تختار أي تخصص في كلية الهندسة ؟

[mo7amed_omara]

على فكرة انا فى جامعة اسكندرية

[yahyanaabil]

انا فى تانيه ميكانيكا عين شمس
أولا : ربنا يعديه من اعدادى على خير
ثانيا : هكلمك على الاقسام من ناحية الدراسة و بترتيب تنسيقهم
كهرباء عاوزه واحد بيعرف او بيحب يذاكر كتير و خياله يبقى عالى
عماره عاوزه واحد فنان و مبدع "المفروض ده يبقى قسم فى فنون جميله" و بيشتغلو كتييييييييييير اوى
ميكانيكا عاوزه واحد بيفهم و يحب يشتغل بايده ودايما فى حاجه لازم تتسلم
مدنى قسم فى اللذيذ اسهل قسم و ده مش معناه انه سهل



يا راجل ! انت بتتكلم جد !
ده عكسنا تماما اتصالات عاوزه واحد جامد جدا جدا

اتصالات قسم ممتاز جدا بس عايز واحد يكون بيعرف يحفظ كويس اوى وقسم اتصالات عندنا فى اسكندريه ناس كتير بتعرف تجيب فيه تقديرات لأنه يعتمد على الحفظ والدكاتره بتوع القسم ايديهم فرطه فى الدرجات عشان كده يعتبر اسهل من الباور
على فكره مدنى مش سهل بس برضه مش صعب لانه بالنسبه لقسم كهربا يعتبر سهل الى حد ما

[maka]

أخويا في اعدادي هندسة عين شمس

مالوش ميول محددة ( زي معظم الطلبة )

هو الحقيقة محتار يختار اي تخصص ... قلت ناخد رأيكم لأن في في نايل موتورز مهندسين وناس محترمة ومثقفة

اتمنى كل اللي عنده وجهة نظر في الموضوع ده مايبخلش علينا بيها وخاصة المهندسين يعني اكيد كل واحد بعد ماخرج لسوق العمل

عرف مميزات وعيوب معظم التخصصات سواء من تجربته او تجربة زمايله .

طبعا هنحط في الاعتبار لكل تخصص ( سهولة دراسته - مجال العمل متاح وبراتب كويس - الجيش - العمل خارج مصر - الخ )

وشكرا جزيلا لكل من سينفعنا برأيه .

السلام عليكم

انا فى هندسة القاهرة 3 باور

بص كل واحد هيقولك الراى اللى على هواه مش ده المهم المهم اخوك يحدد عاوز ايه

عاوز سهولة دراسة يبقى كيمياء وعمارة وبترول وفلزات وكده اضمنك انه هيريح دماغه

عاوز شغل كويس وفلوس يبقى ميكانيكا وباور ومدنى بس اضمنك انه مش هيريح دماغه

هيتبهدل صح فى الخمس سنين

العمل خارج مصر ده نصيب بس الطلب على ميكانيكا وباور وعمارة ومدنى

الجيش بيطلب معظم التخصصات ماعدا طبية وفلزات وطيران

عاوز واجهة واسم يبقى اتصالات وحاسبات بس الشغل مش كتيير وهيتعب على مايلقى

مش عاوز يشتغل خالص يبقى طيران:D:D

اهم حاجة لو هيخش ميكانيكا يكون كويس فى الرسم الهندسى ولو هيخش كهرباء يبقى

كويس فى الفيزياء والرياضة وياريت يخش الحاجة اللى ميال ليها لان الشغل ده بتاع ربنا

زى سامح فهمى خريج قسم كيمياء مش بترول وياريت يبعد تماما عن طبية وطيران

انا عارف انا هو متوتر اصل انا مرات بكل ده :D فى الاول خالص كانت فى كلية حاسبات

ومعلومات القاهرة معجبتنيش قاعدت اسبوع ورحت حولت هندسة بعد محولت اكتشفت ان

مواد الكمبيوتر بتاعت قسم حاسبات مش طيقها وحمدت ربنا كتيير ان انا حولت بعد كده

نجحت اعدادى وكانت فرحا بالمجموع فاخترت اتصالات ملقيتش نفسى فيها قعدت اسال

لحد مربنا هدانى دكتور طيب قالى عاوز تبقى مهندس صح عليك بباور او ميكانيكا هتفتح

دماغك وشاغلهم كتيير وبرده فضلت محتار بينهم لحد ما حولت باور :)

اهم حاجة هو ميال لمواد ايه وميبصش ابدا للمجموع ( ميكانيكا اقل مجموع ومع ذلك شغله نار)

ولو عاوز اى حاجة انا فى الخدمة ;)

