إزاي أروح المركز الثقافي البريطاني بالعجوزة؟

[goodwave]

السلام عليكم

أخوكم مزنوووووق في خدمة من إخوانا سكان القاهرة..... انا إسكندراني وإن شاء الله الإسبوع القادم عندي إمتحانات في القاهرة وبالتحديد في المركز الثقافي البريطاني.... الموضوع بإختصار إني بدرس في جامعة في إنجلترا بالمراسلة ونظرا لتعذر السفر لحضور الإمتحان في إنجلترا ... إن شاء الله سوف يعقد الإختبار لي في القاهرة بالتنسيق مع المركز الثقافي البريطاني.

بالتفصيل الممل وياريت بلاش خرايط جوجل علشان مش بفهمها وعلشان انا في القاهرة وشوارعها ميييييح :(

المركز الثقافي البريطاني مكانة في العجوزة امام كورنيش النيل على ما أعتقد والإمتحان حيكون يوم الإتنين الساعة 9 ونص صبااحا.

1- هل يفضل أسافر بالعربية ولا بلاش بهدلة في القاهرة لأني مش عارف حاجة هناك؟
2- لو سافرت بالعربية ما هي الإتجاهات والإرشادات؟
3- عندي إمتخان يوم الأتنين ويوم الاربعاء فإن شاء الله محتاج ابات الأتنين والثلاثاء في القاهرة.... حد عندة فكرة عن أسعار شقق مفروشو او لوكاندة معقولة الأسعار؟

4- لو حاجي بالمواصلات مثلا السوبر جيت.... ما هي العلامات الإرشادية؟ ولو حركب من موقف السوبر جيت اقولة رايح فين وأديلة كام وياخد وقت قد إية؟

معلش أخووكم عايش في إسكندرية وهي عبارة عن 3 شوارع متوازية والعيشة سهلة..... بس القاهرة بحس فيها إني في "متاهه"!

ياريت النصيحة بالنسبة لموضوع السفر بالعربية ولا لأ؟؟؟؟

وشكرا

[SEATLOVER]

لا تعالا بالعربية يا good بس قولى هاتيجى صحراوى ولا زراعى .. وياريت يبقى زراعى .. وانا هاقولك واحدة واحدة

[Hossam_Hassan]

تعالى صحراوى، بعد بوابات القاهرة خد المحور باتجاه المهندسين، ماتنزلش ميدان لبنان و كمل فوق المحور، لما تلاقى نادى الزمالك على يمينك اخرج من اول فتحة يمين و امشى مع سور نادى الزمالك لشارع جامعة الدول العربية و خد اى U turn شمال و ارجع فى اتجاه كورنيش النيل - يعنى تخليك ماشى على اليمين - لغاية ما تلاقى مسرح البالون على يمينك و اخر المسرح تدخل يمين و تمشى 100 متر هتلاقى المركز على اليمين بعد اول تقاطع

لو جاى بالسوبر جيت، انزل الجيزة و خد تاكسى ب 5 جنيه، قوله السيرك القومى فى العجوزة لو معرفش المركز

[goodwave]

SEATLOVER

إذا كنت حاجي بالعربية فإن شاء الله حيكون صحراوي.

Hossam _ Hassan

أشكرك على الشرح المفصل بس للأسف انا ما أعرفش فين نادي المهندسين وفين المحور والمشكلة لو الطريق زحمة الصبح يبقى صعب جدا أقف كل شوية علشان أسأل :(

[Hossam_Hassan]

شكلك اهلاوى :d ، بقولك نادى الزمالك، عموما الطريق اللى وصفتهولك مفيهوش مجال للخطاء، اللهم من اول ما تدخل على المهندسين، بص المحور سهل جدا تطلعه من الصحراوى و انزل فى ميدان لبنان اخر المحور و اسأل هناك و خلى بالك اسهل انك تسأل عن السيرك القومى و هو جنب المركز علطول

[goodwave]

متشكر يا حسام باشا ..... بس يارب يكون الموضوع سهل وماتكونش بتضحك عليا زي "الليلة الكبيرة"...... دي وصفة سهلة.... دي وصفة هايلة :) :) :)

[Mosso]

لو جاي من ميدان لبنان متستناش لغاية لما تشوف النادي لان الفتحه قبل النادي
انت اول ما تنزل من ميدان لبنان امشي ناحية المهندسين و خد اول خارجه يمين هتدخل على شارع جامعة الدول خد منه اول ملف شمال و ارجع و هتلاقي كوبري هيعدي من فوقك
قبل ما الكوبري يعدي من فوقيك هتلاقي في يمين تحت شارع
و في الشارع ده في مطالع للكوبري ده
انت متطلعش ولا طلعه خليك ماشي لغاية لما هتلاقي يافطه فوقيك بتقول (امبابه\العجوزه )و هتلاقي مسرح البالون على يميك و النيل قدامك ادخل يمين و هتلاقي السيرك و بعديه على طول المركز

[Hossam_Hassan]

ما تقلقش، المركز قريب جدا من اخر المحور

[Mosso]

و ياريت الكلام ده يكون بدري عشان تلحق تسأل لو احتجت قبل الزحمه

[tutankhamoun]

