حد ينصحنى انا محتار اوى بين وظفتين (مهندس ولا معيد)

[mr_safwt]

السلام عليكم ورحمة الله وبركاتة
بصوا يا جماعة انا مهندس اتصالات متخرج بتقدير عالى وكنت من الاوائل على الدفعة
والحمد لله دخلت جيش وخلصتة واشتغلت فى شركة كبيرة
المشكلة دلوقتى انى جايلى وظيفة معيد فى احدى الجامعات الاجنبية فى مصر وتقريبا نفس المرتب اللى باخدة دلوقتى
المشكلة انى مرتاح فى الشركة اللى انا فيها وحاسس انى مش هقدر ادرس لحد او ارجع اذاكر معادلات رياضية ومواد هندسية كلها رياضة بطريقة غبية واللى فى كلية هندسة عارف الدراسة الاكاديمية عاملة ازاى وحبيت شغل المشروعات والبزنس اكتر من الدراسة الاكاديمية
بس بردة معيد فى جامعة اجنبية حاجة مش قليلة حد يقولى اعمل اية
انا محتار جدااااااااااااا

[mazagngi2010]

كل مكان وله قرفه المشكله ببساطه محدش عارف المستقبل مخبي له ايه
خليك فى الشركه احسن على الاقل عالم تانى فى التعاملات مع الناس والخبره فى الحياه بدل الارقام والمعادلات

[م.احمد زكريا]

اختيار صعب بصراحة

من بعيد كدة

المعيد : سلك جامعي ومكانة اجتماعية محترمة ومستقبل محترم جدا اجتماعيا وماديا

المهندس: ممكن يكون خبرة عملية اكتر ممكن فلوس اكتر في الاول بس حرية في الحركة دون التقيد بدراسات عليا

شوف كل يوم قبل ما تنام صلي صلاة إستخارة

وربنا يوفقك

[حماده المصري]

هو انا مش مهندس بس السلم الاكاديمي معروف معيد في مساعد ف مش عارف ايه ف استاذ والخ الخ الخ

ف انت لو هتعمل الموضوع ده تسيب الشركه وتفضل في الكليه ووتشوف كليات تانيه بس ساعتها لازم تعمل ماجستير ف دكتوراه وتتجه للتدريس المطلع وانا شايف مقرف بصراحه

افضل شيء انك تكمل في الشركه وتكبر نفسك وممكن تفتح شركه لنفسك وبعدين تعمل الماجستير مستريح وممكن في يوم من الايام تبقى بتدرس ماده او اتنين في جامعه بس مش ملزم بيها طول وقتك

[mohamedbook]

والله استخير ربنا
فعلا حاجة محيرة

[Inteltech]

اخي الكريم رأيي باختصار وانا مهندس واخترت الشركات لو حضرتك بتدور مكانة اجتماعية ودرجة علمية اكثر طبعا هتروح للشغل الاكاديمي بدون كلام مع الرغم من مشاكله الكثيرة بس برستيج وشغل عالي واهم حاجة هتفضل دايما على اطلاع دائم ومعرفة لكل جديد انا بفتكر لما كنت بدرس هندسة كان الدكتور يقولنا لو معلوماتكم عن التكنولوجيا تقادمت عن سنة متبقوش مهندسين ... والله كان عنده حق
بس لو حضرتك عايز بزنس واعمال وفلوس وراحة من وجع القلب يبقى الشركات وخلاص كده وده هتلاحظ بعد فترة انه هيبتدي يقلل من عندك معلومات كثيرة ويكسبك برضو حجات جديدة بس مش علمية قد ما هي حسب طبيعة الشغل اللي حضرتك فيه
وصلي استخارة وشوف ربنا يهديك لايه
تحياتي

[blazer]

انا متخرج السنه دى وبرده شغال فى شركه واحتمال يجى لى فرصه فى جامعه انى ابقى معيد فيها " انا خريج فنون تطبيقيه "


