محتاج نصيحه في جوازه

[dr.amr]

في موضوع مقلقني شويه يا اخواني وكنت عايز نصيحه فيه منكم

في واحد اعرفه متقدم لواحده قريبتي جواز صالونات عادي

هما بيسألوني عليه وانا مش عارف ارد

مره واحنا في الكليه اتهم في سرقه موبايل وجم المخبرين اخدوه من على القهوه وقالنا بعد كده انو

سوء تفاهم والله اعلم بقه

غير ان في زمايلي شاكين لما كان هوه في المدينه انو مرتبط بواقعات مشابه بس من غير دليل

غير كده هوه عادي بيس يعني معرفش بيصلي ولا لا بس هو بيدخن

مش عارف هل اقولهم علي موضوع السرقه والمخبر وكده والموضوع ده

ولا اعمل ايه ؟؟

ياريت تنصحوني

[Mshawky]

احسب مميزاته وعيوبه لان انت واضح انك تعرفه شويه وانصحها انها تاخد بالها جدا منه بس بدون قلق ولا شك لان برضه انت ممعكش دليل لتكون ظالمه وفى نفس الوقت تحرس ولا تخون

لكن لو عايز رايى الشخصى اللى انا لو مكانك هنفذه ملوش لازمه خالص حد بيدخن ومتعرفش عنه بيصلى ولالا وبعدين فى شبهات والله اعلم بها حقيقه ولالا فانا شايف ان الموضوع هيبوخ وهيحصل فيه مشاكل كتير والله اعلم

ولكن متنساش استخارة ربنا بجانب مشورة الناس هى افضل شيىء

[human]

ده صالونات يعنى مافيش قصه ورا الموضوع

بلاش

[wesam_salom]

قول اللى تعرفه
وسيب لهم التفكير والاختيار
بس دى شهاده ومسئوليه

[yoko]

قول وقولهم هو كلام بس الله أعلم صحته وسجاير وبتاع نصيحة ليها مني بلاش

[ENG\AHMED]

دى شهادة , ياتشهد شهادة حق يابلاش

[Mostafa.Mahran]

طالما الجواز صالونات يبقى نختار انسب و احسن الظروف
انما لو عن حب و ارتباط جامد يبقى ممكن يكون فى تنازلات بسيطة

وبما ان موضوعك جوز صالونات عادى يبقى بلاش لان مفيش دخان من غير نار و الى سمعته جايز جدا يكون فيه جزء من الحقيقة

[X_MM_X]

صراحه وضعك صعب ربنا يعينك

[mr_sameh]

انا اتحطيت في مواقف زي دي كتير وكل مره اقول اللي اعرفه عن الشخص ومساوئه وغالبا كانت تتم الجوازات وكنت بطلع غلطان حاول تقول اسئلو عليه لان معلوماتي عنه قليله

[أحمد كمال]

قول لهم ماعرفش و اخلع ...... لو قلت اللي انت قلته و الجوازة مشيت هيكرهوك للابد و يقولوا كان طمعان فيها و لا منفسن و لا بتاع

و لو قلت كويس و طلع مش كويس هيقولوا هو اللي دبسنا


انا في اي حاجة من دي باشيل ايدي خالص .......... تعرف فلان اعرفه عاشرته لأ يبقى ما تعرفوش

[AmatoALLAH]

امشي في جنازة و ماتمشيش في جوازه

قول لهم انك ماتعرفش عنه حاجه و انه يسالوا عنه كويس

[ASSASSIN]

قول اللى تعرفه
وسيب لهم التفكير والاختيار
بس دى شهاده ومسئوليه

+11111111111111111111

[aboomar22]

لا طبعا لازم تقول اللى تعرفه وتخلى حد من عندهم يروح يسال عليه كويس فى المنطقة اللى ساكن فيها وفى شغله سكوتك عن الحق مش صح انت بتقول واقعه شفتها مش سمعت عنها وبرضه لازم تقول انك عرفت ان الموضوع طلع سوء تفاهم وهما اصحاب القرار اما موضوع التدخين مع انى مش مدخن بس مش مربط الفرس لان كلنا عندنا اخوات واعمام واصدقاء مدخنين وناس محترمة جدا

[Donzi]

طالما الجواز صالونات يبقى نختار انسب و احسن الظروف
انما لو عن حب و ارتباط جامد يبقى ممكن يكون فى تنازلات بسيطة

وبما ان موضوعك جوز صالونات عادى يبقى بلاش لان مفيش دخان من غير نار و الى سمعته جايز جدا يكون فيه جزء من الحقيقة

+111111111111111111111

[د/أحمد ابراهيم]

سيدي الفاضل:

دي شهادة ستحاسب عليها امام الله تعالى

لازم تنقلها بصدق ووضوح

اعتبر ان البنت دي اختك... هل كان ينفع كل ما يسألوا حد يقولهم معرفش! وفي الاخر يتدبسوا فيه ويندموا

ممكن المعلومات القليلة اللى عندك تكون اكتر من كافبة ليهم عشان يفكروا مرتين

لو دي اختى عمري ما اجوزها لشخص ماعرفش بيصلى ولا لأ ... وكمان بيدخن (بناقص دي جوازة)

موضوع السرقة: صعب افيدك فيه ... لاكن انت ممكن تشوف حد من زمايلة اللي كانوا معاه في المدينة ويعرف عنه اكتر

وتدي رقمه لاهل العروسة عشان هم يسألوا بنفسهم......... وبرده لازم تنبه على الزميل ده ان الموضوع شهاده حق ومش من حقه يكتم معلومة مؤكده عن سلوكيات هذا الشخص (الا لو ذنب الراجل تاب منه توبة نصوحا... فلا يجوز فضحه)

يفضل تاخد رأي اهل العلم الشرعى (من الثقات) عشان تعرف رأى الشريعة في مثل هذه المواقف