كنت شغال ايه قبل كده

[Ahmed_Elkhateb]

موضوع حلو اوووووووى

انا اشتغلت صبى فى ورشة ازاز من اولى اعدادى لحد الثانوى اتعلمة الصناعه ولما دخلت الجمعه فتحت محل انا وواحد صحبى
وبعد كده سبتو لصحبى
خالص واشتغلت فى شركة سياحة محاسب وبعد كده فى قسم الحجوزات والحمد لله حاليا مدير فرع

[abd_el_7amid]

وانا في اعدادي صبي بني
وبعدين صبي محاره
وبعدين في مصنع الاسمده بعبي شكاير سماد
بعد التخرج عامل بازار اروق وامسح
وبعدين بياع في محل عطور
حاليا مرشد سياحي (خريج اثار) وكان نفسي اعمل شركه وكنت علي وشك لكن جت الثوره
حاليا بعد الثوره ربة بيت بساعد المدام ومعرفش ايه مصيري

ما تقلقش عليك بالدعاء... و فى السماء رزقكم و ما توعدون

[husseinsalah]

وانا فى ابتدائى كنت بشتغل فى الغيطان بالومية
وفى اعدادى صبى نجار مسلح وصبى بنى وفى المعمار
فى ثانوى عامل فى مطعم ثم كشير فى نفس المطعم ثم كشير فى محل احذية ثم عامل فى ورشة تفكيك ماكينات خردة
حاليا مهندس بشركة بتروجت

[aminibrahim]

ما تقلقش عليك بالدعاء... و فى السماء رزقكم و ما توعدون

ونعم بالله

[Abdallah]

والله فكرتنى باللذى مضى يا اخى

من سن ال 8 سنوات كانت بنزل مع والدى فى بيزنس العطار وكنت بقعد على البنك وبعد كدة جالى حساسية ومبقتش اقدر اتعامل فى المجال دة مع ان اصل العيلة كلها فيه هو وتجارة الأسمنت والأراضى
اشتغلت وانا عندى 10 سنوات فى مصنع ملابس جاهزة
وسنى 14 سنة اشتغلت فى مصنع عربيات ووصلت فيه لحد ما بقيت مقصدار !!
16 سنة مسكت شغل لوالدى فى مجال الأسمنت وفى الاخر اقنعته ان فلوسها حرام وصفى اعماله فيها هههههههههههههه
18 سنة حصل مشاكل بينى وبين والدى وخرجت اتعارك مع الحياة واشتغلت فى سايبر وبعد كدة اشتريته
بعد كدة اشتغلت فى مجال المبيعات والتوزيع لقطع غيار الكمبيوتر وحاليا اعمل كمدير فرع السويس بشركة الأمير للتجارة والتوكيلات اهم موزعى بروكتر وجامبل مصر
كلمة اخيرة عمر الشغل ما كان عيب لأنه فى الاخر هو من يصنع الرجال حتى لو كنت ابن مليونير

[mr_vampire]

الله ينور والله ياشباب مصر. عشان اللي بيشكك في قدرات شباب مصر وبيقول بيتدلعو وعايزين يشتغلو مديرين ييجي يشوف الشباب عامل ازاي.

[abd_el_7amid]

فعلا عمر الشغل ماكان عيب ... حتى لو بتلم زبالة... حتى لو كنت ابن مليونير

[aif]

اشتغلت موظف مالوش لازمة في مطابع السكة الحديد
واشتغلت مساعد مهندس في موقع التحرير لخط مترو الانفاق الاول سنة 1984
واشتغلت مشرف بنسيون في وسط البلد 1985
وكنت بشتغل شبه سمسار وانا في الجيش عشان اجيب مصاريفي 1986
محاسب قاوني تحت التمرين 3 سنوات ... شبه ببلاش
محاسب في شركة استشارات هندسية 1990
رئيس حسابات في مصنع ملابس بالمنطقة الحرة
محاسب بالسعودية 1992
مدير محطة بنزين
مدير مالي بشركة الملابس بتاعت المنظقة الحرة .... تاني
مدير مالي بشركة الاستشارات الهندسية اياها .... تاني
صاحب مكتب محاسبة حاليا
....
يا نهار ابيض ... ده انا تعبت م الكتابة بس

