انت ليه فرحان بموضوع تونس؟

[ahmed4000]

السلام عليكم

انا عارف انى حخد هجوم للصبح بس حاولوا تتقبلوا راى تانى ومش معنى تقبله انك موافق عليه

بس ليه الناس فرحانه بموضوع تونس اوى ونفسهم يحصل عندهم

فى اول يوم للتغيير مات كام واحد؟ حنقولى مش مهم فى سبيل الحرية...طيب ولو طلع الواحد ده ابوك ولا اخوك ولا ابنك...ارجوك قبل متقول شعارات كبيرة فكر شوية ان بيجيلك تليفون يقولك ابوك اتقتل فى احداث العنف

فى اول يوم للتغيير اتحرق كام محل وكام شركة؟ حتقولى برده مش مهم..طيب تخيل نفسك قاعد فى محلك اللى دفعت فيه شقى عمرك وبيتحرق قدامك....ولا شركتك اللى شغال فيها انحرقت واتقفلت وياسلام لو صاحب الشركة قالك اقعد فى البيت احنا بيتنا اتخرب؟ حتروح بيتك تاكل مراتك وولادك شعارات الحرية؟

فى اول يوم عصابات السلب والنهب عملت ايه؟ فى احياء اتحاصرت فى تونس اهلها مش عارفين يخرجوا من بيوتهم ....تخيل نفسك وانت قافل عليك شقتك ورعب اولادك وهو متحاصرين لمجرد ان فى عصابات - وما سيكون اكثرهم فى مصر- شايفة انك مدام ساكن فى شقة فى مدينة نصر ولا فى مصر الجديدة يبقى انت مليونير ابن ستين....ولازم نسرقك

انا شايف ناس اندفعت وناس بتصطاد فى المياه العكرة وناس بتتكلم على كرة الثلج واستعدادات ليوم 25 يناير -مش عارف ايه اللى حيحصل فيه- لكن بصراحة الشعور اللى جالى هو الخوف مش الامل ولا الفرحة

[Karim_Mohy]

متابع معاك للموضوع ومعاك حق في اللي انت بتقوله

بس تعالي نتكلم علي توني وتخيل نفسك انت مكان البائع المتجول بو عزيزي او اي شخص هناك تحت خط الفقر معدوم الدخل وما اكثرهم في مصر
تخيل ان الشخص ده مش عايش في مدينة نصر ولا مصر الجديدة تفتكر هايفكر زي حضرتك......

اكيد تفكيره هو وغيره هايختلف تماما....يا اما تفكير ايجابي بالنسبه له وهو الثورة مع العلم ان ممكن التفكير ده يكون سلبي لانسان مرتاح ماديا او مش فارقة معاه ثوره.....ما كده كده مش هاتغرق معاه في حاجة

انما اللي عمله ده من وجهة نظره ومن وجهة نظر كتييير زيه في بلده وفي بلاد تانية زي انفراجة من شيء لشيء تاني المهم انه يتم التغيير لاحساسه انه لا يعيش حياة كريمة

ياريت تتقبل مشاركتي ومتفهم وجهة نظر حضرتك

[تامر.محمد]

استعد للهجوم ............................ خد لك ساتر ...................... تعال يمين شوية
كله يضرب عليه يا جماعة




نتكلم بجد بقى , هات احصائيات كام حالة سرقة في بلدنا كل يوم ( و بالتالي كام واحد بيتسرق) , و هات احصائية وفيات الحوادث و الاهمال كل يوم .....
هاتلاقي اننا مش فارقين كتير :(
بص , انت يمكن سليم , بس غيرك كتير نايمين في الشارع , و كتير ماتوا في حوادث بلا اي ذنب , او نتيجة اهمال , و كلنا بنتسرق , و خد بالك من اللي جاية دي و انا عارف ان عقليتك هاتستوعبها بسهولة ... كمان كام سنة بنفس المعدل اللي احنا فيه - البطالة في ازدياد و الفقر في ازدياد و الفوضى في ازدياد و الجريمة في ازدياد و الجهل في ازدياد - هانبقى نموذج رواية يوتوبيا بتاعة خالد توفيق , اللي اظن تونس كانت قريبة منه , و شوف عدد المتأثرين هايبقى قد ايه .....
و احسبها تاني :)

