الامارات العربية المتحدة

[noureymo]

السلام عليكم
يا جماعة انا جالي عقد عمل النهاردة في بنك من بنوك الامارات في المركز الرئيسي في ابو ظبي
انا مضيت العقد واستلت صورة والمفروض اكون هناك في خلال شهر
بس بصراحة رجعت البنك الي انا بشتغل فيه وما قدرتش اكتب الاستقالة
بصراحة عاوز حد يكون عنده خبرة يفهمني المعيشة هناك شكلها ايه (انا وزوجتي وابنتي 4.5 سنة )
يعني بصراحة مش عارف اسافر ولا لأ
انا هنا الحمدلله كويس لكن المرتب المعروض حوالي 7 اضعاف مرتبي هنا بس برده العيشة هناك غالية جدا
ارجوكم انا محتارجدا حد يدلني
شكرا جزيلا

[Ahmed Hassan]

المدارس غاليه جدا
السكن غالي جدا الا لو هتخرج من ابو ظبي و دبي

غير كده مفيش مشاكل و الحياه سهله. يا ترى عقدك مشتمل على مصاريف المدارس و السكن؟!!

غير كل ده.. لو انت من النوع اللي معندكش تحكم في مصاريفك.. يبقى خليك هنا احسن لأنك مش هتحوش حاجه حتى لو مرتبك 100 الف درهم في الشهر. المغريات هناك ملهاش حدود و في الحاله دي هترجع زي ما روحت :)

[MoToRiZeR]

انا رأيي حتي لو مش هتحوش حاجة هناك روح .. عالأقل هتعيش في مكان متحضر مش الغابة اللي احنا عايشين فيها .. و بنتك تخش مدارس كويسة و تتعلم تعليم كويس

يعني هترفع من مستواك كتير

[Ahmad Allawy]

وفي ميزة كويسة قوي في ابو ظبي عن دبي..
ان ابو ظبي مش متحررة زيادة عن اللازم زي دبي..
يعني ممكن تآمن ان بنتك تتربي هناك و تدخل مدارس هناك..
علي عكس دبي..
و فعلا زي ما واحد من الاخوة قال..
ان العرض يكون باكدج علي بعضها..
شاملة سكن و مدرسة البنت مثلا.. (انا ماعرفش المدارس ايه.. بس شوف يعني )
و اعمل حسابك ان المعيشة هناك غالية جدا.. يعني اكل البيت بقي و الكلام ده ممكن يساعدك انك تجوش.. لكن الاكل في الشارع ده مش هتعرف تحوش مليم..

عموما.. استخير برضه.. و ربنا يوفقك لما فيه الخير..

[noureymo]

شكرا جزيلا يا جماعة على الردود العقد شامل72 الف درهم جزء من السكن و75% من مصاريف المدرسة
قيمة العقد بالجم تعادل حوالي 7 اضعاف مرتبي هنا يا ريت يا جماعة لو حد عنده فكرة عن الاسعار هناك والمعيشة
وشكرا مقدما

[Ahmad Allawy]

والله يا باشا انا معلوماتي عن السكن هناك شبه معدومة عشان انا مروحتش هناك قبل كده..
بس ممكن الاخوة اللي راحوا هناك يفيدوك..
اللي اسمع عنه انه السكن هناك بتدفعه سنوي..
و السنه تقريبا مش هتقل عن 40 الف درهم..و اكيد في اكتر..
ده الحد الادني..
ووارد جدا ان الرقم ده ميكونش مظبوط كمان..
و المدارس بقي معنديش ادني فكرة..

المبلغ اللي انت كتبته ده شهري ولا سنوي..؟؟
لو سنوي يبقي متروحش ولا تنزل من بيتك..
ولو شهري يبقي في امل انك تفكر في الموضوع..

وربنا يباركلك و يطرح البركة في بنتك و في مرتبك ان شاء الله..

[noureymo]

المبلغ المكتوب ده 72 الف درهم بدل السكن بس (في السنة طبعا يا جماعة)
وده غير المرتب والبدلات والحوافز وارباح

[Ahmad Allawy]

بيتهيألي كده ما شاء الله كويس قوي..
شوف بقي باقي الكلام ايه..
و ربنا يوفقك..

[AHMAD FAHEEM]

استاذ احمد
انا عايش في السعوديه من 7 سنين
متهيالي الظروف واحده في البلدين
المعروف عن الامارات ان السكن غالي جدا
بس السلع الاستهلاكيه زي هنا في السعوديه
يعني معقوله طبعا زياده الاسعار العالميه ماثره علي الكل



النصيحه :
سافر لو مش هتحوش مليم واحد
كفايه انك هتتعامل معامله نضيفه
وبعدين اسال نفسك سؤال
الامارات احسن ولا لاء
واختار الاحسن

[elpasha009]

المبلغ المكتوب ده 72 الف درهم بدل السكن بس (في السنة طبعا يا جماعة)
وده غير المرتب والبدلات والحوافز وارباح

أنا لما كنت في الإمارات أول السنة ده كنت عند خالي وسألته عن الشقة اللي قاعد فيها بكام قالي إنها كانت ب80 ألف في السنة وغليت من أول السنة ده بقت ب 120 ألف بس طبعا شقة أقل ما يقال عليها هنا في مصر إنها فيلا:) أولا هي كبيرة جدا 5 غرف وكمان على الشارع رقم 2 في أبو ظبي وبتشوف البحر وكل حاجة:).
أنا قصدي يعني إن بما إنك عائلة صغيرة يبقى ممكن تلاقي شقة في حدود المبلغ اللي هتاخده من الشركة.
بس فعلا المدارس هناك غالية جداااااااااااااااااااااااااااااااااااااااااااااااا ااااااااااا.بس مش هقدر أفتيلك فيها.

