بعض الملاحظات بخصوص مصيف فى الاسكندريه.....

[ahmad--ezzat]

بسم الله الرحمن الرحيم
.
.
.
.
جاتلى فرصه انى اطلع اسكندريه 5 ايام ودة لانى بحب اسكندريه جدا عن اى بلد تانيه وهى المصيف رقم واحد بالنسبه ليا....المهم اللى لاحظته فى الرحله من اول ما طلعت...

1-الطريق ممتاز جدا ودة طبعا بعد الكارته ومفيش تحويلات اطلاقا والعمليه فى السريع (انا ختها فى ساعه و ربع للكارته التانيه بالاضافه ان العربيه خدت 25 لتر بنزين..دة ازا مكنش اكتر ) ...لكن قبل الكارته عذاب شديد من زحمه القاهره....

2-لما وصلت اسكندريه وعديت الكارته....الجو جميل جدا والصراحه افضل من القاهره بمراحل....

3-الكورنيييييييش...وما ادراك ما الكورنيش...زحمه فظيعه والناس فوق بعضها والهوا واقف متفهمش ازاى....وفى رطوبه غير طبيعيه وابتديت احس بالحر فعلا والكتمه

4-الناس مش بتنام...ادان الفجر بيأذن والاغانى شغاله وولا فى اى احترام لاى حاجه.......متعرفش تخرج وتستمتع خالص...لانك لو خرجت هتتقرف من الزحمه...دة غير انك مينفعش تركن فى اى مكان لانك مش هتلاقى.....

5-المرور هناك شادد حيله اوى على بتوع القاهره ما شاء الله...زى ميكون رزق وجايلهم

6-احسن اماكن هناك يتخرج فيها....سان ستيفنو وجرين بلازا....اما بالنسبه للقلعه والكورنيش والمنشيه والمناطق دى صعب جدا الخروج او التمشيه فيها....وبالنسبه للمعموره او المنتزه للاسف مدخلتهاش لانى معيش باسات (مش قصدى عربيه طبعا ).....بس اعتقد هيبقوا افضل قليلا

7-حاجه لاحظتها غريبه جدا مش عارف انا صح فيها ولا لا.....الصراحه اناكنت قاعد جنب جامع سيدى بشر....المهم...المساجد هناك مفيش اهتمام بيها خااالص....يعنى مسجد كبير زى سيدى بشر للاسف يفتقد حجات كتير زى نضافه الحمامات والمداخل والمخارج وما شابه ذلك...وكمان مش عارف ليه المساجد قليله على الكورنيش....يعنى انا صليت الجمعه فى زاويه تقريبا فى الشوارع الداخليه

8-نصيحه لكل اللى عايز يطلع اسكندريه......بقوله بلاش احسن......لو عايز تستمتع روح اى حته تانيه..انا كرهت اسكندريه وكرهت نفسى ههههه ...اسكندريه حاليا بقت عذاب ومفيش اى نوع من انواع الانبساط هناك...معلش اسف للطاله بس حبيت اوضح الحجات دى

[M.Osman]

انا نفسي اروح مطروح او المعمورة في رمضان بعيد عن الوش اللي انا فيه دا

[ahmad--ezzat]

انا نفسي اروح مطروح او المعمورة في رمضان بعيد عن الوش اللي انا فيه دا

مطروح جميله جدا وجوها حلو وبلد دمها خفيف وتحفه

[تامر.محمد]

انا كنت بافكر اني اروحها بس امتنعت خوفا من الزحمة برده
و حاليا بسبب بعض الظروف , بالزحمة او من غيرها ما بقاش نافع
:))))

[Samah AbdAllah]

ماهو لو كل واحد فكر زيك كده
واختار مكانى تانى غير اليكس
ان شاء الله هتفضل اسكندرية جميلة واحنا
نعرف نخرج من بيوتنا ونمشى فى الشارع
ههههههههههههههههههههههههه
اصل اكيد مش احنا اللى زاحمينها
يارب كل الناس تفكر زيك

[ahmad--ezzat]

اصل اكيد مش احنا اللى زاحمينها
يارب كل الناس تفكر زيك

ايه دة ايه دة...ماااااشى...بس على فكره احنا يا دوبك بنقعد اسبوع وبنمشى لكن انتو هناك على طول يبقى انتوا اللى زحمينها بقا مش احنا

[ahmed-moga]

مصيف سعيد ياأستاذ أحمد ان شاء الله الحاجات اللي ذكرتها دية تعتبر هينه شويه

انا بقالي 5 ايام في اسكندريه وبصراحه اللي جاي يصيف في الوقت ده يبقي غلطان جدا

اولا من ساعة ماجيت لحد دلوقتي بعاني من نقص المياه علشان السحب الفظيع عليه ده غير ماتور رفع مياة العماره بايظ

والميه مابتجيش الا علي الفجر

ثانيا الأسعار في بحري غاليه جدا اما في قبلي كويسه جدا مثال كيلو الجمبري الجامبو في بحري من عند حسني ب 250

آه والله يعني اغلي من مصر نزلت جبته الساعه 9 صباحا من قبلي وهو هوه ب70 جنيه ولو كنت فصلت كنت هاخده 60 كمان

ثالثا لو هتخش اي شاطئ اعمل حسابك في شوية فلوس فكه كتير لأن اي حد عايز يخش الحمام بجنيه ولو دخلت كذا مره

كل مره لازم تدفع جنيه تخيل لو معاك اسره واطفال وطبعا لو مريض سكر يبقي عليه العوض في فلوسك ده غير المشاريب غاليه جدا

