تختار أي تخصص في كلية الهندسة ؟

[Dr_Smart]

أخويا في اعدادي هندسة عين شمس

مالوش ميول محددة ( زي معظم الطلبة )

هو الحقيقة محتار يختار اي تخصص ... قلت ناخد رأيكم لأن في في نايل موتورز مهندسين وناس محترمة ومثقفة

اتمنى كل اللي عنده وجهة نظر في الموضوع ده مايبخلش علينا بيها وخاصة المهندسين يعني اكيد كل واحد بعد ماخرج لسوق العمل

عرف مميزات وعيوب معظم التخصصات سواء من تجربته او تجربة زمايله .

طبعا هنحط في الاعتبار لكل تخصص ( سهولة دراسته - مجال العمل متاح وبراتب كويس - الجيش - العمل خارج مصر - الخ )

وشكرا جزيلا لكل من سينفعنا برأيه .

[Hossam_Hassan]

يحول قناة السويس و يدخل بترول، اللتر ب 185 قرش

[freez]

بص يا باشا انا اختى فى تانيه هندسه
هو بيبقى حسب المجموع بتاعه فى اعدادى
بس احسن حاجه هندسة اجهزه طبيه ومش عارف دى موجوده فى عين شمس ولا لأ
واتصالات
بس دول بيبقو عايزين مجموع معين فى اعدادى
بعديهم عندك عماره وعلى فكره مستقبلها جميل بس خلى بالك عايزه شغل جاااامد جدا
ومصاريف زى ما يكون فى جامعة مصر :d
ومهم جدا مجموعه لان كل قسم وليه تنسيق
وغالبا الاقسام اللى هقولك عليها دى بتبقى فى المراكز الاولى
-اجهزه طبيه (وده مش عارف موجود فى عين شمس ولا لأ )
-هندسة اتصالات
-باور
-عماره
-مدنى
وهتلاقى فى الاخر
-انتاج
-ميكانيكا
طبعا انا مش ملم بكل الاقسام بس انا حبيت اوصلك اللى اعرفه
وعلى فكره لازم يكون ليه ميول حاول تسأله مثلا بيحب ماده معينه بيعرف يزاكرها اكتر من المواد التانيه او بيرسم كويس كده علشان يقدر يمشى كويس فى القسم اللى هيدخله وميكرهش دراسته لان هندسه دى ثانويه عامه تانى بس بشكل مختلف :d
ويارب اكون افدتك

[Dr_Smart]

الف شكر يا باشا على ردك ربنا يكرمك

[soundoffear]

ايوة انا مهندس كهرباء قوي جامعة عين شمس
طبعا قسم ممتاز
هبقي اتديك فكرة اكتر بس اما افضي شوية ان شاء الله
بس مبدئيا زي ما بقولك كدة كهربا

[Dr_Smart]

في انتظار التفاصيل يا بشمهندس

شكرا جزيلا

[yahyanaabil]

انا فى بكالوريوس كهربا باور جامعه الاسكندريه
انا حنصحك بكهربا باور ده لو عايز شغل انما لو عايز سهوله كهربا اتصالات مفيش اسهل منها
الكلام ده اعتمادا على هندسه اسكندريه هيه ديه الاقسام اللى بتلاقى شغل بسهوله وممكن تضم معاهم ميكانيا غير كده كله زى بعضه بس لو باظت معاه اوى يخش مدنى شغلهم كتير بس رواتبهم بتبقى اقل شويه من مهندسين الكهربا انا بتكلم على الحاله العامه

[ams]

أخويا في اعدادي هندسة عين شمس

مالوش ميول محددة ( زي معظم الطلبة )

انا فى تانيه ميكانيكا عين شمس
أولا : ربنا يعديه من اعدادى على خير
ثانيا : هكلمك على الاقسام من ناحية الدراسة و بترتيب تنسيقهم
كهرباء عاوزه واحد بيعرف او بيحب يذاكر كتير و خياله يبقى عالى
عماره عاوزه واحد فنان و مبدع "المفروض ده يبقى قسم فى فنون جميله" و بيشتغلو كتييييييييييير اوى
ميكانيكا عاوزه واحد بيفهم و يحب يشتغل بايده ودايما فى حاجه لازم تتسلم
مدنى قسم فى اللذيذ اسهل قسم و ده مش معناه انه سهل

لو عايز سهوله كهربا اتصالات مفيش اسهل منها

يا راجل ! انت بتتكلم جد !
ده عكسنا تماما اتصالات عاوزه واحد جامد جدا جدا

[Chicco]

