يا جماعه...راس البر بتضيع

[talent]

تخيلوا ..انا دايما كنت بعدى جنب مصنع سماد طلخا وانا رايح المنصوره او القاهره وبشوف البلاوى اللى بتحصل هناك السما مغيمه فى عز الحر والارض الزراعيه ضايعه والترعه اللى جنب المصنع بتدخن.. ايوه والله بتدخن بتطلع بخار من النشادر اللى فيها والناس هناك كلها مصابه بامراض خطيره ... والاخوه اللى من المنصوره ياكوا الكلام ده..يعنى كل ده هيحصل عندنا فى دمياط ..
..mokhtar..

انا يا جماعه من المنصوره هو المصنع فى طلخا بس عمرى ما روحت هناك عند المصنع
حتى لما اجى اصطاد يقولولى روح عند الميه السخنه و الميه دى عند المصنع
و انا بسمع عن المصنع ده بلاوى مفيش سنه تعدى من غير ضحايا و خاصه العاملين بالمصنع

[alaa_dash]

انا اللي عاجبني قوي موقف محافظ دمياط..الراجل هدد بالاستقالة غير الخبر بتاع الجمهورية النهاردة:

علمت "الجمهورية" أنه تقرر إلغاء احتفالات العيد القومي لمحافظة دمياط يوم 9 مايو المقبل احتجاجا علي موقف الحكومة بشأن السماح بإقامة مصنع أجريوم علي أرض دمياط وعدم العدول عن موقفها حتي الآن وإعلان هذا اليوم حدادا عاما في دمياط

المهم ..الراجل ده واقف كده لانه ديه مصلحة الناس .ولا .. الله اعلم

[mokhtar]

محافظ دمياط الشهاده لله الراجل ده محترم من يوم مامسك البلد وهو بيخدمها كانها بلده هو اللى عمل الطفره الكبيره فى راس البر وكوبرى دمياط على النيل اتعمل فى عهده فى اقل من سنه بضمانه هو
ووقف وقفه راجل فى الموضوع بتاع مصنع السماد بالرغم من ان اتقال كلام انهم هيمشوه عشان واقف فى سكتهم الا ان تغيير المحافظين اسفر عن بقاؤه فى موقعه وان شاء الله هنفضل وراه لما نغورهم
ةعلى فكره احمد المسلمانى برضه موقفه كويس جدا بقاله ييجى اسبوعين ماسك الموضوع ده بايديه وسنانه ... ..انا اول مره اسمع عن وقف العمل بالمشروع ..على العموم الله يبارك فيكم ..
ويارب زيح الغمه دى عننا ..

..mokhtar..

[turboman]

المشكلة بقى اللي محدش عارفها...ان على بعد كيلو واحد من مكان المشروع..........فية ايه؟فيه فيل؟.لا طبعا فيه مصنع سماد تاني مملوك للحكومة.........يعني اشمعنى دلوقتي اهل دمياط خدتهم الحمية قوي؟كلمة مهمة انا كطبيب اشتغلت في دمياط.......و دلوقتي انا شغال في اقرب مستشفى لمصنع سماد طلخافي المنصورة.......و باكد ان مفيش اي مشاكل زيادة عن اي مكان تاني في مصر يعني الناس مش ماشية تهلل ولا حاجة و نسبة امراض التنفس و الامراض السرطانية زي اي مكان تاني.................اللي اتفرج على القاهرة اليوم امبارح يعرف مصر خسرت قد اية بسبب اغلاق هذا المصنع.....................حقائق مهمة1_المصنع واخد موافقة هذا المحافظ سنة 2004..........2_موافقة جهاز شئون البيئة............3_موافقة جهاز الحكم المحلي بدمياط...................سؤال بسيط..............يا اهل دمياط الكرام ...........اية الجديد اللي خلا المجلس المحلي يرفض هوا و المحافظ بعد ما سبق ووافقوا؟

[Adham_Sabry]

.اللي اتفرج على القاهرة اليوم امبارح يعرف مصر خسرت قد اية بسبب اغلاق هذا المصنع

اللي خسر البلد هو التخبيط اسف التخطيط الجيد بتاع الحكومه مش اللي بيحاول يتنفس هواء نظيف..

انا شغال في اقرب مستشفى لمصنع سماد طلخافي المنصورة.......و باكد ان مفيش اي مشاكل زيادة

اعرف ناس سكنين في المنصوره .. ابنهم عنده 5 سنوات وعنده مشاكل في التنفس وماشي بالكورتيزون .. وبعدين سافروا السعوديه .. الولد خف وبطل الدواء .. رجعوا المنصوره .. الولد تعب تاني ورجعوا للدواء تاني

سؤال : ايه اللي جاب الكنديه تعمل المصنع في مصر ؟؟
سؤال : ايه السبب ان معظم مصانع الأسمنت في دول اوروبا وامريكا اتقفلت .. وليه اشتروا مصانع الأسمنت في مصر والجزائر و الدول المتخلفه دي