[Ahmad Allawy]

هاقول لسعاتك حاجة ودي خلاصة الدراسة في الكلية دي..
بس انا خريج القاهرة مش عين شمي..
لو اخوك عنده ميول تصميمية.. يعني خياله واسع في العمارة و المباني و الكلام ده..
يبي يدخل عمارة.. القسم ده محتاج موهبة قبل اي حاجة.. يعني مش بالمجهود الجامد بس و المذاكرة هتبقي طالب متميز.. لازم موهبة.. و تزبطها بالمجهود و الشغل الكتير..
لو هو حابب الرياضيات و الالكترونيات.. يبقي يدخل كهربا.. بتتفرع لباور و اتصالات و كومبيوتر..
طبعا البرمجة هيتدرب عليها في اول سنة.. لو لقي انه حاببها و دايس فيها يبقي يدخل كومبيوتر.. لو رياضيات بقي و كده يبقي اتصالات او باور..ولو ان باور رياضياتها اقل شوية..
لو هو حابب ميكانيكا اعدادي.. يبقي يتوكل علي الله و يدخل ميكانيكا.. صعبة شوية.. بس كويسة..
الطبية كويسة جدا طبعا.. بس فرص شغلها قليلة شوية..و في منهم كتير بيشتغلوا برمجة و شغل كومبيوتر..

اما بالنسبة للمرتبات فطبعا ده موضوع ارزاق.. و كله بايد ربنا.. بس السوق بيقول ان مرتبات الكهربا اتصالات و كومبيوتر.. و باور.. و بعدها ييجي عمارة و بعدين ميكانيكا
بس الحمد لله علي كل حال.. ان حال المهندسين في مصر احسن من غيرهم بكتييييييييييييير..
و الحمد لله في شغل.. يعني مش هتقعد ف البيت.. بس متحطش موضوع المرتب ده في دماغك لما تيجي تشتغل اول شغلانتين ولا حاجة.. خد خبرتك و بعدين ابقي اطلب مرتب..
وربنا يوفق و يكرم ان شاء الله..

[karmouty918]

السلام عليكم
انا فى تانية مدنى (هندسة عين شمس) و اول حاجة احب اقول لحضرتك ان التخصص بيبقى على حسب المجموع وترتيب الاقسام كالاتى:
1-هندسة كهربية..(فى اول الجيد) و دة اعلى قسم من حيث التقدير
2-هندسة معمارية..(مقبول مرتفع)
3-هندسة ميكانيكية..(مقبول)
4-هندسة مدنية....(مقبول)
و اعذرنى لو مكنتش فاكر التقديرات بالارقام
اولا هو لازم يدخل قسم هو بيحبه و يكون مقتنع به مش بقول انو يكون بيعشقو بس على الاقل يكون شايف نفسة فيه.
لان بصراحة كلية الهندسة من اصعب الكليات فلو دخل حاجة هو مش حاببها هايمشى فيها بصعوبة و هايبقى قرفان طول مدة دراسته بالكلية .
(على فكرة الحيرة الى هو فيها دى عاديية جدا طبعا هو دلوقتى بيملى استمارة الرغبات و بنسبة 98% هايكتب كالاتى:
1-كهربا
2-ميكانيكا
3-عمارة
4-مدنى
انا مش عايز ابالغ و اقولك ان انا كل دفعتى كانت كاتبه الترتيب دة بما فيهم انا((كلنا كتبنا كهربا اول حاجة)
دة طبعا لان (هندسة الاتصالات -حاسبات) بقى ليها سوق عمل كبير جدا فى مصر مش زى زمان و مرتباتهم ممتازة
يعنى باختصار 98% من دفعة اعدادى بتفكر فى كهربا بس و بتكتب باقى ترتيب الاقسام اى حاجة كدة ودة بيكون بسبب انو مش قادر يفكر هو ممكن ينفع فى ايه غير كهربا نتيجة كثرة الامتحانات فى الفترة دى (شفوى و عملى و final حاجة تقرف)...
الى حصل معايا انى كنت كاتب نفس الترتيب الى فوق دة و بعدين جبت مجموع يدخلنى اى قسم ماعدا كهربا فبلتالى انا كدة هادخل ميكانيكا
و بعدين و انا فى اجازة الصيف قعدت افكر و لقيت نفسى كارة ميكانيكا جدااااااااا (((و غالبا هى دى الفترة الى اخو حضرتك هايفكر كويس هو عايز ايه))) .و بعد كدة لقيت نفسى حابب الانشاءات و التصميم جدا فقررت انى ادخل مدنى

