بعد خطاب الرئيس مبارك

[mfarag]

يا ريت لجنة الحكماء بتاعة زويل تتحقق بسرعة

مبارك نجح فى شق صف المتظاهرين

و اتقسموا لمظاهرات مويدة و معارضة

زمع محاولات بعض المويدين الاحتكام بالمعارضيين فى ميدان التحرير

يبقى البنزين جنب النار

يا ريت مبارك يفوض سليمان بسرعة

او يوصولوا لحل تفاوضى

و الا الاشتبكات هتبقى مش بين الجيش و الشعب

لا هتبقى بين الشعب و الشعب

[mmffor]

كان مطلب الشارع منذ اليوم الاول " الشعب يريد اسقاط النظام " و ليس الحكومة او مجلس الشعب او احمد عز او غيره!
مبارك رمى بالفتات

[pro_samir]

اتفرجو علي المسخره

المعارضه رجعو في كلامهم دلوقتي وعايزين يعملو حوار مع نائب الرئيس !!!!!!!!!!!!

يظهر حسو انهم هيطلعو من المولد بلا حمص خصوصا بعد ما معظم الناس هديت

[medomashake]

السلام عليكم ورحمه الله وبركاته
احنا عايزين ايه تاني
المطالب ما بتتحققش في يوم وليلة ندى فرصة للحكومة المشكلة
البلد في النازل والخراب هيعم على الكل
البطالة هتزيد
وبعدين اللى بيقولوا ان المجلسين فاسدين عشان يعدلوا المادتين
فتحي سرور اقر انه ما فيش اجتماع للمجلسين قبل قرارات محكمة النقض
يعنى ان شاء الله خير
يا جماعة نصبر شوية من فضلكوا وبعدين نقرر

[evram]

يا جماعه انا شايف ان مينفعش يمشي دلوقتي اولا الراجل ده عمل حاجات وحشه كتير بس عمل حلو بردوة استحملنا 30 سنه مش هاين علينا نستحمله شهرين نلاته الراجل عايز يعمل حاجه قبل ما يمشي تعملوة معاه كده المفروض الشباب الفاضي الي في التحرير بيقول يرحل مثل محاميه كانت مع عمرو اديب امبارح اسمه مها دي بتسخن في الناس و تقوله ارحل ارحل مينفعش اسرائيل اعده عايزانه من غير ريس ساعه واحده بس و غيرة كتير ظروفنا غير ظروف تونس انا من راي كده عملنا ايل علينا و الي يقول غير كده يبقي مش فاهم حاجه و التغير مش في يوم و ليله و بلاش بقي الشعارات الي تنرفز دي جمعه الغضب كل ده بيعم علي بلدنا بال وحش البلد خربت مصر الجديده الي كانت من اجمل امكن بقيت ازبل اماكن و لغايه امتي يا مصر اهدو يا شباب البردعي الي بيسخنكم ولا تعرفوة ولا يعرفنه و الاخوان الي عايزين يخربوة دول و امثال كتييييييييييييير مينفعش تمسكنه و عينه علينا و اسرائيل اهدو يا شباب و بلاش ايل يسخنكم و افتكرو ربنا و اهدو

[Moh.Abdelbaset]

أستاذ محمد أنا اخواتي الإتنين في الشارع من 5 أيام بيأمنوا الشارع بتاعنا فى المحلة
رغم ان المحلة محصلش فيها أعمال نهب وشغب اكيد عايز الناس تهدى والبلد ترجع
بس انا قولت الحل اللى فعلا ممكن يرضى جميع الاطراف
تنحى الرئيس ..... اجتماع نائب الرئيس بقوى المعارضة
ضمان عدم ملاحقة الريس قضائيا ( هو شخصيا )
اما باقى النظام يجب ان يحاكم


الريس للاسف حرق شخصيتين ليهم احترام كبير اوى بين الشعب
عمر سليمان ............. أحمد شفيق

فليتحلى بالشجاعة ويعترف بالهزيمة لحفظ ماء وجهه كما فعلها جمال عبد الناصر من قبل
عند إعترافه بالهزيمة امام اسرائيل فى 67