السيناريو واضح .. المصانع دي ملوثه للبيئه ولا يوجد حل نهائي لتجنب اضرارها .. يبقي الحل دول اوروبا يقفلوا المصانع دي عندهم .. ويروحوا للدول المتخلفه (احنا يعني) اللي صحه الأنسان ليس لها قيمه .. ويمتلكوا المصانع دي .. ويحتكروا الأسعار ويزودها علينا
معادله سهله المصانع والبلاء عندنا ... والأنتاج ليهم علي نظيف

[turboman]

عزيزي الاستاذ ابو زايد .....انا قلت ان النسبة زي اي مكان تاني .........يعني في مرضى ايوة لكن مش بنسبة مبالغ فيها يعني صعب تربط بين الاثنين.........و بعدين امريكا و مصانعها فقط ليها اعلى نسبة تلوث و الدليل انهم لم يشتركوا في اتفاقية كيوتو لتنظيم الا نبعاثات الحرارية عموما انا قصدي ان اللي حصل فيه شي من المبالغة من ناس سبق ووافقت...........و في رايي ان الخاسر الوحيد هم اهل دمياط لان المصنع ده كان هيقدم كتير لدمياط لكن تقول لمين........محدش في بلدنا بيفكر............اللي معترض بلاش يقول كلام عشوائي يعني مثلا يحدد الاضرار اللي ممكن تحصل بكلام علمي مثبت و انا اضربله تعظيم سلام...........لكن احنا بلد بتجري ورا الاشاعات...............و زي ما انا بقول لحضرتك ان المصنع ده بجوارة مصنع حكومي للاسمدة برضة........اشمعنى دة...........؟المصنع المصري اسمة موبكو.للي عايز يتاكد............تقبل تحياتي

[mokhtar]

عزيزى turboman ...احنا الدمايطه اخدتنا الحميه قوى ..عشان العمليه لما توصل انها تهدد حياتنا ورزقنا وقوت عيالنا يبقى لازم تاخدنا الحميه......عشان لما راس البر تتخرب والمصيف اللى بدخل لدمياط مليارات كل سنه والناس عايشه عليه كل ده يضيع..لازم تاخدنا الحميه ..
عشان لما اقتصاد بلد يضرب ...والناس يجيلها امراض خبيثه ...لازم تاخدنا الحميه
انت بتقول ان اهل دمياط هم اللى هيضروا...احب اقولك ان مش المصنع ده اللى هيزودنا ولا ينقصنا الحمد لله دمياط مش محتاجاه ومعظم العاملين فيه بيبقوا من خارج دمياط
طمياط مش محافظه لقيطه..دمياط عندها اقتصاد عالى جدا ...محناش محافظه مالهاش لازمه
عندنا اكبر صناعه اثاث فى الشرق الاوسط
اكبر مصنع البان فى مصر
اكبر اسطول صيد فى مصر
ميناء دمياط ..وفيه اكبر محطه للحاويات فى الشرق الاوسط
بعد كل ده .....ماتقوليش ان احنا الى خسرانين
وعلى فكره كلامى مش عشوائى....بس ده كلام على لسان مليون ونص دمياطى
بالنسبه لمصنع طلخا الاخوه الاعزاء اهل المنصوره هم اللى هيردم مش انا الناس فى طلخا متبهدله وبالذات قريه ميت عنتر اللى بجوار المصنع

اللى قرأ جريده الاسبوع 19/4 هيعرف الحقيقه ودى جزء من المقال
26 دعوى قضائيه دوليه مقدمه من محامو دمياط ضد الشركه مستندين لخبراء البيئه بجامعه قناه السويس : الوضع البيئى فى المنطقه لا يحتمل ايه مشروعات والمصنع سينتج 2300 طن امونيا
يوميا مما يؤثر على التوازن البيئى والغازات المنبعثه من انتاج الامونيا تؤدى لاصابه اهلها بامراض خطيره ..واكد التقرير ان سمعه الشركه سيئه وصدر عده تقارير تؤكد اضرارهابالبيئه الكنديه عام 2005 بسبب الانبعاثات السامه لمصانعها التى زادت بنسبه 54% على عام 2004

منقول من جريده الاسبوع ..

الدليل على ان احنا مش بنهلفط ولا بنجرى ورا الاشاعات ..ان المصنع خلاص اتقفل ورئاسه الجمهوريه بعتت لمحافظ دمياط رساله تؤكد ايقاف العمل بالمصنع وجارى البحث عن مكان بديل والاقرب فى كفر الشيخ بشمال الدلتا بعيد عن العمران وعلى البحر المتوسط

..mokhtar..

