الكلبة عندي خلفة (فيديو)

[windofchange]

والله يا ميدو الكلاب دي وفية وفيها صفات مش موجودة في بني آدمين كتير دلوقتي للاسف ,,عندنا البواب كان جايب كلب من الشارع ورباه وكبره بس الكلب ده مكنش متعلم او متدرب كان بيطلع علي عربيات الجيران ويهوهو علي اللي يخاف منه من الجيران(اعتقد ده بسبب انه شاف امه واخواته الصغيرين اتسمو وماتوا فلحظة من شويه جيران ربنا يحاسبهم بما يستحقوا اتعقد بقي )وكانوا عايزين يمشوه من المنطقة وبيكلموا البواب يمشوه واحنا فالعمارة كسكان عادي مكناش عايزين نمشيه وهددوا البواب يسموه حسبي الله ونعم الوكيل فيهم بجد عارف انت لما يكون البني آدم عايش بهواه ومزاجه ومفيش دين ولا شرع يحكموه واتسم فعلا معرفش من جيران ولا ايه وقعد 3 ايام بيموت ويتشنج وانا جبت مواصفات ادوية اديهاله بس معرفتش امسكه لأنه كان بيجري اه صحيح كان بيخاف من المياه الكلب ده ومات ومشفتش جثته دورت عليه فالمنطقة ملقيتوش ,,,بص بقه الوفاء فين اتصاحب علي كلاب فالشارع وراح قعد معاهم شهر كده ولا شهرين وسابهم ورجع كمل مع البواب صاحبه عادي وكان ملازمة فكل مكان يروحه يجيب منه طلبات للعمارة,,,, سكرين باشا لو اتعاملت مباشر مع الكلاب القرف منهم هيروح انا كنت بخاف منهم لغاية مااتعاملت معاهم وفاء وصدق وحب واخلاص يعني كتير نسمع صاحب الكلب يموت الكلب يكتئب ويضرب عن الطعام يقعدله اسبوع ويموت وحصلت كتير في مصر صدق الله حين قال "وَمَا مِن دَابَّةٍ فِي الْأَرْضِ وَلَا طَائِرٍ يَطِيرُ بِجَنَاحَيْهِ إِلَّا أُمَمٌ أَمْثَالُكُم مَّا فَرَّطْنَا فِي الْكِتَابِ مِن شَيْءٍ ثُمَّ إِلَىٰ رَبِّهِمْ يُحْشَرُونَ "

[me_medoo]

صدق الله العظيم ... فعلاً معاك حق ياباشا ... في ناس لاتقدر قيمة الروح الي في المخلوقات ومدى وفاء الكلاب ، والي سمو الكلاب دول ربنا ما هيكسبهم أبداً وذنب الكلاب دي في رقبتهم .

أنتو عارفين أن حل مشكلة الكلاب الي بتنط فوق سقف العربيات ، حلها كام عضمة ولا بواقي أكل ترمهملوو ... انا عامل كده لأن كتير بركن عربيتي بره البيت وخليت الكلاب البلدي توقف طول الليل تحرس عربيتي ... وحتى الصبح وميخلوش ولا عيل ولا قطه ولا كلب يسند حتى على العربية ... كلو بالتدريب ياريس ... الكلاب ذكية جداً بس محتاج حد يفهمهم بشويش وبراحة كانك بتعلم طفل او بتدرب طفل .


زمان انا كنت بخاف من الكلاب أيام ما كنت لسه شب صغير ... وكنا ساكنين في مكان يعتبر صحره وحته مقطوعه والغفير كان مربي كلبة جربانة وعرجة أسمها (فلة ) كنت بقرف وبخاف منها جداً ... لغايت مافي يوم من الايام ... حطيتلها بقايا أكل وطبخ وكلتهم .


ولقيتها بقت تستناني كل يوم واانا اشخط فيها واقلولها رووووووووووووحي أبعدي عني أيه القرف ده ... لمره في يوم كنت قاعد بالليل بغسل عربيت الحج قدام البيت وسرب كلاب مسعورة جي يجري عليا وعاوز يهاجمني معرفش ان كانو كلاب ولا ديابة ... لأن مفيش فرق بين الكلب المصري والديب المصري ..


