موكيت ولا قنال تكس

[M_55]

الموكيت درجات وأسعار متفاوتة

عيبه

محتاج تنظيف فورى واهتمام زائد وخصوصا فى حالة وقوع مياه

ميزته

مش هتاجى اى سجاد نهائى

القنالتكس (فينيل) ميزته اشكال والوان لاتنتهى + فيه المصرى والصينى

تركيبه سهل جدا ومش بياخد وقت

والمتر ممكن يتكلف فى حدود من 40 جنيه بالتركيب

و فيه حاجات منه بتبقى شيك وسهل جدا تقدرى تتدخلى الالوان مع بعض

انصحك بالفينيل لسهولة تنظيفه

طيب حضرتك تعرف شركة معينة بتركب القنال تكس

بتهيئلي الموكت احلى .... كان عندنا المشمع ده وكان شكله غبى جدا



بصراحة لا بديل عن السيراميك وان كان الموكت احلى من وجهة نظري

هو فعلا لا بديل عن السيراميك ، بس لازم تكون شقة تمليك عشان توضب براحتك
طيب المشمع كانت ايه مشاكله عند حضرتك

الموكيب بيعمل مشاكل لانه صعب التنظيف
القنالتكس افضل وبيبدا من 15 جنيه للصينى وليه سوق فى الرويعى بالقرب من ميدان العتبة والمصرى فى حدود 25 جنيه والاسعار ديه من غير الغرا ولا مصنعية التركيب
القنالتكس حلو بس طبعا عمره الافتراضى اقل من السيراميك
بالترتيب
لصق سيراميك على البلاط بالمادة
قنالتكس
..........
موكيت اخر حل

انا فعلا خايفة من الموكيت . وبالنسبة للقنال تكس مفيش مكان غير الرويعي ، عشان البهدلة ودلع الصنايعية والغش

أنا حدود معلوماتي في الموكيت
شكله معقول وممكن تعملي الغرف كل غرفة لون مختلف
سعره 9-12 ده العادي (هتلاقيهم في العتبة)
في نوعيات تانية بتعدي

المصنعية هتبقى 4-5 جنيه للمتر شاملة كل المواد
وانتي وشطارتك مع الصنايعي في الفصال

(كنا في الشركة بنجيب الصنايعي بيعمل المتر ب 2 جنيه بس طبعا علشان بنعمل معارض باستمرار)

شكرا لرد حضرتك ، بس حضرتك تقصد موكيت ملزوق بمادة ؟ ، وده يا تري مايربيش حشرات

[AmatoALLAH]

الاتش دي اف زيه زي الباركيه بس طبعا اختلاف الخامه

و الصيني كان بتركيبه يتكلف 48 جنيه تقريبا للمتر

أنا عامل عندى ال hdf السويدى و كان فيه صينى ولكن أنا أخترت السويدى الغالى بس للأسف فى أول اختبار فشل لما حصلت سيول و الميه دخلت من باب البلكونة للشقة و حصل قببان فى الخشب و شكله بقى يزعل (رغم أن القببان حصل فى أماكن مش ظاهرة بس برضة شكلة مزعلنى)

اي خشب سواء اتش دي اف او باركيه لازم تبعد عنه المياه حتي تنظيفه بيكون من علي الوش و له ممسحه مخصوص

[AmatoALLAH]

اه نسيت اقولك ان فيه كنالتكس شوفته من كام شهر شكله ماتفرئهوش عن الباركيه و الخشب بس سعره بردوا حوالي 50 جنيه المتر علي ما افتكر

[أبو صلاح]

شكرا لرد حضرتك ، بس حضرتك تقصد موكيت ملزوق بمادة ؟ ، وده يا تري مايربيش حشرات

هو بيتلزق بكلا بس من على الاطارف ممكن يتشال بسهولة على فكرة وسهل حد يفكه و يركبه طالما المقاس مظبطوط
هيجيب كولا ويلزق تاني
بس اللي يستحمل الكولا علشان بتعمل دماااااااااااغ


بالنسبة للحشرات أنا صراحة معرف ده تخصص ستات البيوت

[M_55]

الموكيت متعب في تنظيفه والعناية به ومش هتلاحقي عليه لو في اطفال وميغركيش جمال الوانه وهو جديد
في الدول الخليجية بيستخدموه بكثرة بس هم ارضهم رملية لكن احنا عندنا الارض طينية واي شوية تراب في الجو هتخلي الموكيت طييييييين
ده بالاضافة الى انه غير صحي خصوصا بالنسبة للاطفال ومرضى الجهازالتنفسي
القنال تكس كويس ولو غالي عليكي فيه مشمع ارضيات باسعار مختلفةعلى حسب الجودة
لو ممكن تتحملي تكلفة سيراميك فوق البلاط بينفع سواء باللصق او باسمنت عادي
عند ماما عملته فوق البلاط باسمنت واحتاجت تظبط الابواب شوية لان الارض ارتفعت طبعا
خلاصة الكلام من حيث الافضلية
سيراميك كنال تكس مشمع موكيت

شكرا لرد حضرتك

أنا عامل عندى ال hdf السويدى و كان فيه صينى ولكن أنا أخترت السويدى الغالى بس للأسف فى أول اختبار فشل لما حصلت سيول و الميه دخلت من باب البلكونة للشقة و حصل قببان فى الخشب و شكله بقى يزعل (رغم أن القببان حصل فى أماكن مش ظاهرة بس برضة شكلة مزعلنى)

