بلا جواز بلا هم

[SHNORY]

شكرا جزيلا لحضرتك عالمجاملة ولذوق حضرتك

لو اتحسدتي متساليش وتقولي مين اللي حسدوني هههههههههههههه

انا معاااااااااكي جداااااااااااااااااااااااااا
مش باقتنع اني اشتري حاجة غير الحاجة اللي هاستعملها وبتريحني وبس
وعمري ما اقتنعت بالفرح اللي مانعرفش نص الناس اللي فيه ده والنص التاني جاي ينتقد كل حاجة بصراحة
بحب اوي الافراح البسيطة الاهل والمعارف والاصحاب القريبين لان في يوم زي ده بنبقى عايزين الناس اللي بنحبهم
وبس مش العيلة وعيلة العيلة وممكن يبقوا يجوا يباركوا يعني بس مش لازم الفرح يقلب كانه موووول
والعروسة تبقى بسيطة وطبيعية مش 2 كيلو ميكب ولا ايشارب اسبانيش وتحسي انها واحدة تانية
وهو ساعتين او 3 وخلص الفرح مش يروحوا كانهم مضروبين من الارهاق
كل ما كان الفرح او اي مناسبة بسيطة كل ما كانت احلى بكتييييييير

كل الناس مش بتقتنع بكده بس كله بيقول ان الظروف اقوي منهم
نجيب تلاجه كبيره يا ابني علشان نملاهالكم اكل ونساعدكم
ركب تكييف علشان حماتك الحر بيتعبها وبتسخسخ
هات شفه في وسط البلد بعماره باسانسير علشان الصحه بقت علي قدها ونيجي نزوركم
هات كيلوا دهب في الفرح مش علشاننا بس علشان قيمتك قدام الناس
هههههههههههههههه
كمان فرح ايه اللي ساعتين او تلاته امال هو الفرح المفروض يكون قد ايه ؟؟
يا جماعه
بقولهالكم وبكررها
العزوبيه تاااااااااااج علي رؤس العزاب لا يراه الا المتزوجون

[amr_elmasry]

انا والله الحمد الله ربنا كرمنى ولاقيت بنت الحلال اللى فيها كل المواصفات دى مش عايزة شبكة ولا عايزة فرح بس شرطها الوحيد بعد الجواز ان ربنا يكرمنا برحلة عمرة ان شاء الله وعلى فكرة انا لسة خاطب يوم
7/10/2011
البنات الكويسة المحترمة ولاد الاصول والحلال كتير بس لازم تحسن اختيارك وبالتوفيق ان شاء الله

[shaddadfalcon1]

انا والله الحمد الله ربنا كرمنى ولاقيت بنت الحلال اللى فيها كل المواصفات دى مش عايزة شبكة ولا عايزة فرح بس شرطها الوحيد بعد الجواز ان ربنا يكرمنا برحلة عمرة ان شاء الله وعلى فكرة انا لسة خاطب يوم
7/10/2011
البنات الكويسة المحترمة ولاد الاصول والحلال كتير بس لازم تحسن اختيارك وبالتوفيق ان شاء الله

طيب اداري ومتقولش لحد وسكتم بكتم

[No Comment]

