عندي انترفيو بعد ساعة ونص ومش جيلي نوم

[رزق]

أيوه ده النهاردة

اتسحرت
صليت الفجر
قفلت الكمبيوتر على غير العادة
طفيت النور
هيأت الاوضة للنوم
ممدد
صوت عقرب الساعة مزعج .. تن تن تن تن يروح شوية ويرجع تن تن تن تن
قعدت اتقلب في السرير بتاع نص ساعة
قمت جبت دعاء ماقبل النوم وقريته برده على غير العادة
ربع ساعة عدت يمين شمال يمين شمال
جبت الادعية تاني وقعدت اقرا
مفيش
صوت عقرب الساعة مجنني
جبت الموبيل جمبي وجالي مزاج ادور على "شراء ساعة حائط "
شوية ورميته جمبي وكملت تغميض
ساعة كده وقمت شغلت حلقة كرتون يمكن الواحد عينه توجعه و يسقط
مفيش قمت طفيت الكمبيوتر تاني
يأس تام
فكرت اقوم أعمل شوية تدريبات رياضية
مكملتش الفكرة قلت فاكس مافياش حييل
ابص للساعة...داخلة على 7
وانا برده مأضييها تقلب في السرير
خلاص مبقتش طايق الساعة
قمت خلعت الساعة من الحيطة و شلْت البطارية ورميت الساعة عالمكتب بعد ماجبت اخري
رجعت
التكييف بارد سخنه شوية
شوية
التكييف سخن برضه شوية
فين وفين بصيت على ساعة الموبيل لقيتها 8 ونص
وانا لازم أنزل 10
خلاص مش حكمل

أهم حاجة إن المقابلة ماكانتش في دماغي اساسا
ولا شاغل بالي
مخي كان فاااااضي


الموضوع ده بيجييلي دايما لما يكون عندي حاجة اليوم اللي بعده
نازل اوصل حد نازل رايح مشوار مهم
لازم اليوم اللي قبليه معرفش أنام
وأفكر في إن اد إيه الساعة بتجري وإني حنام 5 ساعات بس
دلوقتي 4
نام بقى يابنييي
دلوقتي 3


حد يقدر ينصحني بحاجة بخصوص الموضوع ده؟
غير المخدرات مش طلبها نوم بحبوب

ومعلش طولت عليكم

[matrix_it]

نفس مشكلتك بالضبط بس ساعات مع التفكير بيبقى فيه توتر!!!!!!! و سبحان الله بحس براحة رهييبة اول ما اخلص المشوار

[world_of_kill]

بيبقي توتر وقلق داخلي يعني مش في دماغك الحوار اللي انت رايحو بس من كتر ما انت شاغلك مش بتعرف تنام لانك بيبقي عندك شغف مخليك مش مركز لان النوم بيحتاج صفاء ذهن و دا طبيعي انك ماتنمش :d

[mohmdomar]

نفس المشكلة معايا بس زيادة شوية زائد ان نومي خفيف جدا لو حد فتح عليا الباب وانا نايم بصحا وانا من طبعي اني بفكر كتير وبقلق

حد يشوفلنا حل

[Khaled Online]

الحل الوحيد في رأيي المتواضع هو تثبيت وقت النوم من ١٠ مساء كل ليلة
نخليها ١١ بالكتير ونقوم من النوم ٥ أو ٦ صباحا

الانتظام في تثبيت وقت النوم هو الحل الوحيد الفعال
أنا بعاني من عدم النوم كفاية من سنين والحل الوحيد معايا هو إني أنام بدري ومسهرش مهما حصل
وطبيعي لو يومك متعب لما تيجي ٩ بالليل كمان هتكون قتيل

وبلاش نوم بعد الشغل لأنه هيسهرك

[رزق]

شكرا ل كل الردود كويس إن الواحد يعرف إن في ناس تانية بتعاني زيه

الحل الوحيد في رأيي المتواضع هو تثبيت وقت النوم من 10 مساء كل ليلة
نخليها 11 بالكتير ونقوم من النوم 5 أو 6 صباحا

الانتظام في تثبيت وقت النوم هو الحل الوحيد الفعال
أنا بعاني من عدم النوم كفاية من سنين والحل الوحيد معايا هو إني أنام بدري ومسهرش مهما حصل
وطبيعي لو يومك متعب لما تيجي 9 بالليل كمان هتكون قتيل

وبلاش نوم بعد الشغل لأنه هيسهرك

كلامك زي الفل بس ماينفعش في رمضان
ياراجل ده أنت طول اليوم عطشان
معقول ساعتين بعد الفطار أنام لما بعد الفجر؟
ده الواحد ممكن يموت فيها دي

المشكلة إني في رمضان مقدرش أنام بعد المغرب عشان مضيعش دقيقة واحدة أقدر اشرب فيها مية
شفت الحرمان؟

فلو شغلك 6 يبقى تنام 4 عشان الادان 3:45

[Khaled Online]

كلامك زي الفل بس ماينفعش في رمضان
ياراجل ده أنت طول اليوم عطشان
معقول ساعتين بعد الفطار أنام لما بعد الفجر؟
ده الواحد ممكن يموت فيها دي

المشكلة إني في رمضان مقدرش أنام بعد المغرب عشان مضيعش دقيقة واحدة أقدر اشرب فيها مية
شفت الحرمان؟

فلو شغلك 6 يبقى تنام 4 عشان الادان 3:45

يا أستاذ رزق الكلام ده بعد رمضان طبعا
جوة رمضان الحل إن بعد صلاة التراويح تنام تصحى عالسحور تتسحر وتصلي الصبح وتنام تاني
ازاي بقى تنام وتصحى وبعديها تنام تاني لغاية ٧ أو ٨؟ الحل في كلمة واحدة: التعود

وربنا يقويك

[رزق]

طب ياريت لو حد عنده مخدر أو منوم مش ممنوع يبعته عشان الموضوع كده مش نافع
وبلاش الاعشاب عشان طلعت تعبانة
وبلاش حاجات زي بانادول night عشان شاحة في السوق

ولو في حاجة ممنوعة مش خطرة ممكن برده بس عالخاص

[MOUSTAFA_SAAD]

نفس مشكلتى

[د/أحمد ابراهيم]

الحل سهل باذن الله:

توضاء وصلى ركعتين ثم نام على السرير وقعد استغفر استغفر استغفر بدون اي تقكير في امور الدنيا واسأل الله الفرج من الهم والغم

[أحمد كمال]

طب ياريت لو حد عنده مخدر أو منوم مش ممنوع يبعته عشان الموضوع كده مش نافع
وبلاش الاعشاب عشان طلعت تعبانة
وبلاش حاجات زي بانادول night عشان شاحة في السوق

ولو في حاجة ممنوعة مش خطرة ممكن برده بس عالخاص

بانادول نايت موجود في صيدلية سيف .......

[رزق]

مش اللي جنبي (المنيل)

[love7amada]

انا كمان كده

[أحمد كمال]

مش اللي جنبي (المنيل)

خليه يجيبهولك من اي فرع تاني هييجي بعد يومين بس مش مشكلة :)

[رزق]

حاضر
إنت برده مصمم إنه ينفع؟
طب لو منيمنيش؟

وهل ليه ادمان physical ولا عادي؟