عندى فوبيا مزمنة من الحقن، هل هناك حل؟

[grand hand]

زى ماهو واضح من العنوان بخاف جدا جدا من الحقن لدرجة انى غالبا لما بتعب مش بروح للدكتور عشان ميوصفش حقن واضطر اخدها، ولو حصل باخلى الدكتور يبعد تماما عن الحقن ولو كتبها مش باخدها. حاجة تانية لو شفت منظر دم او عملية بالصدفة فى اى قناة او حتى حد حكى لى انه اتعور مثلا ووصف المشهد بحس انى هرجع وبطنى بتقلب عليا وغممان نفس فظيع!

كتير ببقى نفسى اتبرع بالدم وانا صحتى كويسة والحمد لله لكن لما بشوف الابرة الضخمة المربوطة فى اخر الكيس بتراجع فورا، زمان وانا صغير اخدت حقنة وريد والشخص اللى ادانى الحقنة كان غبى شوية والعرق هرب واغمى عليا وكان يوم منيل

دلوقت جايلى عقد سفر ولازم طبعا التحاليل اكتر من مرة فى اكتر من مستشفى، وتحليل الدم شئ اساسى ووالله العظيم بفكر الغى السفر بسبب الموضوع ده والابر اللى مش متخيلها تدخل فى ذراعى، الموضوع مسبب لى ازمة نفسية ربنا وحده اللى يعلم بيها وعايز اعرف هو انا بس اللى كدة ولا فى حد غيرى فى الكون عنده نفس المشكلة ؟ وهل ينفع عينة الدم تتاخد من العضل مش الوريد؟ ياريت تساعدونى بحل او اقتراح عشان بجد نفسيتى تعبت من الموضوع ده بدون تريقة..

[3ateef]

[Eng.Geo]

طب يالله

[grand hand]

متشكر يا استاذ عاطف، يمكن حضرتك متخيل ان اللى كاتب الكلام ده شاب سيس من بتوع بابى ومامى لكن الحقيقة غير كده تماما، انا قلت عندى ما يشبه الفوبيا من الموضوع ده وبستفسر عن حل لو فيه.. ومكنتش مستنى انك تتريق او تقولى اشرب بريل لان كلامى واضح جدا، والموضوع حالة نفسية مش اكتر من حقن (الوريد) تحديدا عشان كدة بسال اطباء المنتدى هل ينفع اخذ عينة الدم من العضل/الكتف مثلا او اصبع اليد بدلا من الوريد؟ وشكرا

[grand hand]

طب يالله

[AirForces]

شوف اللينك دا إن شاء الله يفيدك
كيف تتغلب على خوف الحقن | ekayf

[grand hand]

شوف اللينك دا إن شاء الله يفيدك
كيف تتغلب على خوف الحقن | ekayf

لينك مفيد جدا
جزاك الله كل خير اخى الفاضل على اهتمامك

[casperinoo]

بس السحب من الوريد مبيوجعش اصلا .والوضع هتلاقيه مختلف عن وانت صغير..حاول بقدر الامكان متبصش للحقنه خالص ..
لازم تواجه خوفك..هتلاقي الموضوع بسيط جدا..
علي كده بقي اغسل سنانك كويس :))

[gaaz]

ماينفعش طبعا يتاخد من العضل
الموضوع ببساطة انك حتروح وتخلي الوالدة او المدام او اي حد بتثق فيه يحضن دماغك على ما تتسحب الحقنة
ويفضل طبعا تروح لحد بيسحب دم كتير
انا اعرف ممرضة بتشتغل معايا والله سحبتلي مرة وانا كنت عمال اقولها يلا انجزي قالتلي خلاص انا سحبت
الموضوع مش مؤلم على قد ماهو مرعب فانت ماتبصش
وبعدين يعني لو الموضوع صعب معاك للدرجه دي انت ممكن تاخد اي حاجة مهدئة قبل ما يتسحبلك
مع العلم انه مش مستاهل خالص
توكل على الله يا عم توقف سفرك ومستقبلك عشان حقنة ؟ دي هي شكه دبوس
خد الشكة وسافر بدل ما تفضل قاعد في البلد دي وساعتها الشكه حتبقى اكبر بكتييييير