يعني ينفع ياابو كمال لو حبيت تشرب حجر تفاحه تدفع فيه 10 جنيه هههههههههههه ده غير اللي بيحطلك الكراسي

والشمسيه تيجي تديله 2 او 3 جنيه يبصلك بقرف عايز 5 جنيه علشان حطلك الكراسي والشمسيه وعلي الرغم

كاتبين علي ورق رسوم الدخول ممنوع الأكرميات بشتي انواعها ولو دخلت الصبح ماينفعش تدخل بنفس التذكره بالليل

يعني انا مشيت الساعه 4 عصرا علشان اعمل شوية حاجات وجيت اخش الساعه 7 قالي مينفعش لازم تدفع رسوم

دخول تاني 6 جنيه لكل فرد ده غير شاطئ فنيسيا اللي في المنتزه غالي جدا ومش اصلحلك تخشله من غير عربيتك

لأن دية مدينه تانيه خالص بس بصراحه المنتزه منتازه هههههههه في النظافه والشوارع والأتزام بتمني مصر تكون بنضافتها وجمالها

رابعا مفيش خرم ابره تعرف تركن فيه عربيتك انا بالصدفه لقيت بارك فيه مكان فاضي سبت العربيه فيه لحد دلوقتي

وكل مشاوريري موتو رجل افيد واسرع وآآمن خصوصا من سواقين التاكسي والميكروباصات والناس اللي بتعدي

بالأكراه هعدي هعدي وللأسف كل يوم حادثه أقربها امبارح واحده بتعدي واترددت في نص الطريق الله يشفيها لو

لسه عايشه ويرحمها لو ماتت ياسيدي الفاضل دي الناس بتعدي في منتهي البرود والأستهتار من علي طريق مصر

اسكندريه الصحراوي وخصوصا قبل كوبري العامريه تحس وهما بيعدوا انهم كارهين الحياه وعايز ين ينتحروا ده غير

عربيات الكارو االلي شايله الخضار وايه كمان ماشيه عكس الأتجاه وفي الشمال كمان لا حول ولا قوة الا بالله العلي

العظيم طيب انت مش خايف علي نفسك ليه تحملني ذنبك وتحطني في مصيبه او تسببلي بكارثه

او مصيبه والعياذ بالله ربنا يكفينا شر الكوارث والمصايب والحوادث جميعا

بس بصراحه الأسكندريه مدينه جميله فعلا عروس البحر المتوسط وقررت اغير البروجرام بتاعي علشان استمتع اكتر

بقيت اصلي الفجر واروح اقععد علي الشط لحد الساعه 9 لأن الشمس من بعد 9صباحا لحد 6 مساءً بتبقي محرقه

جدا حتي لو منزلتش الميه وشك ودرعاتك ها يتسلخوا ويحمروا وده اللي حصلي في اول يوم وبعاني منها لحد دلوقتي

ده كانت الملحوظات السلبيه والأيجابيه اللي عشتها لحد دلوقتي معلش طولت عليكم بس حبيت انقلكم الرحله كامله

حتي الأن كان معكم أحمد ابو العافيه من شط اسكندريه من منطقة المندره القبليه والبحريه

[محمد محمد]

صدق اللى قال ان اللى يروح اسكندرية بيخرج من القاهرة بيروح للقاهرة برضه...افضل مصيف روحته في حياتي كان العريش وزرت رفح ساعتها واتصورت مع الجندي اللى واقف علي الحدود كانت من اجمل ايام عمري ايام العريش دي.

[ahmad--ezzat]

العريش كويسه اوى وهاديه خصوصا سما العريش

[dramir1]

مطروح رائعه بس عيبها بعيده وللاسف الواحد بيزهق من السواقه

[zyadahmed]

احيك على هذا الرأى وأأويدك بشدة وياريت تنشرها لمليون صديق بيفكر يجى اسكندرية تكسب ثواب فى اهلها الغلبانيين المحبوسين طول الصيف فى بيوتهم خوفا من الغزاة
ههههههههه
نورت اسكندرية يا باشا وتشرف فى اى وقت بعد اكتوبر هاتتمتع وتدعيلى

[ahmad--ezzat]

احيك على هذا الرأى وأأويدك بشدة وياريت تنشرها لمليون صديق بيفكر يجى اسكندرية تكسب ثواب فى اهلها الغلبانيين المحبوسين طول الصيف فى بيوتهم خوفا من الغزاة
ههههههههه
نورت اسكندرية يا باشا وتشرف فى اى وقت بعد اكتوبر هاتتمتع وتدعيلى

تسلم يا زياد باااااااشا

[osama.m]

على فكرة احنا مش بنعرف نخرج من الزحمة و السنة دي زحمة كتييرة جدا ... يعني انا يوم الجمعة دا من بعد العصر مش بخرج من البيت خالص .. عشان الناس من كترهم بيمشوا على الاسفلت .....
ان شاء الله هنزل الساحل قريب عشان اصيف بقى :(

[elrasy]

انا مبروحش اسكندرية غير قبل الموسم اول شهر ستة,,,, او بعد الموسم فى نصف تسعة ,,,
ودى هتكون اخر سنة فى الدلع دة لان بنتى هتدخل المدرسة السنة الجاية

[akramlail]

بصراحة انا بستغرب من كمية الناس اللى جاية تصيف فى اسكندرية لية ؟؟؟ وعلى اية دى مدينة مش مصيف
المصيف دة بيبقى هدوء وبحر ومنظر جميل