موكيت ولا قنال تكس

[M_55]

السلام عليكم يا اعضاء المنتدي
كنت عاوزة اسأل عن افضل طريقة لتغطية البلاط
انا فكرت الاول اني افرش الشقة كلها موكيت بس خوفوني من مشاكله
فاقترحوا عليا القنال تكس وقالولي انه مشمع بتلزق علي البلاط بمادة معينة وفي اشكال كتير
بس انا ماليش خبرة في الموضوع ده ، فكنت عاوزة اعرف لو حد عنده خبرة مشابهة وتعامل مع شركات مضمونة . كمان كنت عاوزة اعرف رنج الاسعار لان انا مش عاوزة تكلفة كبيرة لانها شقة ايجار .

ولو فيه حلول تانية ( بعيدا عن تكسير البلاط ووضع سيراميك لانه مكلف ومرهق ) ارجو الافادة وابداء المشورة

وشكرا لحضراتكم بجد

[M.Elgergawy]

اعتقد القنال تكس هيكون موفر وخصوصا انها شقة ايجار يعني فترة معينة وهتسبيها وهسالك ناس عاملين القنال تكس وهرد عليكي :)

[AmatoALLAH]

اعرفي سعرمتر الموكيت بكام و سعر متر الكنالتكس بكام و قارني بينهم و طبعا ماتسيش سعر اللزق تحسبيه معهم

و راي كمان تسالي عن الاتش دي اف الصيني اعتقد سعره هيكون مقارب للموكيت و اكيد احلي

[aboomar22]

على فكرة السيراميك ممكن يركب فوق البلاط وبتلصق بمادة مش ب اسمنت ورمل وبيبقى مش وحش بس هو بيعلى الارض مسافة البلاطة اللى بتركب هو الاحسن التكسير بس دى بهدلة ودوشة انا اخويا مركب فوق البلاط ومطالع كويس واظن القنال تكس غير مشمع الارضيات صح كده ده حاجة وده حاجة تانيى

[M_55]

اعتقد القنال تكس هيكون موفر وخصوصا انها شقة ايجار يعني فترة معينة وهتسبيها وهسالك ناس عاملين القنال تكس وهرد عليكي :)

شكرا لحضرتك ، ومنتظرة الرد

على فكرة السيراميك ممكن يركب فوق البلاط وبتلصق بمادة مش ب اسمنت ورمل وبيبقى مش وحش بس هو بيعلى الارض مسافة البلاطة اللى بتركب هو الاحسن التكسير بس دى بهدلة ودوشة انا اخويا مركب فوق البلاط ومطالع كويس واظن القنال تكس غير مشمع الارضيات صح كده ده حاجة وده حاجة تانيى

أعتقد السيراميك فوق البلاط مش هايبقي كويس واعتقد تكلفته عالية ، وممكن صاحب الشقة يرفض ، لكن المشمع اعتقد هايبقي افضل

اعرفي سعرمتر الموكيت بكام و سعر متر الكنالتكس بكام و قارني بينهم و طبعا ماتسيش سعر اللزق تحسبيه معهم
انا مش عارفة اسعار خالص ، بس اكتر من حد قاللي ان الموكيت له مشاكل كتير في التنظيف ؟

و راي كمان تسالي عن الاتش دي اف الصيني اعتقد سعره هيكون مقارب للموكيت و اكيد احلي

دا زي الباركيه يعني ، بس اعتقد هايكون غالي ، ولا ايه ؟

[محمد عز]

الموكيت درجات وأسعار متفاوتة

عيبه

محتاج تنظيف فورى واهتمام زائد وخصوصا فى حالة وقوع مياه

ميزته

مش هتاجى اى سجاد نهائى

القنالتكس (فينيل) ميزته اشكال والوان لاتنتهى + فيه المصرى والصينى

تركيبه سهل جدا ومش بياخد وقت

والمتر ممكن يتكلف فى حدود من 40 جنيه بالتركيب

و فيه حاجات منه بتبقى شيك وسهل جدا تقدرى تتدخلى الالوان مع بعض

انصحك بالفينيل لسهولة تنظيفه

[MRBEBO]

بتهيئلي الموكت احلى .... كان عندنا المشمع ده وكان شكله غبى جدا



بصراحة لا بديل عن السيراميك وان كان الموكت احلى من وجهة نظري

[zkralla]