يا أزميرلادا انتي واخده الموضوع بحدة شويتين
وانا حاسس إنك بتكتبيلي بكل عصبية ولو طلتي رقبتي هتكسريها في إيديك من النرفزة
أكيد كلامك فيه حاجات صحيحة كتير
لكن يمكن انا الفكرة اللي عاوز أوصلهالك ما قدرتش أوضحها بأسلوب بسيط فاعذريني
أنا مش بأقولك الراجل يمن على زوجته بالحاجة اللي جابها لكن هو بيبقى عاوز يقولها أنا لو كنت جبتلك زير فخار فأنا قدمتلك كل ما أملك وكان ده غالي علي جامد لأن إمكانياتي ساعتها ما كانتش كبيرة
الفكرة إن الواحدة في الأول بتوافق على شخص معين شكله وأسرته وتدينه ووظيفته وأسلوبه وووو وآخر شئ هتبص له إمكانياته
انا مش بأقول إنها ما تبص لإمكانياته لكن ده الترتيب الطبيعي إن البنت آخر شئ بيلفت نظرها هو الإمكانيات إلا لو كان تفكيرها مش طبيعي
لأن الإنسانة مستحيل تعيش مع واحد مش متقبلاه لكن ممكن تعيش مع واحد مش متقبله ظروفه ولو بصعوبة أقل
فيه رجالة بتضحي علشان زوجاتها حتى بالخلفة وفيه العكس
وفيه ستات ما بيصبروش على ازواجهم لو تأخر الحمل وفيه العكس ودي حرية ما حدش يقدر يفرض رأيه على الآخر فيها
لأنها غريزة الجنس والأمومة والأبوة دي حاجات جبريات ما نقدرش نمنعها عن شخص متاح له الحصول عليها في الحلال إلا لو هو طلب كده
وعلشان كده ربنا أحل الطلاق للرجل وأحل الخلع للمرأة
ولا يمكن أن نقارن هذه الغرائز بالجانب الآخر وهو الأساسيات او الكماليات من المادة مهما بلغت أهميتهم
أكيد مش بنقول إن الست تعيش مع واحد هيموتها من الجوع وما فيش راجل يرضى يلزم مراته بالموت جوعا بجواره - إلا بموافقتها بردوا وطلبها
ثانيا عايزك تفهمي إن الجواز فيه مصلحة للطرفين للرجل والبنت مش مصلحة من طرف واحد
أنا عن نفسي ما طلبتش حاجة من أهل مراتي
مراتي أبوها متوفي ولما تقدمت لهم أهل أبوها في البلد كل واحد فيهم قعد يعمل فيها ابن بارم ديله وإن هو اللي خايف على بنت أخوهم ويزود في الطلبات
حماتي وهي ست وقفتلهم وقالتلهم بصوا أنا موافقة عليه معاه مش معاه مش فارقة معايا
أنا أهم حاجة عندي إن أبقى مطمنة على بنتي مع واحد هيراعي ربنا فيها
وقالت لواحد فيهم انت لو اتقدم لبنتك هتوافق عليه ولا هترفضه
قالها الصراحة هأوافق
قالتله خلاص ما توقفوش حال البنت وتعملوا نفسكم خايفين عليها
أنا مسئولة عنها وعارفه إنه مش هيتأخر
جبت ساعتها شبكة 80 جرام تقريبا وعملت فرح واتفقنا إن أنا علي كل حاجة ( ده سلو بلدنا ) وهم عليهم المطبخ
للأمانة حماتي جابت شوية حاجات في المطبخ وانا قلت لمراتي خليها توفر الفلوس لاخواتك هم أولى إحنا ربنا كرمنا ونقدر نجيب اللي نحتاجه
ولما ربنا سهل وعملنا عفش خليتهم يختاروا أحلى عفش في الكتالوج وهكذا
أي راجل طبيعي عايز يعيش في شقة مفروشة من أكمل ما يمكن زي ما البنت عاوزه
وأكيد طول ما فيه نفس ويقدر يمشي على رجليه هيحاول يشتغل ويجيب كل ما تتمناه
وهنا يظهر دور المرأة اللي بتقف جنب جوزها وبيقولوا وراء كل رجل ناجح إمرأة ناجحة
لو البنت مش مرتاحة إنها تتجوز واحد مناسب لها من غالبية النواحي لكن إمكانياته ضعيفه فهي حرة ما حدش يقدر يلومها ولا فيه أي حرمانية عليها
بس لازم تسأل نفسها هل رفضها في مصلحتها ولا لأ ؟
وده السؤال الأهم ؟
أنا مش بأقولك توافقي على واحد علشان صعبت عليكي ظروفه فقولتي أتحمله علشان آخد فيه ثواب ،
