انا اتثبت النهرده بس بطريقه شيك

[dr_3eshoo]

بجد قصه غربيه النهارده كنت بسخن العربيه الساعه 9 الصبح كنت رايح الكليه و الشارع فاضي و هيا بتخس بلمع العربيه و بشوف زيت متسرب فرده نايمه كده لقيت واحد قرب مني و سالني انت بتصلي قلتله الحمد لله قالي متعرفش جامع الوقتي قلتله معرفش قالي اصل مفيش حد ارحله الوقتي نسيت اقلكم الواد لابس قميص لميع و بنطلون جينز ليفايز و كمان جزم كات بس شكله كده بيشرب حجات كتير جنب اليجاير و كان باين من وشه و من سنانه المهم قلتله انا اقدر اساعد ب ايه قالي انا اخواتي وقعي بيني و بين امي و شويه حجات كده بقله يا فندم اقدر اساعد ب ايه زعقلي و قالي فندم ايه انا اسمي عصام قلتله ياعصام و انا هاعرف اسمك منين انا اسف متزعلش مني اقدر اساعد ب ايه يا فندم لا ما تزعلش عصام قالي معييش فلوس انا عاوز 10 جنيه
قلتله انا ما عييش و لا مليم بس هادور لك في العربيه دخلت العربيه و طلعت 5 جنيه و قلتله دي الي معايا الوقتي اصل رايح اخد فلوس من واحد صاحبي في الكليه المهم اخدها و قالي هاجيبهالك في الكليه ليا اصحاب هناك كتير وكده و شكرا و اخدها ومشي
واحد يقلي اديتله ليه اقله علشان طريقه كلامه و شكله كانرايح يشرب يعني ممكن يقتل علشان الي هايشربه قلت زوق بزوق ادليه ال 5 جنيه و يبعد عني احسن ما ياخد روحي و العربيه و يمشي
نيس اقلكم هو وعدني وعد غريب قالي هايرجع ال 5 جنيه و لو شافني في اي موقف هايقف جنبي
بجد انا كنت خايف اوي شارع فاضي بره العربيه و تحت البيت مفيش حد
السؤال حد اتحط تحت الموقف ده و هل انا اتصرفت صح

[Chicco]

تعيش و تاخد غيرها يا دوك
حصلتلي برضه بس بتفاصيل مختلفة ....ما كنش منهم حكاية المسطول ديه ...بس تبقى ناس شكلها محترم و تطلب فلوس كتير و بخاف لا يكونوا فعلا ناس محتاجة و مزنوقة

[MoToRiZeR]

عادي يا باشا في المواقف اللي زي دي اي حاجة معاك تروح في داهية مش مشكلة خصوصا لو اللي ادامك مش في وعيه بتبقي مصيبة

انا بقي قبل كدة اتثبتت بطريقة مش شيك خالص
كنت راجع لوحدي بالليل وواحد جه فتح علية مطوة مباشرة كدة و شكله من الناس اللي بتغير ريقها الصبح بمية نار و العياذ بالله .. تشرد تشرد يعني .. و قاللي حلو الكاب ده هاته .. قلتله مفيش كابات .. قام حاطط المطوة في جيبه .. و مطلع موس من بقه .. و قاللي يبقي في علامة في وشك تفتكرني بيها .. قلتله اتفضل يا باشا :> قبل ما يطلع ار بي جي من قفاه ولا حاجة .. كان عندي 17 سنة تقريبا .. و المصيبة انه كان اقل مني طولا و حجما بكتير .. و لكن لأن كان شكله شارب ولا ضارب حاجة فا مكنتش مستبعد يستعمل السلاح فعلا .. و اكيد ياما قريت عن الناس اللي قتلت ناس random كدة عشان شوية فكة

و اهو كاب يفوت ولا حد يموت .. ممكن احاول اتعامل مع البني ادمين دول بس لو حسيت اللي قدامي مش في وعيه بتجنب ده تماما لأن اي حاجة منه بتبقي متوقعة

[alaa_dash]

كويس انها جت على قد كده ..و المفروض بقى مادام انت ممكن تتعرض لمواقف من النوع ده..

هاتلك حاجة تدافع بيها عن نفسك و حطها في السيارة ..سبراي ..صاعق ..شوية طوب اي حاجة ..

بس الطف حاجة الوعد بتاعه :) قال يعني لو شافك تاني هيفتكرك اساسا بحالته ديه !

[AhmedGen2]

أنا كنت بفكر أشيل مونشاكو وكان نفسى أتعلمه بس للاسف محدش أعرفه محترم فى مصر بيعلم استخدامه صح ، ومعرفش إذا كان قانونى حمله ولا لأ ، فيه كمان السيلف ديفنس لزوم الكهربة بس برضه معرفش طرقه ازاى ..

