بعض الملاحظات بخصوص مصيف فى الاسكندريه.....

[ahmed-moga]

احمد باشا انا لسه شايف كلامك دلوقتى وانا لو اعرف ان انت فى اسكندريه كنت نصحتك تطلع العجمى شهر العسل جميييييييييله جدا وفاضيه شويه عن وسط البلد والشاطىء جميل جدا جدا
وممكن تدخل بيانكى وتتفرج براحتك ههههههههههه

اما اسكندريه من اول ابو قير لحد بحرى منصحش اى حد يغامر ويروح فيها لانها تحولت لجزء من القاهره وميدان رمسيس


على فكره 50 % من سكان اسكندريه هاجرو الى مطروح

لدرجه السنه الى فاتت شفت ناس كتير اعرفهم هناك ههههههههه

السنه دى بقا الاسكندرانيه كلهم فى مطروح

ميزو باشا أذي معاليك وربنا يخليك يافندم انا رحت العجمي فعلا في البيطاش شاطئ شهر العسل وقعدت طول اليوم ومشيت آخر اليوم

وفعلا منطقة العجمي منطقه جميله وهاديه بس احنا كنا مجموعتين زوج اخت المدام والشقه دية بتاعته وصغيره ويدوبك علي قدهم

وشقتي انا في المندره فااتفقنا ان كل مجموعه تعيش حياتها ومصيفها وساعات لما اعوز اروح مكان هادي كنت بروحلهم

وقضيتها المندره المنتزه المعموره العجمي والحمد والشكر لله عدت علي خير وقضينا الكام يوم بسلام وانبساط

بس بصراحه يوم الجمعه بيبقي يوم استثنائي الزحمه فيه كتير جدا لدرجة اني الجو كان حر جدا النهارده والرطوبه عاليه جدا

ومتهيألي انه بسبب الناس الكتير جدا شفطوا كل الهوا الحلو ههههههههههههههههههه

وان شاء الله السنه الجايه هتكون يافي مطروح يا العريش ولا في امكانيات والحاله الماديه تسمح شرم الشيخ

اشوفكم علي خير وكل سنه وكل الأسكندرنيه بخير وكل المصريين

[ahmad--ezzat]

ولكن لا ننكر إن إسكندرية لا تزال المصيف الأول والمفضل لكثير من الناس اللي ظروفهم الاقتصادية لا تتحمل مصيف الساحل أو أي مكان آخر

لو رحت دلوقتى هتنكر كل حاجه

[adhamsabry51]

و الله يا جماعه هو كلو يانس و يشرف بس بصراحه احنا تعبنا اوي يعني مثلا يوم الأربع اللي فات كان عندي عزاء بالقرب من محطة مصر اخدت المشوار من عند بيتي انا ساكن في سيدي بشر عبد الناصر حتي هناك في ساعتين و عشر دقائق و علشان توقف تاكسي ده حاجه مستحيله يعني انا لو حبيت اروح البحر بصراحه باروح الساحل او عايده في المنتزه انما بصراحه الجو فعلا صعب حاجه تخنق الدنيا زحمه موووووووووت يعني لازم تأيف مشوارك علي السريع او الدائري علشان تعرف تخلص مشاويرك انما اهلا و سهلا باللي عاوز ييجي بس واحد واحد

[م. عصام مهنى]

انا كل سنة بروح مرسى مطروح
بلد هادية وجميلة البحر حاجة تانية خالص
السنة دى لسة راجع من المعمورة
المعمورة كويسة وجميلة بس البحر مش نظيف + قناديل البحر الكتيرة جدا
لو حبيت تنزل اسكندرية بالعربية تكره نفسك وتكرة انا رحت بالعربية من الزحمة من اول المنتزة لحد القلعة
ولو نزلت اسكندرية بتاكسى وركنت العربية فى المعمورة
وانت راجع ممكن تاخذ ساعة ونص لحد المعمورة
البلد زحمة جدا جدا
الله يكون فى عون الاسكندرانية
وكل عام وانتم بخير

