إيه هو أطرف و أرخم موقف قابلوك و أنت بتسوق .. ؟!

[aratux]

كان عندي عربية بي ام E21 و أنا في الجامعة
المهم العربية و انا ماشي لاقيتها مالهاش علاقة بالدواسة بتاعة البنزين خالص
لاقيت سلك الأكسلراتير اتقطع و عايز اروح و كنت بالليل .
تعمل ايه يا واد يا حمد
تعمل ايه يا واد يا حمد
قمت جبت قماشة من الشنطة و قطعتها بالطول و ربطت بيها رفاس الأكسيلراتير و هويت الكابوت حاجة بسيطة و مسكت القماشة من طرفها التاني بأيدي وانا راكب
اشد ......... العربية تجري :d
ارخي .............العربية تهدى :(

و انا ماشي كنت حاسس اني راكب حصان ...حمار ... حاجة دواب يعني:)

و من هنا ظهر مصطلح
تيجى نشد بالعربية يا كابتن ؟؟؟

[EslaM_NagY]

رغم ان الموضوع قديم

الا انى فطسسسسسسسسسسسسسسسسسسسسسسسسان من هنا لبكرة من الضحك

مسخررررررررررررة والله

[Ahmed Sharaf]

انا بجد هايجرالي حاجه من كتر الضحك والله العظيم مش ممكن :D

انا حصللي موقفين الموقف الكوميدي او الكويس كان تالت مره اسوق فيها العربيه كان معايا والدي ركب جانبي وقاللي تعالى نجيب اخوك من الدرس المهم ركبت العربيه وكله تمام الحزام المرايات كل اجراءات الامن والسواقه المثاليه اخدتها واتوكلت على الله المشوار كله من الشارع اللي انا فيه لشارع تاني على بعد 10 دقائق مش اكتر المهم دخلت الشارع اللي فيه الدرس أخدت اخويا وراجعين الشارع فاضي تماما مافيش فيه غير عربيتين تلاته راكنين عادي واتساع الشارع لا بأس به ياخد اربع عربيات جنب بعض مفيش مشكله المهم انا ماشي باتمخطر وفجأه لقيت تاكسي ورايا فا انا قلت ابين لوالدي اد ايه انا محترم في السواقه وواد جينتل بقى وكده قمت مشاور للتاكسي يعدي من جنبي ووسعت ليه بس من الواضح اني وسعت زياده شويه التاكسي جه جنبي افتكرني عاوز اسأله على حاجه ولا ايه مش فاهم المهم لقيته جه جنبي وفضل ماشي فا انا طبعا مكنتش عامل اي استعداد لكده :p وفضلت اكلم الراجل واتفضل عادي انا بقولك عادي من جنبي وكده اتاريني كل ده عمال اسرح يمين ووالدي مش واخد باله لئنه مركز معايا وسواق التاكسي واخويا ورا شايف اني هاخبط بس مكسوف يقول ولا ايه مش عارف المهم فجأه لزقت في العربيه اللي واقفه ياعيني على اليمين ودمرت الدنيا عنده وعندي طبعا ووالدي لقيته على حجري بعد كده ومن خضتي كسرت شمال كنت هلبس في التاكسي بس الحمد لله هو بعد :D.....عارفين انا والله من ساعت الموقف ده بقيلي 8 سنين بسوق اه بس متعقد لسه وبخاف اكلم اي حد بعربيه جنبي وانا سايق لازم اقف الأول :(

