أشترى منين نظارة شمس أصلية في مصر ؟؟

[Innovation]

والله نصيحة......لو عايز تجيب نضارة اصلية خلي حد يجبهالك من برة. غير كدا الموضوع مش مضمون اطلاقاً.....ولاتقولي توكيل ولا متوكيلش...عن خبرة وتجارب وصرف فلوس قد كدا السنتين اللي فاتو!.

فكره بردو فعلا ..بس للاسف كل اللى اعرفهم مسافرين بره ينقسمو لنوعين ..نوع لا أثق في ذوقه تماماً .. ونوع تانى هيجيبلى لو طلبت بس مش هيرضا ياخد تمنها وهتكسف جداً من ده
بس انا فعلا زيك كده كل سنه بأشترى نضاره تطلع مضروبه وخلاص مش هستحمل تانى يحصلى كده.. عنيا ابتدت توجعني

[Innovation]

بص يا سيدى على قد خبرتى المحدودة جدا النظارة الاصلى اول هام لازم بيجى معاها كارت زى كارت الفيزا كده بيبقى باسم نوع النظارة وده بيبقى الضمان & وكمان كتالوج صغير بردوه باسم الماركة بيشرح نوع العدسات وجراب بأسم النظارة ومعاه منديل جوا الجراب متكيس والكيس بتاع المنديل والمنديل باسم الماركة بردوا بس كده........ده غير انى النظارة بتبقى مريحة فى وشك لما تلبسها وكده يعنى انا جايب نظرتى من عند (c&co)فى الكوربة بس خد بالك مش كل نظرتهم اوريجنال ...........ويارب اكون قدرة افيدك وتحياتى ليك.:oc_sun1[1]:

شكرا جزيلا على المعلومات المتكامله .. خلاص مش هشتري نضاره مش معاها ضمان وكتالوج ومتكيسه تانى .. خلاص انا ناويه ان شاء الله مايتضحكش عليا تاااني .. شكراااً جزيلا على المرور والتعليق المفيد :)

[Innovation]

انا شخصيا كل تعاملنا فى النضارات مع بركة
و كل اللى بنجيبو من هناك اصلى سواء نظر او شمس
و بيبقى معاها فى علبتها ما يثبت انها اصلية
انا مثلا لسه جايبة من بركة نضارة نظر gucci ، معاها فى العلبة كارت قد كارت الفيزا proof of authenticity

تمام يا شيري .. طيب فين الاقي فروع بركه ؟؟

على فكره انا معايا Gucci بردو وكان معاها علبتها ومنديلها بس مش معاها ضمان ..بصراحه انا ماكنتش اعرف موضوع الضمان ده لما جبتها ..وطبعا طلعت كوبي وان وتعبتنى جامد ..بس خلاص مش هشتريها من غير ضمااان تااااني حرررمت :)

شكرا شيري على المرور والتعليق بس ياريت تقوليلى الاقي فروع بركه فين ؟

[Innovation]

هو ده الوحيد المضمون فعلا

طيب انا هحاول اروحله واشوف ان شاء الله .. شكرا للمرور والتعليق :)

[Innovation]

انا جايب نضاره من البركه او c&co ماركه مش مشهوره اسمها salvatore ب 300 جنيه
على فكره مش لازم الاصليه تكون فوق الالف لان ده بيعتمد على الموديل والنوع
النضاره مكتوب عليها صنع فى الصين وبرده ده مش لازم يكون معناها انها تقليد لان كل حاجه دلوقتى مصانعها فى الصين

بس يا استاذ مصطفى انا اشك انها اصليه ب 300 ج .. وكمان مش مهم مكتوب عليها ايه لان اللى معايا مكتوب عليها صنع في ايطاليا ومش اصليه .. اهم حاجه فعلا موضوع الضمان اللى بيجى معاها

شكرا جزيلا للمرور والتعليق :)

[Innovation]

انا جربت سفير عنده تشكيلة وموديلات أصلى كثيرة بس للأسف موجود ( طنطا - اسكندرية فقط ) انا نفس حالتك بالضبط ولفيت وجربت كثير جدا مع اشهر المحلات الموجودة وملقتش طلبى غير فى سفير الحمد لله واقل نظارة اصلى شوفتها كانت فى حدود 1500 جنيه

شكرا يا yakoot ..بس انا محتاجه مكان فى القاهره والجيزه .. وبعدين نفسي اجيب حاجه ماتزيدش عن 1000 ..عشان كمان لو ضاعت منى او اتسرقت ما ازعلش اوى اوى

بس كويس انى مش لوحدى فى المشكله دى وفيه ناس مرت بده بردو زى والف مبروك انكلقيت اللى انت بتدور عليه وعقبالى يارب :)

[Innovation]

السلام عليكم و رحمة الله و بركاته

أنا داخل هنا عشان أقول حاجة واحدة بس, اوعى تفتكر أن النظارات اللى عند المغربى فى مصر, أصلى, مش عشان مغربى و بتاع, تبقى أصلى, أختى جابت من عندهم واحدة ريبان من 5 سنين و بعد حوالى 3 سنين. العدسة مش حتى الframe قشرت و بقعت و لما راحت لهم, قالولها, مامعناه, ارميها و هاتى جديد و كانت جايباها ب 900 جنيه تقريبا.

اممم الله يبشرك بالخييييييييير :)

بس يعنى لو النضاره اصليه وهتقعد معايا 3 سنين وتبوظ بعد كده يبأه تمام و زى الفل .. اهم حاجه تكون بتحجز الاشعه فعلا حقيقي مش منظر وخلاص ..

