نداء استغاثة

[mertahgedan]

أهل المنتدي الكرام في مقال في الدستور الأصلي تحت عنوان (مصابو الثورة يؤكدون طردهم من مستشفيات القصر العيني والاطباء يضربون عن العمل) الكلام ده لو حقيقي يبقي وصمة عار علي جبين الثورة معلش أنا مش عارف اجيب الرابط بتاع المقال . لكن لازم نلاقي حل في أسرع وقت لهؤلاء المصابين وأنا أناشد الأستاذ كريم شخصيا التحقق من هذا الأمر

[A.Saad]

http://www.nilemotors.net/Nile/199459-a.html

تانى حاجة

والاطباء يضربون عن العمل

ده معناه ان استمرار التظاهرات واستمرار الاعتصامات بيضر البلد واللى قلناه قبل كدة ومحدش صدقه

[icehearted girl]

الكلام دا حقيقي..احنا مضربين عن العمل من 3 أيام ليل ونهار ومواصلين الاضراب لحين تحقيق مطالبنا...

[icehearted girl]

ملحوظتين مهمتين لكي لا تختلط الاوراق

اولا..نداء الاستغاثة دا احنا اللي بنطلقه وليس المصابين

ثانيا: المصابين اللي بيقولوا انهم مطرودين دول مصابين ليسوا مصابين ثورة

[mertahgedan]

ألف شكر علي الرد و التوضيح لكن أنتو شايفين الحل ايه

[A7MED_PHARMA]

ملحوظتين مهمتين لكي لا تختلط الاوراق

اولا..نداء الاستغاثة دا احنا اللي بنطلقه وليس المصابين

ثانيا: المصابين اللي بيقولوا انهم مطرودين دول مصابين ليسوا مصابين ثورة

هوا الطبيب يقدر يمتنع عن العمل يادكتورة؟؟
يعني تقدري مثلا حد يجيلك مصاب ..سواء في الثورة أو في غيرها ..والطبيب يمتنع عن علاجه؟؟؟
لأي سبب كان

[heshamzaky]

بصراحة دة كلام مش مظبوط و مش صح يعنى أية دكتور يضرب عن العمل و لو واحد جة و حالتة خطر يتقال لة اية أصل الدكاترة مضربين عن العمل . مش منطقى و كدة تبقى فوضى و ضرر . الا لو كان حا يستقبل الحالات الخطرة و الكشف العادى يطنشة و ما يكشفشى علية بس دة برضو غلط .

[icehearted girl]

ولمزيد من الاستفاضة هفهم حضراتكم الوضع ايه..

يمكن نقلت لحضراتكم صورة من اللي كان بيحصل في استقبال القصر العيني ايام الثورة والخطر اللي كنا بنشوفه ونتعرضله لحين هجوم بلطجية علمكان وكنا بنستحمل ونشتغل..عشان فعلا الوضع غير محتمل..مكنش حد مننا بيكون مستأمن نفسه لا وهو جي ولا وهو مروح ولا وهو بيشتغل

المصيبة والطامة الكبري...غياب الامن تماما عن المكان..فاهمين يعني ايه؟؟؟

بقالنا حوالي 6 ايام بنتعرض لكافة انواع البلطجة في المستشفي بالليل

كل من هب ودب يتخانق ويشتم ويضرب وحنا لا حول لنا ولا قوة

هو احنا مش ولاد ناس..وحقنا نتعامل مش هقول باحترام..لكن هقول ب أمان؟؟؟

غياب الامن تممااما عن المكان حوله لمكان فوضوي...يوميا بنتعرض لبلجة بالسكاكين والمطاوي والضرب

من 3 ايام شفت بعيني حاجات لو بس اهلي سمعوا عنها مش هيترددوا لحظة انهم ينزلوني الشغل تاني...لو اي حد منكم عرف ان بنته فلطوارئ بيترفع عليها مطوة ولما تتصل بالامن يقولها هنعملك ايه مع نفسك..هتعرفوا انا قصدي ايه

لما تشوفوا بعنيكم عشر بلطجية دخلين يجروا ورانا بسيوف ومطاوي عشان قالوا اتنين بس يدخلوا مع المريض هتعرفوا يعني ايه