الموقف التاني كان فيلم رعب .......مره كنت ماشي في امان الله المهم واحد صاحبي كان معايا ادالي كانز بيبسي افتحهالك يا رامي قلتله لا يا راجل عادي المهم جيت افتحها وقعت مني ويشاء القدر انها تتزحلق وتنام تحت دواسة الفرامل المهم ماجاش في بالي ابدا انها راحت المكان الخبيث ده المهم بفرمل لقيت في حاجه معاكسه معايا قلت لالالالالالالالالالالالالا ايه دااااااااااه مش هعرف افرمللللللل المهم طبعا جالي حاله صرع وقلت لأ انا لازم افرمل مع اني ماكنتش محتاج افرمل وقتها بس مش عارف ايه خلاني اعمل كده المهم دوست على دواسة الفرامل بعزم ما فيا لقيت العربيه فرملة الحمد لله بس حاجه فرقعة وحاسس ببلل غريب تحت :D طبعا الحمد لله ربنا كرم الكانز فرقعت لما دوست جامد على دواسة الفرامل خرمت الكانز.......اللي يضحك اكتر اني لما سمعت صوت الفرقعه دي قلت لصاحبي ايه يا عم ده ؟؟؟؟؟؟ قاللي ماتقلقش شكل السيرفو ضرب ولا حاجه :D الواحد زمان كان خياله واسع اوي :p

انت مش ممكن انا قريت كلامك وانا فى الشغل وقدامى عهيل منتظر وانا انفجرت فى الضحك و الراجل افتكرنى بضحك علية , وفييييين لما جبتة مكانى وشرحتلة انا بضحك على اية وقعدت اقولة مزايا نايل موتورز ولما الراجل قرى كلامك سخسخ على روحة من الضحك وقاللى انة حيروح يسجل فى المنتدى (cross Sell ) .

[EslaM_NagY]

انت مش ممكن انا قريت كلامك وانا فى الشغل وقدامى عهيل منتظر وانا انفجرت فى الضحك و الراجل افتكرنى بضحك علية , وفييييين لما جبتة مكانى وشرحتلة انا بضحك على اية وقعدت اقولة مزايا نايل موتورز ولما الراجل قرى كلامك سخسخ على روحة من الضحك وقاللى انة حيروح يسجل فى المنتدى (cross Sell ) .

هههههههههههههههههههههههههههههههههههههههههههههه

[AhMeD EzZ]

انا ليا موقفين زي الفل
اول موقف كنت بعلم واحد صاحبي السواقة في شارع فاضي بيعدي منة عربيات قليل اوي و واسع و في علي ناصيتة سمكري
كان معانا 3 اصحابنا قاعدين ورا
اول مرة قعدتة علي الدريكسيون و فهمتة دوس دبرياج للاخر و عشق الاول و شيل رجلك براحة و تنزل سنة بنزين
البيه راح دايس دبراياج و معشق و ساب رجلة علي الدبرياج و داس بنزين للاخر و شال رجلة مرة و احدة من ع الدبرياج
طبعا العربية طلعت حتة طلعة بتخميسة و كان في عربية اكسنت راكنة قدامنا و ستر ربنا اني شديت الهاند في اخر لحظة
بعديها طلعنا قدام شوية و كل دة انا نازل شتيمة فيه
قعد يقولي معلش طب مرة كمان و الكلام دة
قلت له ماشي يا سيدي
ركب و طلع كويس في الاول لحد ما مرة واحدة بدل ما يدوس فرامل داس بنزين و العربية تجري و دة ساب الدريكسيون و العربية تروح شمال و تيجي يمين و انا احاول اعدلها و القاعدين ورا يصوتو و انا اشد الهاند دة ينزلها اشدها تاني ينزلها و كل الي جي عليه بضحك هيستيري رحت انا و الله بدون مبالغة نزلت في دواسة العربية و رحت دايس فرامل بايدي
طبعا الناس الي كانت في الشارع و خصوصا السمكري الي في اول الشارع شايف عربية عمالة تجري و الناس تصوت و تحدف يمين و شمال قام جري طبعا يومها خدنا كم شتايم