طيب انت من رأيك بلاش مغربي .. يبأه نروح لبركه او منير اللى باقي الاعضاء قالو عليه .. والا ايه رأيكم ؟

شكرا maserati على المرور والتعليق شكرا جزيلاً

[Innovation]

أحب أقولكوا إن الكارت والضمان والمنديل .... إلخ

عندى موجود فى نظارات هاى كوبى :)

آآآخ ياااني .. يعنى مافيش فايده بردو هاخد مقلب واجيب نضاره جديده تطلع كوبي ؟؟؟ لأ اكيد فيه حل

شكرا للمرور والتعليق

[Innovation]

علي فكرة مغربي ده اكبر نصاب في مصر عشان جبت من عنده نضاره ارماني نظر مكملتش شهرين وقشرت والعدسات بتاعتها اتخربشت وغيروهالي مره وتاني مره قالولي طبيعة بشرتك ومش طبيعه بشرتك وكلام فاضي كده ملهوش اي لازمة

طيب كتر خيرهم يعنى غيروهالك مره .. غيرهم هيقولك ما اعرفكش اصلا ولا انت اشتريتها من عندى :)))))))))

على العموم فداك يا فندم وندور على حد غير مغربي ماينصبش علينا بأه وامرنا لله :)

شكرا جزيلاً على المعلومه دي

[Innovation]

كلامك سليم 100%. يوم الجمعة كنت نازل شارع الأزهر وعند جراج الأوبرا كان واحد واقف بيبيع نظارات راي بان بالجراب الأصلي والكارت والضمان والمنديل ومكتوب على الدراع made in italy والعلامة المائية بتاعة راي بان جوه العدسات والمخدات عليها كلمة ray ban والكلام من بؤه 125 جنيه. يعني لسه ماطحنتوش فصال!!!. مفيش اصلي كل الموجود اوريجينال كوبي او اوريجنال هاي كوبي.

ايوه بس خلى بالك ان خلال الثوره فيه محلات كتير اتكسرت واتسرقت .. وزى ما كان فيه كوتشي اديدس اصلى بيتباع على الرصيف فى الجيزه بخمسين وستين جنيه ممكن بردو النضارات دى تكون اصليه فعلا بس مسروقه واللى بيبيعها مش عارف قيمتها الاصليه ومش متصور انه يقدر يبيعها بأكتر من 125 ج .. وهوه كده بردو كسبان وسعيد جداً .

شكرا بردو على تأكيد المعلومه يا mido51eg .. وربنا يسهل بأه واعرف اجيب واحده اصليه

[Innovation]

لصاحبة الموضوع اختاري الماركة اللي عاوزاها والموديل اللي تفضليه وشوفي رقم الموديل وخلي حد يجيبهالك من بره. يااما ترضي بالاوريجينال هاي كوبي ومش هتبقى وحشة. انا برضه لابس عدسات لاصقة طبية وعندي نضارتين ، واحدة بيرسول ودي كنت جايبها من عند العجيل من سنة 2005 والحقيقة هايلة مفيش حاجة قشرت ولا اتجرحت والتانية راي بان كانت جاية لي من بره سنة 2006 وبرضه حلوة.

طيب هحاول اشوف حد بره يجيبهالى معاه ..بس مش قادره اقتنع ان مصر بقت وحشه اوى كده ومافيش فيها غير المضروب والكوبي ..للدرجادى بلدنا بترجع لورا مابتتقدمش ابداً !!!

شكرا على المرور والتعليق وان شاء الله احاول اعمل بنصيحتك لو لقيت حد بره يقدر يجيبلى معاه

[Innovation]

grand optics carrefoure maadi

ماشي نشوف جراند اوبتكس ان شاء الله .. شكرا على المرور و المعلومه :)

[Innovation]

أنا سمعت الكلام دة كتير فعلا

فعلا ناس كتير قالت منير نصيف هوه المضمون .. اعتقد ان له فرع فى شارع طلعت حرب .. انشاء الله احاول افضي نفسي يوم كده واروح اشوفه ..

شكرا للمرور والتعليق

[ehab]

ده اللى فى شارع طلعت حرب ؟؟ والا فيه فروع قريبه فى الجيزه ؟؟
وهل الاسعار عنده معقوله والا ايه ؟

شكرا للمرور والتعليق يا استاذ ايهاب

عناوين الفروع موجودة في المشاركة دي

http://www.nilemotors.net/Nile/3873383466-post9.html

[Innovation]

لازم تروح محل محترم وياريت يكون وكيل او وكيل معتمد للماركه اللى انته عاوزها
الماركات الجامده بس هى اللى ممكن تلاقى سعرها فوق الالف
فيه ماركات كتير ايطالى وسعرها معقول
لكن فيه حاجه ودى عن تجربه حتى الاصلى بتاع مصر موش زى الاصلى اللى بره
مثال شوفت نضاره بولس بره وشفتها هى هى جوه مصر اختلاف كبير فى الخامه ليه ماعرفش
حتى الفنلات بتاعت اللعبين فى اديدس شوفتها بره نفس الفنله بس الخامه فرق السما والارض
احسن حد يكون ثقه يجبلك الديزين اللى انته عاوزه من بره وصدقنى ممكن تكون ارخص من اللى حاتشتريها هنا

طيب ان شاء الله احاول اشوف حد بره مصر واختار من على النت موديل واطلب منه يشتريهولى .. ربنا يسهل بس والاقي حد اثق فيه

شكرا على المرور والنصيحه