لو انتي عملتي كده انتي حرة بردو وتنتظري الأجر والثواب وحتى البركة من الله وما تمنيش عليه بيها
لكن ده مش مطلوب من أي فتاه
المطلوب لما يتقدملها واحد تفكر كويس قبل ما ترفضه أو حتى قبل ما توافق عليه
ولو هترفضه علشان ظروفه المادية فقططططط يبقى تفكر أكثر من مرة
أنا لي إخوات بنات ما فيش واحدة فيهم اتجوزت جوازه كحيانة شوية غير لما ربنا فتح عليها وبسم الله ما شاء الله
وما فيش واحدة كانت جوازتها مرتاحة في البداية غير لما ظلت متوسطة الحال
في إحدى المرات اتقدم لواحدة قريبتي شاب محترم جدا لكن كان عنده شلل أطفال في إحدى رجليه
دعيت للقعاد معاه ضمن ناس تانيين
قعدنا قعدة لطيفة جدا وفضلنا نضحك والولد ارتاحلي خالص لدرجة إنه اتخيله إنهم مرحبين بالموضوع
بعد ما ماشي لقيتهم كلهم بيقولولها شكلك عاوزه ترفضبي - عارفه لو رفضتي ربنا هينتقم منك - انتي عاوزه إيه تاني إيه المشكلة لما عنده رجل معاقة - وفضلوا يضربولها أمثلة عن فلانة مال وجمال ووافقت على واحد عمل حادثة وفلانة اتجوزت وجوزها حصله والعياذ بالله بتر وهكذا
أنا قعدت معاها قولتلها سيبك من كل العبط اللي بيقولوه - ربنا سبحانه وتعالى ما فرضش عليكي توافقي على واحد مش مرتاحاله - انتي تفكري في الأول هل الجواز منه مناسب ليكي ولا لأ - وبعدين هل في مصلحتك ولا لأ - وتفكري كويس إنتي هتتقبلي عيبه ده ولا لأ لأنك لو ما تقبليتيش عيبه الجسدي فهتبقى ظلمتي نفسك أولا وظلمتيه ثانيا - ممكن واحده جوزها ماشي على كرسي لكن مبسوطة بيه فانتي عندك استعداد تبقى طالعه معاه بره ومتفاخرة إنك متجوزه الشخص ده ولا ممكن ولو للحظه تبقى مكسوفة من الناس
وفي الآخر البنت رفضت وربنا كرمها واتجوزت واحد سليم
أحد الصحابة كان مزاجه إنه يتجوز واحدة رجلها حلوة وعجبته إمرأة فلم يتقدم لها إلا بعد أن تأكد أن رجلها كما يتمنى
لو كان اتجوز واحدة ما فيش فيها الصفة اللي طول عمره بيحلم بيها أكيد كان هيعيش طول عمره متضايق ومش ماليه عنيه
وزي ما الإسلام بيأمر المرأة أن تتزين لزوجها وتهتم بنفسها فقد أمر الرجل كذلك
وطبعا فيه فرق أكيد بين إهتمام المرأة وإهتمام الرجل
ده حتى فيه بنات يقرفوا من الولد اللي بيهتم بشكله بدرجة مبالغ فيها بتوصل إنه يحط بودرة او ميكياج لأن المرأة الطبيعية بتحب الرجل الخشن القاسي الملامح نوعا ما
الرجل دايما بيرحب بنصايح مراته لو كانت في إتجاه إنه يبقى أكثر رقي - ده دايما مش علطول
لكن المرأة للأسف بتتضايق جدا لو جوزها انتقدها ولو بأسلوب التلميح
وساعات الراجل بيفضل يلمح لغاية ما يصرح
يعني لو واحدة ست متعودة إنها تصحى بدري تفطر وجوزها لأ
وجت صحيت وعملتله فطار بدري وصحته الغالب مش هيتضايق منها
لكن لو الراجل متعود عند أهله إنه يصحى بدري جدا يلاقي الفطار جاهز ويفطر ويروح الشغل
ومراته مش متعودة على كده
لو طلب منها تصحى بدري أو صحاها فالغالب إنها بتتضايق وتحس إنه حول حياتها لجحيم
ومش هتستجيب بسهولة ولا بسرعة وهيضطر كل يوم يصحيها لغاية ما يتعود إنه يصحى يعمل فطار لنفسه ويروح الشغل ويرجع تقوله معلش يا حبيبي ما قدرتش أصحى كنت هلكانة م التعب وهو يفوت ويعدي لغاية ما يفيض به
موضوع الخطوبة