[yasserelsayad]

يااااااااااااااه...
اشتغلت ايه قبل كده .. منذ صغرك وحتى وظيفتك الحالية
يمكن حد يستفيد من خبرة حد
ونتعرف على بعضنا اكثر
على العموم
انا اشتغلت قبل التخرج
1- مندوب مبيعات ملابس
2- عامل فى شركة شيبسى باليومية
3- وقفت فى محل علافة
4-وقفت فى محل سباكة وادوات منزلية
5-وقفت فى محل ادوات رياضية
6-مندوب مبيعات ( الحاجات اللى ب 10 جنيه )
7-بائع عطور بارض معارض جامعة القاهرة اثناء الدراسة
بعد التخرج من كلية علوم
8- رسم خرائط تجارية من المواقع بالقاهرة
9-مندوب مبيعات سمعات اذن لضعاف السمع
10-مندوب مبيعات مستلزمات معامل التحاليل
11-وقفت فى محل ورقيات وبلاستيك (محل الحاج)
12-اخيرا اشتغلت فى مجالى ( جيولوجى فى حفر ابار البترول )

مين اللى بعدى؟؟؟؟

والله يا باشا انا ارفعلك القبعة
دا انا طلعت مرفه جدا ومدلل وللاسف ضيعت شبابى فى تفاهة

[زينة الله]

ما شاء الله على الرجالة اللى من سن الطفولة بيشتغلوا و مابيتكبروش على أى شغل حلال

لكم كل أحترام و إجلال و تقدير

عايزة أفرج الموضوع لأخواتى الصغار عشان يشوفوا الرجالة الصح والقدوة ويتعلموا منكم

ربنا يبارك فيكم و يكتر من أمثالكم

[abumoh2000]

اول شغلانه كنت فى تالته ابتدائى كنت بنظف القطن
وكانت ب 125 قرش فى اليوم بعد شهر ونص شغل يبقى معايا مبلغ محترم اروش بيه العجله بتاعتى جرس وزينه ودلع
وبعدين وانا فى رابعه ابتدائى كنت بخلع البصل وانضفه ودى كانت اليوم ب 3 جنيه برده بعد شهرين شغل يبقى معايا ثروه تصرف على المصايف اليوم الواحد فى اسكندريه واخواتها
فى اعدادى كنت بنجمع البرقوق من الجناين نطلع على الشجر زى القرود ودى كانت ب5 جنيه فى اليوم وبعد نهايه الموسم ننزل مصر نجيب الجينز التركى والتيشرتات الكالفن كلاين
وفى ثانوى اشتغلت فى العتبه فى محلات اخشاب ودى بفلوسها كنت بنزل اجيب لبس من 26 يوليو (كبرنا بقى )
فى الجامعه اشتغلت فى شركه تعبئه سكر عامل عادى وبعدين اشتغلت فى مكتبه فى الفجاله وبالفلوس دى كنت باخد كورسات (اصلها غليه اوى)
وفى سنه 6 طب اشتغلت فى عياده فى مدينه الانتاج الاعلامى
وفى امتياز اشتغلت شفتات فى مستشفيات كتير فى شبرا والوايلى والهرم وفيصل و دى كان الشفت كامل 24 ساعه ب45 جنيه ههههههههه
وبعدين اشتغلت نائب فى مستشفى الجامعه وبعدين معيد وحاليا مدرس مساعد فى كليه طب بنها وكمان بدى كورسات
والله ايام جميله برغم قسوتها بتخليك راجل

[casperinoo]

ماشاء الله شيء يفرح يارجالة نايل موتورز ...
احنا عيال بالنسبه ليكوا ..
انا اشتغلت في صيدليه وانا في الكليه ..
دلوقتي طبيب اسنان في وزارة الصحه بالاضافه للعمل بالمستوصفات ليلا