وكل مطالبنا هي تواجد امني عشان نشتغل

اتصلنا بالجيش قالنا كل اللي نقدر عليه نعدي عليكم كل ساعتين

كل مطالبنا امن ف القصر العيني وزمايلنا ف ابو الريش ومستشفي الباطنة

شايفين دا كتير...؟؟؟

للاسف العميدة سايبانا نخبط دماغنا ف اكبر حيط...ومتجاهلة طلبنا تماما فقررنا الاعتصام...وفعلا مضايقين جدا انا لجأنا للخطوة دي لكن ما باليد حيلة

وصلت ان مدير مستشفي الطوارئ قلنا هسمحلكم تحملوا اسلحة وتحموا نفسكم باديكم ونا هحميكم قانونيا

تفتكروا مكان مديره بيقولي كدا هآمن فيه علي نفسي؟؟؟

حتي النواب والمدرسين كتبوا استقالة جماعية وقدموها النهاردة

متستهونوش بالموضوع الله يكرمكم

[heshamzaky]

هوا الطبيب يقدر يمتنع عن العمل يادكتورة؟؟
يعني تقدري مثلا حد يجيلك مصاب ..سواء في الثورة أو في غيرها ..والطبيب يمتنع عن علاجه؟؟؟
لأي سبب كان

بص يا باشا لو دة حصل الجيش ممكن ينزل أطباء من عندة و شاطرين جدا جدا جدا فى كافة المجالات و التخصصات بس كدة يبقى الشعب بيرهق الجيش و بحملة اعباء زيادة و بصراحة يبقى من حق الجيش بعدها يتخذ اى اجرائات مع الناس و ممكن جدا يغير طريقة المعاملة الحسنة و هما كانو أذاعو بيان و قالوها بصورة لطيفة أن الاضراب عن العمل مش فى مصلحة الوطن .

[icehearted girl]

ملحوظة: امبارح تلات اطباء دخلوا قعدوا ف الاسعافات الاولية اللي بتستقبل الحالات الخطرة فقط..عشان فيه فعلا مرضي كتير ملهمش ذنب...ثلاثة فقط

..

في فعلا وضع غريب وسمعت ان في مدابح بين بلطجية زينهم وبلطجيية السيدة

متخيلين مين المتردد علينا طوال الليل؟؟

[Tarek Gen 2]

الكلام دا حقيقي..احنا مضربين عن العمل من 3 أيام ليل ونهار ومواصلين الاضراب لحين تحقيق مطالبنا...

و ايه المطالب :) زى مطالب الثورة ولا حاجة تانية ؟

[dramir1]

المهنه الوحيده اللي ماينفعش فيها اضراب هي الطب لانقاذ حياة المصابين ...انا معاكم ان الاطباء وخاصة صغار السن مظلومين جدا ...مرتبات ضئيله ساعات عمل ونوبتجيات كثيره مذاكره كتير وطول عمرهم بيذاكرو وفي النهايه مفيش تقدير...وانا لا انسى بعد الماجستير قالولي المرتب زاد 100 جنيه يخصم منها 12 جنيه والباقي 88 جنيه هي الزياده للحصول على درجة الماجستير الف مبروك!!!!!! ولكن نرجع ونقول ماينفعش الاطباء بالذات يضربو عن العمل ولكن يشوفو طريقه تانيه للتعبير عن تضررهم من الاوضاع الحاليه بدون تعطيل مصالح وارواح الناس
ولكن بعد البلطجه والسنج والسيوف والكلام دا لازم الجيش يوفر للمستشفيات الحراسه اللازمه لعدم تعرض الاطباء لاي اذى وعمر الطبيب ماهينفع يشتغل وهومرفوع عليه سنجه خاصة لو كانت طبيبه ...وربنا يعدي الازمه دي على خير

[تامر.محمد]

