مش قادر أفهم الشباب عايزين ايه !!!

[MaZaGAngeE]

الحمدلله ربنا وفقني و بالتعاون مع ممول مصري عملنا دراسة لمصنع كربونات كالسيوم ( موجود جزء كبير منها في المنتدى هنا ) ..
المهم بعد ما خلصنا انشاءات و تركيبات و اللذي منه .. جه دور العمال و الفنيين و تعييناتهم و تدريبهم ..
هيه دي بقى المصيبة السودة المنيلة بنيلة زرقا

البهوات : دبلوم اي حاجة و طبعا لا بيقروا و لا بيكتبوا و لا يعرفوا حاجة في الدنيا ..
التعيين بعقود عمل و ليهم تامينات و تامين صحي و زي و مواصلات و ساعة راحة في الوردية ...
العمل عمالة انتاج و عمالة عادية و المرتب الصافي 750 جنيه .................
لحد كده حلو ؟

البهوات بقى مش عاجبهم الشغل و مش عاجبهم المرتب
و اللي عايز مكتب
اللي عايز حمامات افرنجي ( مع ان فيه حمامات و غرفة تغيير ملابس للعمال كبيرة )
و اللي بيشتكي ان الميه مقطوعة
و اللي بيدلع و عايزك تتحايل على اهله عشان يعمل حاجة
و البلوة الأكبر غياااااااااااااااااااااااااااااااااااء بلا حدود بعلم كل واحد بالراحة و اشرح 100 مرة و اعمل الحاجة معاه و برضه الحجر يفهم و الافندي لأ ( غياوة مش استهبال )

اللي انا مش قادر افهمه بقى ::::::::::: لما البلد حالها واقف و الدنيا مش مظبوطة و الشغل يوم فيه و 10 مفيش ولاد .................. بيدلعوا على الشغل بتاع ايه !!!!!!!!!؟؟؟
و لما بقفش على حد و اديله على دماغه الاقي المصنع شغال زي الساعة .... يعني لازم اكون قليل الادب مع الناس عشان يعملوا شغلهم ؟ انا بكره الطريقة دي و مش مستعد اني اعملها ...
كمان واحد من البهوات خليته يشتري طلبات للمصنع و الباشا اكتشفت انه بيسمسر عليا و بفواتير طبعا مضروبة ( ده انا ركنته على جنب و بقيت بتعامل مع المورد مباشرة )

ليه لما الناس تلاقي شغل تعمل كده ........... و لما يبقوا مرميين في الشارع يبقى عندهم استعداد يبوسوا رجليك عشان تشغلهم ؟؟؟!!!!!
انا حزين جدا على مستوى الاخلاقيات في العمل ....

[windofchange]

تربية زفت ودين ............ ربنا يجزيك خير علي كل شيء حلو بتعمله معاهم

[KHALED AYMAN]

بص احنا عندنا مصنع :)
انا مش هقول رايى فى كلامك لان الناس هتزعل منى و هتفهمنى غلط
كل الى اقدر اقولهولك
تعايش مع الوضع و متاخدش حاجه على صدرك ..عشان متتعبش
هتشوف السرقه بعينك بص الناحيه التانيه ..
العامل غبى ..عادى بيتغابى عادى
بيدلع عادى
بيهرج عادى
منفسن عادى
انت لسه لما تدخل فى مرحله ان المصنع يكبر و تبدأ تطور من نفسك
هتلاقى العمال كلهم جايين يستلفو منك ..الى بيتجوز والى خلف والى تعبان كده يعنى
يااااااااااااااااااااااااااااااااااااااااااااااااا اااااااااارب اكرمنا بعمال "نضاف" من بنجلاديش (قريبا)

[MaZaGAngeE]

منفسن عادى

اه دي مصيبة تانية انا نسيتها
همه فاكرين اني باخد بتا 50 الف في الشهر
مع اني لحد دلوقتي باخد مصاريف شخصية و لسه مرتبي منزلش
و كله كوم بقى و اني ليا مكتب ده كوم تاني

يا ناس حد يديني عقله
مهندس و خريج الاكاديمية البحرية
خبرة في انشاء المشروعات الضخمة و المتوسطة الحجم
المشروع دراستي و تصميمي و تركيبي و ادارتي
تدريب الفنيين و العمال بعمله بنفسي
و الكلاب تقول بينهم و بين بعض " يا عم ده من ساعة ما قعد في المكتب خلاص بقى كبر دماغه مننا "
مع اني بالاضافة للحاجات دي بعمل الاتي :
المشتريات العادية
المبيعات و بدرب طقم المبيعات
مراجعة الحسابات و العهدة مع المحاسب
متابعة الصيانة و تجهيز قطع الغيار
متابعة موردين مستلزمات الانتاج و البحث عن موردين ارخص
تظبيط المحجر و رفع جودة التحجير
تخليص اوراق المصنع مع الاجهزة الحكومية و التامينات و مكتب العمل و التراخيص

بنام 5 الصبح و اقوم 8 و افضل لحد 5 الصيح بهاتي في كل حتة

[MaZaGAngeE]

