اخواتنا في المنتدي: منين اجيب لبس منتقبات في مدينة نصر

[shaddadfalcon1]

السلام عليكم ورحمة الله وبركاته
اخواتنا واخوانا المتجوزين وغير المتجوزين عايز اجيب لبس لزوجتي من مدنية نصر او مكان قريب منها بس لبس خروج شيك ويطابق الشريعه مش بتاع اليومين دوول الضيق والمبهرج ولو عايز اجيب ملحفه اجيبها منين وياريت العناوين والاسعار لو ممكن

وياسلام لو تقولولي علي مكان لبس اطفال بالمره يبقي قشطه

جزاكم الله خيرا مقدما

[أحمد الجندى]

الوحيد اللى اعرفه هو السلام شوبينج سنتر وده فى ميدان الاسماعيلية وعلطول بخلى مراتى تجيب منه أو من فرع المعادى بس برضو أنا مش راضى عنه قوى ... ياريت لو حد يفيدنا بملابس محجبات بس تبقى ملابس محجبات بجد يعنى اللبس يبقى واسع لا ضيق من الوسط أو الصدر وكمان يبقى عنده مقاسات كبيرة يبقى عمل فينا خير كبير وياريت مايبقاش مقتصر على مدينة نصر بس

[mesaharaty]

فيه كام محل كده على ما أتذكر :
1- محل أبو الفدا فى العتبة (مبنى الجراج) وده زى سنتر للحاجات دى .
2- فيه مول (عمارة كده) جنب صيدناوى العتبة فيه محلات كتيرة كلها لملابس المنتقبات وإكسسواراتها كمان وبسعر الجملة وحاجات مش وحشة .
3- عندك فى شارع العزيز بالله - متفرع من جسر السويس - فيه محلات كتير لهذا الغرض .

طبعا دى أماكن بس الأذواق بتختلف يعنى يمكن تعجب حضرتك ويمكن لأ .

بالتوفيق

[shaddadfalcon1]

طيب ممكن للأفاده كل واحد يقول علي المكان ولو في فكره عن الأسعار وازاي اروح بالعربيه او مواصلات

[أحمد الجندى]

فرع السلام اللى فى ميدان الاسماعيلية ده مكانه فى مصر الجديدة أعتقد انت لو وصلت لميدان الحجاز وسألت عن الميدان الف من يدلك اما عن فرع المعادى فهو جنب المركز الاوليمبى.

بالنسبة لأول محلين اللى فى العتبة تقدر تروحلهم عن طريق صلاح سالم ثم نفق الازهر وأول ما تطلع من النفق شوفلك ركنة فى اول مكان تلاقيه أو روح على جراج الاوبرا وريح نفسك

[أحمد كمال]

R Squared - مصطفى النحاس بجوار فودافون

[ehab_mansour]

المكان الأكثر شهرة في هذا الاتجاه هو شارع العزيز بالله بالزيتون وده هتلاقي فيه كل حاجه ان شاء الله و تقريبا كل المحلات هناك شغاله في لبس المنتقبات
هو عموما شارع متفرع من جسر السويس وانت رايح من ميدان التجنيد باتجاه وسط البلد هو علي يمينك ولكنه خارج باتجاه جسر السويس يعني لو عايز تروحه هتدخل من شوارع جانبيه قبله عشان تخرج فيه و يكون اتجاهك صح مع اتجاه سير العربيات ولو سألت هناك هتلاقي كتييييييييير يدلك لأنه مشهور جدا

[wael30003]

واضح انك من اسكندرية
ممكن اعمل لك خدمة وانزل اسألك عشان تيجى تشترى على طول وتلحق تروح عشان الدنيا هنا زحمةقوى وفى نفس الوقت اخد ثواب لان زوجتى منتقبة فالموضوع هيكون سهل واعتقد ان فيه فى اسكندرية اماكن للبس المنتقبات لان اكيد فى سيدات منتقبات فى اسكندرية بدل ما تدب المشوار لفاية هنا واعتقد ان الاخ اللى قالك فى العزيز بالله فعلا فيه كل حاجة ولو عايز انزل مصر النهارده فى العيد قبل الزحمة او اسال فى اسكندرية اسهل لك وانا فى الخدمة

[fineart607]