انا ما أعرفش شعور البنت إيه لما واحد مخطوب يتقدملها أو مطلق
لكن الرجل دايما بيغير على مراته أكتر من المرأة أو غيرتهم مختلفة
الست تغير لو شافت واحدة أحلى منها أو شافت جوزها بيبص على واحدة أحلى منها لأنه كده بيثير مركب النقص داخلها
لكن الرجل لو شاف زوجته معجبة بواحد تاني فمش هتثير جواه مركب نقص لكن هتثير جواه شكوك أو إحساس بإهانة الشرف أو على الأقل الكرامة
فعلشان كده لما بيتقدم لواحدة مخطوبة سابقا بيبقى محتاج يسألها هل فيه حاجة حصلت أو لا
زي ما الواحد بيبى خايف على بنته أكتر من إبنه
أنا الحمد لله لا أقبل الخطأ من الرجل ولا من المرأة لكن إهتمام الرجل وخوفه في هذا الجانب أكثر من المرأة هو إهتمام وخوف طبيعي يندرج تحت بيند الإختلاف بين المرأة والرجل
ويمكن حضرتك لو عندك ابن وعرفتي إنه بيطلع مع واحدة أول شئ هتقوليه البنت دي ما عندهاش أب يربيها قبل ما تبصي لإبنك هل ربتيه ولا لأ
وطول عمر التهاون بيسأل عنه المرأة قبل الرجل حتى ربنا لما تكلم عن الفاحشة والعياذ بالله قدم المرأة المخطئة قبل الرجل المخطئ في ترتيب الآية
ولكنه عندما تحدث عن أي جريمة أخرى قدم الرجل على المرأة
ولو قلتي إنني أعني أن المرأة هي فقط المسئولة عن التسامح في الحرام دونا عن الرجل هأقولك ده مش قصدي لأن الإسلام بردو لم يفرق بين عقوبة السارق وعقوبة السارقة رغم أنه قدم السارق الرجل على السارقة المرأة
لكن المجتمع يحمل المرأة المسئولية الأعظم في الحفاظ على شرفها لعدة أسباب مهمة جدا
أولها أن المرأة وحدها هي التي تملك الحقيقة المطلقة في نسب الأولاد
فلو شك الرجل في سلوك زوجته فإنه سيشك بالتالي في نسب أولاده إليه
أما المرأة فمهما شكت أن زوجها تزوج عليها في الحلال أو حتى يخونها والعياذ بالله في الحرام فإنها لا يمكن أن تشك أبدا في نسب أولادها إليه
ولذلك اليهود ينسبون اليهودية إلي من كانت فقط أمه يهودية بغض النظر عن ديانة أبوه ربما لأنهم يعتبرون أن الشك في النسب هو الأساس والله أعلم
وثانيا لأن المرأة هي التي تتحمل أعباء أي علاقة محرمة من غير زواج سواء الحمل أو تحمل مواجهة المرأة وأسرتها لوجود طفل من الحرام أو حتى لإكتشاف أمرها في حالة زواجها
أما الرجل فمهما حدث منه فمن الصعب إثبات هذه العلاقة أو حتى إجباره على تحمل تبعاته
كل هذه الأسباب تجعل اهتمام المجتمع بالحفاظ والسؤال عن أحوال البنت أكثر من إهتمامهم بالحفظا على سلوك الولد وكل أب لديه ولد بيعتبر أن هناك أب أكثر تشددا منه يحاول الحفاظ على بنته من ولده وإذا فرط الأب الثاني في شرف ومسئولية بنته فمن الأسهل أن يتغاضى الأب الأول عن أخطاء ولده
وأكرر لك أنا هنا لا أبرر ولكن أوضح لك الأسباب
وطبعا المفروض أن يكون الإنسان طبيعيا في شكه وأن تكون الثقة هي العامل الأكبر بين الرجل وخطيبته أو زوجته ولا يحمل المواضيع أكثر مما تحتمل وحتى لو حب يسأل يسأل من بعيد مش يواجه الفتاة بأسئلة عن كل شئ وفيها نبرة شك وريبة كبيرة
أما الإنسان الشكاك فالبعد عنه غنيمة
أنا آسف طولت عليكي
وأدعو الله سبحانه وتعالى أن يقر عينيك بزوج خلوق متدين يضعك داخل نن عنيه ويحافظ عليكي دنيا ودين
وعلى فكرة الجواز نعمه واللي بيشيل الطين صحيح هو الغلبان الراجل بس هنقول إيه - لنا الجنة إن شاء الله
تحياتي