[mohamed hatem]

بص يا ريس ..
معيشة الفرد اكل وشرب الواحد في المعدل يتكلف الف ونص درهم وطبعا لو بتصرف يبقى اكتر حسب مزاجك

يعني في ثلاثة يبقة اربعة الاف ونص درهم للاسرة ...
ايجار الشهر بيبقى في حدود 3.5 لغاية 5 الاف درهم في الشهر شاملة الكهربة و الميه سعات بس الكلام ده في الشارقة ومتهيقلي ابوظبي ممكن تكون نفس الموضوع
المواصلات غالية هناك ... يعني لازم اول ما تروح تحاول تتعلم السواقه على طول وتاخد الرخصة بمفهوم الامارات طبعا ....ومتقلقش هتلاقي عربية على طول الاسعار هناك رخيصة عشان ما فيش جمارك

بعني لو بالكلام السابق ده مع الميزانية اللي جيالك عرفت تحوش الفين او ثلاثة في الشهر يبقى كويس جدا وتوكل لى الله ...

مصدر المعلومات ا: ابن عمي مقيم هناك هو ومراته ولسه ساله عشاني برده

[smsmbakr]

بس يباشا انا كنت هناك ورجعت لظروف خاصة
لو هتعيش في دبي
ممكن السكن يبقى غرفة بالحمام والمطبخ ((( حوالي 3 الاف درهم ))) ولو اكبر يبقى اغلى
الاكل في كل الامارات واحد تمنة حلو وقليل وانضف
وطبعا هناك كرفور زي هنا وفية عروض جامدة جدا وده كويس ليك علشان انت واسرتك
ممكن الاكل يخش في حوالي 2000الى 3000 درهم ده للأسرة وده طبعا لو انت حريص في الاكل من غير دليفري
وميمنعش لو اكلت كل جمعة دليفري
اما عن المدارس فانا سمعت انها غالية حوالي 3000 درهم في الترم ((( على ماافتكر )))
واما عن الاتصالات فهى رخيصة داخليا ولمصر بـ 2 درهم الدقيقة
والأنترنت الساعة من 4 : 7 درهم
واما عن المواصلات لو اتوبيسات (اتوبيسات دبي مش مصر ) ياعني درهم في المشوار
ولو تاكسي يبقى خراب بيوت المشوار اقل مسافة حوالي 10 درهم
بس بصراحة هناك عالم تاني وهتنسى مصر كلها
والحياة هناك سهلة جدا وكفاية التقدم الي هناك والنظافة
رائيي روووووووووووووووووح
ولو هتوفر الف درهم احسن من هنا
انا ليا واحد شغال في بنك الامارت فرع الشارقة بقالو حوالي سنة
واليومين الجايين دول هياخد مراتة وبنته ذيك كده
وربنا يوفئك

[Dr_Smart]

مش هزود حاجه عن اللي الاخوة قالوه

رأيي استخير ربنا وتوكل على الله

بس فيه حاجه ... لو فرضنا لاقدر الله حصل ظروف واضطريت ترجع هينفع ترجع لشغلك في مصر تاني ؟

ربنا يوفقك

[Mido80]

انا عايش في قطر بقالي 4 سنين ومعايا اسرتي والاسعار هنا نار نار وخاصة السكن بس الحمد لله شغلي موفر لي سكن لاني باشتغل في شغل حكومي. بس احب اقولك انت ممكن تروح لوحدك الاول لحد ما تظبط اوضاعك وبعد كدة لما تستقر وتعرف راسك من رجليك ابقي خد الاسرة معاك. وخلي بالك انت كل سنة بتقضيها في شغلك بتزيد فيها راتبك العام الثاني وعلي العموم مهما كانت الاوضاع هناك احسن من مصر 100 مرة لانك اكيد عايش عندك وشايف الاوضاع شكلها اية. ربنا معاك واتوكل علي الله بدون تردد

[جندى مجند]

ربنا يوفقك و مش حأقدر أزود حاجة على اللى كل الأخوة قالوه غير بس ان أختى فى أبو ظبى برضو و زوجها من هواة الصيد و بيحلفلى انه بيطلع فى المرة الواحدة 5 أو 6 كيلو سمك (دة صيد من على الشاطئ مش من مركب) و بالتالى بيوفر تمن الغذاء 4 أو 5 مرات فى الأسبوع و بيعزم الجيران كمان :) ... فلو انت من هواة الصيد يبقى بند الأكل عندك حيقل جامد باذن الله.