حد يعرف؟

[ehab08]

طريقة الحوار تدل على أنه فعلا مبرشم
تصرفك سليم مليون فى المئه
وأحيانا كتير جدا الخوف بينجى
انا بيتهيألى لو كنت مكانك كنت حديله 10 جنيه علشان أنهى الموقف بسرعه

[mars3v]

بجد قصه غربيه النهارده كنت بسخن العربيه الساعه 9 الصبح كنت رايح الكليه و الشارع فاضي و هيا بتخس بلمع العربيه و بشوف زيت متسرب فرده نايمه كده لقيت واحد قرب مني و سالني انت بتصلي قلتله الحمد لله قالي متعرفش جامع الوقتي قلتله معرفش قالي اصل مفيش حد ارحله الوقتي نسيت اقلكم الواد لابس قميص لميع و بنطلون جينز ليفايز و كمان جزم كات بس شكله كده بيشرب حجات كتير جنب اليجاير و كان باين من وشه و من سنانه المهم قلتله انا اقدر اساعد ب ايه قالي انا اخواتي وقعي بيني و بين امي و شويه حجات كده بقله يا فندم اقدر اساعد ب ايه زعقلي و قالي فندم ايه انا اسمي عصام قلتله ياعصام و انا هاعرف اسمك منين انا اسف متزعلش مني اقدر اساعد ب ايه يا فندم لا ما تزعلش عصام قالي معييش فلوس انا عاوز 10 جنيه
قلتله انا ما عييش و لا مليم بس هادور لك في العربيه دخلت العربيه و طلعت 5 جنيه و قلتله دي الي معايا الوقتي اصل رايح اخد فلوس من واحد صاحبي في الكليه المهم اخدها و قالي هاجيبهالك في الكليه ليا اصحاب هناك كتير وكده و شكرا و اخدها ومشي
واحد يقلي اديتله ليه اقله علشان طريقه كلامه و شكله كانرايح يشرب يعني ممكن يقتل علشان الي هايشربه قلت زوق بزوق ادليه ال 5 جنيه و يبعد عني احسن ما ياخد روحي و العربيه و يمشي
نيس اقلكم هو وعدني وعد غريب قالي هايرجع ال 5 جنيه و لو شافني في اي موقف هايقف جنبي
بجد انا كنت خايف اوي شارع فاضي بره العربيه و تحت البيت مفيش حد
السؤال حد اتحط تحت الموقف ده و هل انا اتصرفت صح

اللى انت عملته صح خصوصا ان العربيه مفتوحه يعنى ممكن لو معاه مطوه كان خد العربيه و دى حصلت مع واحد صحبى، اول مخلص ركن و طلع، راحوا اتنين طلعولو خدو منو المفتاح و سلام.

انا بأه شخصيا حصل معايا اربع مواقف بالشكل ده:

اول موقف كنت انا وواحد صحبى خارجين من الكليه(هندسة اسكندريه) و كان فى شوية شباب قاعدين فالجنينه اللى جمب الكليه و كانت الساعه حوالى سته بليل و الجو ضلمه شويه، راح واحد منهم قام و عدى الشارع و وقف فى نص الرصيف اللى ماشيين عليه، اول ماوصلناله قالناازيكو يابشمهندسين و مد ايدو عشان يسلم, سلمنا عليه، اعد بقى يقول امى تعبانه و عايز فلوس عشان اروح الحقها و انا ساكن فى سيدى بشر، و هو اصلا كان بيحشش مع باقى العيال، راح صحبى قاله فين فى سيدى بشر عشان هو( اللى هو انا) ساكن فى ميامى وممكن تروحوا مع بعض :D ، قاللو لاء مفيش مشكله هات اللى فيه النصيب و خلاص. و اعدنا نهيس معاه بتاع عشر دقايق :D ، راح اخر لما زهق مننا قللى مش الساعه اللى انت لابسها ديه اللى بريموت للتلفزيون...الله يفتح عليك :D... اصلى انا لسه طابق واحده زيها انهارده.. روحت قايله و انت عايز كام عشان تروح، قاللى نص جنيه:D، قولتله بس و روحت مديهوله، بس صعب عليا من اللى عملنا فيه، بوظنالوا الدماغ اللى كان عاملها. بس هو ماكنش هايعرف يعمل حاجه عشان كنا اتنين طول بعرض و هو نص حجمنا.
بس الغريب ان مفيش حد من صحابه قام يساعده، كانوا بتاع خمسه، كنا هانتثبت بجد.غالبا كانوا عاملين دماغ عالاخر.

الموقف التانى كنت بسخن العربيه و جه واحد بيقولى انا من القاهره و عايز اروح و مش عارف ايه، و ورانى بطاقته، روحت مطلعله جنيه، ادايق قوى و قاللى بقولك من القاهره، تدينى جنيه؟و سبنى و مشى! خلى ضميرى يأنبنى :D

الموقف التالت كنت فى محطة الرمل مع واحد صحبى و كنت لسه شارى سندوتشات فول من جاد، و انا بحب الفول جدا اصلا...لسه بطلع السندوتش لاقيت واحد زى الشحط طلعلى و قاللى هات السندوتش ده :D ، انا الصراحه معجبنيش اسلوبه و مكنتش هفرط فى السندوتش...روحت واخد قطمه جابت نص السندوتش :D ، قاللى ايه ياعم ده :D، روحت اديته سندوتش تانى بس فلافل :D