معلش ، ماتزعلش حضرتك لان المفروض ال hdf مايوصلوش مياة ، انا علي حد معلوماتي انه ختي في التنظيف يتم مسحة بموب وقليل من المياه مابالك بالسيول . انا سألت عليه بس النوع الصيني لقيت ان سعره 50 جنيه للمتر بالتركيب ، فمازلت ابحث عن خيارات اقل سعرا لتقليل التكلفة

القنالتكس كويس فى الشقق ذات الجو البارد
لانه بيحوش البرد
عيبه المياة يفضل تكون بعيد عنه

شكرا لرد حضرتك

طيب بدل كل الدوشه ديه جيب سجاد و خلاص بدل الموكيت و القنال تكس تكالف علي الفاضي مدام مش شقتكم يعني السجاد هيغطي البلاط و لو حبيتي تغسليه بيتغسل و يتنضف في سهوله و كمان هتخديه معاكي لما العقد ينتهي و خلاص

ما انا عاملة كدة فعلا ، بس مع اي تغيير في ترتيب الاثاث لتجنب الملل بيظهر اماكن ماكنتش عاملة حسابها وبكون مضطرة لشراء مزيد من المشايات ، كمان تحتاج في الصيف لفرش سجاد صغير احيانا ، وشكل البلاط حقيقي غير محبب لي

[MRBEBO]

المشكلة الوحيدة اللي قبلتني معاه انه قب بعد فترة وكان منظره وحش قوي

مش عارف ازاي مع انه كان راكب كويس جدا ... وطبعا لما عمل كده شيلته وركبت سيراميك

[heshamzaky]

القنال تكس اسرع و اسهل حاجة فى تركيبة
دة بيبقى زى بلاطات كدة مقاس الواحدة 30x30 و بيتلزق بمادة لاصقة قوية جدا و فية منة كذا شكل فية اشكال شبة السجاد و اشكال شبة الباركية
و النوع الكويس موجود عند شركة اسمها (((( سومير ))) خلف الحديقة الدولية بمدينة نصر
و سهل جدا انة يتنقل فى سيارة ملاكى و لو الشركة حا تبيع اكثر من 30 متر بيبقى اللزق مجانا تقريبا هما بيبعتو واحد يلزقة من عندهم
سعر المتر من 25 الى 30 جنية تقريبا

[mohabelnegm]

انا كنت بفكر اعملة لان السيرامك شكلة بقى وحش عندى
ممكن اعرف اتكلف كام
وتنضيفة اية
وعملى ولا لا

هوا بيركب فوق السيراميك كبس فى بعضه فى ساعة زمن و أنا عملت صاله فى الشقة مساحتها تقريبا 4ْx5 و أتكلف على ما أفتكر 2400 جنيه توريد و تركيب . تنضيفه سهل جدا بالمكنسة علشان تلم التراب و بعدين البتاعة ديه اللى فيها شراشيب مع أى ملمع أرضيات خشب و لو مابتحيش ريحة الملمعات ديه يبقى ميه بسيط أوى مع شوية ديتول قليليين أوى فى بخاخة و ترش وتمسح بالبتاعة أم شراشيب و هيديك نتيجة كويسة زى الملمعات

[M_55]

القنال تكس اسرع و اسهل حاجة فى تركيبة
دة بيبقى زى بلاطات كدة مقاس الواحدة 30x30 و بيتلزق بمادة لاصقة قوية جدا و فية منة كذا شكل فية اشكال شبة السجاد و اشكال شبة الباركية
و النوع الكويس موجود عند شركة اسمها (((( سومير ))) خلف الحديقة الدولية بمدينة نصر
و سهل جدا انة يتنقل فى سيارة ملاكى و لو الشركة حا تبيع اكثر من 30 متر بيبقى اللزق مجانا تقريبا هما بيبعتو واحد يلزقة من عندهم
سعر المتر من 25 الى 30 جنية تقريبا

شكرا لرد حضرتك ، بس هل هناك سابقة تعامل مع هذه الشركة ؟؟
وهل في شركات تانية

[heshamzaky]

شكرا لرد حضرتك ، بس هل هناك سابقة تعامل مع هذه الشركة ؟؟
وهل في شركات تانية

العفو على اية
و طبعا سبق التعامل معهم كذا مرة فى تركيب قنال تكس
التركيب مش بياخد اى وقت ساعة زمن يكون ركب و مشى كمان بشرط ان الغرفة تبقى فاضية مفيش فيها اى عفش لسهولة فرش الارض بسرعة
و على فكرة نوع القنال تكس دة اعتقد تايوانى هو مش مصرى على ما أتذكر بس المشكلة ان المعرض الى فى مدينة نصر مفيش عندة اشكال كتيرة و برضو بيعملو أرضيات خشب و اعتقد هو المستورد مش محل بيع
غير الشركة دى يبقى لازم لفة فى وسط البلد

[azmeralda]

القنالتكس ده سىء وكل شوية عايز جرد وتلميع والا شكله بيبقى مجير وبيزحلق عندنا فى الشغل ووحش خالص

[marsguy]

طب ما فيش أخبار عن الـ mdf?

شكراً

[heshamzaky]

طب ما فيش أخبار عن الـ mdf?

شكراً

المتر مش أقل من 80 جنية تقريبا

[akramlail]

انتوا حيرتونا
طب حد يعرف مين بيشتغل فى الباركية الالمانى او الصينى دة هنا ف اسكندرية ومضمون

[M_55]

منتظرين المزيد من الآراء والمقترحات .....