ولي العهد عايز يستحمى

[Ahmed A Rahman]

الى الاصدقاء الأعزاء


سيرزقني الله في الايام المقبلة بولي العهد حامي حمى الجوار وامين لجنة سياسات العائلة

وحيتولد في شهر 12 الجاي في عز البرد

عايز دفاية ادفي لحضرته الحمام عشان ميجيلوش نزلة شعبية

جربت قبل كده الهالوجين وحسيت انها مش صحية
جربت قبل كده السلك اللي بيحمى وادامه مروحة وشميت ريحة شياط

هل مفيش حاجه ادامي غير الزيت ؟؟؟؟

انا عندي دفاية زيت 11 ريشة توشيبا العربي
مش حاسس انها بتعمل حاجه في الاوض العادية او الريسيبشن
هل احطها في الحمام ولا فيه حاجه احسن ولا اجيب حاجه اصغر
ولا احطها في الحمام واجيب حاجه اكبر

حد ليه خبرات في الموضوع ده ؟؟؟؟

[ashouhdy]

لفة ببطانية متخفش قوى كدة دول عفاريييييييت .....الف مبروك وربنا يباركلك فية

[zago]

الف مبروك
اخترناه وبايعناه :)

حضرتك كده جربت كل حاجه مش باقي غير انك تولع حطب في الحمام
:)

[Hossam_Hassan]

اولا مبروك، بص انت تشغل المياه السخنة على الفاضى تعمل شوية بخار و تدفى الحمام قبل ما الباشا يدخل بربع ساعة، ونصيحة حاول ما تبالغش فى تدفئته عموما علشان ما يتعبش و مناعته تضعف.

[MOUSTAFA_SAAD]

الف مبروك
اخترناه وبايعناه :)

حضرتك كده جربت كل حاجه مش باقي غير انك تولع حطب في الحمام
:)

ههههههههههههههههه
نفسى افهم انت بتالف الردود دية منين

[abogogo]

معلش هو الطفل المولود حديثا بيستحمى في الحمام يادكتور ..!!! من واقع الخبرة السابقة في عروستين عندي اولا الطفل لما تحميه خصوصا حديث الولادة بتشتري بانيو بيبي بيكون بلاستيك وعلى مقاس الطفل وفي حجرة النوم وبشوية مياه دافئه وشامبو اطفال وقطعة إسفينج ويستحمى في حجرة النوم بعد غلق جميع اماكن تيارات الهواء شباك او باب وياريت تدفي الحجرة بدفاية وتحط حاجه تحت عقب الباب وبعد ماتحمي البيبي مايخرجش من الاوضة يرضع وينام على طول .... لأنك لو حميته في الحمام هتخرج به على جو الشقة ممكن لا قدر الله ياخد برد .... وربنا يكرمك ويبارك لك فيه ويكون صالح بأذن الله
صور البانيو

[Hamdy Masria]

معلش هو الطفل المولود حديثا بيستحمى في الحمام يادكتور ..!!! من واقع الخبرة السابقة في عروستين عندي اولا الطفل لما تحميه خصوصا حديث الولادة بتشتري بانيو بيبي بيكون بلاستيك وعلى مقاس الطفل وفي حجرة النوم وبشوية مياه دافئه وشامبو اطفال وقطعة إسفينج ويستحمى في حجرة النوم بعد غلق جميع اماكن تيارات الهواء شباك او باب وياريت تدفي الحجرة بدفاية وتحط حاجه تحت عقب الباب وبعد ماتحمي البيبي مايخرجش من الاوضة يرضع وينام على طول .... لأنك لو حميته في الحمام هتخرج به على جو الشقة ممكن لا قدر الله ياخد برد .... وربنا يكرمك ويبارك لك فيه ويكون صالح بأذن الله
صور البانيو

كنت داخل اقول نفس الكلام بس حضرتك سبقتى
اوعى يا دكتور تحمية برة غرفة النوم مش هيستحمل
ربنا يبارك فية ويجيلك على خير ان شاء الله

[icehearted girl]