و ما تنساش نقطة مهمة جدا , الشعوب كل ما زاد جهلها كل ما اتأخرت حركتها ضد الظلم , لحد ما بتوصل لمستوى معين - احنا فيه - مش بتتحرك الا لما لقمة العيش تبقى مش مكفية ..... دي الناس اللي ثارت في تونس وصلت لها , و احنا مش بعيد عنها

[م/مصطفى محمود]

طب مش هنروح بعيد ، تخيل أن ليك حد من ضحايا تفجيرات الكنيسة أو قطار العياط اللى أتحرق ولا حد ماتلك فى العبارة ولا حد مات بسبب أمراض مُسرطنة

تخيل أبنك خالد سعيد وقتلوة وأتهموة ، تخيل أنك أخو سيد بلال ومحدش عارف ياخدلك حقك ، تخيل وأنت بتتظلم عيني عينك فى أشارة مرور وأبن واسطة كبيرة معدي ولا هو هنا

تخيل وأنت بتسمع عن قضايا الأحتكار ونهب أراضي الدولة اللى بيتفصلها قوانين علشان تبقى قانونية

أنا طبعا مبدافعشي عن اللى حصل وفعلا الإتلاف والعنف غير مرغوب ، بس مينفعشي نسكت على الظلم برضوا

انا لا أدعوا للعنف فى المظاهرة ، ولكن أدعوا للمظاهرة والإضراب والتغيير

أنا لا أدعوا للسرقة والنهب ، ولكن أدعوا لوقف السرقة والنهب

يا أخي الفاضل أحمد ، والله والله والله أغلب زمايلي عايزين يهاجروا ويسيبوا البلد ، وأسمهم مهندسيين يعني هيلاقوا وظايف تريحهم ، فما بالك بالغلابة بجد

انا عارف أنك تقصد العنف وترفضة ، وصدقني والله كلنا كذلك ، والتوانسة اللى قاموا بالثورة كده برضوا ، بس إذا لم يكن من الموت بد فمن العجز أن تموت جبانا

وبإذن الله الوضع عندنا يتغير بإقل خسائر وأقل عنف

[moody1]

متفق معاك تماما

والحمد لله ان فيه ناس بتفكر صح وبتخاف على البلد زى حضرتك

والى عايزين البلد تولع لازم يعرفو حاجتين

اولا حتى لو ولعت هما اول ناس هتضر

ثانيا الى حصل فتونس (مش مسموح انه يحصل فى مصر)

ثالثا عايزين تخربو وتكسرو ماشى براحتكو (بس متزعلوش من رد فعل الداخلية)!!!!! وتقولو تعذيب فالسجون و اعتداء عالمتظاهرين ولا كل الكلام ده!!!

[viper911s]

فى اول يوم عصابات السلب والنهب عملت ايه؟ فى احياء اتحاصرت فى تونس اهلها مش عارفين يخرجوا من بيوتهم ....تخيل نفسك وانت قافل عليك شقتك ورعب اولادك وهو متحاصرين لمجرد ان فى عصابات - وما سيكون اكثرهم فى مصر- شايفة انك مدام ساكن فى شقة فى مدينة نصر ولا فى مصر الجديدة يبقى انت مليونير ابن ستين....ولازم نسرقك



الجملة دى هو كل خوفى من الموضوع دة بسبب كترهم والحقد الدفين الى موجود جواهم اى شخص سمعتة بس انو غنى ممكن يتقتل هو واهلة علشان يدورو على وهم وبالنسبالهم دة اجمل وقت محدش هيحاسبهم خالص

ربنا بستر

[M.Mostafa80]

متفق معاك تماما

والحمد لله ان فيه ناس بتفكر صح وبتخاف على البلد زى حضرتك

والى عايزين البلد تولع لازم يعرفو حاجتين

اولا حتى لو ولعت هما اول ناس هتضر

ثانيا الى حصل فتونس (مش مسموح انه يحصل فى مصر)

ثالثا عايزين تخربو وتكسرو ماشى براحتكو (بس متزعلوش من رد فعل الداخلية)!!!!! وتقولو تعذيب فالسجون و اعتداء عالمتظاهرين ولا كل الكلام ده!!!