الموقف التاني
كنت في مدينة الهايكستب الجديدة قدام اكوا بارك انا و اخويا بوصل ناس و راجع الساعة 12.30 طبعا الحتة دي كلها صحرا و رعب و مفيش نور
اخويا قعد يون علمني السواقة ،، سيبني اسوق
قلتلة تعالي المهم دة قعد و طلع تمام و ماشي كويس و مفيش حاجة جة في حتة مفيش نور خالص سمع صوت كلب بيعوي
لقيته راح ساب الدريكسيون خالص و داس بنزين جامد و العربية طلعت فوق الرصيف بقيت عجلتين بس ع الرصيف و الباقي علي الهوي
احاول انزلها مفيش الكاوتش بيلف ع الفاضي
طبعا كم الرعب الي انا كنت فيه لايوصف مفيش نور الساعة حوالي 1 و المدينة عبارة عن قطاعين و طريق طويل يفصل ما بينهم انا كنت في نص الطريق دة يعني مفيش اي سكن جنبي و الصحرا علي شمال و يميني و كلاب و لا ديابة عمالة تعوي
كنت خلاص بموت
لحد ما ربنا نجدني بعربية ناس بتشيل زبالة ساعدوني و نزلناها
بس بعد كدة حرمت اعلم حد السواقة

[DR.M]

مواقف مالهاش حل كلها
انا سنه 90 كان عندي 128 وكنت فرحان بيها لغايه لما جت في اشارة حمراء وراحت دواسه الفرامل اتكسرت بعد اول لمسه
ومكنش فيها هاند بريك

بارتيته المرور جالهم رعب لأني رحت تجاه الرصيف علشان اقف (بس سابوني لما عرفوا السبب)


المره التانيه كنت مسافر مع صديق ليلا وكله تمام ثم....الكاوتش عملها وكان يسلامته الأستبن في سابع نومه هو كمان
المهم صديقي اقترح اني ابقى بالعربيه وهو ياخد الكاوتش يصلحه .....المهم وهو راجع في ميكروباص الميكروباص نزله بعيد عني شوسه
راجع يزق الكاوتش و فرحان هههههههه لقينا الكاوتش جري ونزل مصرف صغير .........
كانت ليله سودة ....لغايه ما عرفنا نطلعه ونركب العجله

اخيرا كنت مره راجع من شاطىء النخيل(6 اكتوبر) ليلا وكان فيه شتاء فظيع المهم الكباري اللي في الدولي مظلمه
والدنيا سيول وراح سير الدينامو قاطع ......... زائد مؤشر البنزين كان يشير لعلامات بايخه
ربنا سترها الحمد لله

[DR.M]

مواقف مالهاش حل كلها
انا سنه 90 كان عندي 128 وكنت فرحان بيها لغايه لما جت في اشارة حمراء وراحت دواسه الفرامل اتكسرت بعد اول لمسه
ومكنش فيها هاند بريك

بارتيته المرور جالهم رعب لأني رحت تجاه الرصيف علشان اقف (بس سابوني لما عرفوا السبب)


المره التانيه كنت مسافر مع صديق ليلا وكله تمام ثم....الكاوتش عملها وكان يسلامته الأستبن في سابع نومه هو كمان
المهم صديقي اقترح اني ابقى بالعربيه وهو ياخد الكاوتش يصلحه .....المهم وهو راجع في ميكروباص الميكروباص نزله بعيد عني شوسه
راجع يزق الكاوتش و فرحان هههههههه لقينا الكاوتش جري ونزل مصرف صغير .........
كانت ليله سودة ....لغايه ما عرفنا نطلعه ونركب العجله

اخيرا كنت مره راجع من شاطىء النخيل(6 اكتوبر) ليلا وكان فيه شتاء فظيع المهم الكباري اللي في الدولي مظلمه
والدنيا سيول وراح سير الدينامو قاطع ......... زائد مؤشر البنزين كان يشير لعلامات بايخه
ربنا سترها الحمد لله

[eng.octooo]