[abo_anas]

ايييييييييييييييه
فكرتنى برحله كفاح
وانا طفل عندى 10 سنين كنت بشتغل عند خالى فى ورشه لتصنيع الاحذيه . وكانت ظروفنا الماديه وقتها كويسه وكنت كل اجازه اروح على الورشه على طول. وانا وحيد على 3 بنات انا اصغرهم
والدى رحمه الله عليه مر بضائقه ماليه وانا فى تانيه اعدادى وسافر الى ليبيا وترك لى الحمل وانا فى هذا السن وخلصت الاعدادى وجبت مجموع كبير يدخلنى ثانوى عام ولكن الظروف لاتسمح حيث ثانوى عام يعنى دروس خصوصيه بالشىء الفولانى وبعدها جامعه ومصاريف ولبس ، توكلت على الله ودخلت صنايع وكنت اخرج من المدرسه اروح اتغدى واطلع على الورشه اشتغل بضمير واقبض الجمعه ادى لأمى مصروف البيت واصرف الباقى .ووصل بى الاصرار والتوكل على الرزاق الى اننى فى سنه 3 دبلوم والله العظيم كنت بشتغل من الساعه 11 صباحا الى تانى يوم 6 الصبح واروح اصلى الفجر واغير هدومى واطلع على المدرسه . وخلصت الدبلوم وجبت مجموع كبير 90% .

باختصار للباقى : ركزت فى الشغل جدا واجتهدت وساعدت امى فى مصاريف البيت وفى جهاز اخواتى البنات واحده بعد الاخرى وكل هذا وانا صنايعى فى ورشه خالى كنت بشتغل من 11 صباحا الى بعد الفجر متواصل بدون اجازات علشان اساعد ظروفنا وابى رحمه الله عليه اكثر من 10 سنوات فى الغربه لايرسل فلوس والاتصال معدوم بيننا وبينه.
الحمد لله اخواتى تزوجن . وانا تزوجت وفتحت ورشه احذيه فى 12 يناير 2001 وهو نفس يوم ولاده ابنتى الاولى سلمى
اجتهدت وفتح الله على ورزقنى من حيث لا احتسب واديت فريضه الحج وبفضل الله على مداوم على العمره كل عام من 2006 واخر عمره 4/2011 نويتها لابى رحمه الله عليه.

وها أنا اكتب بين يديكم الان بفضل الله صاحب اكبر ورشه احذيه فى بنها ، وقريبا سيكون مصنع بأذن الله

اخيرا اسف لو كنت خرجت بره الموضوع شويه ولكن يجب ان نتعلم من حياه الاخرين مانستفاد به فى حياتنا

اخوكم محمد عبده 35 سنه

[د.أحمد السعيد]

اول شغلانه كنت فى تالته ابتدائى كنت بنظف القطن
وكانت ب 125 قرش فى اليوم بعد شهر ونص شغل يبقى معايا مبلغ محترم اروش بيه العجله بتاعتى جرس وزينه ودلع
وبعدين وانا فى رابعه ابتدائى كنت بخلع البصل وانضفه ودى كانت اليوم ب 3 جنيه برده بعد شهرين شغل يبقى معايا ثروه تصرف على المصايف اليوم الواحد فى اسكندريه واخواتها
فى اعدادى كنت بنجمع البرقوق من الجناين نطلع على الشجر زى القرود ودى كانت ب5 جنيه فى اليوم وبعد نهايه الموسم ننزل مصر نجيب الجينز التركى والتيشرتات الكالفن كلاين
وفى ثانوى اشتغلت فى العتبه فى محلات اخشاب ودى بفلوسها كنت بنزل اجيب لبس من 26 يوليو (كبرنا بقى )
فى الجامعه اشتغلت فى شركه تعبئه سكر عامل عادى وبعدين اشتغلت فى مكتبه فى الفجاله وبالفلوس دى كنت باخد كورسات (اصلها غليه اوى)
وفى سنه 6 طب اشتغلت فى عياده فى مدينه الانتاج الاعلامى
وفى امتياز اشتغلت شفتات فى مستشفيات كتير فى شبرا والوايلى والهرم وفيصل و دى كان الشفت كامل 24 ساعه ب45 جنيه ههههههههه
وبعدين اشتغلت نائب فى مستشفى الجامعه وبعدين معيد وحاليا مدرس مساعد فى كليه طب بنها وكمان بدى كورسات
والله ايام جميله برغم قسوتها بتخليك راجل

تحياتى لحضرتك

و فعلا الاجتهاد عادة و ليس صدفة !!