واضح ان حضرتك مفيش اى تأثير عليك من اللىعاملينه البهوات فى الناس الغلابه وان حضرتك مابيقعش قدامك نماذج للظلم والبهدله اللى بتحصل فى البلد وللناس اللى لا يعرفو حد فى الداخليه ولا ليهم حد مسئءول كبير عشان يحميهم من الظلم
والداخليه دى المفروض ان مرتباتها بتتدفع من جيوب الناس الغلابه اللى مش عاجب حضرتك رد فعلهم
دول من خلال الضرايب اللى بتستقطع من دخلهم ومراتبتهم والسلع اللى بيشتروها
واللى المفروض يكون هدفهم حمايه الناس واملاكها مش نهبها بصور مقننه تحت مايسمى قانون الطوارئ وقانون المرور الجديد اللى قعدوم يغنو ويقولو هو دا اللى هيجيب الديب من ديله ويعدل حال البلد
وما هى الا وسيله لنهب اموال الناس عشان يكون جيش يحمى بيه النظام الحاكم من غضب الشعب المقهور اتمنى ان حضرتك تنزل للشوارع فى المناطق الشبه عشوائيه مش هقولك العشوائيه وتتفرج على حال الناس وبعدين تبقى تيجى ترد عليا وعلى الموضوع
وتقبل احترامى لشخصك ومعارضتى لرأيك

[moody1]

يا باشا انت فاكر ان المظاهرات الى هتطلع(ديه لو طلعت من اصله ومكنتش مجرد كلام عالفيسبوك)

فاكر ان هتضر مؤسسات الدولة ؟ وا هيهجمو عالاقسام مثلا ؟

ميقدروش وهما عارفين كده

الموضوع هيدخل فيه الحقد الاجتماعى و النفسنة و كره الطبقة الدنيا (للناس الاغنية الوحشين هههه) وخالى بالك الناس الى تحت اوى دول بيفتكرو ان اى واحد معاه فلوس يبقى حرامى

وانت عارف هيهاجمو مين وده الى انا خايف منه

عشان فمصر بتتصادف كتير ان المناطق الفقير بتبقى مجاور لمناطق الغنية

طبقة الرعاع هيطلعو يسرقو وينهبو ويكسرو (فمين بقا)؟؟؟؟

فينا احنا

يعنى اللى بيدعو ليوم 25 يناير ده من الاخر عايز حرب اهلية

صحيح هيبقى شعورك ايه لو صحيت من النوم لاقيت عربيتك دغدغوها (الثوار)؟؟؟؟؟!!!!!!!!


وبانسبة لعدد الفقراء فمصر

طبعا انا ببقى حزين لما بروح بعض الاحياء الشعبية وبشوف كل شىء سىء منتشر وسط الفقر والجهل والمخدرات

وجهة نظرى ان الى سبب كده هى معادلة

نمو سكانى غير عادى+موارد محدود= يعنى لازم نص الشعب يبقى تحت خط الفقر !!!!!!!!!!

هقولك مثال

فليبيا الجارة الشقيقة عددهم دلوقتى 5 مليون(بس) و كموارد عندهم بترول اد مصر 10 مرات

احنا فمصر عندنا اقل من ربع مواردهم الطبيعية

وكمان ككثافة سكانية احنا قدهم 16 مرة (احنا 82 وهما 5) مليون!!!!!!

[madyyuri]

نتكلم بجد بقى , هات احصائيات كام حالة سرقة في بلدنا كل يوم ( و بالتالي كام واحد بيتسرق) , و هات احصائية وفيات الحوادث و الاهمال كل يوم .....
هاتلاقي اننا مش فارقين كتير :(

طب مش هنروح بعيد ، تخيل أن ليك حد من ضحايا تفجيرات الكنيسة أو قطار العياط اللى أتحرق ولا حد ماتلك فى العبارة ولا حد مات بسبب أمراض مُسرطنة

تخيل أبنك خالد سعيد وقتلوة وأتهموة ، تخيل أنك أخو سيد بلال ومحدش عارف ياخدلك حقك ، تخيل وأنت بتتظلم عيني عينك فى أشارة مرور وأبن واسطة كبيرة معدي ولا هو هنا