[shaddadfalcon1]

انا زيك بس موضوع الدم والحاجات دي مش قوي يعني

بس فعلا الحقن دي مووووووووووووت ودلوقتي بحاول اخلي ولادي ميخافوش منها وكنت لسه من كام اسبوع ابني كان بيعمل تحليل دم وفضلت اشجع فيه لحد مالدكتور خد عينه من الوريد ومعيطش وبقي يقولي انا شاطر عشان معيطتش وانا في سري بقوله لو انا كنت عيطت :)

كتيييييييييير ابقي عايز اتبرع بالدم بس برده بخاف عشان الحقنه الكبيره دي مع اني اتبرعت قبل كده وموجعتيش بس هي فوبيا فعلا

[damasry]

والدى كان عنده نفس الفوبيا لحد وقت قريب لما الأمراض زادت عليه - شافاه الله وعافاه - ومش عايز اقولك كان بيعمل ايه عشان ياخد حقنة ومكنش بياخدها بردو حتى فى شدة المه مكنش بيردى ياخدها

لحد ما ربنا ابتلاه بمرض السكر وكان بياخد حقن انسولين كل يوم وواحدة واحدة وبالتدريج وتشجيع النفس وإرادة قوية اتعود عليها وبقت شئ عادى خالص عنده.

عايزك مش تبص للحقنة خالص وفكر فى اى حاجة ساعتها وانت مش ها تحس بأى حاجة خالص.

[A7MED_PHARMA]

طب يالله

إيه دي ؟

























.


















.

[Mohamed.Mohsen]

كان الله في عونك بعاني من الموضوع ده من 25 سنة وخوف رهيب وإغماء وعرق وهبوط لو فكرت في ازاي الذراع يتشك بالابرة وحاولت كتير التشجع والمقاومة واتحسن الموضوع شوية لكن مش عادي زي باقي الناس ربنا يعافينا بحاول اتجنب التحليلات الدم او الحقن قد ما اقدر ياااه كانك بتتكلم عني كان نفسي الاقي حد عنده الموضوع ده اول واحد بنفس الاعراض تحليلها نفسي انا وقفت مع والدي وانا عندي 5 سنين تقريبا اثناء سحب عينه دم من الوريد وحصلت لي الصدمة النفسية من الابرة الضخمة وقتها من سنين طويلة وخرطوم كيس الدم يللا بلاش اركز عشان انا بحاول انسي والشفاء من عند الله دي فوبيا وحالة نفسية خوف مرضي لاسند له ..حاول تدرب نفسك وانا كمان علي مواجهة الموقف تدريجيا وربنا يسهل ..

[S.S.E]

أنا بقى عندى عقده من الحقن تماماً وبالذات دكتور الأسنان عملت ضرسين عصب من غير حقن لدرجة الدكتور بيقول كده شكل العصب ميت مع أنى كنت بكهرب من شدة الأم .

[أبو صلاح]

عملت ضرسين عصب من غير حقن لدرجة الدكتور بيقول كده شكل العصب ميت مع أنى كنت بكهرب من شدة الأم .

لااااااااااااا
كله كوم
والحوار ده كوم تاني خالص

والله العظيم انا لو كنت اعرف مدى الالم بتاع حشو العصب كنت قررت خلع الضرس تماما مع اني لو خلعته مش هعرف أستعمل الجنب ده خالص لاني خالع ضرسين من تحت والوحيد الموجود هو المواجه للضرس اللي هحشيه عصب
ما علينا من الحوار ده

القصد اني اخدت 3 حقن بنج وكنت قربت امسك الدكتورة اخبطها في الحيط من الوجع