بص احنا عندنا مصنع :)
انا مش هقول رايى فى كلامك لان الناس هتزعل منى و هتفهمنى غلط
كل الى اقدر اقولهولك
تعايش مع الوضع و متاخدش حاجه على صدرك ..عشان متتعبش
هتشوف السرقه بعينك بص الناحيه التانيه ..
العامل غبى ..عادى بيتغابى عادى
بيدلع عادى
بيهرج عادى
منفسن عادى
انت لسه لما تدخل فى مرحله ان المصنع يكبر و تبدأ تطور من نفسك
هتلاقى العمال كلهم جايين يستلفو منك ..الى بيتجوز والى خلف والى تعبان كده يعنى
يااااااااااااااااااااااااااااااااااااااااااااااااا اااااااااارب اكرمنا بعمال "نضاف" من بنجلاديش (قريبا)

انتوا مصنع نسيج مش كده ؟ انا فاكر اننا اتكلمنا مع بعض قبل كده
بتوع بنجلاديش دول نظامهم ايه ؟

[A7MED_PHARMA]

لايحة قوانين كبيرة تتعلق على باب المصنع
ويبقا القانون بتاعك
وتتعامل رسمي معاهم .. رسمي رسمي
يعني الي سرق من فواتيرك ده .. يتبلغ عنه ويتحبس .
وماتعاملهمش على إنهم شغالين معاك..عاملهم على إنهم شغالين عندك

والغلطة بخصم
والشغل الكويس بعلاوة
وإلي مش عاجبه .. يغور وييجي غيره
بس

[MaZaGAngeE]

لايحة قوانين كبيرة تتعلق على باب المصنع
ويبقا القانون بتاعك
وتتعامل رسمي معاهم .. رسمي رسمي
يعني الي سرق من فواتيرك ده .. يتبلغ عنه ويتحبس .
وماتعاملهمش على إنهم شغالين معاك..عاملهم على إنهم شغالين عندك

والغلطة بخصم
والشغل الكويس بعلاوة
وإلي مش عاجبه .. يغور وييجي غيره
بس

عشان توصل للمرحلة دي ( و لو انها نظرية جدا و صعب تطبيقها ) لازم تعدي في المرحلة اللي انا فيها حاليا لأن كل طقم المصنع ماعد 6 افراد بيتعلم و عاملهم فصول زي بتوع الثانوي .

[KHALED AYMAN]

انتوا مصنع نسيج مش كده ؟ انا فاكر اننا اتكلمنا مع بعض قبل كده
بتوع بنجلاديش دول نظامهم ايه ؟

اه احنا صباغه و نسيج و ملابس ...
بتوع بنجلاديش دول لسه مصبغه بتاع واحد اعرفه ماشي في الحوار ...مستني اجرب فيه لو ظبتت مش هخلي فراش مصري حتي ..بس مبدئيا بتوع بنجلاديش عاورين سكن جمب المصنع ...

[amr1973]

يا باشا الموضوع و مافية هو ان العامل المصرى اخد على الراحة و الرشوة و ماشى بمفهوم اشتغل كتير تغلط كتير تتجازى اشتغل قليل تغلط قليل تكسب كتير المفروض ان حضرتك اى مشروع تجارى بيكون لية قانون خاص بالمشروع لا يتعارض مع القوانين العامه و ثانيا الاثابة بمعنى ان كل صاحب مصنع بيهمة الانتاجية و لو طبعا عامل متوسط الانتاجية بتاعته اللى بيقبض عليها المرتب مثلا 100 قطعه نسيج طيب لو اضفنا بند فى القانون الخاص بيك ان العامل اللى انتاجيته زادت الى حد مثلا 150 قطعه لية حافز مثلا 20 % من المرتب اكيد العامل ده مش هايضيع وقت و يدلع لان عارف ان الوقت بتاعه لية مقابل انما هو بيدلع لانه عارف ان الوقت مش فارق معاه وده اللى بحصل برة فى كل مصانع العالم الا مصر العامل لازم يحس ان استخدامة بشكل صحيح لعامل الوقت ممكن يزود من دخلة بشكل كويس و عدم استغلال الوقت يضرة و بالطبع فى الاول فى ناس مش هاتعرف انما لما يشوف ان زميل لية اشتغل و عمل انتاجية مرتفعة و اخد عليها تشجيع مالى بالتالى هايتشجع و يقدر قيمة الوقت و دى وجهة نظرى و جايز اكون مخطىء انما الاكيد مش عايزين نفقد الثقة بالعامل المصرى انما نقومة و نظبطة لان موضوع العمالة من الخارج هاتضرنا احنا قبل العمال طيب لما البطالة طبعا الناس مش معاها فلوس تشترى حاجة و بالتالى كل المصانع هاتتاثر ثانيا العمالة اللى من الخارج مش هاتشترى حاجة من عندك يعنى هايخدو الفلوس و يتم تحويلها برة يعنى بالبلدى بدل ما تدخل دخل تخرج فلوس و دى الخطورة

[MohssenRashed]

برج العرب فيها عمال من بنجلاديش كتير و الناس بيشكروا فيهم جدا و بتوع شغل ( احسن ميزة فيهم انهم مش فهلوية).

