حد عندة معلومات عن الازهر بارك

[Karim_Monir]

يا جماعة مين عارف الازهر بارك كويس وعارف مطاعمها واسعارها ومستوى الخدمات فيها
عشان ان شاء الله ترتيب المقابلة الجاي هاتكون هناك
فلو حد يعرف مطاعمها وكافيهاتها ونظامها عشان انا من العطاطين القدام ومحصليش الشرف بعطاية هناك لانه حديثة العهد
يا ريت كل اللي عنده معلومات يدلى بدلوه(بس من غير طرطشة):D:D

[OlaOsman]

عن أسعار مطاعمها للأسف لا أعرف الكثير.. انما عن الكافيهات فيه كافيه تيريانون و ده القعدة فيه مفتوحة.. يعني قراركوا هايكون حسب الجو و ال Minimum charge فيه 40 جنيه و يوم الخميس او الجمعة 50 متهيألي حاجة زي كده.

اما Lake side cafe فده القعدة فيه في حتة مقفولة بس على البحيرة على طول، بس ماعنديش فكرة عن المينيمام تشارج بتاعه.

مع تمنيات الجنس الناعم بالمنتدى لكم بقضاء وقت سعيد و يا ريت توصلوا سلامنا لأخونا إسلام و تمنياتنا له بالتوفيق ان شاء الله :)

[Karim_Monir]

شكرا يا علا على الافادة اللي من غير اي افادة
ها ها ها
شكرا للمحاولة وطبعا بهرج
في انتظار ناس تانية تفيد
امال في العطاطين بتوع المنتدى ياخوننا
انا عارف مش اللي هيا حتة يتعط فيها بس برضه مش كدة

[OlaOsman]

شكرا يا علا على الافادة اللي من غير اي افادة
ها ها ها
شكرا للمحاولة وطبعا بهرج
في انتظار ناس تانية تفيد
امال في العطاطين بتوع المنتدى ياخوننا
انا عارف مش اللي هيا حتة يتعط فيها بس برضه مش كدة

:D :D :D
انا برضه لما كتبت ردي و قريته لقيت ان نصه متهيألي و تقريبا و يمكن و احتمال و حاجة زي كده :D

بس برضه اهو احسن من مافيش

[Powert]

انا داخل بس علشان اقولك انا ماروحتش الازهر بارك قبل كده فاوعى تسألني :D

[casperinoo]

الجراج ب 5 جنيه
تذكرة الدخول ب 3 جنيه وسعات ب 5 جنيه
وانا شايف متعتها في المساحات الخضره الكتيره ..
ومنظر القاهره من فوق ..ويعيني علي منظر الغروب من هناك

.انما بصراحه الكافيهات مكنش ليا الشرف ..انا اخري تحت الشجره:):)

[Hossam_Hassan]

المطاعم 1 - ستوديو مصر 2 - اللى جنب البحيرة و الاتنين بيشتغلوا خميس و جمعة بوفيه مفتوح و اسعارهم حوالى 120 و 90 جنيه و باقى الأسبوع مفيش بوفيه، يعنى تطلب من قائمة الطعام اللى انت عاوزه.

[Nile_Storm]

بتقول كام :(

[Karim_Monir]

يا جماعة واضح اننا هانقضيها تحت الشجر يا وهيبة
نيههههههههههههههه

[Hossam_Hassan]

كده مفيش غير تريانون، بس نتأكد من ال Minimum Charge علشان كلنا نبقى عارفين

[electroman]

الموقع الرسمى لبارك الازهر و فيه كل حاجة عن المطاعم و كله :

https://www.alazharpark.com

[eng_mkhalaf]

بس مفيشى أسعار ودية أهم حاجة أحنا أخر الشهر يا جماعة والحالة صعبة :-)

[Karim_Monir]

تم التاكد ان تريانون في منيمم 40 في الايام العادية
واعتقد هايكون 50 في الجمعة زي ما علا قالت
وكمان قعدتة اعلى قمة التبة يعني هايكون برررررررررد جدا
اعتقد اننا هاتجمع نقعد في اي مكان وكل واحد
يجيب الشاي بتاعة او الكانز بتاعة وخلاص
لان 50 جنية كتير في الهواء الطلق ده لكل نفر
لو حد يعرف يجيب تليفونها وعندهم استعداد يفتحوا المنيمم وتبقي بالمشاريب العادي تبقي كويسة جدا بس هايبقى برد شوية برده
مستنين تفاعل اكتر يا جملعة وحد يتحرك بقي ويجيب التليفون يكلمهم
والعدد مش هايقل عن 15 او 20 وده لمصلحنهم اكيد

[Powert]

انا كنت ناوي اجي المقابلة بس خلاص غيرت رأيي

اصل ناوي اصوم يوم الجمعة اللي جاية:D:D

[Hossam_Hassan]

فى الأزهر بارك بيمنعوا دخول أى اكل او شرب من بره