نصيحة هامة ........... تعالى في السوبر جيت أسرع
أولا هيكون صعب عليك تسوق في القاهرة في الصباح الباكر حيث المرور متوقف تماما
ثانيا أنت عندك إمتحان ........... يعني مينفعش تضيع وقت في البحث و التحري و بعدين تحتاس علشان تلاقي مكان تركن فيه حيث أن الكرن في هذا المكان صعب جدا

ثالثا السوبر جيت أسرع و أسهل لك

هاتنزل الجيزة و دي أخر محطة السوبر جيت
و بعدين ممكن تركب ميكروباص كيت كات أو إمبابة كورنيش بخمسين قرشا لا غير
و ممكن تأخذ تاكسي بخمسة جنيهات مصرية لا غير و تنزل عند السيرك القومي و طبعا السيرك القومي هو نسخة مصغرة من السيرك المصري المفتوح ....... :D
و خلاص كدا ........................................... بلاش العربية

[Karim_Monir]

احمد باشا صباح الفل
انت بتتكلم في امتحان وفي يوم في وسط الاسبوع ورايح العجوزة يعني مفيش ركنة
خدها نصيحة من واحدة متحور في شوارع القاهرة
تاخد القطار تنزل محطة مصر تاخد تاكسي ب 5 ولا 7 جنية يوديك لحد هناك
وقولت القطر عشان تهرب من المحور ووقفتة وومكن لو في حادثة لا قدر االه تقف 3 او اربع ساعات عشان الطريق شغال فردة واحدة وكمان طريق اسكندرية في اخرة شغال فردة واحدة رايح جاي عشان بيعملو الطريق الحر وكلة مطبات يا تاخدها فوق ال 100 يا تخدها على 10 كم
نصيحة تعالي بالقطر
لو جيت بالعربية وده معناه انك تصلي الفجر وتنزل من بيتكم تقريبا بعد البوابات خد المحور اللي هو هاتلاقية طلعتة من اليمين وخليك ماشي علية على طول لحد ما تلاقي نفسك نزلت عند ميدان لبنان في المهندسين
اركن جنب نور سور نادي الزمالك في اكتر من ركنة وفي كذا سايس واقف
وخد تاكسي لغاية العجوزة عشان مفيش ركنة هناك ومتقعدش تسال
وانت راجع خد تاكسي لعربيتك على طول
البلد بقت الشوارع فيها في حالة مقرفة صدقني

[tutankhamoun]

نصيحة هامة ........... تعالى في السوبر جيت أسرع
أولا هيكون صعب عليك تسوق في القاهرة في الصباح الباكر حيث المرور متوقف تماما
ثانيا أنت عندك إمتحان ........... يعني مينفعش تضيع وقت في البحث و التحري و بعدين تحتاس علشان تلاقي مكان تركن فيه حيث أن الكرن في هذا المكان صعب جدا

ثالثا السوبر جيت أسرع و أسهل لك

هاتنزل الجيزة و دي أخر محطة السوبر جيت
و بعدين ممكن تركب ميكروباص كيت كات أو إمبابة كورنيش بخمسين قرشا لا غير
و ممكن تأخذ تاكسي بخمسة جنيهات مصرية لا غير و تنزل عند السيرك القومي و طبعا السيرك القومي هو نسخة مصغرة من السيرك المصري المفتوح ....... :D
و خلاص كدا ........................................... بلاش العربية

أنا مع رأي الأستاذ كريم منير في موضوع القطار
لذلك سأستبدل السوبر جيت ........... بالقطار ............ و الجيزة بمحطة مصر في رمسيس
و لكن ..................... لا تقود سيارتك برجليك و تيجي بيها القاهرة


بلاش ............. ما بلاش يا أم بدوي ...... عايزين نشوفوا البدرون ........... ما بلاش يا أم بدوي ............
و في الأخر أم بدوي هي اللي جابته لنفسها

[goodwave]

الاخين العزيزين توت عنخ امون وكيمو منير حبيب قلبي

اصدر مولانا الملك المبجل فرمان بعد إستشارة أهل الرأي والخبرة في القاهرة الزدحمة الخنقة بأنة غير مسموح النزول بالسيارة وبناء علية فسوف يتم (إن شاء الله) ركوب المواصلات وغالبا السوبر جيت نظرا لقعدتة المريحة والخدمة الطرية وكمان ممكن البطن تمشي من الخوف :( فيكون هناك Wc محترم أحسن من بتوع القطارات.

بس ما قولتوش يا حلوين.... حأعمل إية في المبيت؟؟؟ حبات في السوبر جيت ولا إية؟؟؟ شوفتو بقى ميزة العربية يعني لو إتزنقت كنت حنام فيها :( :( :(

دلوني يا أهل الخير

[MM_Mohsen]

بلاش ............. ما بلاش يا أم بدوي ...... عايزين نشوفوا البدرون ........... ما بلاش يا أم بدوي ............
و في الأخر أم بدوي هي اللي جابته لنفسها

ايو كدة يا توت اضحك كركر :D:D اوع تكشر ...و لو ان كلامك اخره البدرون !!! - يعنى برضه متشائم !! - Take it easy man مفيش حاجة تستاهل و كبر دماغكككككككككك :p:p:p

[Karim_Monir]

يا احمد خليك في القطر احسن عشان مفيش محور
انا خوفي عليك كلة يابني المحور
وانت موضحتش انك عندك بيات
حبيب قلبي بيتي مفتوحلك تنورني والله
واهو ندوقك حاجة مصري بدل البلطي بتاع البحر بتاعكم:p