بلاش أستاذ دي..أنا لسة 22 سنة
حضرتك بتقول إخواتك مش إنت
ما هو الرئيس يعتبر تنحى
ده المدير الفني في بعض الحالات لازم يقعد آخر الموسم علشان الفريق ما يقعش
فما بالك برئيس دولة..حنبقى زي تونس و الله..و هتطلع المظاهرات ضد عمر سليمان
و بعدين لما يتنحى مين اللي هيمسك
عمر سليمان..ممكن يعترضوا عليه و ده وارد جداً يحجة إن من النظام السابق
أو .....مفيش حد الناس مجهزاه أو المعارضة حتى مجهزة شخص يقود البلد

حضرتك دلوقتي فيه آلاف بييأيدوا الرئيس مبارك نزلوا الشوارع
حضرتك معظهمهم مش عايز مبارك لشخصه..هما عايزين الاستقرار و الأمان يعود تاني
و بيقولوا للمعارضين روحوا بيوتكم بأه

[yoyomano]

السلام عليكم ورحمة الله وبركاته
احبائى واخوانى واخواتى احترامى الشديد لكل كلمة قيلت وستقال واسمحوا لى بأن ادلى برئي مع اننى اول مرة اكتب فى السياسة على النت
اولا الكثيريين او الكل مع التغير وتداول السلطة وانا معهم ولكن يجب ان يتم ذلك من خلال انتخابات حرة ونزيهة وان توضع لها كل الضمانات( حتى لا تكون بنزاهة الانتخابات السابقة) وانا احى مبارك لانه لم يترك الطائرة تتحطم ويهبط بالبارشوط وهذا افضل واجمل شئ عمله بعد ال30 سنة خراب وبيع للبلد فى جميع القطاعات من مصانع وشركات واراضى وووووووو وفساد فى جميع المواقع ولكن لو تركها الان وهرب سيتكالب علينا الذئاب والمرتزقة والمنتفعين والمشتاقين من الداخل والخارج
واذا كنا جميعا فى طائرة واحدة ومبارك هو الطيار ولم يعجبنا طريقة قيادته الخطرة هل يعقل ان نجعله يترك الطائرة فى الجو ويتركنا ام نطلب منه ان يهبط بنا فى اقرب مكان آمن او هبوط آمن

Safe landing

[osmana]

انا مبقتش فاهم حاجة اية الصح و اية الغلط
يمشي ولا يقعد
طيب لو مشي البلد هتلحق تلم نفسها ولا هنقع بسرعة مهولة
طيب مين اللي فاهم و شريف (مش بيتشعبط ) عشان يمسك
المتظاهرين يمشو ولا يستنو
طيب لو الدنيا وقفت اكتر من كدة كام يوم تاني الناس هتاكل منين

[derinyym]

والله ياجماعه انا ما بينى وبين النظام اى حاجه بس انا فعلا مش لاقى حاجة حلوة افتكروا بيها 40% من الشعب تحت خط الفقر - تعليم سئ - صحة سرطانات - فيروس سى - مستشفيات ........ زراعة مصر اكبر مستورد للقمح فى العالم - صناعة مفيش فساد فى كل حته بطاله فى معظم الشباب والله انا باشوف دايما ناس بتاكل من الزبالة حتى البنيه الاساسية اللى بيتكلم عليها مشاكل المرور مذمنة والبلد بتغرق فى شبر ميه ده غير مشكلة الزبالة

[eto_cairo]

لسه ماقلش :: فهمتكم اى نعم فهمتكم

[eto_cairo]

انا لا اتذكر اى حاجة كويسة لعصر مبارك افتكره بيها غير حاجة واحدة بس : 5 كاس افريقيا فى الكورة !!!!!!!1

[Tarek Gen 2]

(ده اقتباس لكلامى فى رد اخر )

بن على فلوسه اتجمدت
مطلوب فى الانتربول
مستنداته اتفتحت
ورقه اتسرب
لاجئ سياسي
هيتحاكم

تفتكر مين حاكم دكر يرضى انه يتنحى عن الحكم؟؟

خطاب الريس

مفيهوش سيرة عن قانون الطوارئ اللى فى ايد عيال عندها 20 سنة و حاطط نجمة على كتفه
مفيهوش سيرة عن المادة 88 بتاعة الاشراف القضائى يعنى اللى هيقغد على الصناديق موظفين ب 50 جنيه يسودلك الصندوق
كل كلامه عن ناس مندسين مع الشعب خربت عن ان المظاهرات خربت عن ان الناس خربت
لكن الشرطة لا - مفيش غلطة من الحكومة - مشيوا بكل ديموقراطية يوم 25 - يا سلاااااااااااااام والضرب اللى اتضربته و المية اللى اترشيت بيها وانا بصلى و الغاز اللى اضربت بيه من 8 بليل لحد 5 الصبح ده كان ايه ؟؟ الحكومة بتهزر معايا