اتهم عدد كبير من مصابى أحداث الثورة إدارة مستشفى قصر العينى بإخراجهم من المستشفى اليوم دون استكمال علاجهم رغم حاجتهم للعلاج بزعم إضراب أطباء الامتياز والنواب عن العمل احتجاجا على غياب الأمن عن المستشفيات ورفض الشرطة التدخل لحماية الأطباء من اعتداءات بعض أهالى المرضى.
وقال العديد من المرضى الذين تجمعوا أمام دار القضاء عصر اليوم أن إداريين بالقسم الداخلى للمستشفى بعنابر 12و14و15و16أجبروهم على مغادرة المستشفى صباح اليوم وحرضوهم على تحرير محاضر ضد أطباء الامتياز والنواب بزعم أنهم المسئولون عن عدم استكمال علاجهم.
وكشف المصابون أن بعض المرضى بعنابر الرمدالذين يتجاوز عددهم 150مصاب تدهورت حالتهم بشكل كبير لعدم استطاعتهم تغطية تكاليف العلاج غير المتوافر بمخازن قصر العينى.
وكان العشرات من أطباء الامتياز والنواب قد اعتصموا أمام مكتب عميدة الكلية الدكتورة لميس رجب ظهر اليوم احتجاجا على عدم تأمين مستشفيات قصر العينى وحماية أطبائه من أعمال بلطجة وعنف مارسها بعض أهالى المرضى بسبب عدم علاج مرضاهم لامتلاء المستشفيات وأقسام الطوارىء والعنايات المركزة عن آخرها بالمرضى والمصابين.
وفقدت عميدة الكلية السيطرة على أعصابها وقامت بتقطيع لافتة تهنئها بالمنصب الجديد بعد فشلها فى إقناع الأطباء بالعودة إلى العمل وتأكيد الأطباء على استمرار إضرابهم لحين إرسال آليات الجييش لحمايتهم وفتح أقسام العلاج الاقتصادى للعلاج المجانى وتخصيص مستشفيات خاصة لعلاج المصابين والحالات الطارئة بالمجان لمواجهة عجز الأماكن التى تواجهها المستشفيات العامة.
ورفع الأطباء لافتات منها "ياييجى الجييش ..ياشغل مفييش"وعايزدبابة ..على البوابة|"و أمان الأطباء ..علاج للمرضى"و"أمان أوإغلاق الاستقبال "
وقال الدكتور محمد شعلان طبيب امتياز أن أفراد الشرطة المتواجدين بالمستشفيات لم يتدخلوا لحماية الأطباء العاملين بقسم الاستقبال من ثورة الأهالى يوم الثلاثاء الماضى رغم استدعائهم أكثر من مرة بعد أن رفع بعض أهالى المناطق العشوائية أسلحة بيضاء على الأطباء لإجبارهم على قبول مرضاهم رغم عدم وجود أسرة خاليةوان أحد الضباط قال لهم بالحرف الواحد أنا محتاج حماية زييى زيكم".
وأشار إلى أن مايقرب من 15بلطجى أشهرواالسيوف والمطاوى على الأطباء مساء الاثنين.
وتابع الدكتور أحمد أنور إن أطباء الامتياز والنواب يعانون من الإرهاق الشديد بعد أن وقع عليهم الجانب الأكبر من العمل بالمستشفيات الجامعية والحكومية فى علاج مصابى وجرحى ثورة الخامس والعشرين من يناير، وأنهم عملواتحت ضغط شديد من أهالى المرضى وغياب تام للأمن.
وكشف أحد الأطباء العاملين بقسم الطوارىء أن العدد الحقيقى لشهداء ثورة الخامس و العشرين يتجاوز بكثير الأرقام المعلنة حيث أنه كانت هناك تعليمات واضحة حتى مساء الجمعة 28يناير بعدم استخراج تقارير الوفاة والإصابات بالرصاص الحى وأن عدد كبير من الأهالى قاموا بأخذ جثث ذويهم لدفنهم بمعرفتهم دون قيدهم فى كشوف المترددين على المستشفى بعد تهديدهم بتشريح الجثث والدخول فى إجراءات إدارية معقدة لإثبات وفاتهم بالرصاص الحى .
ولفت الطبيب إلى أن حالات الوفاة الأولى التى وردت للمستشفى كانت مصابة بتهتك تام فى الجمجمة بسبب سقوط القنابل المسيلة للغاز على رؤوس المتظاهرين ،قبل ان ترد بعد ذلك أفواج من الحالات المصابة بطلقات الرصاص الحى وأشار إلى أن غرف عمليات مستشفى قصر العينى ال17لم تتوقف عن العمل المتواصل فى إجراء الجراحات للمصابين منذ الأحداث وحتى الأن.

نقلا عن موقع الدستور الأصلي

[icehearted girl]

مرتبات ايه يفندم بس وكادر ايه حضرتك اقرأ مشاركتي الصفحة اللي فاتت

انا مليش دعوة بدستور او غيره

انا نقلت لحضراتكم صورة واقعية بنعاني منها حاليا انا وزمايلي

انا نازلة كمان ساعة الشيفت ومعايا شومة وسكينة عشان اعرف اقعد

[icehearted girl]

ملحوظة..دكتور محمد شعلان دا مدرس مساعد مش طبيب امتياز