الموقف الرابع كنت فى شارع اسكندر ابراهيم عند اخره من ناحية البحر قدام الجامع، كانت الساعه 9 بليل ومكنش فى حد كتير...كان فى واحد منظره من محترفين الصياعه دول ساند على السور الحديد و لما قربت منه مد ايده عشان يسلم و قاللى ازيك يا صحبى، انا طبعا عرفت ان ديه تثبيته، روحت كملت مشى و معبرتهوش... راح شاددنى من القميص و قاللى مش بسلم عليك يله...انا الصراحه دمى فار، مين الحيوان ده عشان يقولى يله و كمان يشدنى من القميص...الصراحه محستش بنفسى، روحت مسكته من رقبته و زقيته و قلتله غووور ،راح خبط جامد فى السور و كان هيوقع، و انا كملت مشى، هو فضل واقف مكانه بس قعد يشتم، بجد كنت عايز اقتله.

[modux]

تعيش و تاخد غيرها يا عيشووووو

[shady_elkady]

ههههه انا كل يوم و انا مروح من الشغل اقابل و احد فى نفس المكان يقولى انا قى كلية هندسة قسم ميكا و محتاج 10 ج علشان اروح اقلة معيشش يشتم و يقولى كما تدين تدان ههههههههههههههه

[ehabradwan]

عادي يا برنس كلنا حصلنا كده قبل كده

[tears]

على فكره يا شباب الى بيحصل ده من راى سببه الاول والاخير البطاله الى فى مصر احنا نسبة البطاله وصلت 7 مليون تخيلوا انا حصل معايا بس اتخنقت واتشلفطت بس هعمل ايه قلبى جامد شويه بس هما كانوا 3 الحمد لله مسكت واحد مسبتوش الا فى القسم والباقى جرى بس عمرى مفكر اعمل خناقه تانى مع ناس مصاطيل

[Ahmed Selim]

الموقف التانى كنت بسخن العربيه و جه واحد بيقولى انا من القاهره و عايز اروح و مش عارف ايه، و ورانى بطاقته، روحت مطلعله جنيه، ادايق قوى و قاللى بقولك من القاهره، تدينى جنيه؟و سبنى و مشى! خلى ضميرى يأنبنى :D
.

أنا حصل معايا نفس الموقف بس كنت فى أسكندرية والعربية ملاكى القاهرة ف أشتغالة يعنى :-)

المهم البيه جالى و أنا فى العربية ومعايا مراتى وبنتى وطلعلى بطاقة تدل أنه مهندس و من بنها باين و قاللى أن جاله غيبوبة سكر و هو فى شغل فى أسكندرية ولما فاق لقى المحفظة بتاعته اتسرق منها الفلوس والكرديت كاردز كلها وعاوز يروح و كان عاوز 30 جنيه

أديته اللى فيه النصيب وبعدين قعد يقولى أدينى رقم تليفونك علشان أرجعلك الفلوس فى القاهرة وبتاع قلتله لأ خلاص الموضوع مش مستاهل مقعدش يلح عليا وقاللى شكراً و مشى

[polo61]

ياخبر ابيض ايه كل ده ؟
معلشى سؤال ساذج من ام
هل الكلام ده بيحصل للشباب بس ولا ممكن يحصل لبنت مثلا وهى بتشيك على عربيتها
افيدونى وطمنونى بجد حاجة زادت عن حدها
وحسبى الله ونعم الوكيل فى كل واحد كان سبب فى تردى الاحوال بالشكل ده فى مصر
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟

[hazem_khidr]

يووووووووووووووووه بتحصل كتير.
بس نفس الموقف
ابقي ماشي واحد ينادي و من هبلي ابص لاقيه وقفني
و قصه طويله عريضه مفادها انه عاوز 47 جنيه او 34 جنيه او 19 جنيه
علشان يعدي بيهم ظرف و ما تسالوش ليه بتبقي الفلوس كده كسور.
و خد بطاقتي و ساعتي او اي شئ.
تلاقي نفسك تطلع اللي فيه النصيب و محرج و مايبقاش المبلغ اللي هو عاوزه
يقوم يقولك طب الظرف ممكن اقضي جزء منه ب 14 جنيه و نص
و يا ريت تكملهم ليا و كلام غريب كده!!!!!!!!!!
المشكله ان الواحد قلبه ضعيف مش بيعرف ياخد موقف :(

[Abo_Lina]

والله ولا كنت تسأل فيه..انت ممكن تديله فلوس يطمع اكتر و ممكن تنتهي انه يفتح مطوة برضه
انا لما الاقي حد كده ببقى و لا كأن فيه حد بيتكلم و ببقى ريلاكس خالص لحد ما يزهق مني و يمشي لوحده
وطبعا في الايام دي لما تطلع حاجه لله لازم تبقى عارفه وواثق انه محتاج فعلا لأن الشوارع اتملت ناس كده بتستسهل انها تشحت و خلاص ولا ف دماغهم شغل و لا وجع دماغ