بلاش فكرة تدفيله الحمام ي خالص لان الجو بيكون سخن يطلع برة فلهوا ياخد برد بردوا مش حل

بص

حضرتك اولا متحميهوش فلحمام..والله بتكلم جد.. ف اوضة النوم تقفل الباب وتجيب بانيو بلاستك صغنتوت كدا....ومية دافية وتحميه ف خلال 5 دقايق بلكتير..والموضوع دا مش كتير..يعني مرة كل اسبوعين تلاتة مثلا..غير كدا الحموم يكون علناشف..قطن مبلول بمية دافية ولوسيون..وتعري جزء جزء من جسمه وتمسحهوله..بس هو يشرف بالسلامة بس

[zago]

ههههههههههههههههه
نفسى افهم انت بتالف الردود دية منين

ده انا كنت حكتبله يجيب غساله فول اوتوماتيك بالمجفف
وكده يتغسل وينشف على طول
بس خفت الناس تفكرني بهرج
:)

[zago]

البانيو البلاستيك ده بيتباع في كارفور المعادي
ب 170 جنيه تقريبا
بس اييييييه مقولكش
حاجه كده اخر الاجه :)
وفيه سداده زي بلاعه البانيو العادي
ومكان تحط فيه الصابونه
والارضيه بتاعته مبتزحلقش
حاجه فعلا تليق بمقام امين لجنه سياسات :9

[abogogo]

البانيو البلاستيك ده بيتباع في كارفور المعادي
ب 170 جنيه تقريبا
بس اييييييه مقولكش
حاجه كده اخر الاجه :)
وفيه سداده زي بلاعه البانيو العادي
ومكان تحط فيه الصابونه
والارضيه بتاعته مبتزحلقش
حاجه فعلا تليق بمقام امين لجنه سياسات :9

الله يرحمك يا أمي ... على ايامي ... وانا مولود في اوائل السبعينيات ماكنش في بانيو بلاستيك والرافاهيه الموجوده حاليا البلد كانت خارجه من حرب .... كانت بتحميني في طبق الغسيل البلاستيك كان طفره ساعتها بعد الطشت الالومنيوم والطشت النحاس ... انا موعاش هما اللى بيحكولي وكانوا بيدفوا الاوضة بالباجور النحاس ابو كباس ماكنش فيه دفايات

[shaddadfalcon1]

اي حاجه كبيره وحطه فيها في اوضة النوم وشكرا
مراتي كان عندها باستله كبيره او حاجه بلاستيك شبه الكروانه كانت بتدفي فيها المياه وتجيبها جنب السرير وتنقعه فيها لحد ماينضف وبعدين ترميه علي السرير

ولما الدنيا تبقي ساقعه قوي كانت بتجيب مناديل مبلله من ام جنيه ونص وتمسح بيها جسمه من عير مياه خالص عشان مياخدش برد

في الصيف بقي هتلاقيه فاكر نفسه قرصان البحار

[أحمد كمال]

يابني ليلى مولودة 31 ديسمبر يعني عز عز البرد و الشقة كانت تلاجة و كنا بس بنقفل باب و شباك الحمام ..... فيه ايه يابني انت نسيت و لا ايه ...... بطل أفورة بقى !

[نور القمر]

ربنا يجيب البيبي بالسلامة
اي دفاية تدفي بيها الحمام او اوضة التوم قبلها بربع ساعة
انا بدفي الحمام بالدفاية العادية دي اللي فيها حاجة زي اللمبة النيون
ولما انشفهم اطفيها عشان الجو يهدى تدريجي والبسهم والفهم بالبطانية تمام وعلى السرير طوالي
وبلاش حموم كتير في الشتا
ممكن غسيل للراس بس ومسح الجسم
والجزء السفلي كدة كدة بيتغسل يوميا مرة على الاقل

[pro_samir]

مش عارف ليه الموضوع فكرني بالأخ اللي كان حران خد خافض للحراره

يشرف بالسلامه يا دكتور ، أنا برضو اول مره اعرف ان في حد بيحمي بيبي صغير كده في الحمام