[Samah AbdAllah]

هو فعلا لو الموضوع ده ما بيفدش بعض الناس
لاكن برضو فية ناس كتير بتعبر المصيف مصدر رزق كبير واساسي ليها
شوفي المطاعم والقهاوي واصحاب الشقق والتاكسيات
اذا كان المصطافين ضرر لبعض الناس فهما بيفيدو ناس تانية

احنا عمرنا مع اعتبرناهم ضرر
دول بيميزوا الصيف عندنا
بنعرف الصيف من الزحمة
واليكس بلد كل المصريين
بس مش ييجوا يصيفوا ويكونوا هم سبب الزحمة وكمان يشتكوا ويعيبوا عالبلد

[ahmad--ezzat]

يعنى حضرتك جيت اسكندريه ومدخلتش المعموره ولا المنتزه مع انها بتزاكر عادى جدا واسعار معقوله من غير اى باصات

ومروحتش العجمى ولا اكتوبر ولا الساحل
ولا حتى القلعه وبحرى
وقعدت فى سيدى بشر وتقول ده مصيف وتنصح التاس متجيش اسكندريه

حضرتك للاسف الى اخترت غلط او كان فى سوء تنظيم للرحله انت رحت اماكن

اكيد حضرتك مفهمتش الموضوع....انا مش بتكلم على الاماكن

كل الاماكن كويسه وجميله واسكندريه جميله...احنا بنتكلم كميه البشر اللى هناك...بقلك الخروج على الكورنيش عذاب..مجرد التمشيه على الكرنيش اكنك فى اتوبيس..الزحمه الفظيعه خلت الواحد حتى ميعرفش يخرج بالعربيه...لانك لو خرجت مش هتلاقى مكان تركن...وازا ركنت فى اى حته هتتاخد مخالفه

[misoalex]

اكيد حضرتك مفهمتش الموضوع....انا مش بتكلم على الاماكن :c_laugh[1]:

كل الاماكن كويسه وجميله واسكندريه جميله...احنا بنتكلم كميه البشر اللى هناك...بقلك الخروج على الكورنيش عذاب..مجرد التمشيه على الكرنيش اكنك فى اتوبيس..الزحمه الفظيعه خلت الواحد حتى ميعرفش يخرج بالعربيه...لانك لو خرجت مش هتلاقى مكان تركن...وازا ركنت فى اى حته هتتاخد مخالفه:m_yes[1]:

كلامك كله صح بس انت قعدت اسبووووووووع واتخنقت وقولت حقى برقبتى

احنا بقى فى كل ده غصب عننا
مصالحك ومشاويرك متقدرش تعملها ولا تتحرك ولا تتفسح مع اسرتك

ده حتى اصحابى مش عارف اروحلهم من كام يوم فى نص الاسبوع كمان مش يوم اجازه اتجنيت الساعه 1 باليل وقولت اعدى على واحد صاحبى فى خالد ابن الوليد بعيد عنك وصلت لحد عنده وقعدت ساعه الا ربع ادور على مكان اركن فيه لحد موصلت لحد اخر خالد ابن الوليد وطبعا مينفعش ارجع فضلت ماشى فى الزحمه بتاعه البحر لحد 45 ودخلت على جمال عبد الناصر لحد خليل حماده ودخلت نص خالد ابن الوليد تانى من عند السينيما وابتديت رحله البحث عن ركنه تانى لكن المره دى طلعت مفتح
دخلت اخر شارع يمين فى خالد ابن الوليد ولقيت ركنه فى نص الشارع بالعافيه من بق الاسد

انت بقى زعلان على اسبوع هنا شفت البلد فيه زحمه امال احنا نقول ايه

دى وصلت انهم قفلو القلعه الجمعه الى فاتت ومنعو اى عربيه من الدخول من كتر الزحمه

الموضوع بجد بقى حاجه فوق الوصف وعدت الحدود بصراحه السنه دى

[Diaby]