يعنى الى عايز اقولة لحضرتك ان القرار اللى هايخدو اخوك دلوقتى مش هايكون القرار النهائى لان لسة فى فرصة انه يغير القسم ى العام الدراسى الجديد و اهم حاجه دلوقتى انه يركز فى مذاكرتة على شان يجيب مجموع يدخل بيه القسم الى هو عايزه.
و دى شوية معلومات عن الاقسام:
1-مدنى :مش سهل بس يعتبر اسهل قسم فى الكلية المشؤومة دى .سوق سوق العمل ملياااان فرص لمدنى و دول الخليج جعاااانة مهندسين مدنى
بالنسبة للمرتبات على حسب المهندس دة قدراتة اية (يعنى مثلا كان مرة دكتور بيتكلم معانه قال انا عندى فالمكتب مهندس بياخد 1000 جنية و مهندس تانى بياخد 3000 جنية )
2-كهربا :حلم شباب هندسة عين شمس و من احسن الاقسام فالكلية و شغلها موجود و مرتبات زى الفل
3-عمارة :بصراحة محدش بينفع فى القسم دة غير واحد عنده موهبه جمالية و تكون ايدة حلوة فى الرسم
4-ميكانيكا:بكرهاااا بس على العموم برضة قسم كويس و مرتبات كويسة

و فى النهاية مهما كان القسم اللى هايدخله قدراته كمهندس هى اللى هاتحدد هو هايشتغل ايه و بكام لما يتخرج و اتمنى لاخو حضرتك التوفيق.

[TAG_Turbo0]

بعيد عن الموجوع
هو ميوله ايه
لو مبيحبش المذاكرة ودماغة فى الرسم وتخيلة حلو يبأى عمارة
لو بيحب المكن والتروس والشحم والزيت يبأى ميكانيكا
لو بيحب شغل الكهربا الكترونيات يبأى كهربا
لو له فى المواقع العمال وبهدلة المبانى يباى مدنى

وانا عن نفسى هختار عمارة
مع انى متحفظ على حتة ان العمارة هندسة (العمارة كول عمرها فن)

[Dr_Smart]

الف شكر على ردودكم كلكم يا بشمهندسين

والله اخويا فرح أوي بكل الردود واستفاد من آرائكم في الموضوع ده

وربنا يوفق الجميع

[HISHAM80]

mechanical power engineer is the best department if he loves mechanic. it required alot of work but there is a great apportunities for that departments especially in power generation, oil & gas, air craft engines. I had experience in those fields so I can till you that the only draw back. he always work in tuff enviroment like desert fields alway awy from home for long period

[TaoTao]

عاوز يشتغل مهندس بجد وعنده فن وموهبة الإدارة (مهمة جدا هذه الموهبة) ومش مهم يقعد على مكتب .. هندسة مدنية
فنان موهوب رسم وإبداع وخيال واسع (بالإضافة للحس الهندسي) وبرضه هايشتغل مهندس بجد .. هندسة عمارة
ويس في الرياضيات والفيزياء الكهربية والحرارية والإنشاءات .. هندسة كهرباء فوى (وبرضه هايرضي ميوله الهندسية)
أستاذ فيزياء "خواص مادة وحرارية" ومتميز في الرسم الميكانيكي (ممكن يكتسب هذه المهارة بالتدريب الجيد) .. هندسة ميكانيكية
أستاذ رياضيات وفيزياء (كهربية وكهرومغناطيسية) وحس ابتكاري مرتفع .. هندسة كهربا اتصالات أو هندسة إلكترونيات أو هندسة حاسبات

قسم الميكاترونيكس جديد جدا وواعد جدا .. بس هايطلب مهارات هجين بين الالكترونيات والميكانيكا (آخر نقطتين فاتوا)

التميز في أي مجال هو اللي بيفتح للواحد فرص العمل بإذن الله، وإن شاء الله يكون أخوك من المتميزين وربنا يوفقه ويرشده للأنسب والأصلح لقدراته
في هندسة القاهرة كنا أخدنا محاضرة في آخر السنة عن الأقسام وكل قسم متطلباته ايه (أعطاها لنا اأستاذ الدكتور أمير بيومي رحمه الله رحمة واسعة) لو موجود زيها خليه يحضر ويشوف رأي الدكاترة ايه.

