أشترى منين نظارة شمس أصلية في مصر ؟؟

[Innovation]

السلام عليكم

موضوع شراء نظارات شمسيه فى مصر اصبح شيئ مش سهل خالص .. لأنك بتروح المحلات يقولك ايوه ده اصلى وهوه ولا اصلى ولا حاجه .. ومحلات تانيه يقولك مافيش اصلي اصلاً في مصر خالص !!

ياترى ممكن اشترى نظارة شمس اصليه منين فى مصر ؟؟ وازاى أتأكد انها اصلي مش كوبى اوريجينال اللى بيقولو عليها تجاريه دى ..
وهل ممكن اجيب نضارة اصليه فى حدود اقل من 1000 جنيه والا لازم هيكون اعلى من كده ؟؟

بجد ممكن الموضوع شكله يكون بسيط ومش مستاهل .. بس اللى بيلبس عدسات طبيه بيحتاج نضاره اصلي بشكل ضرورى جداً .. فالحكايه مش رفاهيه يعنى ده موضوع طبي بحت ..

انا عملت سيرش لقيت فيديوهات بتوضح الريبان الاصلى والتقليد .. بس افرض مش عايزه ريبان وعايزه اجيب ماركات تانيه هعرف ازاى انها اصلي ؟؟ ايه المحلات المضمونه بجد؟؟

ياريت لو تقدرو تساعدونى لو حد عنده خبره فى الموضوع ده لأن آخر نضاره اشتريتها طلعت تقليد وتاعبانى جداً ومش عايزه ادبس في واحده جديده تطلع تقليد بردو .

[M7amD_7amDy]

كل اللى فى السوق أغلبه هاى كوبى لكن مش بالسوء ده وبتكون طبية ومصرح بيها

النظارات الشعبى هيا اللى بتضر العين فعلا

والأصلى فعلا لازم تكون فوق الألف ومش كل المحلات بتعمل تشكيلة منها

فى الأول والأخر هيا بتبقى عملية ثقة وضمير للمحل اللى بتشترى منه

[Innovation]

كل اللى فى السوق أغلبه هاى كوبى لكن مش بالسوء ده وبتكون طبية ومصرح بيها

يعنى معقول فعلا مافيش اصلي ؟؟

النظارات الشعبى هيا اللى بتضر العين فعلا

والأصلى فعلا لازم تكون فوق الألف ومش كل المحلات بتعمل تشكيلة منها

فى الأول والأخر هيا بتبقى عملية ثقة وضمير للمحل اللى بتشترى منه

طيب فين احسن مكان اللى فيه ضمير وثقه ؟؟ مغربي مثلا والا فيه محلات تانيه ؟؟

شكراً للمرور والتعليق :)

[zegna]

انا عندي يا باشا نضارات اصلي made in itlay rayban كتير لو عايز تبوص عليهم بس قولي استايللك اية يعني شكل الشنبر اللي في دماغك لان اغلب اللي عندي استايل Aviator

[M7amD_7amDy]

والله أنا متعاملتش معاه . ممكن لو حد ليه تجربة أكيد هيفيدك

حاولى على قد متقدرى تاخدى ضمانات أو اى إثباتات من المحل إنها تكون أصلية

بالتوفيق :)

[ehab]

منير نصيف توكيل راي بان في مصر و اعتقد انه اكيد تلاقي عنده اصلي

[amrezzat82]

باشا مش لازم تكون فوق الألف عشان تكون أصلي
و فى محلات كتيرة فعلا أصلي مش هاي كوبي أبدا
أنزل مدنية نصر أو كارفور أو المعادي أو وسط البلد
المحلات المحترمة كتيرة جدا
و مش لازم ريبان طبعا ممكن تختار اللى أنته عايزه

[A_H_M_A_D]

نصيحة لو عايز تشتري نضارة و تتأكد إنها فعلا أصلية , إشتري نوع مايكونش نزل منه مضروب

أنا مثلا لما جيت أشتري نضارة نظر إشتريت نوع إسمه oga فرنساوي عشان مفيش منه كوبي أصلا و بكده تتأكد إنك إشتريت حاجه أصلي حتى ولو مكانتش ليها شهرة كبيرة بس نوع محترم

[r0xer]

والله نصيحة......لو عايز تجيب نضارة اصلية خلي حد يجبهالك من برة. غير كدا الموضوع مش مضمون اطلاقاً.....ولاتقولي توكيل ولا متوكيلش...عن خبرة وتجارب وصرف فلوس قد كدا السنتين اللي فاتو!.