و احيى اخوتى الاعزاء على الصراحة التى تحمل فى طياتها كثير من معانى الرجولة و الاصالة و التربية الجيدة

و عدم التكبر و التعالى و الشعور بالأشمئزاز من المهن السابقة


و كم كنت اتمنى ان اشتغل اثناء الدراسة و لكن اهلى منعونى من ذلك

و اعمل حاليا طبيب أطفال بمستشفى حميات و ايضا استشارى دولى فى الرضاعة الطبيعية و الحمد لله

و الله انا فى قمة الانبساط من الموضوع دا

و تحية و تقدير لصاحب الموضوع

[aif]

ايييييييييييييييه
فكرتنى برحله كفاح
وانا طفل عندى 10 سنين كنت بشتغل عند خالى فى ورشه لتصنيع الاحذيه . وكانت ظروفنا الماديه وقتها كويسه وكنت كل اجازه اروح على الورشه على طول. وانا وحيد على 3 بنات انا اصغرهم
والدى رحمه الله عليه مر بضائقه ماليه وانا فى تانيه اعدادى وسافر الى ليبيا وترك لى الحمل وانا فى هذا السن وخلصت الاعدادى وجبت مجموع كبير يدخلنى ثانوى عام ولكن الظروف لاتسمح حيث ثانوى عام يعنى دروس خصوصيه بالشىء الفولانى وبعدها جامعه ومصاريف ولبس ، توكلت على الله ودخلت صنايع وكنت اخرج من المدرسه اروح اتغدى واطلع على الورشه اشتغل بضمير واقبض الجمعه ادى لأمى مصروف البيت واصرف الباقى .ووصل بى الاصرار والتوكل على الرزاق الى اننى فى سنه 3 دبلوم والله العظيم كنت بشتغل من الساعه 11 صباحا الى تانى يوم 6 الصبح واروح اصلى الفجر واغير هدومى واطلع على المدرسه . وخلصت الدبلوم وجبت مجموع كبير 90% .

باختصار للباقى : ركزت فى الشغل جدا واجتهدت وساعدت امى فى مصاريف البيت وفى جهاز اخواتى البنات وكانت هى الاخرى تعمل عمل شريف من اجل المعيشه واحده بعد الاخرى وكل هذا وانا صنايعى فى ورشه خالى كنت بشتغل من 11 صباحا الى بعد الفجر متواصل بدون اجازات علشان اساعد ظروفنا وابى رحمه الله عليه اكثر من 10 سنوات فى الغربه لايرسل فلوس والاتصال معدوم بيننا وبينه.
الحمد لله اخواتى تزوجن . وانا تزوجت وفتحت ورشه احذيه فى 12 يناير 2001 وهو نفس يوم ولاده ابنتى الاولى سلمى
اجتهدت وفتح الله على ورزقنى من حيث لا احتسب فأرحت امى من العمل واديت فريضه الحج وبفضل الله على مداوم على العمره كل عام من 2006 واخر عمره 4/2011 نويتها لابى رحمه الله عليه.

وها أنا اكتب بين يديكم الان بفضل الله صاحب اكبر ورشه احذيه فى بنها ، وقريبا سيكون مصنع بأذن الله

اخيرا اسف لو كنت خرجت بره الموضوع شويه ولكن يجب ان نتعلم من حياه الاخرين مانستفاد به فى حياتنا

اخوكم محمد عبده 35 سنه

ربنا يباركلك ويزيدك ويديم عليك برك لوالديك