هو انا لازم اصاحب الصنايعي ؟؟؟!!!!!!!!!!

[khaloooda]

مش بيعجبني اللغة اللي بعض الناس بشوفها بتتعامل بيها مع الصنايعي
الواحد منهم بيتصاحب عليه وهو عارف انه احط خلق الله
وتسمع كلام من عينة ( تؤمر يا بوب - احنا بتوعك يا ريس - من عينيا يا غالي .....
وكأنهم راضعين علي بعض

ولو كلمت واحد صاحبك يقولك ما هو لازم اتصاحب عليه عشان يخلص لي العربية وميخدش مني كتير
مع احترامي ..

في النهاية ده صنايعي
يعني علي المستوي الانساني معتقدش ان هيكون بينك وبينه اي تواصل انساني او ثقافة مشتركة
علي المستوي النفسي : انا شخصيا لم اتعامل حتي الان مع صنايعي محترم واعتبر الصنايعية زي بالظبط فئة سواقين الميكروباص : عاوزين الحرق
علي المستوي الخلقي والشرعي والتربوي : فالغااااااااالبية العظمي منهم حرامية

وفي الاول وفي الاخر انا ليه شغلي يتعمل في العربية بما يرضي الله
وانت ليك فلوسك حق ما تعبت وبذلت مجهود

اكتر من كده مفيش

[minicooper20]

الكلمه الحلوه صدقه
تانى حاجه كل فئه فيها الحلو و الوحش و الصنيعايه نفس الكلام
هتخسر ايه ياعنى لو خدت و اديت معاه فى الكلام ماهو انسان زى وزيك و فيه صنيعايه فى الاصل مهندسين ياعنى
مش لازم تخليه ياخود عليك بس هوانسان برضو ياعنى
انا عن نفسى ممكن اعود اشرب معاه شاى
و فى الاخر كلواحد حر فى التعامل مع الناس بس انا مش شايف اى عيب انى اعمل الصنايعى حلو
اما بالنسبه للنقطه بتاعت لو صحبتو هيخلصلى شغلى بسرعه فالصنايعى المحترم هيخلص بسرعه سواء صاحبتو او لا
و خد بالك كل مكان لسانك حلو مع الناس كل معملولك حاجتك و هما مرتحين
زى البواب و السايس بيتاع الجراج و كل الفئات

[icehearted girl]

مش عاجبني لغة التعالي دي..يعني ايه احط خلق الله؟؟؟؟

ويعني ايه دا صنايعيي..ما المهندس صنايعي والدكتور صنايعي

ولو في اختلاف فلمستوي تقدر تسميها توطيد علاقة بالميكانيكي لانه ن اكتر الناس اللي هتتعامل معاها باستمرار....يعني مش هتعرفه مرة وتجري..دي العلاقة مستمرة

[heshamzaky]

بص يا باشا حا اقولك رايى بصراحة شديدة
الاول من تواضع لله رفعة
هو بنى ادم و كلنا بنى ادمين الفرق واحد اتعلم و اشتغل اى شغلة و هو اشتغل حرفى
مش معنى كدة انى اقلل من شأنة
ممكن ترفض مصاهرة او تناسبة دة ماشى بسبب وضع اجتماعى معين
الفكرة انك لما بتتكلم معاة و لسانك بيكون حلو مش للمصلحة الكلمة الحلوة صدقة و فية ذكاء اجتماعى و طالما مش حا يضرك اية المانع ما اشرب معاة شاى مفيش اى مشكلة

فية مثل بيقولك خاطبو الناس على قدر عقولهم
و صدقنى لو انت بتتعامل معاة كويس حا يديلك عنية الموضوع مش موضوع اجرة بتتدفع و دى حقة لآ الموضوع موضوع مودة و رحمة

الرسول علية الصلاة و السلام كان طيب و لين القلب علشان كدة الناس ألتفت حولة
لو غليظ القلب لانفضو من حولة


مسيرك تدخل الجيش و حا تتصاحب على أشكال و الوان و اصناف من البشر و تاكل و تشرب و تنام معاهم لو حسو للحظة عفوا فى الكلمة بأى نبرة تعالى حا يكرهوك و انت شخصيا حا تتعب و تتضايق و لو الدنيا ماشية و الامور حلوة الوقت بيعدى و الحياة بتبقى سهلة و كلة بيهون
و فية مثل بيقولك حبيبك ياكلك الزلط و عدوك يتمنى لك الغلط


مشى امورك هو عقليتة كدة مش حا يضرك بالعكس حا تتعلم منة و تستفيد و جيبلة شاى اديلة سيجارة كدة عنى الحياة ابسط من ذلك
و ان الله لا ينظر الى وجوهكم و لكن ينظر الى اعمالكم و كلنا سواسية

[mohammedabdallh]