قال لم اكن انوى ان اترشح و لما الناس سالته قبل كدة مقالش كدة ليه
و لما هو كدة اتعمله حملة انتخابية جديدة بصور جديدة و عشان تطمن على مستقبل اولادك ليه ؟؟
ولما هو ناوى كدة معدلش الدستور عشان اللى جى بعده ليه
فى ظل الدستور الحالى ده ولا البرادعى ولا ايمن نور ولا عمرو موسى ولا كمال الجنزورى يقدر يرشح نفسه

فى خطابه لم يلمح لمحاكمة العادلى على موت 300 واحد و فقد 500 و جرح 3000 ؟؟ و استخدام الرصاص الحى
حى ؟؟ يا نهار ابيض !! ليه احنا كفرة ؟

فى خطابه قال شائت الاقدار ان اكون رئيس لمصر 30 عاما
لا والنبى لا يا راجل قال انتا مش عايزنا بس الاقدار هى اللى عملت كدة

فى تكليفه للوزراء شال 9 بس !! م ن اكتر من 20 واحد ده اسمه تشكيل وزارة و حكومة جديدة
ازاااااااااااى

انا احارب البطالة و ساب وزيرة القوة العاملة اللى معاها اعدادية و باست ايد ميراته
انس الفقى اكبر (------) فى الدنيا و اكبر كداااااااااااب و القنوات المصرية تشهد اللى مجبتش مشهد واحد من اللى حصل قبل كدة
مثلا من الشرطة تجاه المتظاهرين

احمد ابو الغيط اللى ميعرفش ينطق كلمتين واللى المصريين فى عهده بيتمسح بكرامة اللى جايبينه الارض برة واللى السفرات المصرية برة فى عهده مالهاش اى دور

بطرس غالى يطلع يقول انه رفض الانضمام للحكومة الجديدة على اساس اننا ماسكيييييييييين فيه !!

احمد زكى بدر لسة موجود !! على اساس ايه

بدل ما يحل المجلس اللى طلع قال عليه قبل كدة انه شرعى و ان اللى بيقول عليه مزور ده هو اللى بيكدب و يتمنى الخراب لمصر
497 عضو وطنى و ميبقاش مزور طب بعد الثورة و اثبات الناس انها مش عايزة خلقتهم و كسرت مقارتهم يبقى ايه يا ريس ؟؟
يطلع بدل ما يحلو يقول هنبص فى احكام المحكمة اللى هتاخدلها سنين بقى

حد يقدر يضمن المجلس الجديد اللى هيبقى من غير اشراف قضائى ؟؟
حد يقدر ان المجلس ده ميبايعش الريس لفترة جديدة زى ما حصل فى تالت ولاية ليه؟؟

حد يقدر يضمن ان صوته هيروح للى عايزى فى ظل عدم وجود اشراف قضائى
حد حقق فى كلام العادلى اللى وجه فيه حادث الكنيسة لناس معملتش حاجة ؟؟ و اتطرمخت

اللى بيقول ان البرادعى و جروب خالد سعيد مدفوعين من اسرائيل و امريكا اقولوهم كلمة واحدة بس
اسرائيل و امريكا عمرهم ما هيلاقوا ضفر مبارك تانى
ضفر واحد بيصدر الغاز لاسرائيل و نستورده احنا و الناس تمشى كيلوهات عشان تجيب انبوبة متلاقيش !!
ضفر واحد بيسبهم داخلين خارجين فى طابا و سينا و الوحيد فى افرقيا اللى بيستقبل وزرائها و حكومتها فى مصر !!