[pop_king3]

خلى اى حد يجبهالك من بره مصر

[Sameh_OO7]

بص يا سيدى على قد خبرتى المحدودة جدا النظارة الاصلى اول هام لازم بيجى معاها كارت زى كارت الفيزا كده بيبقى باسم نوع النظارة وده بيبقى الضمان & وكمان كتالوج صغير بردوه باسم الماركة بيشرح نوع العدسات وجراب بأسم النظارة ومعاه منديل جوا الجراب متكيس والكيس بتاع المنديل والمنديل باسم الماركة بردوا بس كده........ده غير انى النظارة بتبقى مريحة فى وشك لما تلبسها وكده يعنى انا جايب نظرتى من عند (C&CO)فى الكوربة بس خد بالك مش كل نظرتهم اوريجنال ...........ويارب اكون قدرة افيدك وتحياتى ليك.

[shery103]

انا شخصيا كل تعاملنا فى النضارات مع بركة
و كل اللى بنجيبو من هناك اصلى سواء نظر او شمس
و بيبقى معاها فى علبتها ما يثبت انها اصلية
انا مثلا لسه جايبة من بركة نضارة نظر gucci ، معاها فى العلبة كارت قد كارت الفيزا proof of authenticity

[beast2004]

منير نصيف توكيل راي بان في مصر و اعتقد انه اكيد تلاقي عنده اصلي

هو ده الوحيد المضمون فعلا

[MOUSTAFA_SAAD]

انا جايب نضاره من البركه او c&co ماركه مش مشهوره اسمها salvatore ب 300 جنيه
على فكره مش لازم الاصليه تكون فوق الالف لان ده بيعتمد على الموديل والنوع
النضاره مكتوب عليها صنع فى الصين وبرده ده مش لازم يكون معناها انها تقليد لان كل حاجه دلوقتى مصانعها فى الصين

[yakoot]

السلام عليكم

موضوع شراء نظارات شمسيه فى مصر اصبح شيئ مش سهل خالص .. لأنك بتروح المحلات يقولك ايوه ده اصلى وهوه ولا اصلى ولا حاجه .. ومحلات تانيه يقولك مافيش اصلي اصلاً في مصر خالص !!

ياترى ممكن اشترى نظارة شمس اصليه منين فى مصر ؟؟ وازاى أتأكد انها اصلي مش كوبى اوريجينال اللى بيقولو عليها تجاريه دى ..
وهل ممكن اجيب نضارة اصليه فى حدود اقل من 1000 جنيه والا لازم هيكون اعلى من كده ؟؟

بجد ممكن الموضوع شكله يكون بسيط ومش مستاهل .. بس اللى بيلبس عدسات طبيه بيحتاج نضاره اصلي بشكل ضرورى جداً .. فالحكايه مش رفاهيه يعنى ده موضوع طبي بحت ..

انا عملت سيرش لقيت فيديوهات بتوضح الريبان الاصلى والتقليد .. بس افرض مش عايزه ريبان وعايزه اجيب ماركات تانيه هعرف ازاى انها اصلي ؟؟ ايه المحلات المضمونه بجد؟؟

ياريت لو تقدرو تساعدونى لو حد عنده خبره فى الموضوع ده لأن آخر نضاره اشتريتها طلعت تقليد وتاعبانى جداً ومش عايزه ادبس في واحده جديده تطلع تقليد بردو .

انا جربت سفير عنده تشكيلة وموديلات أصلى كثيرة بس للأسف موجود ( طنطا - اسكندرية فقط ) انا نفس حالتك بالضبط ولفيت وجربت كثير جدا مع اشهر المحلات الموجودة وملقتش طلبى غير فى سفير الحمد لله واقل نظارة اصلى شوفتها كانت فى حدود 1500 جنيه