بص يا باشا
كلنا ولا د تسعه
ومينفعشى تتعالى على حد
وايه المشكله لما تصاحب اى حد صنايعى على الاقل هيكون صادق معاك ونفس الوقت هيوفر عليك وقت + الفلوس شويه بمعنى مش هيلسعك اوى فى الفلوس
وكل واحد له رايه فى الموضوع ده

[Eng.Geo]

انا بحب الناس بقي
أي حد بتعامل معاه ... طالما بيعاملني كويس أعامل كويس جدا جداااااااا
ولو مابيعاملنيش كويس ... بعامله كويس
انا متصاحب علي صنايعية البلد كلهم
أي حد بيحط أيده في العربية ماقدرش أبقي واقف جمبه زي اللي شغال عندي
لازم أفتح موضوع ويهزر ونهزر
انا مش عاجبني كلمة أحط خلق الله !

[رزق]

و خد بالك كل مكان لسانك حلو مع الناس كل معملولك حاجتك و هما مرتحين
زى البواب و السايس بيتاع الجراج و كل الفئات

مش معاك
احنا عندنا في العمارة البواب اللي فات احنا كنا بنعمله زي أي حد كويس قوي لكن كان بيسوق فيها شايفنا ناس ماتخلصش
إنما كان معانا ناس بيتبهدلهم ينافزلهم الامر وقتي
اديك مثال
أنا عربيتي كنت اترجاه عشان ينضفها الصبح
في معانا ناس شديدة بقى كان يصحى بدري عشان يغسلهم العربية عشان لو معملش كده حيطلعوا عيينه

[ganash]

قال الله تعالى (تلك الدار الآخرة نجعلها للذين لا يريدون علواً في الأرض ولا فساداً والعاقبة للمتقين)

[khaloooda]

هو ليه يا جماعة انتو اخدتو كلامي علي انه تعالي
لا والله وربنا يعلم
انا بس كل الصنايعية اللي اتعاملت معاهم وخااااصة صنايعية العربيات كانوا فعلا .......

فانا كان بيستفذني لغة البعض معاهم اللي مش بتكون من باب التواضع ولا ان احنا ولاد تسعة ولا الكلام ده
وبعدين هو انا بخسته حقه

وكمان ياريت اللي اتصاحب عليه
رد عليه الصنايعي الصحوبية او الكلمة الحلوة دي بشغل نضيف وراعي ضميره
الا برضه سرقه

انا بحكي علي الصنايعي اللي عاوزني اصاحبه وادلع في جنابه عشان يتكرم ويعملي شغلي
وياريته بيعمله بما يرضي الله

بس

والحمد لله بعامل كل انسان بما يستحق
يعني مثلا عندنا اتنين بوابين واحد امين ومحترم جدا وبيراعي اكل عيشه
اشيله فوق دماغي
ومستحيل ارن عليه او اصحيه بعد ورديته في العمارة ما تخلص

كذلك سايس الجراج ... نفس الفكرة

الفكرة مش فكرة تعالي او حاجة كده
الفكرة فكرة ان كل واحد ياخد حقه
الصنايعي بيطلب اجرته علي الشغل بديهاله وانا راضي
منتظر من شغل كويس .. زي ما اخد مني فلوس كويسه

برضه الشغل زباله

ولما يبقي كلامك معاه علي الاد وباختصار
تبقي زبون اتم
لكن لما هو يمشورك ويبعتك ويبوظلك حاجة في العربية عشان مش فاهم
وفي الاخر يرفض يعترف بغلطه ويقولك : لا يا بيه ما هي عربيتك هي اللي كده

يا جماعة انا في صنايعي لففني الحرفيين كلها واخدت معاه يومين تقريبا علي فيشة في العربية
وكان هيخليني اروح اجيب حساس من التوكيل تمنه اكتر من 600 جنيه عشان هو مش فاهم
وبتكلم معاه : يقولي معلش اصل انا بشتغل في عربيات كذا وكذا ، ومش بشتغل في عربيتك
امال اخدتها ليه
قولي ماليش فيه

يا مؤمن ده انا عندي نقاش شغال في شقتي بقاله اكتر من 5 شهور
5 شهووووووووووووووور بيدهن في شقة
وواخد فلوس وبدلع فيه وغدا وشاي وقهوة واللي هو عاوزه
ومفيش شغل

ده مثال بسيط من اللي اتعاملت معاهم من الصنايعية
ارجو ان الصورة تكون وصلت

[Dr_Mido]

وجهات نظر مرفوضه بصراحه ليه احط خلق الله مهو لو جالك عيادتك لو انت دكتور هتقله اتفضل حضرتك ولو انت مهندس وهو جاى يبنى حاجه هتقله اتفضل حضرتك برضه وعلى فكرة اعرف صناعيعيه كتير جدا على المستوى الانسانى انضف من دكاترة جامعه اعرفهم انا كفايه ان الكهربائى بتاعى نزلى الساعه 4 الفجر فى عز البرد علشان عطلت على الدائرى