[Falcon.Crest]

i am petroleum engineer , but i hoped that i was communication

[محمد عز]

خليه يبعد عن مجال الاتصالات
لان المجال ده صعب الحصول فيه على فرصة عمل بسهولة
لكن لو اشتغل فى المجال اكيد هيبقى حاجة كويسة

المدنى ( خليه يدخل اشغال) طرق ونقل ومرور
انا مهندس طرق ونقل ومرور وفرصة العمل لمهندسي النقل والمرور فى دول العالم كلها عالية جدا وبالاخص دول الخليج
وبيقى ليه اولوية فى طلبات الهجرة
لان العالم كله بيواجه مشكلات النقل والمرور وبيحاول يتغلب عليه
لكن فى مصر انسي ياعمرو

الميكانيكا قسم جميل بس الدكاترة مش ظراف

الحقيقة هوا لازم يختار بنفسه

لكن نصيحة منى خليه يدخل قسم مدنى اشغال (طرق)

[SEATLOVER]

اية يا جماعة ...
الهندسة دى الوحيدة الكلية اللى مافيش فيها حاجة اسمها تدخل قسم عشان شغلة اكتر ...اللى بيعمل كدة الكلية بتمسك فية و مابترضاش تسيبة

لازم يكون هو فى دماغة هدف عايز يوصلة ...عشان كدة بيستحمل الاهوال اللى هايشوفها فى كل قسم

وما احترامى لكل الاراء اللى اتقالت
مفيش اى شغل متاح فى البلد الى لنوعين من الخريجين النابغة و اللى يعرف حد ..فقط لاغير و خلينا واقعيين

الكهرباء و الاتصالات والالكترونيات .... بتتساوى مع اى حد عندة شوية كورسات كمبيوتر وبقت لكل من هب ودب

انتاج وميكانيكا وسيارات .... ماحناش فى المانيا

المدنى .... يبقى يعمل حسابة انة يشتغل مقاولات وإلا ماتبقاش جايبة ربع همها

العمارة .... الكلام اللى اتقال عليها موهبة و بيحب الرسم والكلام دة ...كلام قديم جداً
العمارة دلوقتى فيها اكتر من خمس تخصصات ...مش شرط ابداً انة يكون عندة موهبة

واللى بيقول انها سهلة ...يبقى ماعداش على قسم عمارة و الناس سهرانة ومطبقة 3 ايام شغل متواصل ايام المشاريع و مشافش حرقة الدم والاعصاب اللى بتقابل كل تصميم ممكن يختلف علية اتنين بين اكثر مؤيد و اسوء معارض

العمارة ...احسن قسم حالياً والدليل انة فى التنسيق بيبقى بعد او قبل الحاسبات
بس لو مايعرفش حد فى المجال ...يبقى لازم يكون نابغة فيها

م/عمرو
مهندس معمارى

[Sherif Khalifa]

اهم حاجة هوا (بيحب اية)

و غاوى اية
يعنى مثلا" اتصلات و كومبيوتر من احسن الحاجات المطلوبة فى سوق العمل

(بس)

لازم يكون غاوى علشان لو مش غاوى (هيفشل) و لو خلص مش هيبئا مميز فى شغلة
و هيتخنئ بسرعة

معلش انا اتكلمت على المجال دة علشان دا تخصصى و بشوف الناس الى متخرجة من اتصلات و مكانوش غوينها

فعلا شىء مؤسف

[outosend]

طبعا هنحط في الاعتبار لكل تخصص ( سهولة دراسته - مجال العمل متاح وبراتب كويس - الجيش - العمل خارج مصر - الخ )

الكلام اللى فوق مش دقيق ياباشا ومش صح نبنى عليه مستقبل لان الطلب على قسم بعينه بيختلف من وقت لوقت يعنى دلوقتى مدنى عليه طلب جامد لو دخل مدنى علشان كده على مايتخرج هايكون السوق تشبع
الصح انه يشوف ايه القسم اللى حاسس انه هايبدع فيه ويكون متفوق كمجال عمل مش كدراسه كليه لو عنده الرغبه والحب ده للكمبيوتر مثلا او للمدنى يدخل اللى هو حابه حتى لو معندوش خلفيه لانه طالما بيحبه هايثبت نفسه ويشتغل ويتفوق
المكان فى السوق للراجل المتميز بغض النظر عن القسم ايه ده هو الضمان الوحيد انا مهندس كمبيوتر والحمد لله واخد كورسات كتير فلقيت مكان وليا زمايل لسه مش لاقيين علشان اهملو فى حق نفسهم ومااختاروش اللى يناسبهم بغض النظر عن المسميات
وربنا يوفقه ويفتح عليه ولاينسى صلاه الاستخاره وفى الاخر ماتقلقش عليه مافيش مهنس بيقعد بس لو مش عايزينه يبعد عنكو يبقى بلاش بترول :)

[Noha.M]

Kahraba power zay khateeby :-D howa khareeg ain shams brdo