المعيد افضل فى كذا نقطه
وهى انك صحيح هتسيب الشركه بتعتك بس دا هيكون مثلا انك اخدت فيها خبره سنه
هتبتدى فى الجامعه وتعمل ماجستير
وممكن وقتها تاخد كورسات لغات جديده المانى او اسبانى مثلا
وممكن كمان تاخد كورسات برامج جمبيوتر متخصصه فى مجالك او اى كورسات لشغلك
فى خلال سنتين او ثلاته هتلاقى نفسك معاك ماجستير و كورسات كتير محترمه
وممكن يجيلك وقتها شغل بمرتب كبير جدا
ما شاء الله السنه اللى انا اتخرجت فيها دكتور كان عندنا سافر الامارات او السعوديه مش فاكر كان مرتبه ما يعادل 100 الف جنيه مصر

[htkamal]

من واقع تجربه شخصية

ياباشهندس من واقع تجربتى من حيث انى شغال فى جامعة خاصة نظرا لان مفهوم التعليم الخاص اصبح انه بيتعلم على ان الطالب زبون والزبون على حق فالعمل فى شركه افضل بكتير من العمل فى التعليم وبعدين الشركه بتلاقى نفسك بتتعامل مع اشخاص بيفهموا كويس وفى جو وفى تطوير اما بالنسبه للشغل كمعيد او حتى دكتور حتلاقى نفسك بتتعامل مع نوعيات من الطلبه كلنا عارفين هما دخلوا الجامعه الخاصة ليه علشان شهادة لا اكثر ولا اقل والقرار فى ايدك لو غاوى دراسه يبقى عليك وعلى شغلانه المعيد لانك حتفضل مبروط فى سلك الدراسه لغايه ما تاخد الدكتوراة

[mailo]

لو عرف تشتغل فالجامعة part time يبقى تمام قوي

بس خد بالك وإنت معيد بـتذاكر دايما الجديد وتشوف الابحاث لازم يبقى ليك جانب عملي عشان يعليك عن غيرك

وإنت مهندس إنك تعرف دايما الجديد وتتابعه هيفيدك قوي برده عشان تعرف تعلى في مكانك

وفي كل الحالات لازم تعمل ابحاث ودراسات عليا

[ainshouka]

ياباشهندس من واقع تجربتى من حيث انى شغال فى جامعة خاصة نظرا لان مفهوم التعليم الخاص اصبح انه بيتعلم على ان الطالب زبون والزبون على حق فالعمل فى شركه افضل بكتير من العمل فى التعليم وبعدين الشركه بتلاقى نفسك بتتعامل مع اشخاص بيفهموا كويس وفى جو وفى تطوير اما بالنسبه للشغل كمعيد او حتى دكتور حتلاقى نفسك بتتعامل مع نوعيات من الطلبه كلنا عارفين هما دخلوا الجامعه الخاصة ليه علشان شهادة لا اكثر ولا اقل والقرار فى ايدك لو غاوى دراسه يبقى عليك وعلى شغلانه المعيد لانك حتفضل مبروط فى سلك الدراسه لغايه ما تاخد الدكتوراة

++11111111111111
كلام تمام وعن تجربة
لا برستيج ولاهباب
خليك في شغلك احسن علي الأقل حواليك ناس بتفهم

[mr_safwt]

انا متشكر ليكوا اوى يا جماعة انتوا فعلا خير ناصح
انا فعلا قررت انى اكمل فى الشركة ان شاء الله لان ناس كتير فعلا قالولى ان التدريس فى الجامعات الخاصة سىء جدا
والطالب هو رقم 1 فى الجامعة لانه هو اللى بيدفع
زائد ان الدراسات العليا هتبقى على حسابى انا مش على حساب الجامعة لانك بالنسبة له موظف بعقد مش هيصرف عليك ماجستير وخلافة دة لو وفرلك وقت اصلا انك تذاكر هو اهم حاجة عندة انك تملى فراغ وخلاص مش فارق معاة تعمل ابحاث ولالا

[Land_Cruiser]

انا اتعرضت لنفس موقف حضرتك و فى الاخر اخترت الشركه لعده اسباب :-
- المرتب
- الخبره العمليه
- الترقيات و سهوله الانتقال لشركات اكبر بمرتب اكبر و تنوع مجال الخبرات