انا اغرب موقف حصلى اول مرة كنت باتعلم السوقة كانت على عربيتا وكان ابن عمى بيعلمنى المهم بعد ما عرفت الاساسيات جربت فى يوم من الايام انى ازوغ من البيت واخرج خروجة بالعربية المهم خرجت و رحت عند مول زحمة والشارع ضيق والعربية بطلت وانا كل ما اشغلها تنط لقدام (كنت مدى الاول) بعدين العربيات كترت فنزلت من العربية وناديت على واحد قلتلة لو سمحت ممكن تعدى العربية انا لسة جديد فى السواقة والراجل طلع محترم وركن عربيتة قدامى وجة يدور لقا العربية نطت منة ولبست فى عربيتة (بس ما كانش فية خساير ) والمهم فتحنا الشارع وركنت العربية وفجاة لقيت الراجل بيقولى انا النهاردة كانت الحصة الثاثة فى مدرسة السواقة وواخد عربية اخويا قلتلة وانا كمان وواخد عربية ابويا المهم بعد ماممشى رحت منادى لسواق تاكسى من الموقف قلتلة سوقلى العربية لحد البيت وهديك ضعف الى بتاخدة فى المشوار وخد 10 جندى وروحت نمت ولا كان فية حاجة بس فى اليوم دة كا جسمى بيترعش وعرقان وو طبعا عارفين

[M_55]

أغرب موقف حصلي قبل ما أشتري العربية

كنت ناوية خلاص اني اشتري عربية وكنت ناوية علي ماروتي ، المهم قريت اعلان عن عربية ورحت عشان اتفرج عليها انا وجوزي وطبعا كنت لسة بتعلم السواقة في مدرسة .
اول مارحنا عند الراجل فتح الكبوت وتمام وراح مديني المفاتيح وقاللي جربي ، طبعا مش متوقع ان اتنين جايين يشتروا عربية مش بيعرفوا يسوقوا اصلا : ) .
المهم انا اخذت المفتاح وبكل ثقة دورت العربية وبدات اتحرك / الحمد لله مشيت وتمام ، هنا بقي بدأت أعرف ان في فرق بين السواقة في المدرسة والسواقة في الشارع طبعا مفيش اتجاهات خالص وكسرت علي تاكسي وراح شتمني وهوب العربية وقفت وانا باخذ يوترن ومش عارفة اعمل ايه ، لقيت واحد راح جه وزق العربية كأنها ورقة لغاية ماعدينا الناس اللي في الشارع وراح مدورها وقالي اتفضلي ... تانـــــــــــــي
رحت سوقتها شويه ووقفت علي جنب واتصلت بجوزي وقلتلو تعالوا خدوني علشان خايفة ابعد واعدي اليوترن واتأخر عليكم :)

الغريبة بقي ان صاحب العربية ساقها هوا من غير ما تقطع ولا تفصل ، وطبعا ماعرفش اي حاجة من اللي حصلت ( الحمد لله )

[Ashraf_Ashraf]

اطرف موقف وارخمه وانا طالب كنت متعرف على صديقه وكنا فى الشتا وكنت لسه بتعلم سواقه ويادوب اعرف مفتاح الكونتكت بالعافيه
المهم الدنيا يومها كانت مطره وانا سايق بسرعه وعاوز اورى الكل انى سواق ( وطبعا لو حد قالى بخ كان اغمن على ) فجاه وقفت قدامى مرسيدس ومن السرعه والمياه لبست فيها من وراه والصديقه لبست فى الازاز وغمى عليها من الخضه وانا نزلت لا عارف هشوف البنت ولا صاشوف عربيتى ولا صاحب المرسيدس كان كل همى البنت تكون بخير بس الحمد الله فاقت وركبتها تاكسى
كان يوم مسخره وبهدلها وخضه مالها اول ولا اخر بس لما بفتكره دلوقتى بقعد اضحك

[Ahmed Sharaf]