فى محمل فى جنينه مول الدور الأرضى روعة ملوش حل قمة التنوع والشياكة احنا جربناه ومحترم جدا وكمان فى واحد اسمه البروفيسير فى العاشر من رمضان ملوش حل بس بيفصل كانك مشتريه جاهز ماشاء الله عليه

[Eng_hatemfathy]

أخى الكريم طلبك غالبا يحتاج تفصيل لانة لم يسم ولم يصف فهل الاخت ترتدى اسدال/ادناء ام عباءة ولو عباءة اهى سوداء ام ملونة
لو اسدال فالامر يسير لان هناك الكثير من المصانع لتفصيل لباس المنتقبات ومنهم طبعا بشارع العزيز بالله والعتبه وامبابة وشبرا
اما بالنسبة للعباءة فلا اظن ان هناك جاهز محترم لان كل اللى فى السوق تقريبا مفسد للحجاب فيما عدا النادر من العباءات او بمعنى اصح بلاطى او دريلات واسعة عند الهدى للمحجبات هتلاقيها الوانها هادية ومفيش فيها تطريز وربنا يرزق نساءنا الحجاب والحياء والعفة

[shaddadfalcon1]

أخى الكريم طلبك غالبا يحتاج تفصيل لانة لم يسم ولم يصف فهل الاخت ترتدى اسدال/ادناء ام عباءة ولو عباءة اهى سوداء ام ملونة
لو اسدال فالامر يسير لان هناك الكثير من المصانع لتفصيل لباس المنتقبات ومنهم طبعا بشارع العزيز بالله والعتبه وامبابة وشبرا
اما بالنسبة للعباءة فلا اظن ان هناك جاهز محترم لان كل اللى فى السوق تقريبا مفسد للحجاب فيما عدا النادر من العباءات او بمعنى اصح بلاطى او دريلات واسعة عند الهدى للمحجبات هتلاقيها الوانها هادية ومفيش فيها تطريز وربنا يرزق نساءنا الحجاب والحياء والعفة

زوجتي بتلبس عبايا او اسدال بس العبايات اكتر وكل مره بنشتري حاجه بيطلع عينا عشان نلاقي حاجه محترمه

[shaddadfalcon1]

r squared - مصطفى النحاس بجوار فودافون

باشا ده موقعه ايه من الأعراب من شارع عباس العقاد او مكرم عبيد؟ يعني انا عارف مصطفي النحاس من عند تقاطع الشارعين دوول

واضح انك من اسكندرية
ممكن اعمل لك خدمة وانزل اسألك عشان تيجى تشترى على طول وتلحق تروح عشان الدنيا هنا زحمةقوى وفى نفس الوقت اخد ثواب لان زوجتى منتقبة فالموضوع هيكون سهل واعتقد ان فيه فى اسكندرية اماكن للبس المنتقبات لان اكيد فى سيدات منتقبات فى اسكندرية بدل ما تدب المشوار لفاية هنا واعتقد ان الاخ اللى قالك فى العزيز بالله فعلا فيه كل حاجة ولو عايز انزل مصر النهارده فى العيد قبل الزحمة او اسال فى اسكندرية اسهل لك وانا فى الخدمة

انا من الأسكندريه بس دلوقتي عايش مؤقتا في القاهره وفي الأسكندريه بيطلع عيني عشان الاقي حاجه عدله ومحترمه ومفيش غير كام محل زي المحجبه والمسلمه بس دوول غاليين فحت يعني اقل حاجه فوق ال 1000 وكده كده دلوقتي مش بروح الأسكندريه خالص فمش هينفع اشتري منها

[أحمد كمال]

مصطفى النحاس ... و انت جاي من عباس على مكرم .... كمل و اقطع مكرم و كمل طوالي .... هو بعد تقاطع مكرم بحوالي 200-300 متر على شمالك ...... بعد مكدونالدز و فودافون بحوالي 50-100 متر ...... محل راقي جدا و شيك جدا بس هيعورك في الفلوس جدا جدا جدا ههههههههههههه

[shaddadfalcon1]

محل راقي جدا و شيك جدا بس هيعورك في الفلوس جدا جدا جدا ههههههههههههه

كام غرزه تقريبا ؟

[M.Hosni]

فيه كمان بريوني في شارع البطراوي اللي هوه فيه جنينة مول , جنب بيتزا كينج في اول الشارع من ناحية عباس العقاد
2R-Squared حلو بس اعاره حلوة قوي :) يعني العبية في حدود 500 - 600