أنا طبيب ....مدرس في كلية الطب !!!!
و أنا صغير كان نفسي أطلع مهندس كهربا أو إلكترونيات لأن المستقبل كله ليهم و مجال العمل خارج مصر متاح .....ربنا يوفق أخوك إن شاء الله

[noble911]

انا مهندس معماري دفعة 2002
انصحه بالحاسبات او الاتصالات قم الكهربا
دول اللي سوقهم ماشي اليومين دول و مش محتاجين معارف او كده لايجاد وظيفة الشاطر في اي تخصص من دول بيلاقي شغل

[mars3v]

مفيش غير ميكانيكا او ميكاترونيكس...بلاش مدنى و عماره و اجهزه طبيه

[thegoodhacker]

انا مهندس اتصالات من جامعة اسكندرية
بالنسبة لافضل قسم فكل الاقسام جيدة بس كل قسم ممكن بيحتاج ميول واهتمامات معينة ودي نبذة عن اهم وافضل الاقسام :

1-قسم اتصالات : قسم ممتاز و مستقبله كويس لان مهندس الاتصالات ممكن يشتغل في كتير من المجالات - مجال الاتصالات و مجال الاليكترونيات و ممكن الهندسة الطبية و ممكن يشتغل في التحكم الالي و ممكن يشتغل في مجال الكهربا الباوركمان ........ بس المشكلة ان القسم ده بيبقي فيه حفظ كتير جدا لكثير من البراهين والاثباتات و بيعتمد علي مواد الفيزياء والرياضيات بكافة انواعها

2- قسم الكهرباء الباور : قسم ممتاز برضه بس مفيهوش مجالات كتير بيبقي مهندس صيانة الات كهربية او مهندس وقاية للجهد العالي والمتوسط والمنخفض
والقسم ده من رايي اسهل في دراسته عن قسم الاتصالات لانه مفيهوش حفظ كتير بس بيحتاج فهم كويس اوي

3- قسم الحاسب الالي : قسم كويس بس المشكلة انه بيواجه منافسة شرسة من باقي خريجي الجامعات علشان بقي فيه خريجين كتير بيدرسوا كورسات البرمجة و الشبكات خصوصا عن طريق منح وزارة الاتصالات

3- قسم الهندسة المعمارية : قسم ممتاز و مطلوب جدا في دول الخليج بس مشكلته لازم يحتاج تخيل و ميول فنية من ناحية التصميمات المعمارية الخارجية و الداخلية و بيحتاج براعة في الرسم اليدوي وباستخدام الكمبيوتر

4- هندسة الميكانيكا باور : وهو قسم ممتاز يتعلق بكل ما يخص الماكينات بكافة اشكالها و محركات الاحتراق الداخلي و الاوناش و الكثير

5- الهندسة المدنية : قسم ممتاز بس يعيبه كثرة عدد الطلبة فيه - ولازم يكون الشخص لديه ميول ناحية البناء و المعمار و اعمال المقاولات

[engamrnour80]

السلام عليكم
اولا احب اقولك ربنا يوف اخو حضرتك
بعد كده الاقسام اللى حضرتك كاتبها
عمارة سهل و يمشىمع واحد عنده ميول رسم شوية
فرص العمل الى حدما كويسة
كهربا اقسام كتير بس احسنهم اتصالات و باور بس عاوز دمااغ و شغل كتيير على المكاتب و فرص العمل داخ مصر و خارجها كويسة جدا
ميكانيكا لو هو حابب هندسة بجد انا انصحة بالقسم ده هو صعب كتير فى الدراسة بس هيشبع ميوله الهندسية جدا
فرص العمل داخل مصر قليلة خارج مصر كتيييير
مدنى و ده تخصصى سهل جدا فى الدراسة و فرص عملة كتييير داخل و خارج مصر


و اى خدمة انا تحت امرك

[Islam_galal]

انا مهندس ميكانيكا قوي - اسكندرية
لو مش فارقة معاه أو مش حابب حاجة معينة و حتي لو حابب
كهرباء و يا حبذا حاسب آلي
ده اللي ليه شغل بقوة حاليا في مصر و بره مصر
يا فرحتي لو دخل قسم عاجبه و بعدين يشحت
و ممكن يحدد القسم علي حسب تخصصات الأقارب اللي يقدره يشغلوه براتب كويس
الشغل حاجة و الهواية حاجة تانيه

[mo7amed_omara]

ربنا يطمنك يا مهندس اسلام اصل انا مهندس ميكانيكا قوى حتخرج السنة دى اشاء الله
تبقى شغلنى معاك بقى متنساش اخووووك :)