الموكيب بيعمل مشاكل لانه صعب التنظيف
القنالتكس افضل وبيبدا من 15 جنيه للصينى وليه سوق فى الرويعى بالقرب من ميدان العتبة والمصرى فى حدود 25 جنيه والاسعار ديه من غير الغرا ولا مصنعية التركيب
القنالتكس حلو بس طبعا عمره الافتراضى اقل من السيراميك
بالترتيب
لصق سيراميك على البلاط بالمادة
قنالتكس
..........
موكيت اخر حل

[أبو صلاح]

أنا حدود معلوماتي في الموكيت
شكله معقول وممكن تعملي الغرف كل غرفة لون مختلف
سعره 9-12 ده العادي (هتلاقيهم في العتبة)
في نوعيات تانية بتعدي

المصنعية هتبقى 4-5 جنيه للمتر شاملة كل المواد
وانتي وشطارتك مع الصنايعي في الفصال

(كنا في الشركة بنجيب الصنايعي بيعمل المتر ب 2 جنيه بس طبعا علشان بنعمل معارض باستمرار)

[أبو صلاح]

أنا حدود معلوماتي في الموكيت
شكله معقول وممكن تعملي الغرف كل غرفة لون مختلف
سعره 9-12 ده العادي (هتلاقيهم في العتبة)
في نوعيات تانية بتعدي

المصنعية هتبقى 4-5 جنيه للمتر شاملة كل المواد
وانتي وشطارتك مع الصنايعي في الفصال

(كنا في الشركة بنجيب الصنايعي بيعمل المتر ب 2 جنيه بس طبعا علشان بنعمل معارض باستمرار)

[نور القمر]

الموكيت متعب في تنظيفه والعناية به ومش هتلاحقي عليه لو في اطفال وميغركيش جمال الوانه وهو جديد
في الدول الخليجية بيستخدموه بكثرة بس هم ارضهم رملية لكن احنا عندنا الارض طينية واي شوية تراب في الجو هتخلي الموكيت طييييييين
ده بالاضافة الى انه غير صحي خصوصا بالنسبة للاطفال ومرضى الجهازالتنفسي
القنال تكس كويس ولو غالي عليكي فيه مشمع ارضيات باسعار مختلفةعلى حسب الجودة
لو ممكن تتحملي تكلفة سيراميك فوق البلاط بينفع سواء باللصق او باسمنت عادي
عند ماما عملته فوق البلاط باسمنت واحتاجت تظبط الابواب شوية لان الارض ارتفعت طبعا
خلاصة الكلام من حيث الافضلية
سيراميك كنال تكس مشمع موكيت

[mohabelnegm]

أنا عامل عندى ال hdf السويدى و كان فيه صينى ولكن أنا أخترت السويدى الغالى بس للأسف فى أول اختبار فشل لما حصلت سيول و الميه دخلت من باب البلكونة للشقة و حصل قببان فى الخشب و شكله بقى يزعل (رغم أن القببان حصل فى أماكن مش ظاهرة بس برضة شكلة مزعلنى)

[A.Saad]

القنالتكس كويس فى الشقق ذات الجو البارد
لانه بيحوش البرد
عيبه المياة يفضل تكون بعيد عنه

[akramlail]

أنا عامل عندى ال hdf السويدى و كان فيه صينى ولكن أنا أخترت السويدى الغالى بس للأسف فى أول اختبار فشل لما حصلت سيول و الميه دخلت من باب البلكونة للشقة و حصل قببان فى الخشب و شكله بقى يزعل (رغم أن القببان حصل فى أماكن مش ظاهرة بس برضة شكلة مزعلنى)

انا كنت بفكر اعملة لان السيرامك شكلة بقى وحش عندى
ممكن اعرف اتكلف كام
وتنضيفة اية
وعملى ولا لا

[chicobon]

طيب بدل كل الدوشه ديه جيب سجاد و خلاص بدل الموكيت و القنال تكس تكالف علي الفاضي مدام مش شقتكم يعني السجاد هيغطي البلاط و لو حبيتي تغسليه بيتغسل و يتنضف في سهوله و كمان هتخديه معاكي لما العقد ينتهي و خلاص