و بعدين لو مرتبك كويس او حتى شغلك ممكن يكون بيساعدك فى مصاريف الدراسات العليا فتقدر تعملها و انت شغال فى الشركه برضه و بكده تبقى خدت مزايا الاتنين حتى لو تعبت شويه مش اشكال انت كده بتبنى مستقبلك

مشكله الجامعات الاجنبيه ان مرتبها تعبان ( ممكن يكون قد الشركه الان لكن سنه و لا اتنين و هتلاقى الشركه مرتبها فرق جامد) و مش هتديلك مزايا كونك معيد فيها لانهم هيشغلوك للحد الأقصى و ممكن ما تلاقيش و قت تذاكر بالاضافه الى انك مع الوقت هتنسى العملى و هيبقى صعب تسيب مجال الجامعه لو غيرت رأيك لاحقا و بالتوفيق

[hugan]

بغض النظر عن الماده ومين افضل كدخل
استاذ جامعي ولا مهندس
انت حابب ايه وميال لايه

صدقني اي اختيار هايكون افضل لو انت حابه
واكيد هاتبدع فيه وتحقق مركز متميز فيه

[shaddadfalcon1]

لو انت مرتاح ماديا وعندك شقتك وعربيتك وبتحب التدريس ومستعد تفضل طول عمرك تذاكر بالعافيه يبقي معيد
لو عايز تبقي حر نفسك ومتحبش دلع الطلبه وغباء البعض منهم لاننا كنا طلبه برده وعارفين بنعمل ايه في المعيدين لما نبقي مش فاهمين يبقي خليك في شغلك في الشركه علي لأقل هتذداد خبره في حياتك العمليه والعلميه برده

زميل ليا كان معيد برده وبعد 3 سنين اتخنق وسابها واشتغل في شركه

[زهير فكري]

السلام عليكم ورحمة الله وبركاتة
بصوا يا جماعة انا مهندس اتصالات متخرج بتقدير عالى وكنت من الاوائل على الدفعة
والحمد لله دخلت جيش وخلصتة واشتغلت فى شركة كبيرة
المشكلة دلوقتى انى جايلى وظيفة معيد فى احدى الجامعات الاجنبية فى مصر وتقريبا نفس المرتب اللى باخدة دلوقتى
المشكلة انى مرتاح فى الشركة اللى انا فيها وحاسس انى مش هقدر ادرس لحد او ارجع اذاكر معادلات رياضية ومواد هندسية كلها رياضة بطريقة غبية واللى فى كلية هندسة عارف الدراسة الاكاديمية عاملة ازاى وحبيت شغل المشروعات والبزنس اكتر من الدراسة الاكاديمية
بس بردة معيد فى جامعة اجنبية حاجة مش قليلة حد يقولى اعمل اية
انا محتار جدااااااااااااا

شوف يا باشا ... لو انت غاوي علم و غاوي معامل وابحاث و بتحب التدريس و عندك القدره علي الشرح وتوصيل المعلومه يبقي سلك التدريس افضل مع مراعاه ان الحصاد مش هيبقي في الأول بمعني ان فرصه حصولك علي مناصب مرموقه سواء محليه او دوليه هتبقي اكبر بعد حصولك علي الأستاذيه مثلا و لو انت غاوي سفر و اخدت فرصه التدريس في احد الجامعات العالميه , يبقي احسن واحسن سواء ماديا او ادبيا ,.... يعني طريق محتاج شويه صبر بس نتائجه و فرصه في الحياه افضل .... اما الشركات لو انت شغال (multinational vendor) , سواء presales او after طبعا علي اساس انك مهندس , المرتب والبدلات هتبقي اكبر من المعيد بس الـ multi national ما لوش امان , و طبعا مميزاته في الترقي تتوقف علي اجتهادك و فرصتك علي الاطلاع علي الجديد من ناحيه المشروعات او التسويق هتبقي افضل بس ليها حدود , و طبعا اكيد حضرتك عارف ان المالتيناشونال او اي شركه بتبقي وظائف المبيعات او خدمه الجمهور هي نمره واحد و فرصه انك لما تاخد دورات زي mba مثلا و عندك قدرات قياديه ممكن تمسك regional managerمثلا .... بالتوفيق .