ضفر واحد راح المانيا و فرنسا اكتر ما راح الفيوم و اسكندرية
ضفر واحد دفع مليارات فى توشكى و المحصلة صفر و حسك عينك تجيب سيرتها فى حاجة

حد يقدر يضمن حاجة فى ظل نفوذ و وجود ( فتحى سرور - صفوت الشريف - زكريا عزمى) ؟


ده فيلم هندى منه يا جماعة والله فيلم و الايام بيننا

[mmffor]

والله ياجماعه انا ما بينى وبين النظام اى حاجه بس انا فعلا مش لاقى حاجة حلوة افتكروا بيها 40% من الشعب تحت خط الفقر - تعليم سئ - صحة سرطانات - فيروس سى - مستشفيات ........ زراعة مصر اكبر مستورد للقمح فى العالم - صناعة مفيش فساد فى كل حته بطاله فى معظم الشباب والله انا باشوف دايما ناس بتاكل من الزبالة حتى البنيه الاساسية اللى بيتكلم عليها مشاكل المرور مذمنة والبلد بتغرق فى شبر ميه ده غير مشكلة الزبالة

يا ريت كل الناس تفتح عينيها و متقفلهاش عمدا

[derinyym]

انا شايف انه لازم يمشى وان كنت باقول بلاش يتحاسب وحسابه عند ربنا وما تخافوش البلد مش هايحصلها حاجة علشان دى بلد مؤسسات مش افراد يعنى هو لو كان مات كنا هانموت احنا كمان وبعدين هافكركوا بحاجة فى ثورة 52 معلش فى اللفظ شوية عيال مسكوا البلد ومحصلش حاجة ساعته بالعكس دخلنا حرب 56 وبنينا السد العالى واممنا قناة السويس

[wawoo]

و للاسف ده اللى خايف منه ........... خطاب معسول ووعود و تنفض الثورة و بعدين نلاقى التفاف و فساد و سرقة

انا مش مع الفوضى و نفسى الدنيا تهدء بس مش مصدقه يعنى اللى محاولش يعمله فى 30 سنة ضميره هيصحا و يعمله فى 10 اشهر .......... ده مش بعيد يسبها تخرب و يقولك ما انا ماشى

تمام يا ماكا

لا احد يريد الفوضى ولا احد يريد عدم الاستقرار ولا احد يرغب فى فراغ سياسى يضع البلاد على حافة الهاوية .

و لكن على الجانب الاخر ..دعونا نتسئل عدة اسئل قبل التفكير فى المرحلة القادمة ..من الذى ادى بنا الى هذة الفوضى ..من الذى وصل بنا اللى هذا الفراغ السياسى ..حتى انة لا يوجد على الساحة اى حزب حقيقى
لقد نجح نظام الحزب السابق برئاسة مبارك فى تدمير اى كيان سياسى يصلح لاستكمال المثيرة لذلك ظهرت الحركات الشعبية مثل كفاية و 6 ابريل و الجمعية الوطنية للتغير لتتواصل مع الشعب و نالها من النظام التشوية و التخريب ما نالها

من الذى اختار الحكومة السابقة التى وصلت بنا اللى الفوضى...

انة نفس الشخص الذى يقول نفس الوعود السابقة و نفس الشخصيات و نفس الوزراء "مع تغير الوزراء الذين ليس لديهم اهمية سياسية فى الشارع مثل وزير الثقافة ..

ان وزير الاعلام المستمر فى خداع المصريين عبر القنوات الفضائية والارضية المصرية ببث صور مزيفة لما يحدث و كان ينقل كورنيش النيل خالى من الناس فى وقت تواجد بالملايين من ابناء هذا الشعب فى ميدان التحرير و الشوراع المؤدية لة ...

رؤساء تحرير الصحف القومية و على رئسهم جريدة الاهرام مستمرة فى خداع المصريين و تشوية اتفاضة الملايين بالتهوين من شىء ما حدث و اظهار الثورة على انها مجرد تجمع قليل من شباب الانترنت والفيس بوك

ان النظام الفاسد مزال مستمر رغم انهيارة و فقدانة اى دعم من معظم فئات الشعب..و الجزورة مازالت موجودة و ستنظر الفرصة لتنقض مرة على الحكم و تمسك بقبضة من حديد فى المرة القادمة حتى لا تتكر مثل هذة الثورة

لا تنخدعو بالبيانات الرنانة و الوعود الوهمية على القنوات المصرية الموالية للرئيس و حزبة المهزوم
على كل مصرى مخلص شارك بصدق ان يتذكر جيدا دماء الشهداء الذين سقطو بالمئات فى سبيل الوصول للهدف الحقيقيى من الثورة و هو تنحى هذا الرئيس ..و هو مطلب معظم المصريين الان