الموقف اللى هحكية دة مش عارف يضحك ولا يبكى ...
فى يوم كان صديق لية عايز يروح مشوار للفيوم عند عمتة يزورها لانها كانت تعبانة وبالمرة يجيب كشاكيل وكراسات من المصنع بتاع جوزها , المهم رحنا وجاب اللى هو عاوزة ورحنا يزور خالتة , واذ بها تعبانة - كان عندها اللهم احفظنا سرطان - وطلع انها كانت حاجزة عند دكتور فى القاهرة .... قلتلة خليها تيجى معانا وهاوصلكم ( كان ايامها معايا عربية فيات 128 ) وعلشان نلحق ميعاد الدكتور كنت طاير فى الطريق وربنا كان ساترها معانا لغاية ما وصلنا عند الموبرى اللى قدام مستشفى حميات إمبابة وانا طالع الكوبرى بسرعة وقدامى عربية ماشية فى منتصف الكوبرى , بطلع من شمالة اقوم الاقى ايييييية ...
عربية بردة فيات 128 رااااجع بظهرة غبى الكوبرى و طاااااااااخ
لبسنا فى بعض .... عربيتة بقت 127 ..... مابقاش فية شنطة
وانا بقى حصل الآتى
1- العربية بقت 127 من الامام كل أغلب اللى فى الكبوت كان فى الشارع وطبعا البطارية قبل ما تنفد بجلدها كان لازم تسيب زكرى .... العربية ولعت من عند الماتور.
2- الدريكسيون اتعوج ودخل فى صدرى كانى عاوز يقولى واحشنى يا مضروب وراح واخدنى بالحضن.
3- النظارة اتكسرت

طبعا قلت لصاحبى الحق انت ودى خالتك المستشفى وانا هاشوف حد يسحب العربية وبالمرة يسحبنى انا كمان .

النتيجة:- قعدت نايم على ظهرى فى البيت متحركش اسبوعين , والمحروسة العربية اتكلفت 6 الاف جنية علشان ترجع طبيعية.

الحمد لله العربية اتصلحت وانا كمان اتصلحت .

بعدها باسبووووووع

واحد صاحبى عايز يشترى حاجة من وسط البلد يوم الجمعة ( يعنى ما بحرمش من مشاوير اصحابى ) واحنا ماشيين فى امان الله فى باب اللوق عند اشارة قبل مبنى للداخلية وداخل على الاشارة بالراحة العسكرى شاورلى اعدى ....
وعينك ما تشوف الا الضلمة .... عربية بوكس بتاعه شرطة العسكرى طاير فى التقاطع والبية كان مشغول بالكبريت اللى بيولع بية سيجارتة و طااااااااااخ دبببببببب
راح داخل فى العربية من الجنب ... طبعا الجنب بتاعى وآةةةةةةةةة يا جنبى وجنب العربية
القايم - البابين - العتب - الرفرف اللى قدام والاكصدام و الفانوس و و و و و و
فجأة لقيت كمية عساكر برشاشات وضباط اتلموا حوالينا
ولقيت ضابط جة وقالى انت كويس .... قولتلة اللى تشوفة يا باشا
فاللى عاوز تعمل محضر ولا نصلحهالك!!!!!!!!!!
قولتلة طبعا تصلحوها .. قالة طيب وراح عمل كام مكالمة باللاسلكى وجة الظابط اللى المفروض البوكس دة تبعة وفاللى هاصلحهالك وانت عليك الدوكو قلتلى موافق ------ طبعا عرفت بعد كدى لية دة حصل انهم قالو يصلحوها ...
علشان العربية كانت ماشية يوم الجمعة من غير حاجة كدة زى امر الشغل ( يعنى المفروض انها كانت اجازة _ واللى سايقها واحد قريب الظابط مش عسكرى ) والحمد لله اتصلحت لا و اية غيرولها البابين والرفرف علشان السمكرى قالهم ما ينفعوش يتسمكروا .
انا خت العربية وقلت دى ما تقعدش معايا تانى وبعتها والحمد للة ( بالمناسبة هو صاحبى راح فييييت ) سابنى وراح يشترى كوتشى من التوحيد و النور اللى جنب مكان الحادثة

بعت العربية والحمد لله لواحد صديق صديقى

عرافين بعد سنة قابلت بالصدفة الراجل اللى اشترى منى العربية بقولة اخيار العربية اية معاك

قاللى: بعناها بعد ما اخويا عمل بيها حادثة ودخل بيها قى شجرة - اخوة كان بيتعلم السواقة - واخو قعد سنة ماشى بعكازين.
كفاية كدة بقى ( تفتكروا العيب فيا ولا فى العربية ولا صاحبى ) اتصلوا على 0128 واللى يقول الحل لة جايزة