ماهو لو كل واحد فكر زيك كده
واختار مكانى تانى غير اليكس
ان شاء الله هتفضل اسكندرية جميلة واحنا
نعرف نخرج من بيوتنا ونمشى فى الشارع
ههههههههههههههههههههههههه
اصل اكيد مش احنا اللى زاحمينها
يارب كل الناس تفكر زيك

ههههههههههههههههههههههههههههه والله عندك حق ده انا اهو من اهل اسكندرية والله ما بصيف هنا ده انا والله لغاية دلوقتى من بداية الصيف مشفتش شكل الكورنيش ولا هوبت عنده المصيفين يااااااااااااااااااااامـــــــــــــــــــــــاااا ااااااااااااااا جدااااااااااااااااااااااااااااااااااااااا اهل البلد مش عارفين يتفسحوا ولا يصيفوا
ده الكورنيش 30كيلو كله 5/6 حارات مفيش غير حتة ميامى وخالد ابن الوليد حارتين او 3 على حسب ما اتذكر مالصيف اللى فات بيبقوا زحمة ناااااااااااااااااااااااار والله بعدى عليه مبشوف البحر من كتر الناس اللى اقعدة واللى نايمة واللى واقفة ع السور
ارحمواااااااااااااااااااااااااااا من فى اسكندرية يرحمكم من فى السماااااااااااء

[alaasaid]

السلام عليكم ,

أحسن وقت تروح فيه الاسكندرية هو الشتا بجد بكون تحفة و بتكون هادية و الدنيا رايقة تماما و تقدر تخرج و تتفسح زى ما أنت عاوز .

[Mido80]

طمنتني يابوحميد. دا انا نازل مصر اجازة الشهر الجاي وعاوز اروح اسبوع مصيف قبل رمضان وكنت ناوي علي اسكندرية بس بعد اللي سمعتة منك مش عارف هاعمل اية....دبروني

[ahmad--ezzat]

طمنتني يابوحميد. دا انا نازل مصر اجازة الشهر الجاي وعاوز اروح اسبوع مصيف قبل رمضان وكنت ناوي علي اسكندرية بس بعد اللي سمعتة منك مش عارف هاعمل اية....دبروني

انت ممكن تقعد فى المعموره بس متخرجش بره

[SHNORY]

يوم الجمعه اللي فاتت
انعقد مجلس حكماء نايل موتورز في ميامي علي القهوه بحضور كلا من محمد بيك الطويل وخالد بيك ابورقيه وانضم الي المجلس علي الواقف احمد بيك بحري اللي كان جاي يسلم علينا
واحمد بيك مصطفي المقيم بقسم نيسان ومشهور باحمد تي في
وعدد من الاصدقاء والاحباب
والعبد لله محمد الشنوري
وقد تقرر الاتي
عدم الذهاب الي ميامي ثانيه خلال فصل الصيف
علشان ولا فيه ركنه نركنها ولا هوا نتنفسه ولا حته نمشي فيها من حجافل التتار المصيفين
هو دا ميمنعش ان السياحه البصريه للاخوه البصاصين انتعشت لان ده الموسم بتاعها
بس احنا قررنا ننقل مقر مجلس الحكماء الي اي مكان تاني مؤقتا يكون رايق ومفيهوش زحمه
لحد ما يتنهي المصيف وترجعلنا اسكندريتنا وتتحرر من ايدي المصيفين العتاه

[Ahmed Nasr]

الحمد لله كنت فاكر انى الوحيد اللى اتخنقت من زحمة الاسكندرية

[Ahmed Nasr]

انا لسه راجع من الاسكندرية من حوالى اسبوع اوافقك على غالبية الكلام
البحر الصبح زحمة........الكورنيش بالليل زحمة
موضوع كبير انك تحاول تركن فى اسكندرية
انا اصلا بورسعيدى عايز اقول ان المشكلة ممكن تكون فى الوقت ده من الصيف لان الصيف هو شهر 7
انا فعلا ما صدقت رجعت بورسعيد