ولقيتلك فولة الجربانه جية جري عليا وهيا بتصرخ وبتهو هو ... وقبل مالكلب جي يعوضني لقيتها رمت جتتها بيني وبين الكلب المسعور ... أو الديب المسعور ... ورحت انا استغليت الفرصة بسرعة ودخلت البيت جري وقفلت باب الحديد ورايا ... وقاعدت أشوفهم وهما بيستفرطو فيها وبيهبشوها من كل حته ..


حاولت اسعدها وارمي اي زلط او طوب على الكلاب علشان تمشي لكن مشيو بعد فوات الاوان ... قعدت فلة ياعيني تطلع في الروح بعديها ... بيومين وبقيت أروح أزروها واحاول اجبلها أكل وبقة قلبي بيتقطع وانا بشوفها بتموت قدامي ... وبسئلها بعنيا وبقلوها طب ليه دافعتي عني لييييييييييييييييه ... وانا الي كنت بقرف منك وبشخط فيكي وبقولك غوري من هنا ... وكنت بهشك بأي حجر أو بأي لوح خشب وأقول هشششششش من هنا .. تقومي أنتي تضحي بحياتك علشاني ... أنا مستهلش بجد ألي عملتيه علشاني ... لغايت مالمسكينة ماتت بعد عذاب من ورى جروحها وألامها ..

ومن ساعتها وانا بقيت أحـــب الكلاب وأهواهم ... وأعشقهم كمان .
وأقسم بالله العظيم أقسم بالله العظيم وشـرف وحيات عيالي الي مابحلف بيهم كذب أبداً أن قصة فلة دي واقعية وحقيقية 100% .

رحمة الله عليكي يا فلة .

[hany63]

فعلاياباشا اللي ميعرفش يقول عدس
المخلوق الوحيد اللي تلقاه يحبك بدون مقابل وياريت كانت البني ادمين كلها في نفس درجة الوفاء
هاحكيلكم على موقف عملته الكلبه اللي عندنا
احنا جبناها و هي صغيره من الوسيط (جريفون) و بعدين مراتي زهقت عشان كانت بتوسخ الشقه و لسه مش عارفين نعودها على نفس المكان المهم مراتي رغم انها بتحبها جدا قررت تمشيها بأي طريقه و اتفقت مع اختها تديهالها عشان عندها ذكر نفس الفصيله
المهم بنتي الصغيره قعدت تعيط بحرقه و الغريب اني لقيت توفي (وده اسمها) زي ماتكون فاهمه انها ماشيه و بأمانه لقيت عنيها كلها حزن و منزله راسها
المهم دخلنا ننام و مراتي اصرت ان توفي تنام في الطرقه لوحدها و قفلتا ابواب اود النوم عشان ماتدخلش
و حوالي الساعه 3 صباحا صحيت على صوتها و هي بتهوهو متواصل انا قلت تلاقيها سمعت صوت على السلم و هتسكت انما مافبش فايده قلت يا واد استعبط لحد ما المدام تصحى تسكتها برضه ما فيش فايده قلت مابدهاش قوم ياواد سكتها بدل ما تصحي الشارع
قمت فاتح باب الاوده و شخطت فيها لقيتها مذعوره و بتجري على الاوده بسرعة الصاروخ
بصيت لقيت زي مايكون نور شمع خارج من المطبخ اتاري المطبخ بيولع و الدخان مالي الشقه
صرخت في مراتي و طفينا النار
اتاري سخان الميه الكهربا حصل فيه قفله و عمل ماس و ولع و النار كانت ابتدت توصل لخشب المطبخ
و الحمد لله الموضوع عدى على خير و قعدت اتخيل لو توفي كانت مشيت قبلها بيوم زي ماكنا متفقين و الميعاد اتأجل كان هيحصل ايه اكيد الدنيا كانت هتولع و احنا قافلين الاود ولا حاسين بحاجه لحد ما موتنا لولا ستر ربنا
طبعا لغينا فكره انها تمشي و دربناها كويس و بقى لها سنتين بعد الموقف ده

[Screenplays]

انا شوفت الفيديو

انت بتعذبهم و لا بتلعب معاهم ؟ يسيبوهم يرضعوا براحتهم يا اخي ههههههه

[akramlail]

انتو فتحتو نفسى يا جماعة اربى كلب
تنصحونى با اية وسعرة كام

[Donzi]