[charming]

يا اخى من تواضع لله رفعة مقامآ بين الناس و لا تمشى فى الارض فرحا
و كلنا سواء مفيش فرق بينى و بينك و بين الصنايعى اللى بيعملك خدمة بياكل من وراها عيش و زمن الطبقيات انتهى خلاص و زمن البشوات المودرن بتوع الاوامر كمان انتهى حان الوقت انك تفكر بموضوعية و تكون عارف انة ممكن يكون افضل منك عند الله

[SheNo0o]

والله انا شايف ان الكل جه عليك علشان طريقه الكلام والصياغه مش اكتر
وعلشان انت قلت كلمه احط خلق الله وشكلك خارج من تجربه او مجرب ناس كتير من نوعيه الصنايعيه الي مش كويسين

بس انا معاك ان مفيش صنيعي بيعمل شغله علي اكمل وجه ومفيش صنايعي مش حرامي بدون ما اكون بعمم او بدون هجوم منكم مع احترامي لكل وجهات النظر يعني

مفيش صنيعي من الي قابلتهم علي الاقل يستاهل معامله حلوة او يستاهل من اصله ان الواحد يروحله وياريتهم بيعملوا شغلهم علي البيكوا زي ما ديما بسمع انما شغل اي كلام وفلوس اكتر وميستحقوهاش

[khaloooda]

يا اخى من تواضع لله رفعة مقامآ بين الناس و لا تمشى فى الارض فرحا
و كلنا سواء مفيش فرق بينى و بينك و بين الصنايعى اللى بيعملك خدمة بياكل من وراها عيش و زمن الطبقيات انتهى خلاص و زمن البشوات المودرن بتوع الاوامر كمان انتهى حان الوقت انك تفكر بموضوعية و تكون عارف انة ممكن يكون افضل منك عند الله

مال زمن البشوات باللي انا اقصده
واوامر ايه اللي حضرتك استنتجت اني بديها لحد
وانا متكلمتش في منزلته عند ربه ... دي يعلمها اللي خلقه بس

لكن معلش ..
انت لما صنايعي يبوظلك عربيتك
ويدفعك فلوس تصليح حاجة هو اللي بوظها
كنت عرفت انا اقصد ايه
لما صنايعي يمشورك عشان حضرته مش عارف هو عاوز ايه مكنتش قلت كده

لما عربية تتصلح في اسبوعين بالكتير
تاخد 3 شهور
كنت عرفت انا اقصد ايه

ياريت تكون الرؤية وضحت

[khaloooda]

والله انا شايف ان الكل جه عليك علشان طريقه الكلام والصياغه مش اكتر
وعلشان انت قلت كلمه احط خلق الله وشكلك خارج من تجربه او مجرب ناس كتير من نوعيه الصنايعيه الي مش كويسين

بس انا معاك ان مفيش صنيعي بيعمل شغله علي اكمل وجه ومفيش صنايعي مش حرامي بدون ما اكون بعمم او بدون هجوم منكم مع احترامي لكل وجهات النظر يعني

مفيش صنيعي من الي قابلتهم علي الاقل يستاهل معامله حلوة او يستاهل من اصله ان الواحد يروحله وياريتهم بيعملوا شغلهم علي البيكوا زي ما ديما بسمع انما شغل اي كلام وفلوس اكتر وميستحقوهاش

الحمد لله

[charming]

مال زمن البشوات باللي انا اقصده
واوامر ايه اللي حضرتك استنتجت اني بديها لحد
وانا متكلمتش في منزلته عند ربه ... دي يعلمها اللي خلقه بس

لكن معلش ..
انت لما صنايعي يبوظلك عربيتك
ويدفعك فلوس تصليح حاجة هو اللي بوظها
كنت عرفت انا اقصد ايه
لما صنايعي يمشورك عشان حضرته مش عارف هو عاوز ايه مكنتش قلت كده

لما عربية تتصلح في اسبوعين بالكتير
تاخد 3 شهور
كنت عرفت انا اقصد ايه

ياريت تكون الرؤية وضحت

كدة يبقى بتتكلم على حالة خاصة و ليست عامة تنطبق على صنايعى و احد او اثنين معدومى الضمير و الصنعة نتيجة تجربة شخصية فى الحالة دى حاجة من الاثنين متتعملش معاة تانى و فوض امرك الى الله و اعرف ان مفيش حد بيتعلم ببلاش ونتيجتة انك هتبدى تتجة للأماكن الاصلح للصيانة عربيتك

لو مضايقك اللى هو عملة وحاسس انة نصب عليك و قلل من شأنك يبقى لا تترك حقك