انا شغال حاليا في شركة فيها تقريبا 3500 عامل كلهم من نفس النوع دة و بقى صعب جداااااااااا تلاقي عامل مستعد يتعلم و الله بيبقوا عارفين ازاي يزودوا الانتاج و ميرضوش يقولك و انا هاخد اية مهو كله في جيب صاحب الشغل . مفيش ضمير

[KHALED AYMAN]

العامل المصري لما بيشتغل بالنتاج بيبوظ الشغل و الجوده بتقل ..احنا جربنا كل حاجه ..والدي في المجال ده من سنه 1990 بجد مفيش فايده ..الحل هو عمال من برا ..ولما المصريين يلاقو نفسهم بينطردو من مصنع ورا التاني و بيشحتو هيبداو يتظبتو تاني و يشتغلو عدل ..

[Dr_Mido]

العمال شغاله بمبداء هو كان مصنع ابونا ايكش يولع بصحابه ودى انا سمعتها بودنى من ك>ا عامل ىف المصانع اللى بنتعامل معاها

[MTAK]

حاول تدير الشغل على اجزاء
بمعنى الجزء اللى اتعلم و فهم ابتدى به شغل
و الباقى اركنهم الى ان يتعلموا
و الى ان يتعلموا وريهم ان من تعلم بينزله حافز و فلوس اخرى
و انهم كمتدربين ليس لهم سوى مبلغ رمزى
هتلاقيهم بياكلوا التراب علشان يتعلموا
خلى الحافز هو الفلوس
و الغلطه بفوره
و طالما هناك شريك
حسسهم دائما ان هناك طرف خفى هو اللى بيشدد و انك بتنفذ ما يقوله
مع انك معاهم
و قلبك عليهم
عامل المكر بالمكر
و لا يحيق المكر السئ الا بأهله
حاول متخليهمش يعملوا عصبه مع بعض

ممكن تفضل على تلك الحاله دورتين لحد ما يتبقى لك العماله النضيفه
موضوع صعب و لكن لا مفر

[hazemhany]

معلش يا جماعة انا حاسس انكم متحاملين علي العامل المصري شوية ..اولا انتوا عارفين ان الاجور متدنية للغاية ..يعني ايه 750 جنية لعامل ..ازاي المبلغ ده يشجعه علي الانتاج وهوا يدوب هيكفيه سجاير وفول وطعمية !!! ...بالاضافة الا انه زي ما فيه عضو بيقول هيستفاد ايه لما الانتاج يزيد؟ ..هل هيستفاد حاجة؟ ..هل هيدولوا نسبة من الارباح اللي زادت ؟! ..طبعا ولا حاجة من دي هتحصل ...يبقي الطبيعي الطبيعي انه يقول ما يولع المصنع باللي فيه !...لما ادي العامل حقه مرتب كويس مش بقول اديله 5000 بس اديله المبلغ اللي يعيشه كويس ..واديله نسبة من الارباح ولما الانتاج يزيد كافأه ..ولو عملت ده كله وبرضه مشفش شغله سعتها قول ع العامل المصري مش بتاع شغل ويستاهل الطرد ...وللعلم يا جماعة دي ابسط حقوق للعمال ..وفيه شركات في مصر مطبقة الكلام ده لعمالها- وهي طبعا تتعد علي الصوابع-وفي المقابل بنلاقي العامل هناك شايف شغله كويس وخايف علي مصنعه وعايز يموت نفسه عشان الانتاج يزيد ....

[Dr_Mido]

معلش يا جماعة انا حاسس انكم متحاملين علي العامل المصري شوية ..اولا انتوا عارفين ان الاجور متدنية للغاية ..يعني ايه 750 جنية لعامل ..ازاي المبلغ ده يشجعه علي الانتاج وهوا يدوب هيكفيه سجاير وفول وطعمية !!! ...بالاضافة الا انه زي ما فيه عضو بيقول هيستفاد ايه لما الانتاج يزيد؟ ..هل هيستفاد حاجة؟ ..هل هيدولوا نسبة من الارباح اللي زادت ؟! ..طبعا ولا حاجة من دي هتحصل ...يبقي الطبيعي الطبيعي انه يقول ما يولع المصنع باللي فيه !...لما ادي العامل حقه مرتب كويس مش بقول اديله 5000 بس اديله المبلغ اللي يعيشه كويس ..واديله نسبة من الارباح ولما الانتاج يزيد كافأه ..ولو عملت ده كله وبرضه مشفش شغله سعتها قول ع العامل المصري مش بتاع شغل ويستاهل الطرد ...وللعلم يا جماعة دي ابسط حقوق للعمال ..وفيه شركات في مصر مطبقة الكلام ده لعمالها- وهي طبعا تتعد علي الصوابع-وفي المقابل بنلاقي العامل هناك شايف شغله كويس وخايف علي مصنعه وعايز يموت نفسه عشان الانتاج يزيد ....

وهى 1200 جنيه وحشه فى المصنع اللى انا بقول عليه