[turboman]

اعتقد ان ردك اوفى رد و انا بحترم ردك ده جدا لانة فية ادله علميه و في رايي المتواضع انه عندما يتكلم العلم يجب ان تسكت السلطة.....................بس في نقطه صغيرة................انا يا فندم مقلتش على حضرتك او غيرك انك بتهلفط..و اعتقد اني انتقدت ايوة لان رايي كان كدة .............و بالاضافة لكدة انا بقولك تاني انا دكتور في مستشفى طلخا اللي حضرتك بتقول عليها.....و لم الاحظ زيادة غير عادية في امراض الصدر او الاورام الخبيثة في منطقتنا..........ومش معنى اني اقول ان فيه خسارة لفرص عمل اني اقول ان دمياط محافظة لقيطة.......كل الناس عارفة ان دمياط محافظة غنية .......يا ريت بس من فضل حضرتك لما نبدي اراءنا تكون بهدوء علشان مش انت الوحيد اللي عصبي ممكن اي حد يتعصب بردة..............وانا امام راي العلم لا استطيع الا ان احترمه........مبروك يا سيدي ............و خف العصبية شوية يا ساكن باريس.........

[turboman]

ر............اللي معترض بلاش يقول كلام عشوائي يعني مثلا يحدد الاضرار اللي ممكن تحصل بكلام علمي مثبت و انا اضربله تعظيم سلام........

[turboman]

و انا اهو بضربلك تعظيم سلام

[mokhtar]

عزيزى نربومان:
اولا انا مش بتعصب ومن يوم مادخلت المنتدى ده مليش فى حوارات الشد والجذب والكلام ده وانا مش بعترض على كلامك امجرد الاعتراض دى وجهه نظرك وانت قولتها ..وده حقك..
وانا ليا وجهه نظرى ..وقولتها ..ودا حقى
اما موضوع العصبيه ده مليش فيه خالص لانى بحب المنتدى ده بكل اعضاؤه ...وانت باين عليك انسان محترم ومثقف ...ووجهه نظرى لما افسرها بشىء من التحيز لمدينتى اظن دى مافيهاش حاجه
...انا مش بقول كلام عشوائى بس فى نفس الوقت مقدرش اقول كلام علمى وبعترف بكده لان ده مش تخصصى بس ده الكلام الللى الكل بيقوله ومش قصدى الكل يعنى الشعب لا اقصد الصحافه والاعلام والهيئات الاستشاريه
..انا ماتهمتكش انك بتقول ان احنا بنهلفط والله انا بكلم كلام عام..
..وبالنسبه لموضوع ان دمياط هى الخسرانه انا برد بوجهه نظرى والكلام اللى انا قولته على دمياط
مش رد على انك قولت انها محافظه لقيطه...بالعكس ..انت مقولتشالكلام ده
بس انا برد واوضح الحقايق لناس كتير مش عارفاها وبالتالى مقصدكش انت...
من الواضح ان ردك معظمه تريقه ...بس مفيش اى مشاكل .....اكيد ده سوء تفاهم لان احنا منعرفش بعض فبالنسبه لى ماكانش فيه اى سوءنيه فى كلامى ..الله اعلم بالنسبه لك وده واضح من تريقتك
بالنسبه لتعظيم السلام.....الف شكر ..دى بجد مش تريقه

..بالمناسبه انا ساكن فى دمياط مش فى باريس..
..ودمياط نورت بوجودك فيها ودى برضه بجد مش تريقه ..

..mokhtar..

[turboman]

يا مختار باشا ماعاش اللي يتريق عليك ........والله العظيم ابدا ........انا فعلا بحترم التخصص و مدام فيه ناس علماء قالوا ان الموضوع هيضر يبقى انا لو عاندت ابقى بعاند عناد طفولي.......واعتقد ان كده الموضوع تم حسمه تماما......وفعلا انا بعترف تاني ان ردك كان رد شامل لجميع النقط اللي تساءلت عنها...........انا سالت هل الموضوع ضار ؟انت اجبت بالعلم.......لو عاندت ابقى غلطان..........سالت برضه ليه الناس معترضتش من الاول ؟وانت اجبت ان فيه قضايا مرفوعه على الشركة و من عددها <26>واضح انها بقالها فترة انا و الله كان الغرض اني اعترف اني غلطان.ليه انت اخدتها تربقة..اما باريس فانا بضحك معاك يا سيدي هو انا اللي من باريس ؟ما انا من المنصورة.........دى حتى احلى ايام شغلي كانت في دمياط......مرة اخرى تقبل تحياتي

[mokhtar]

ولا يهمك يا تيربو .. ولا كان حصل حاجه ..ده سوء تفاهم وعدى ..
سيبك من المو ضوع ده بقى ..احنا عايزين نتعرف ..عشان انت باين عليك بجد شخصيه محترمه
وبعدين دمياط والمنصوره جيران وولاد عم وانا لى اقارب فى المنصوره وبحبها جدا ونو رت دمياط وتنورها فى اى وقت

..mokhtar..

[turboman]

انت بتقول فيها؟دانا في دماغي فكرة كدة..ايه رايك ننظم انا و انت مقابلة في الدلتا لاعضاء المنتدى......اكيد في ناس كتير مش بتروح مقابلات مصر علشان المسافة........فكر و رد عليا

[mokhtar]

يا ريت يا تيربو بس اما اخلص من كابوس الامتحانات .....

..mokhtar..