yousef1978 لك كل احترامى ... ربنا يباركـلك .

[nonia]

كل الناس مش بتقتنع بكده بس كله بيقول ان الظروف اقوي منهم
نجيب تلاجه كبيره يا ابني علشان نملاهالكم اكل ونساعدكم
ركب تكييف علشان حماتك الحر بيتعبها وبتسخسخ
هات شفه في وسط البلد بعماره باسانسير علشان الصحه بقت علي قدها ونيجي نزوركم
هات كيلوا دهب في الفرح مش علشاننا بس علشان قيمتك قدام الناس
هههههههههههههههه
كمان فرح ايه اللي ساعتين او تلاته امال هو الفرح المفروض يكون قد ايه ؟؟
يا جماعه
بقولهالكم وبكررها
العزوبيه تاااااااااااج علي رؤس العزاب لا يراه الا المتزوجون[/QUOTE]

هو ليه البساطة في الزمن ده بقت حاجة غريبة
وخلاص بقيت متعودة على نظرة التعجب من الناس
لما اقول مش هاعمل غير اللي انا مقتنعة بيه وماعملش زي الناس
ماهو مش تقليد اعمى وخلاص يعني
تلاجة كبيرة عشان نملاهالكم هما ناوين يفتحوا سوبر ماركت ولا ايه ههههههههه
مع الاعتذار للتلاجة الكبيرة :)
وسط البلد ده مكان الناس قالوا عليه كده عشان الخدمات
او عشان موقعه مع الوقت بقى حاجة متعارف عليها مش حاجة مسلم بيها يعني
زي ما زمان كانت مدينة نصر صحرا واكتوبر كانت صحرا والتجمع كان صحرا عادي يعني
دلوقتي في ناس اد ايه عايشة في الاحياء ديه
مش قادرة اقولك كلمة قيمتك قدام الناس ده من الكلمات اللي مش باستوعبها
يعني قيمة الانسان باخلاقه وتربيته وانه يراعي ربنا فيها
ولا بكيلو الذهب اللي الناس بيبصوا عليهم بصة
ومابيفتكروش شكلهم اصلا وبعدين يشتغلوا قر قر قر لحد ما العروسة والعريس يتكعبلوا وهما مروحين
يعني اهم حاجة من وجهة نظري انهم يكونوا مبسوطين وعايزين يكملوا حياتهم وفيه بينهم امان وثقة
ومودة ورحمة ويعملوا كل حاجة حسب احتياجاتهم وامكانياتهم وبالمعقول مش يناموا على الارض يعني
لكن الشكليات والماديات بصورة مبالغ فيها مش هيا اللي هاتخليهم يكملوا حياتهم
اااااااااااه الافراح الجميلة اللي بتطول بقى 4 او 5 ساعات

[bmw323]

العزوبيه تاااااااااااج علي رؤس العزاب لا يراه الا المتزوجون

الكلمة دى جامدة أوى تخلى الواحد فعلا يفكر ألف مرة قبل ما يخطو خطوة فى الجواز

[yahyanaabil]

حاجه غريبه فعلا نعمل فرح نكلفه فلوس بالعبيط فى الاخر تلاقى الناس نازله تقليس وتريقه على العريس والعروسه كنا روحت مره فرح واحد قريبى وبعد ما رجعنا لاقيت ابويا بيقول العروسه كانت وحشه قولتله ان شاء الله لما اجى اتجوز انته اول واحد مش حتتعزم وبناقص من الرتيقه والكلام اللى ملوش لازمه
و بالنسبه للذواق بتاع الكوافير اللى بيقلب العروسه كائن فضائى برضه واحد صاحبى ليه معاه موقف ظريف اوى راح ياخد مراته من الكوافير معرفهاش من كتر الميكب اللى حطوه

[azmeralda]

يا استاذ يوسف لا عاش ولا كان اللى يقطم رقبتك ده احنا اللى يتعرض لك نقطعه وراك رجاله (انت عارف طبعا ان رجالة تتقال عالجدعان سواء انثى او ذكر )
انا فعلا متنرفزة بس مش من شخصك انت او شخص بعينه محدد انا متنرفزة من طريقة تفكير ومواقف كتير لناس كتير منهم اللى هنا عالمنتدى ومنهم اللى بره وخايفة فعلا لأن بينى وبين اليأس من ان فى ناس كويسة فى الدنيا كام سنتيمتر ادى كل الموضوع


