صور حادثه وحشه قوى على طريق الزقازيق- القنايات

[mazagngi2010]

وانا مروح دلوقتى لقيت هيصه وزحمه جامده والطريق مقفول عند محطه مياه القنايات -طبعا الشراقوه عارفينها- المهم انا معرفش هيا حصلت ازاى لان الميكروباص متدمر ومستحيل اشوف ميكروباص بالمنظر ده ولما عاينته لقيت كل حاجه فى ناحيه حتى حزام الامان مقطوع!!!! المشكله انه مش وقت افطار ده وقت مقتول فى الجرى وبالنسبه للضحايا فيه اللى بيقول 3 ماتوا و4 خطره واللى بيقول ال14 ماتو
وربنا يسترها والله ياجماعه الجرى ملوش اى لازمه

جوافه مهروسه مختلطه بالدم


شبشب طاير متعرفش مصير صاحبه ومكنش فيه اكتر من الشباشب الطاير فى المكروباص


الباب كان مخلوع هو كمان اشمعنى السقف


ازاى الله اعلم!


كان سقف حتى الفرش متقطع


مجتش عليها


السقف فى جنب والعربيه فى جنب واكتر حاجه اثرت فيا ميدليتين مفاتيح متنيين ومتكسرين مهما يعملوا اختبارات ويعدلوا تصاميم الامان برضه السرعه ملهاش كبير والرعونيه مفيش اسهل منها وبالذات على التويوتا الجديد مكروباص طياره والناس كانت بتقول انه كان ماشى بسرعه وربنا يستر علينا

[mostafashokry]

اللهم سلم سلم

[Dr Ahmed]

اللى يسافر علىالطرق بتاعتنا لازم يخلى الشهادة على لسانه دايما

والحاجة الوحيدة الحلوة انهم ماتوا صايمين وربنا يكتبهم شهداء بإذنه

[totaman]

العربية دى مغرية جدا فى الجرى واصحابها بيفترو عليها

ربنا يحفظنا جميعا من شر الحوادث

[mazagngi2010]

ده ميكروباص ملعون اللى صنعه وصممه لو كان يعرف اللى المصريين هيعملوه بيه مكنوش نزلوه تسارع فظيع وصوته هادى وسريع وفيه كل حاجه باختصار نقطه ضعفه انه مثالى اكتر من اللازم(الكلام ده فى مصر بس)

[Eng_Mostafa_89]

لا حول ولا قوة الا بالله
دة لبس فى اية دة

[Adham]

مش يمكن الاسعاف قص الصاج علشان يطلع المصابين

[ganash]

لا حول ولا قوه الا بالله طيب دخل فى ايه ده

[m_elkhishin]

مش يمكن الاسعاف قص الصاج علشان يطلع المصابين

رأي حضرتك من وجهة نظري اقرب الى الصحة، خصوصا ان اخر صورة واضح القايم الخلفي مقطوع بشكل متساوي مش مكسور.

ربنا يعافينا جميعا ويبعد عنا شر الحوادث ويرحم اللي مات ويهدي الاحياء

[Adham]

ولما عاينته لقيت كل حاجه فى ناحيه حتى حزام الامان مقطوع!!!!

غالبا الاسعاف قاصص الصاج و وممكن كمان قاصين حزام الامان

بص في تاني صورة

الصاج الرمادي تحت الكنبة الخلفية ..... دة شكلة مقصوص بمقص صاج

اخر صورة القايم اليمين ورا برضة شكلة مقصوص

و الله اعلم

[bmya]

لا اله الا الله
الله يرحمهم
بس طبعا ده معمول كده بفعل فاعل
اكيد الاسعاف هما اللي قاطعين السقف عشان يعرفوا يخرجوا الضحايا براحتهم عشان الاصابات اكيد خطير واكيد معظم الناس كانوا فاقدين الوعي وعشان كده اسهل انهم يقطعوا السقف
وبجد حسبي الله ونعم الوكيل في سواقين الميكروباصات خصوصا بتوع التويوتا سواء الجديده دي او الشكل اللي قبله
وللاسف غالبا السواق بيطلع سليم او بيلحق ينط من العربيه والناس الغلابه اللي ملهومش زنب وراكبين معه يروحوا كده بلاش
انا كنت راكب مره بيجو 7 راكب بتوع عبود دول برده دول شياطيين هما كمان
المهم السواق عمال يحكي للي جمبه عن سواق زميله نزل بالعربيه في الترعه وكل الركاب ماتوا وهو الوحيد اللي عاش ليه بقه ؟
عشن نط من العربيه قبل ما تتقلب تقريبا الفرامل سابت اول ما لقه نفسه مفيش مفر راح ناطط سايب العربيه
وحصلت برده مع واحد معرفه كان واخد بيجو 7 راكب مخصوص هو ومامته واخته والفرامل سابت برده والسواق نطط وسابهم دخلو في شجر وجت تريله كملت عليهم
ربنا يرحمنا من العالم الزباله دي انا لما بلاقي ميكروباص شايف نفسه على الطريق بحاول اني اقفلها عليه عشان خاطر الناس اللي معه
والمهم انك لو قلت للسواق مثلا براحه يا اسطه يركبه 100 عفريت اكتر من الاول ويتنرفز ويحس بالاهانه وانك كده مش واثق ي قدراته الخارقه في اجتياز الطريق واهواله باقل وقت ممكن ولما يلبسسسسسس يقعد يعيط زي الكلب

[ahmed_mido1889]

يا باشا انا كنت راجع من طنطا يوم الاتنين بعد الفطار
تحس اني انت ماشي غلط ماشي في وسط حلبه سباق
اذا كان ميكروباص ولا نقل بمقطوره ولا ملاكي
دا واحد راكب نقل بمقطوره وانا ماشيعالشمال ماشي 90 لاقيت اللي جاي بيقلب نور وشغال عالكلاكس اديته اشاره شمال يعني مش هغير الحاره عدي من اليمين ضرب النور العالي و فضل معلقه
قولت ارخم علي اهله ازاي فضلت اهدي لحد لما نزلت لحد 40
كبست بنزين بقيت علي 90 تاني وهو يا عيني عقبال لما جمع كان اتشتم من ةكل اللي جاين ورا
وغيره كان ماشي بنقل بكونتينر بنزين ماشي بيغرز بالعربيه

[Abo_Lina]

أتمنى السواق مايكونش مات
و يشوف حالة ميكروباصه بعد الحادثة بقت إزاي
و يكون مقسط الميكروباص
و يدخل السجن بسبب الأقساط
و يموت بحسرته في السجن


جزاء رعونته و تهوره و إنهائه لحياة أبرياء قادهم حظهم للركوب في ميكروباصه الملعون

[Eng.Geo]

يا ساتر يا رب
انا قلبي أنقبض
انا مسافر بعد شوية
ربنا يستر
الصور من أوحش ما شفت

[mazagngi2010]

معرفش لبس فى ايه وبالنسبه للراى اللى بيقول ان الاسعاف استخدم مقص فده محصلش لسببين الاولانى ان السقف كان بعيد عن باقى العربيه والسبب التانى ان القايم اترحل لفوق واتنى مع السقف
=============
Tyler_Durden انا بحييك وبفكر نفس تفكيرك وبصراحه دى من اسوا الطوايف اللى تقابلها فى حياتك هما طايفه سواقين المكروباص والبيجو