بتصرف كام فى الشهر

[mohammedabdallh]

هزعل من ايه
بس الموضوع قديم يعنى
فى الفتره الى اتكتب فيها الموضوع ممكن حوالى من 3 الى 4 الف جنيه فى الشهر ومتقوليش ازاى علشان انا معرفشى بجد علشان كدا كنت عامل الموضوع ده لما قعدت حسبتها مع نفسى
اما دوقتى طبعا مفيش شغل فى المحلات والسوق نايم وفى حالة تقشف شويه
يعنى حوالى من 1000 الى 2000 وربك الى بيستر
طبعا ده شامل كل حاجه ماعدا الميه والكهرباء وومكن كمان بنزين العربيه
عرفت كنت عامل الموضوع ليه

[A7MED_PHARMA]

انا دلوقتي بصرف
300 ج بنزين ... وزيهم سجاير
وبسسسسسسسسسسسسسسسسسسسسسسسس

[SYD]

اولا الحمد لله علي كل حال
بس المصاريف دي امرها عجيب والله
مطاطية
تحس ان جالك قرشين - تتمط وتكبر
تحس انك مقشفر ومتكحرت - تخس وتصغر

النتيجة
عمري ما صرفت اقل او حتي قد دخلي

والله المستعان
،
،

[A7MED_PHARMA]

اه والله يابوالسيد
انا اهه
معييش جنيه في جيبي..ومقضيها على الكفاف
قبل كده
خروجات ومصاريف على العربية
كل يوم بحال
وسبحان مغير الاحوال..........

[mohamed9999]

سؤال بس فكرت فيه هو لما كلكم مش عارفين تحوشو لامؤخذه يعنى جبتو العربيات منين

[lanos2004]

مصاريف البيت حوالى 6000 فى الشهر من غير اولاد-من ضمنهم 1800 ايجار

[mohammedabdallh]

سؤال بس فكرت فيه هو لما كلكم مش عارفين تحوشو لامؤخذه يعنى جبتو العربيات منين

قسط اكيد
ومصاريف بتكبر يوم ورا يوم
بس ايه الى خلاك تفتح سجلات الماضى
ما صدقنا نسينا وعايشين وخلاص على قد الى بيجى ونتلائم مع ظروف الحياه والمرتب

[Ahmed_Adham]

في رأيي الموظف بيفضل دايما مرتبه على قد مصاريفه وكل ما يزيد مرتبه بتزيد مصاريفه تاكل زياده المرتب اما بزياده أسعار في جيوب التجار أو بتوجيه الصرف في جوانب جديده مكنتش موجوده قبل كده المهم الفلوس تتصرف وخلاص.

[Al-Farooq]

انا عمري ما حسبتها ، بحس ان لو هحسبها البركة هتقل ، وهو لو جنية ولا مليون الموضوع كله فى البركة!

[4fun14]

-300 ج بنزين
-350ج سجاير
-200 ج فطار "غالبا ساندوتشات فول"
-350ج حوالى يومين ف الاسبوع تيك اواى
-300ج صيانات واعطال ولوازم العربيه
-200ج تليفونات وانترنت
-بيتوتى فنادر لما اخرج بس لو افترضنا 4 خروجات ف الشهر يعنى كمان 200ج تقريبا
-300ج اجيب بيهم فاكهه او اى لوازم للبيت عشان مبقاش حمل على اهلى
---
يباه كده 2300ج دول الحد الادنى تقريبا..لواحد عايش اعزب ولا يعول ولا عليه اقساط غير شاملين مجاملات ولا جمعيات ولا هدوم ولا برفانات ولا لزوم موبايلات او كمبيوترات ولا غيره..فعليا بصرف حوالى 3..يعنى بالمنطق كده مصاريف واحد متجوز صعب جدا يكون الدخل اقل من 5 الاف!!مش عارف والله الناس بتتجوز ازاى

[الاستاذ]

انا لو بصرف الفلوس الى انتو بتصرفوها دة كان زمانى معايا عمارات
مش بخل بس نصراحة يعنى لية اشرب سجاير وانا ممكن اشترى فاكهة بدالها
لية اجيب اكل من بره معرفش معمول ازاى وانا ممكن اطبخ او تخلى امك او زوجتك تطبخلك
القهوة مع انى مبقعدش على قهاوى ولا بحبها حاسب لنفسك ياسيدى
فى الاخر الفلوس قاعدة ليك

[sarawe511]

متابع و مصدوم

[يارا]

الاكل والشرب مقدور عليه الواحد يدبر اى حاجه اما بقى النور والمايه والنت لازم مع القبض نخلى فلوسهم على جمب وطبعا بجانب اللى بيدفع ايجار شقته
يعنى انا شايفه ان اللى مرتبه فوق الالفين يقدر يمشى حياته وهو اللى يتحكم فيها

اما اللى تحت ال الافين الفلوس هى اللى هتمشبه

تقبلو مرورى

[يارا]

انا لو بصرف الفلوس الى انتو بتصرفوها دة كان زمانى معايا عمارات
مش بخل بس نصراحة يعنى لية اشرب سجاير وانا ممكن اشترى فاكهة بدالها
لية اجيب اكل من بره معرفش معمول ازاى وانا ممكن اطبخ او تخلى امك او زوجتك تطبخلك
القهوة مع انى مبقعدش على قهاوى ولا بحبها حاسب لنفسك ياسيدى
فى الاخر الفلوس قاعدة ليك

عين العقل :018a1d~146:

[lanos2004]

انا لو بصرف الفلوس الى انتو بتصرفوها دة كان زمانى معايا عمارات
مش بخل بس نصراحة يعنى لية اشرب سجاير وانا ممكن اشترى فاكهة بدالها
لية اجيب اكل من بره معرفش معمول ازاى وانا ممكن اطبخ او تخلى امك او زوجتك تطبخلك
القهوة مع انى مبقعدش على قهاوى ولا بحبها حاسب لنفسك ياسيدى
فى الاخر الفلوس قاعدة ليك

طبعا مستحيل
انا لابدخن ولا بقعد علي قهاوي
٦٠٠٠ جنيه وممكن اشحت اخر يومين في الشهر او ااسحب فلوس من البنك
تطبخ دي اللحمه بشتريها ٨٠ جنيه الكيلو-والفرخه ٣٨ جنيه والفراخ البانيه ٤٥--وشويه فاكهه عاديين اقل واجب من ٨٠ الي ١٢٠
انا بحط بنزين ٥٠ جنيه يوم ويوم وده من غير سفر يعني في الشهر٧٥٠ وده من غير غيار زيت ولا صيانات ولا غيره شقه ١٨٠٠ -اشتراك نت علي تليفونات علي سفريه كل شهر علي اي ظرف طارق اقسم بالله الواحد بيشحت---انتو عارفين تعيشوا ازاي باقل من ١٠٠٠٠ جنيه في الشهر