب.
وكمان بتاخد عليهم الجنينة .
السلم بيتفتح عادي جدا بين الدورين وشفت كتير متشطب على الاساس ده.


في عروض كتير في السوق دلوقت عن الدوبلكس والي بتلاقي سعره قليل عن غيره بيكون في مناطق او منطقة لسة قدامها خمس سنين علشان تخلص وتعمر
سعر ال3000 جم الي في المداخلة الي فوق في المناطق الراقية (مع تحفظي على كلمة راقية لان التجمع نقدر نقسمه المناطق الي بانت معالمها والمناطق الي لسة تحت البناء) سعر طبيعي جدا لكن في المناطق الي لسة بتتبني بيكون اقل من كده
اسف على المداخلة الطويلة دي وارجو اني اكون قدرت اكتب الي في دماغي

[Evo]

كلام مقنع بصراحة وبالنسبة لسعر الدوبليكس اللي أنا قلت عليها ممكن تبصوا في الوسيط بتاع الجمعه اللي فاتت هتلاقوها
هي مواصفات فيلا كلاسي مش أي كلام وبسعر شقة !


في حاجة بقى بتدور في دماغي هل ده بمواصفاته الرائعة دي هيكون سكن كلاسي وراقي واللا لأ

أصل كلمة بدروم دي تقيلة على المعدة قوي وبالذات لما أحمد كمال قال إنها بتمسح في الفيلا

!فعايز أعرف تصنيفها إيه في مستوى السكن

[amgad29]

في العادة الارضي المنخفض (بلاش البدروم عشان تبقى خفيفة على المعدة) بيبقى رسبشن و مطبخ و حمام بس و الارضي المرتفع بيبقى غرف النوم.
لو صرفت عليه هيبقى تحفة حمام سباحة و جنينه و تقفيلة الوميتال محترمة و برجولات عشان ماتبقاش مكشوف من السكان اللي فوقك.
انا فكرت فيه لكن فضلت شقة عادية بس مساحة كبيرة و تقريبا بنفس السعر فالموضوع يرجعلك و بعدين كل مكان له ظروفه روح اتفرج و شوف تقسيمها المعروض بقى كتيييير قوي و هتلاقي كل حاجة اهم حاجة ماتستعجلش لان الشرا دلوقتي سهل لكن البيع تقيل شوية

[Nile Heart]

---------------

انا استاذ مساعد ماده الخرسانه المسلحه.. واحد واضعى الكود المصرى للاحمال
اى سلم داخلى او خارجى ممكن يبقى من اى ماده.. و اولهم الخرسانه لآنها ارخص اختيار
اما اللى بيعملوه حديد او خشب فده لسبب من دول
-الحى ممكن يعملهم قضيه ومشكله لآن السلم الخرسانى بيعتبر عنصر انشائى اما الخشب فلا
-المكان ضيق ولا يسمح بصب خرسانه (اذا كان السلم هيتعمل فى منشآ قائم بالفعل)
-الناس شايفه ان الخشب او الحديد اشيك
-السقف القائم لا يتحمل وزن الخرسانه (ودى حجة مقاولين كتير عشان يعملوه خشب أو حديد ويتكلف الضعف) وفى 95% من الحالات السقف هيستحمل ونص

فياريب بقى الكلام ده ينتهى واللى عايز يتكلم فى فنيات يبقى اقول (اعتقد)

مراعاة لتبادل التهكم والشخصنة في الحوار تم الاكتفاء بالتنبيه بالالتزام بقواعد وآداب المنتدى
في حال تكررت المخالفة سيتم تطبيق القواعد فيرجى مراجعتها
مشرف القسم
20 ب
150710
1:07a.m

[hamdy]

متهيالي السلم ينفع يتعمل خرسانة طبعا

[محمد محمد]

الدوبليكس يفضل يبقي ارضي واول او اخير ورووف وممكن تلاقي اول واخير في بعض الفيلات.

[Evo]

الدوبليكس يفضل يبقي ارضي واول او اخير ورووف وممكن تلاقي اول واخير في بعض الفيلات.

معلش مش فاهم إزاي دوبليكس أول واخير

[dolly13]

احنا عاملين كدة فى العمارة عندنا البدروم والارضى لوحده دوبلكس والاخير والروف دوبلكس برده

[أبومعاذ]

بالراحة يا أخواني أحنا داخلين نفيد بعض مش نتخانق مع بعض

[محمد محمد]

معلش مش فاهم إزاي دوبليكس أول واخير

ما هي الفيلات بتبقي عبارة عن بدروم وارضي واول وثاني(اللى هو الأخير) انت كده بتاخد اول واخير اخر دورين في الفيلا.

[Nile Heart]

معلش مش فاهم إزاي دوبليكس أول واخير

الراجل بيقول "أو".... مش "و"