بسم الله ما شاء الله

شكلهم حلو جدا و هما نونو كدا ربنا يباركلك فيهم

انا بحب الجولدن ريتريفر مالكش فيه دا ؟؟

[Donzi]

بسم الله ماشاء الله وربنا يباركلك فيهم (ويحفظهم من عيييييييييين) !
بس اى رخااااااااااامة اللى انت فية دى ماتسيب رجااااااالة ترضع فى امانة الله عماااااال تزقهم وتجيبهم يمين وشمااال (هتلاقى وااحد منهم هيقولك ارحم امى وسابنى اشفط شفطة بمزااج بقى ) ,, بس مش تربيهتم فى البيت بتمنع ملائكة ولا اى ؟!
اناااااااااااا بقى من هوااة تربية شيرازيااااات

انا جيبت قطة جديدة شيرازي بردو بس خنيقة مش ظريفة زي اللي الرومي اللي قبلها

[hany63]

انتو فتحتو نفسى يا جماعة اربى كلب
تنصحونى با اية وسعرة كام

هو طبعا لو حضرتك ساكن في شقه يبقى الجريفون احسن و ارخص خيار و كلاب عشريه و بتحب تلعب و ياسلام لو فيه اطفال هيتسلوا بس المهم ربه المنزل تكون صبوره في الاول
و طبعا فيه انواع صغيره كتير لدرجة ان فيه كلاب بتتحط في شنط السيدات بس ادفع
اما لو بيت بجنينه ممكن رود فايلر و ميني كوبر يدلك احسن مني

[hany63]

نسيت اقول لك ان الجريفون تمنه 300 جنيه اصلي مش مخلط عنده شهر و نص

[akramlail]

لا انا فبيت وعاوزة حراسة كمان ولية كزا مكان عندى ف السطح او تحت ع السلم وفعلا محتاجة
بس معنديش خبرة واخاف اشترى يضحك عليا

[hany63]

لا انا فبيت وعاوزة حراسة كمان ولية كزا مكان عندى ف السطح او تحت ع السلم وفعلا محتاجة
بس معنديش خبرة واخاف اشترى يضحك عليا

يبقى حضرتك محتاج كلب حراسه مدرب شراسه ياريت نسمع رأي الزملاء

[moody_687]

بسم الله ماشاء الله
شكلك ناوي تغلط غلط عمرك اياك تربي الصغيرين شوفلك بيعة مش تعمل زي اخوك الصغير انا مربي قطط عندى وكانوا 15 قطة ووزعت منهم وهما صغيرين وفضلي منهم 5 حاليا كبروا عندى والله عندي ذكرين هاريين بعضهم عراك وبيكون بالدم وبضطر انى افصلهم عن بعض ومحتاس بيهم كل ده بسبب الاناث وصراع الزعامة وف نفس الوقت مش قادر انزلهم الشارع هيتبهدلوا

[Amr Axel]

بسم الله ما شاء الله

ايه يا حج ينفع الكلام ده تبقي غاوي زي حالاتي و متقولش طب حتي عيب

اخوك غاوي تربية كلاب من و هو عنده 6 سنين ههههههههه اول كلب ربيته كان دوبر مان و مليش غير في الانواع التقيلة شوية يعني جيرمن - دوبر - روت - بوكسر انما الخفيف اللي زي ده مليش فيه
حتي الكلاب البلدي مربيهم في الشارع حوالين العمارة و في الباركينج و محدش من الناس بيتكلم عشان هم نفسهم خايفين ع عربياتهم و يقولك يعملوا منظر ههههههه

و شوف واحد منهم عمل ايه من فترة قريبة

http://www.nilemotors.net/Nile/266735-a.html

و كانوا عاملين أحلي اداء ايام اللجان الشعبية ههههههه اي عربية او شخص غريب عن المنطقة يجي يطلعوا يجروا وراه لحد ما يسففوه التراب او اندهلهم هههههههههههههه

[akramlail]

وياريت لو حد يعرف خبير ف اسكندرية يفيدنى

[SHNORY]

وياريت لو حد يعرف خبير ف اسكندرية يفيدنى

فيه واحد صاحبي بيربي كلاب وبيتاجر فيهم
بس ماركات مأصله وغاليين اوي
لو عاوز قولي ابعتلك نمرته