وعلى فكرة مفيش بنت مش نفسها تتجوز بطريقة غير الصالونات مش حاجة ممتعة قوى يعنى الحطة فى الفترينة خصوصا لو اخته او مامته هى اللى بتقرر له !! بس محدش قاللى برضه طريقة شرعية محترمة غير دى

وبالنسبة انك بتقول لو ابنى خرج مع واحدة مش فى محلها لأن المخطوبة تفرق فرق شاسع عن اللى مشيت مع واحد وصاحبت وده اللى انا بوضحه هى لو كانت عايزة تعرف الولاد من بره بره ومحدش يعرف عنها حاجة كانت هتعمل كده وممكن متتكشفش لكن هى مشيت بما يرضى الله مينفعش يشك فيها اصلا لمجرد ان بعض بنات فى الخطوبة بتتجاوز لأن بيبان جدا المحترمة من غيرها والمفروض انه مش داخل اى بيت وباين اخلاق الناس دى ايه ومستوى تدينهم ايه وحتى هيسمحوا له هو بايه لكن يسألها فى حاجة حصلت !!! دى اهانة بصراحة يعنى انا لو اتقدمى لى واحد كان مسافر امريكا مثلا ده يدى لى الحق اشك فيه واسأله فى حاجة حصلت ماهو كان فى مجتمع منحل بقى طب ما اطلب منه يعمل تحاليل كمان احتياطى!!وانا اولى بالشك فيه
وده نظام ربنا اللى عمله اللى هو الخطبة لو اعترضنا عليه هيبقى زى زعلكوا من المغالاة فى المهور بالضبط ودى مش هتأدى لفتنة وفساد فى الألرض انى اخوف البنت تتخطب لأنها هتعامل كمتهمة يا اما لو اتخطبت لو خطيبها ده طلع فيه بلاوى تقبل وتكمل وخلاص حتى لو هتتطلق بعد كده ايه الحل يعنى ماهى الخطبة مجرد وعد بالزواج هى هتعرف اخلاقه منين يا اما الناس تعمل الصح بقى وميبقاش فى دبلة ولا اعلان ويتخطبوا سرا ولو فى وفاق كتب الكتاب يعلن مفيش يبقى شهرين من التعارف وسط المحارم مثلا كفاية وتفسخ الخطبة دى والكل يرتاح


يعنى عايزة اقولك مثلا لما واحد يتقدم لى وباباه يقوللى انا مختارك بتشتغلى عشان تتحملى مصاريفك كاملة طب ما انا هتجوزه ليه بقى وقوامته هتجى منين !!
كل واحد هيصرف على نفسه احنا فى امريكا ولا ايه
وامثلة كتير معاقة بتقابلنى او تقابل اصحابى ولما بحكى لكو هنا الاقى صيحات التعجب وكان بحكى افلام طب انتو في الكوكب اكس ارجعوا بقى الأرض حصل لها غزو من الشباب السيس ومحتاجاكو
وانا عايزة اعرف الناس اللى بتتكلم عالمنتدى هنا بالعقليات الغريبة دى بتهزر وبتتسلى مثلا ولا هى بتفكر كده فعلا لأنى كل ما احكى لى حد اعرفه بيستغرب ويقوللى متقريش الكلام ده تانى اللى واضح فعلا انه ضار على صحتى اديك انت حسيت انا منفعلة قد ايه

وموضوع ان واحدة تتجوز واحد عشان صعبان عليها ده هبل طبعا مفيش شفقة فى الجواز
والأولى تصعب عليها نفسها خصوصا اللى لاحظته ان اى واحدة بتعتبر نفسها اتنازلت عن حاجة الطرف التانى يعتبر ان موافقتها فى حد ذاتها معناها انها قابلة يعنى مش متنازلة ومعملتش جميلة ولا بيحط فى دماغه عادى

وطبعا الجواز مصلحة للطرفين يبقى محدش يقنع نفسه انه بيضحى او بيتكرم عالطرف التانى ولازم يبقى مقتنع بيه ومش حاسس انه احسن منه ولا بيتكرم عليه انه اتنازل واتجوزه

وبصراحة نفسى اجيب ولد فعلا ويكون له اخت عشان اعلمه ازاى يحترم المرأة ويعاملها ازاى واعلمه حقوقه وواجباته فى الأسلام ايه لان للأسف الى مربى الأزواج الوحشين دول فى الأول والآخر ستات هم امهاتهم !! علموهم ان اختك دى عشان تخدمك