تخيل وأنت بتسمع عن قضايا الأحتكار ونهب أراضي الدولة اللى بيتفصلها قوانين علشان تبقى قانونية

هو ده الكلام اللي كنت ناوي ارد بيه علي الموضوع

الأخ صاحب الموضوع مع كل الأحترام لوجه نظرك ممكن اعرف رد علي الكلام ده؟

[تامر.محمد]

يا سادة يا كرام
يا ريت اللي مننا مش مضرور اوي من الأوضاع اللي في البلد يفتكر ان فيه غيره مضرور , بلاش نتحط في نموذج عبد المنزل و عبد الحقل الله يكرمكم

[khaled_sabry]

طب مش هنروح بعيد ، تخيل أن ليك حد من ضحايا تفجيرات الكنيسة أو قطار العياط اللى أتحرق ولا حد ماتلك فى العبارة ولا حد مات بسبب أمراض مُسرطنة

تخيل أبنك خالد سعيد وقتلوة وأتهموة ، تخيل أنك أخو سيد بلال ومحدش عارف ياخدلك حقك ، تخيل وأنت بتتظلم عيني عينك فى أشارة مرور وأبن واسطة كبيرة معدي ولا هو هنا

تخيل وأنت بتسمع عن قضايا الأحتكار ونهب أراضي الدولة اللى بيتفصلها قوانين علشان تبقى قانونية

أنا طبعا مبدافعشي عن اللى حصل وفعلا الإتلاف والعنف غير مرغوب ، بس مينفعشي نسكت على الظلم برضوا

كل الناس اللى ماتو فى المثال ده و غيرهم كتير ماتو بدون تمن
و كل يوم فيه ناس ماعرفهمشى بيموتو فى اقسام الشرطه و هيمنه الحكومه و سطوتها بتتدخم يوم بعد يوم على المواطنين الغلابه فقط ... لكن مابتقدرشى تفتح بقها قدام امريكا و اسرائيل و اى بلد خارجيه
و ده اللى الكنيسه بتستغله و تصتاد فى الميه العكره و تحتمى بامريكا و تشحن الاقباط فى مظاهرات داميه بالا 2000 واحد لمجرد ان الدوله وقفت بناء كنيسه مخالفه للقوانين
اللى ادى لده كله ضعف الحكومه بالاضافه الى الفسااااااااااااااااااااااد الاقتصادى و ثروات البلد منهوب فى جيوب فئه الحيتان ( النموذج الحديث من اقطاعيين ما قبل الثوره ) و لو مش مصدقنى اسأل عز و جمال مبارك و اصحابه
لو زعلان على عربيتك المدشدشه فى الانفلات الامنى اللى حيحصل بعد الثوره - اتخيل معايا مثلا انك راكن فى شارع حيعدى فيه الموكب الرئاسى او اشتبهو فى عربيتك ان فيها متفجرات فى اى وقت او بنت رئيس مباحث الجيزه خبطت عربيتك و انتا راكن
كده كده لو النظام الحاكم ده كمل البلد حتدخل على حرب اهليه و حتنزل تلاقى عربيتك مدشدشه برضه
فيبقى تدشدش احسن بتمن افضل بكتير من انها تدشدش على الفاضى

[kh_talaat]

انه ثمن الحرية

يدفعه الرجال .... ويهرب منه الجبناء

[shaddadfalcon1]

السلب والنهب لازم يحصل بس هو مش هيحصل من الناس اللي هتعمل مظاهره او انقلاب
ده هيصحل من الحراميه والنصابين لان دي هتبقي فرصه متتعوضش - مش كل يوم هيلاقو الشعب بيضرب في الشرطه والجيش ومفيش حد يحمي البيوت

يعني كده كده السرقه هتحصل والناس لازم هتموت بس دي ضريبة الحريه

انا معنديش مانع ان عربيتي ام 40 الف تولع بس اعرف اشتري شقه ب 100 الف بدل 400 الف عشان الحراميه بيتحكمو في الأسعار

معنديش مانع عربيتي تولع بس الاقي بعديها مواصلات نضيفه وادميه

معنديش مانع اني اتصاب او حتي اتقتل بس ابقي عارف اني بعد موتي مراتي وولادي هيعيشو عيشه مصونه ولما حد يظلمهم هيلاقو اللي يعرف يجيب حقهم

بالنسبه للسرقه - انا طول عمري عايش في الاريايف يعني قمة الأمان يعني الناس بتسيب ابوابها مفتوحه وتنام يعني تسيب حاجتها مرميه في جنب البيت وتنام ومحدش يقدر ييجي ناحيتها

من شهرين شقتي اتسرقت ومحدش قدر يعملي حاجه وبعدها اكتر من 10 حوادث سرقه ومفيش يوم دلوقتي بيعدي الا لما سرقه تحصل
وده في الفلاحين اللي المفروض امان - فمابالك بقي بالمدن والعشوائيات !!!

[wesam_salom]

انا على الاقل

نفسى اشوف رئيس تانى واعرف الفرق

حتى لو طلعت غلطان احس وقتها بغلطتى واندم عليها

وعامه هو ممكن يمشى لو طلع كان كويس

نبقى ننتخب جمال

[MASERATI]

السلام عليكم

انا عارف انى حخد هجوم للصبح بس حاولوا تتقبلوا راى تانى ومش معنى تقبله انك موافق عليه

بس ليه الناس فرحانه بموضوع تونس اوى ونفسهم يحصل عندهم...................................

السلام عليكم و رحمة الله و بركاته

ألف شكر يا باشا , أنك فتحت الموضوع ده لأن زى ما سيادتك شايف أن كل الأخوة الأعضاء الأفاضل و أنا معاهم, بندعى أن ربنا ييسر و الموضوع ده يحصل عندنا و نتخلص من الدكتاتورية اللى بقالها 30 سنة لحاااااااااااااااد دلوقتى, حاجة تقرف .

أولا: أننا كشعب من حقنا التغيير و لو لمجرد التغيير , يعنى الرئيس الحالى , لو كان ممتاز و ميه ميه , الا أننا من حقنا أننا نغيره و نشوف حد تانى , يمكن يكون أحسن و لا أوحش و لا ليه فكر تانى و يطلع أحسن, ماهو الرئيس الحالى مش هو اللى ماجابتهوش ولادة يعنى و لا هو الملهم اللى بيعمل كل حاجة صح و مابيغلطش أبدا, ده بفرض أن الأوضاع اللى احنا عايشين فيها دلوقتى , 100 فل و 14 و أننا أحسن من قطر مثلا فى مستوى المعيشة و أحسن من سويسرا آدمية الانسان .

ثانيا: بالنسبة للناس اللى ماتت و الشركات و المحلات اللى اتنهبت , ففعلا ممكن يكون اللى مات دى أخويا و لا أبويا و لا أختى, ok بس خلى بالك, أن أخويا ده و لا أبويا ده, هو اللى بيموت هو و زيه كتييييييييييييير من التعذيب فى المعتقلات و ماحدش بيسمع عنهم و أن الشركات اللى بتتنهب دى , ماهو بالفعل أبناء السلطة و المقربين نازلين مشاركة لرجال الأعمال فى شركاتهم و أموالهم و هما نفسهم بيحتكروا أكبر المشاريع فى البلد ليهم و للمقربين منهم و أنت أكيد عارف , يبقى مش فارقة , أنا و لا أبويا و لا أخويا , نموت فى سبيل أننا نطيح بالحاكم الدكتاتور ده أفضل من أننا نموت من الضرب فى قسم شرطة و لا فى أمن الدولة .

و أحب أقول شئ أخير, أن مش معنى أننا قادرين نعيش بالوضع الحالى , يبقى خلاص بأه, خلينا كده و خلاص, لأننا مش عايزين نعيش و السلام , احنا عاوزين نعيش بكرامة و نعيش أحلى عيشة و لا بلاها خالص ( ده رأيى و ماليش دعوة بأى حد تانى عاوز يعيش جنب الحيط و عنده عيال عاوز يربيهم ) لأن اللى عنده عيال عاوز يربيهم و خايف عليهم, هو مفكر أنه بكده بيربى العيال و بيحافظ عليهم و مايعرفش أنه بيساهم فى أنه يخلق ليهم مستقبل أكتر عبودية و ذل و مهانة و مستقبل أكتر سوادا من الحاضر اللى احنا عايشين فيه.