[ziours]

الله يفتح عليكي اول مره الاقي واحده من الجنس اللطيف بتقول كلام موزوزن وصح الصح فعلا الشعب المصري غاوي فشخره وغاوي يزنق ويلخم نفسه بشويه حاجات تفهه عفا عليها الزمن زي لازم نعمل فرح في لوكنده مفتخره قال يعني الجواز مش هيتم الا في لوكنده مفتخره ويقوللك في الجهاز لازم النيش والصالون والحاجات دي اصلا لاتستعمل بعد الجواز ياريت الشعب المصري يفوق من الخزعبلات والفشخره الكدابه

[ahmadmidop]

موضوووع في الجوووون :)

[nonia]

يعنى عايزة اقولك مثلا لما واحد يتقدم لى وباباه يقوللى انا مختارك بتشتغلى عشان تتحملى مصاريفك كاملة طب ما انا هتجوزه ليه بقى وقوامته هتجى منين !!
كل واحد هيصرف على نفسه احنا فى امريكا ولا ايه
وامثلة كتير معاقة بتقابلنى او تقابل اصحابى ولما بحكى لكو هنا الاقى صيحات التعجب وكان بحكى افلام طب انتو في الكوكب اكس ارجعوا بقى الأرض حصل لها غزو من الشباب السيس ومحتاجاكو

[COLOR="rgb(255, 0, 255)"]

لا ده اب غريييييييييب اوي وكده كتيييييييير بصراحة
وعندك حق الحياة بقينا نشوف فيها اكتر من الافلاااااااااااام بكتييييييييير
والكوكب فعلا بقى محتل [/COLOR]

[khaled_yassin]

احلى ما فى الموضوع انك بنوته الى بتقول الكلام دة
انا اختى بتقول نفس كلامك تقريبا , بس اعتقد ان علشان سن جوازها اتاخر
البنوته الى كنت هرتبط بيها بسالها عايزة فرح ولا نطلع نسافر نعمل عمرة او شهر عسل
تقولى الفرح اهم ليه طعم تانى خالص , يا بنتى دول ساعتين ب20 الف ممكن نطلع بيهم فسحة روعة لمدة 10 ايام , تقولى لالا لازم الفرح
وفى الاخر لا طولنا الفرح ولا طولنا العمرة
ربنا يهدى بنات المسلمين ويكملهم بعقلهم

[khaled_yassin]

دكتور جه فى التليفزيون من كام يوم وقال ان قوامة الرجل فى صحتوا ومالوا
والحمد لله الصحة بقت فى النازل , وبابا حسنى لم فلوس الشباب وخلع

[amrezzat82]

يا جماعة أنا شايف حاجة غربية جدا هنا
شايف بنات باين من تفكيرها أنها كويسة جدا
و شايف كمان شباب باين أنها مش بتلعب ولا تقديها
أومال ليه فى الواقه لا بنلاقي ديه و لا دوكهوما
و يجيلك الأهل
يقولوا داحنا بنشتيري راجل ده أنت زي أبننا و يطلعوا تييييت اللى خلفوه من قطط فاطسة و مصاريف و و و و و و و و و و و و
فعلا الواحد بقى مذهول مكن كتره اللى بيشوفه و بيسمعه

[SHNORY]

يا جماعة أنا شايف حاجة غربية جدا هنا
شايف بنات باين من تفكيرها أنها كويسة جدا
و شايف كمان شباب باين أنها مش بتلعب ولا تقديها
أومال ليه فى الواقه لا بنلاقي ديه و لا دوكهوما
و يجيلك الأهل
يقولوا داحنا بنشتيري راجل ده أنت زي أبننا و يطلعوا تييييت اللى خلفوه من قطط فاطسة و مصاريف و و و و و و و و و و و و
فعلا الواحد بقى مذهول مكن كتره اللى بيشوفه و بيسمعه

ماهما فعلا بيشترو راجل
الناس مضحكتش عليك انما انت اللي فهمت غلط
هو اللي بيشتري عبد بيعمل فيه ايه ؟؟؟؟؟
هما بيشتروك بالمعني الحرفي للكلمه مش تعبير مجازي
بس بيشتروك بفلوسك كمان مش بفلوسهم